8
ក៝នឞែឞ្យាប់ព្លោកត្រាត៝ល់ពើស
1 ត៝ត់ក៝នឞែឞ្យាប់ព្លោកត្រាត៝ល់ពើស ទោមាតាកាលើត្រោកអីនតុកកោរាញឞ្រាសនើមមោហោមតាង់នតែសដែរែងក្វៃក្លាប់លាសគែសងគូលម៝ង។
2 ជេសរីគ៝ប់ឆៃពើសនុយ្សតោងពារ់អីទ៝ក់ឞើសនាប់កោរាញឞ្រាសរីនឹង ឞូអ៝ន់ពើសអឹនុងមាខាន់ពាង់ដ៝ង់។
3 គែសដ៝ង់ទូហ្វេតោងពារ់វាច់ទ៝ក់តាញឆឺងជានឞ្រាសរី នអ៝ប់មាញអោតទូមល៝ម់ខាល់មាយ្ស។ ឞូអ៝ន់មាពាង់នទើបោកាសអ៝ក់ងាន់មាគុច គៃមាគុចញហើរ នទ្រែលមានាវមឞើសឆើមផូងប៝នលានកោរាញឞ្រាសតាកាលើញឆឺងជានឞ្រាសមាយ្សអីឞើសនាប់រានើលកាដាច់នៃ។
4 ជេសរីនហោលនទើបោកាស នទ្រែលមានាវមឞើសឆើមផូងប៝នលានកោរាញឞ្រាសលោសឞើសតីតោងពារ់ហាវជឹតលើឞើសនាប់កោរាញឞ្រាសនៃ។
5 ជេសនៃតោងពារ់អីនៃឆ៝ៈខាល់អីនៃ ឆ៝ៈអុញឞើសញឆឺងជានឞ្រាសតេៈឞេងខាល់ ជេសរីនតុបព្រូតានែសនតូ គែសងលាយ្ស នតែសនត៝រ់មីស លើបងលាយ្ស នអ៝ប់មាងគើនែសនតូដ៝ង់។
ពើសអឹនុង
6 ជេសរីពើសនុយ្សតោងពារ់អីនអ៝ប់មាញអោតពើសអឹនុងអីនៃ នទ្រាប់អោស។
7 តោងពារ់ត៝ល់ង្វាយអោសនុងពាង់នើម ទោមាគែសព្លែរ នទ្រែលមាអុញព៝តលាយដាសមហាម ឞូនតុបព្រូតានែសនតូ។ នែសនតូអុញឆាលែៈទូកោៈតឹមពែ(១/៣) តើមឆីអុញឆាលែៈទូកោៈតឹមពែ(១/៣) នអ៝ប់មាទឹងលែៈរេបជានអឹរអុញឆាលែៈផ្យៅដ៝ង់។
8 តោងពារ់ត៝ល់ឞារអោសនុងពាង់នើម ទោមាគែសតឹមឞានមាទូមល៝ម់យោកទុតក្វ៝ង់ហីតអុញទាទេ ឞូនតុបតាងក្លាងទាកវាច់ទាកវារ់ ទាកវាច់ទាកវារ់អីនៃទូនតុកតឹមពែ(១/៣)ជេងមហាម
9 ជេសរីទឹងលែៈកឹតកាមពោមពា(ឆ្យុម)អីគុរេសតាទាកវាច់ទាកវារ់អាប់ពែអឹខឹតទូមល៝ម់ ជេសរីទូករ៝ៈទាកវាច់ទាកវារ់អាប់ពែលើសហេងទូមល៝ម់ដ៝ង់។
10 តោងពារ់ត៝ល់ពែអោសនុងពាង់នើម ទោមាគែសទូមល៝ម់មាញ់ក្វ៝ង់ ហីតអុញតឹមឞានមាអុញរាទ៝តុបឞើសលើត្រោកតី។ មាញ់អីនៃតុបគែសតាទាករាលាយទឹងលែៈទូកោៈតឹមពែ(១/៣) នទ្រែលមាតុបតាទឹងលែៈតូទាកទូកោៈតឹមពែ(១/៣)ដ៝ង់។
11 រាញាមាញ់អីនៃ«ព្លៃមពាត់» ទាកទូកោៈតឹមពែ(១/៣)ជេងតាង់ខេស គែសអ៝ក់ឞូនុយ្សខឹតយ៝រមាញេតទាកតាង់អីនៃ។
12 តោងពារ់ត៝ល់ព្វាន់អោសនុងពាង់នើម ទោមាគែសនារ ខៃ នទ្រែលមាមាញ់ជេងង៝ទឹងលែៈទូកោៈតឹមពែ(១/៣) នោកនារគែសង៝ទូកោៈតឹមពែ(១/៣) នោកមាង់មោហោមគែសនទើអាងទូកោៈតឹមពែ(១/៣)ដ៝ង់។
13 ជេសរីគ៝ប់អ្វាញ់ឆៃទូមល៝ម់ក្លាងមឞូកមឞ៝កមពារ់កាលើត្រោក នអ៝ប់មាតាង់ពាង់នតែរទុតទាង់ៗ៖ “រេសរាញាល់ងាន់! រេសរាញាល់ងាន់! ទឹងលែៈឞូនុយ្សតានែសនតូមរារេសរាញាល់ងាន់ យ៝រមាហោមតាង់នតែសនុងពែនុយ្សតោងពារ់ជឹតអីលែៈនតើមនទ្រាប់អោស!”