Kayëte Wapuyala ŋa
Wade yehëhna hnë iŋi kayëte
Hnë aŋi kayëte W̃ënu ŋa njëtëndanëka ale herëk a, mpëdara Afaƴik San, viỹë vile rëfëka tëki ryënkwëhniɗ iɓoka Këris. Kerik yëbëlan bëhn wafëhw imbëɗ gë wahi gë bëhn wafëhw imbëɗ gë wahnah g'imbëɗ (70 gë 95) ga ndëcëk nagi Yesu ỹa hnë wati nte korotehnëɗeho cery sali ŋa.
Aŋi kayëte nësëɗ viỹi viyaɓah vile fëhnëtanëk viỹë vihaw̃ary soŋe ɓulunda wasëwif. Mbëɗ gë wahi fëhnëtanëk ile fadëk ỹa. Ñëmp yah ỹa fëhnëtanëk imëk iŋa do fëna ufacah w̃a. Nkol Babilon ŋa fëhnëtanëk Rom; hnë vaŋi vankol nke ucankaf meh.
Kayëte ŋa pëgwëhnanik gë wanës soŋe vacery sali mbëɗ gë vaki hnë vacery sali vambë Asi hna. Ile rëfika ỹa kayëte hna, San njojik ambin hna hn'ile nuk toƴe fo ile liyaɗ ỹa hnë wapuyala ɗuniỹa li ante mbokajëɗ Yesu ŋa: ɗuniỹa ỹi përëkanëɗe, Sintani ỹa këfëɗe, kitiŋ tëkwa ŋa nkeɗ, do Yesu ntañaɗ tinki ahnaw̃ hnë Yerusalem kasëk hna.
Wëlin wanës wakwëhn nafa hn'iŋi kayëte: mëleka, ahnaw̃, kayëte, fape, hwëɗëh, ambin, kopa, uwám.
Wëlin gante nke kayëte ka:
Simpaỹi (1.1-8)
Yesu cahnanika San (1.9-20)
Kayëte soŋe vële hwëtahnëk ye hnë vankol mbëɗ gë wahi hna (2.1–3.22)
Icëmb ŋa ambin hna (4.1-11)
Fape fa gë kayëte nte ỹamëndëlehnik wahwënta imbëɗ gë wahi (5.1–8.2)
Walënkw mbëɗ gë wahi gë wahitiŋ walëw̃ hni (8.3–11.19)
Vëỹew̃ W̃ën mëkëɗen (12.1–14.20)
Wamëleka mbëɗ gë wahi gë wëkata w̃a (15.1–16.21)
Iƴo Babilon (17.1–18.24)
Imëk gë kitiŋ tëkwa (19.1–21.8)
Yerusalem kasëk (21.9–22.21)
1
Uyëtëndan: ile njëtëndanëka W̃ënu ŋa San
1 Hn'aŋi kayëte nke viỹë vile cow̃ëtëk Yesu Këris. W̃ënu ŋa njëɗakawo soŋe njëtëndanëhni vëyohal vëlëw̃u va vile rëfëka tëki hara ɓiỹëna ỹa. Këris ỹa paƴëkawo mëleka lëw̃u ỹa ỹal mën, ami San ayohal alëw̃u, soŋe njëtëndano virac.
2 Seɗe yeɓu hnë fop vile hnuɓuho: rac ye wanës W̃ën g'uceɗeya Yesu Këris ŋa.
3 Ndëwayik ale haraŋëhnëɗëhëhni vahnë wanës wante kerëhnëko W̃ënu ŋa hn'aŋi kayëte do ndëwayini vële w̃ëryëɗ va do hwëtaɗ wante herik ŋa! Ƴëtëryin, wati le hahnëndik soŋe waŋi fop ŋa tëhajëk.
Simpaỹi le kerëhnini vacery sali Asi
4 Ami San herëhnëryiɗëhu, w̃uhnë vacery sali mbëɗ gë vaki vambë Asi vi. Araɓi ipërëna w̃a gë ƴam ỹa ahnuỹaw̃u hnë W̃ën hna, umë ale ye, yeho do yijëɗ, hnë wayir mbëɗ gë wahi hna wale ye haryënkw hnë tinki naw̃ ntëw̃u hna,
5 do fëna hnë Yesu Këris hna, seɗe hahnëndak ỹa, ale ryënkwik vëhnëndehnik hnë vësëm hna do ye ahnaw̃ vëhnaw̃ ỹa nkal li fop! Umë ale ỹahnëkëfu do fehëtëkëfu hnë wameh fu hna gë sat lëw̃u ỹa,
6 ntikëfu inaw̃ vësëna wasaɗëha soŋe ndokuŋëhnëndenëhna W̃ënu ŋa, Rëmu. Araɓi kwëhn icëmb iŋa gë fanka fa kwëlëkwël! Amina.
7 Ƴëkëryin, vëŋar hna njijëɗ! Vahnë va fop nuɗëniha, wëla vële sëhëka va; do fop waɓulunda waɓë nkal ŋi njahnaɗëni soŋe lëw̃u ỹa. Ha! Amina!
8 Ahwëhn a W̃ënu ŋa ntehnëk: «Ami ye Alëfa gë Omega, Aryënkwëryënkw a gë Arëkwa ỹa, ale ye, yeho do yijëɗ, Ahwëhn Fanka Fop.»
Huɗakery San soŋe Ajë Ahnë
9 Ami San, aỹënta hun yeɓu; mbankinëk had w̃uhnë gë Yesu hnë horot hna, hn'imëk hna do hn'iɗuñëna hna. Ntayiɓuho hnë tinti mbë wov le w̃acik Patëmos hna, kaɓi pëƴahnëɗëfuho wanës W̃ënu ŋa do seɗe yeɓuho wëɓa Yesu.
10 Hnë fac Ahwëhn hna, Iƴir Ipacah ŋa tënkëkow̃o do hamëhni mën nkwëryëɓu kopa sankaf had lënkw,
11 më lehnëɗëho: «Kerëry hnë kayëte ile hnuɗu ỹa, do ƴëɗanahnëryihni vacery sali mbëɗ gë vaki vante ye hnë: Efes, Sëmirën, Perëgam, Tiyatir, Sarëdes, Filadelëfi do Lawodise.»
12 Njëkaɗëfuho soŋe hnuw̃uw̃a ale hnësëndëhow̃o ỹa. Ga njëkaɓu, më hnuɓu wayul wasanu mbëɗ gë wahi wakwëhn walampu,
13 do fagant wayul walampu warac, kahnëko ile mëntëlëni g'ahnë. Acuɗ cankaf nte rëkëkaw̃o hafo wapary hna cuɗako do ñëba ryil yankah sanu sakahn lëw̃u hna.
14 Njerëkaw̃o mul iŋa had perëkal. Vinkër va had hwëɗëh pëtëɗëhawo,
15 wapary ŋa had ryëhwëra vëntëvënt facënik hnë hwëɗëh nkehawo do kopa lëw̃u ỹa had uw̃ac w̃ënka wov ñënkaɗëhawo.
16 Hnë vák rëhw lëw̃u hna, wahol mbëɗ gë wahi mënkwëko. W̃ës lëw̃u hna sëlame ỹakënik hwëhn waŋëkan waki sahnëɗëho, do yëka lëw̃u ỹa ntancëko had ulav g'anent.
17 Ga nuɓuha, njoɓuho haryënkw lëw̃u had cëmëɓu. Më tindëko vák rëhw lëw̃u ỹa do ntehno: «Antë ntaki! Ami ye Aryënkwëryënkw a gë Arëkwa ỹa,
18 Ale yënëɗ a. Cëmëɓuho, do wëli tame ale yënëɗ kwëlëkwël yeɓu. Visëɗëta icëm va w̃ënkëɓu do gë viva ỹëw̃a vësëm ỹa.
19 «Awa kerëry vile hnuru va: vile ye gaki va do vile yejëk va.
20 Wëli ile pëhnëtanëk wahol mbëɗ gë wahi wale hnuru hnë vák rëhw mën ỹi do gë wayul sanu mbëɗ gë wahi wahwëhn walampu: wahol mbëɗ gë wahi w̃i wamëleka vacery sali mbëɗ gë vaki vi ye, do gë wayul mbëɗ gë wahi wahwëhn lampu w̃a, vacery sali mbëɗ gë vaki vi ye.»