35
1 Ikanta Tajorentsi ikantakiri Jacob: “Piyaate pinampiteeyaawo janta Bet-el-ki. Ari powetsikapakina taapokimentotsi, tema naaka Pitajorentsite, oñaahakimiri paerani pishiyapithatantakariri pirentzi Esaú.”
2 Ari ikantanakiri Jacob itomipaenipaeni eejatzi ikaatzi tsipatakariri: “Pookeri pitajorentsitetashiyitari eerokapaeni, piyaate pikaawoshite, pikithaateeyaawo otsipa piithaari.
3 Jame aate Bet-el-ki, ari nowetsikapakiri taapokimentotsi nopinkathatapakiri Tajorentsi neshironkatakinari nokemaatsiwaetakaha paerani, tema itsipatapiintakina jempe nokinayitaki.”
4 Iitakiri Jacob maawoeni itajorentsitetashiitari, ikaatzi ithayiitziri eejatzi kempitantsiki. Raanakiri Jacob maawoeni ikitatakiri inchatomashiki jeekatsiri okaakiini inampiki Siquem.
5 Ikanta riyaateeyeeni Jacob, ikantakaakawo Tajorentsi ithaawaeyanakini ikaatzi nampiyitawori janta. Rootaki kaari ikoshekanteetawaari itomipaeni Jacob.
6 Maawoeni itsipatakari Jacob, areeteeyakani iiteetziro Luz, roojatzi iiteetzitari Bet-el jeekatsiri Canaán-ki.
7 Ari rowetsikapakiri taapokimentotsi, iitakiro El-Bet-el. Tema ari roñaahakari paerani Tajorentsi ishiyapithatantakariri rirentzi.
8 Ari okamaeri paerani Débora omperatapiintane Rebeca, ikiteetakiri antamimashiki okaakitapakira Bet-el. Iitakiro Jacob janta “Alón-bacut.”
9 Ikanta ipiyaa Jacob ipoñahaawo Padan-aram-ki, rapiiteero Tajorentsi roñaahaari, itajonkawentawakiri.
10 Ikantakiri:
“Piwaero ini Jacob,
Roo kantacha eeromaeta piitaawo nimaeka jempe piiwita ketziroeni.
Israel piiteeya.”
Ari rowaeniri Tajorentsi otsipa iwaero Jacob.
11 Ikantanakiri:
“Naakataki Tajorentsi shintsiperori.
Ari noshekyahaeri pitomipaeni eejatzi picharinipaeni
Noshekyahaemiri pitomipaeni riyoshiiteeya sheninkatawakahaachani, rijatzi inashiyitaachani isheninkapaeni jemperikapaeni.
Nopinkatharitakaayitakiri pitomipaeni.
12 Aritaki nashitakahaemiro kepatsi nashitakaakariri paerani Abraham eejatzi Isaac.
Roojatzi iroka kepatsi nashitakaeyaariri pitomipaeni.”
13 Ikanta ipiyanaa Tajorentsi ikenkithawaetakaakirira Jacob,
14 raanaki mapi, ipiriintathanthatakiro ikenkithawaetakaakiri Tajorentsi. Ijeetantanakawo yeenkantsi, eejatzi imiriitari opoñaantyaari otajorentsitantyaari.
15 Iitanakiro Bet-el janta.
16 Roojatzi rawijantanakawo Jacob Bet-el. Okaakitzimatapaaki rareetya Efrata-ki, ari okatsitakotapaakiri Raquel, otzimaanite. Oshekimaeta okemaatsitaka otzimaanitantyaari.
17 Okanta oñaakiro aminirori osheki okemaatsiwaetaka, okantanakiro: “Eero pithaayi, tzimaki itsipa peentsite.”
18 Tema kamimataki roori, oetanakiri eentsite “Benoni,” riima ashitariri iitakiri rirori “Benjamín.”
19 Roojatzi okamantaari Raquel, ikiteetakiro awotsiki jatachari Efrata-ki, iiteetziri nimaeka Belén.
20 Rowiriintaki Jacob mapi janta ikitateetakirowa. Rootaki iroka mapi riyoetantari ari okitataari Raquel.
21 Eekiro riyaatatzi Jacob, rawijaneentanakiro Mihdal-edar-ki.
22 Ikanta ijeekaperotapaki Israel janta, jataki Rubén itsipatakawo Bilja, roojatzi itsipatzitari ipaapate. Ikanta riyotakira Israel, antawoete ikijanaka.
Itomipaeniite Jacob
Ikaatzi 12 itomipaeniite Jacob.
23 Irika otomipaeni Lea: Rubén (Jewari itomi Jacob), Simeón, Leví, Judá, Isacar eejatzi Zabulón.
24 Irika otomipaeni Raquel: José, Benjamín.
25 Irika otomipaeni Bilja, omperatane Raquel: Dan, Neftalí.
26 Irika otomipaeni Zilpa, omperatane Lea: Had, Aser. Riiyitakira itomipaeni Jacob ikaatzi tzimaentsiri janta Padan-aram-ki.
27 Ari riyaataki Jacob iñeeri ashitaririni Isaac ijeeki rirori nampitsiki Mamre-ki, roojatzi iiteetzitari Arba, iiteetziro eejatzi Jebrón. Rootaki inampipaeni Abraham eejatzi Isaac.
28 Tzimaki Isaac okaatzi 180 rojarentsite roojatzi ikamantaari.
29 Raanakiri itomipaeni Jacob, Esaú, ikitateeri. Ari itsipataari isheninkapaeni aakiri rantyashiparinka.