7
Ɓulunda gë yavëta W̃ën
1 Ga ndëcëk rac, më hnuɓuhëhni wamëleka wanah ga kahnëni hnë wahëɗ wahnah wavë nkal w̃i. Pëlani wasël wahnah wavë nkal w̃i, soŋe sël ỹa antë mbok cël nkal li, wov hna do fëna wëla hnë atëh ndampo.
2 Do më hnuɓuha mëleka haw̃ary ga kaƴëɗ gë cape pëhna lav. Mënkwëko ile lihande iyavëta mba W̃ën paryi. Ndekandëhëhni ɗus wamëleka wanah wante yëɗayiko imëk mbëvehnëni nkal iŋi gë wov ỹi:
3 «Antë avëvehnu nkal iŋi, wov ỹi, vatëh vi, hafo lifuni yavëta wayëka hna vëyohal W̃ën va.»
4 Tac nkwëryëɓu vahnë vële hnuỹak yavëta ỹa tëkëni wawuli keme gë wafëhw wahnah gë vënah (144,000). Vëhni wahnënk vijë Isërayel hna fop matiniho:
5 hnë hnënk Yuɗa hna: vahnë wawuli pëhw gë vëhi (12,000) liyiko yavëta ỹa;
hnë hnënk Riben hna: vahnë wawuli pëhw gë vëhi (12,000);
hnë hnënk Gad hna: vahnë wawuli pëhw gë vëhi (12,000);
6 hnë hnënk Aser hna, vahnë wawuli pëhw gë vëhi (12,000);
hnë hnënk Nefëtali hna, vahnë wawuli pëhw gë vëhi (12,000);
hnë hnënk Manase hna, vahnë wawuli pëhw gë vëhi (12,000);
7 hnë hnënk Simeỹo hna, vahnë wawuli pëhw gë vëhi (12,000);
hnë hnënk Levi hna, vahnë wawuli pëhw gë vëhi (12,000);
hnë hnënk Isakar hna, vahnë wawuli pëhw gë vëhi (12,000);
8 hnë hnënk Sabilon hna, vahnë wawuli pëhw gë vëhi (12,000);
hnë hnënk Yosef hna, vahnë wawuli pëhw gë vëhi (12,000);
hnë hnënk Besame hna, vahnë wawuli pëhw gë vëhi ntiyiniho yavëta (12,000).
Waɓulunda mbin hna
9 Ga ndëcëk rac, më hnuɓuhëhni kore vahnë vële wok koɗena ndëkwini. Vahnë vëvë wayal fop yeho gë wahnënk w̃a fop gë waɓulunda ŋa fop do gë vanësa va fop. Haryënkw tinki ahnaw̃ hna kahnëniho do gë haryënkw Fape fa, viỹi viyah ntiyaniho do mënkwëni waryund.
10 Ndekaɗëniho ɗus:
«Ipeh iŋa hnë W̃ën fu, le lañak hnë tinki ahnaw̃ hna, matik do gë Fape hna.»
11 Wamëleka ŋa fop caharaɓ tinki ahnaw̃ hna kahnëniho, gë vicër va do gë wulaw̃ wahnah w̃a. Ga nkwëryëɗëniho ile nësëɗëniho vahnë ỹa, ndëkwëhnëɗëniho hafo wayëka w̃a ñak nkal ŋa do cëmbëɗënihawo W̃ënu ŋa.
12 Ntehnëɗëniho: «Amina! Araɓi iɗëwan ŋa, gë icëmb ŋa, g'usery w̃a, g'icamehn iŋa, g'untënah ŋa, g'imëk iŋa do gë fanka fa kwëhn W̃ën fu ŋa kantëm! Amina.»
13 Awa, acër aryampo më tëƴëko: «Vële liyak viỹi viyah vi, vëhni mo ye do ne matini?»
14 Më lëkwaɓuha: «Ahwëhn mën, njëtëru!»
Tac më ntehnëko: «Vële w̃atik horot sankaf va ye. Ndagëni viỹi vilëw̃ hni va do njerënëni hnë sat Fape hna.
15 Soŋe rac nkeni haryënkw tinki W̃ën hna do ndokuŋëhnëɗëniha g'anent gë g'umëɗ Cery Cankaf ntëw̃u hna. Ale lañak hnë tinki ỹa keryëɗëhëhni.
16 Ɓokëɗina njohni inte, ɓokëɗina njohni w̃ënka, do ulav w̃a ɓokëɗina njahni, ma yakah haw̃ary,
17 kaɓi Fape fante ye tinki ahnaw̃ hna yeɗ ahekery alëw̃ hni ỹa, do njiryeryëɗëhëhni gë wahaƴalin w̃ënka uwám ka. Do W̃ënu ŋa pëhwëcëɗëhëhni fop wankwën ŋa vinkër vidëw̃ hni hna.»