IKAMANTANTAKIRI ISAÍAS
6
1 Ikanta ikamae pinkathari Uzías, ari noñaawyaatakari Tajorentsi ijeeki iwinkatharimentoki, ipamankantakawo ikithaari tajorentsipanko.
2 eenitatsi jenokintaweri paamathaeteentsiri rowaatzinkaka ipatziitoki. eenitatsi 6 ishiwankiri. Apite ishiwankiri ipashikapootantari, apite okanta ipashikantari iwathaki, apite raantari.
3 Apiipiitziro ikanteeyini:
“Kiteshire, Kiteshire, Kiteshire rini, shintsiperori Tajorentsi,
Ipamankantakawo rowaniinkawo kepatsi.”
4 Ikanta ikamenitanaki iñaawaetzi, antawoete omoyekanaka ashiroki tajorentsipanko, kachaariinka okantanaka tajorentsipanko.
5 Ari nokantashiretanaki: “¡Ikantamatsiteetana, nimaeka nokame! Nokitateeya Nowinkathariteki Tajorentsi Shintsiperori. Kaariperopaanteri nini, nojeekimotziri atziriite kaariperopaanteri.”
6 Ikanta apaani jenokintaweri oshiyakawori paamari, ipokashitapaakina. Ramakotaki paamarimenki raakiri taapokimentotsiki,
7 Rontsirokakiro nopaanteki, ikantana:
“Pamine, ontsirokakimi pipaanteki paamarimenki.
Ithonkaemiro piyaariperonkari,
Ipeyakoeteemiro pikaariperowitakaha.”
8 Ari nokemaki ikenkithawaetanaki Awinkatharite, ikantzi:
“¿Iitaka notyaanteri? ¿Iitaka jatatsini ikamantante?”
Nakanaki naaka, nokantzi:
“Naaka potyaante.”
9 Ari ikantanakina:
“Pimatero, pikamanteeri atziriite, pikanteri:
‘Arika pikemawitya, eeromaeta pikemathatziro.
Arika paminawitya, eeromaeta piñiiro.’
10 Eeroka kantakahaeyaawoni ikijoshiretanteetyaari,
witayempitari ikanteetya, imawityaakiyiite.
Rootaki eero ikowichaatanta,
Eero ikemanta,
Eero ikenkithashiretanta,
Tee ikemijantzi, rootaki eero rawijakotantaawo.”
11 Nokantziri:
“¡Noyinkatharite! ¿Okaateka ojamanite iroka?”
Ikantzi rirori:
“Arika ithonkaeteeri paata jeekatsiri nampitsiki,
Kaankipanko okanteeya pankotsipaeni,
Kaankiitya okanteeya eejatzi osheki owaantsi.
12 Ramaeri Tajorentsi thaankiini atziriite,
Kaankiite okanteeya nampitsiki tekatsi nampiteeyaawoni.
13 Itzimerika añaaneentsini apawopaeni,
Aritaki ithonkaetakiri eejatzi irikaete, roshiyeeyaawo itowaetziro meta ari ookanakiro isankahani.
Apatziro oshookamatsitee opiriniki.”