14
ᑆᓪ ᐁᒄ ᒫᒃ ᐸᕐᓇᐸᔅ ᑳ ᐃᑐᐦᑌᑣᐤ ᐊᓂᑌ ᐊᐃᒀᓂᔭᒥᐦᒡ
1 ᐃᔅᑯᑕᒃ ᑳ ᑕᑯᔑᐦᒀᐤ ᐊᓂᑌ ᐊᐃᒀᓂᔭᒥᐦᒡ, ᑆᓪ ᐁᒄ ᒫᒃ ᐸᕐᓇᐸᔅ ᒌ ᐲᐦᒉᐅᒡ ᐊᓂᑌ ᐊᔨᒥᐦᐁᐅᑲᒥᑯᐦᒡ, ᐁᒄ ᒫᒃ ᐊᓂᔫ ᑳ ᐃᔥᐱᔥ ᒌ ᓲᐦᒋᐦᑖᑯᓯᑣᐤ ᐁ ᑲᒉᔅᑴᑣᐤ ᒥᐦᒉᑐ ᒎᐗ ᐄᓅᐦ ᑲᔦ ᐊᓂᔫ ᐁᑳ ᒎᐗ ᑳ ᐃᑎᔅᑳᓀᓰᑣᐤᐦ ᐁᑯᑦ ᑳ ᐅᐦᒋ ᑖᐺᔨᒫᔨᒡ ᒌᓴᔅ᙮
2 ᐁᒄ ᐊᓂᒌ ᒎᐗ ᐄᓅᒡ ᐁᑳ ᑳ ᑖᐺᐦᑕᐦᒀᐤ, ᒌ ᐃᐦᑑᑕᐌᐅᒡ ᐊᓂᔫ ᐁᑳ ᒎᐗ ᑳ ᐃᑎᔅᑳᓀᓰᑣᐤᐦ ᒉᒌ ᒪᒋᐸᔨᐦᑲᐦᑐᐙᔨᒡ ᐊᓂᔫ ᐐᒋᔖᓂᒫᐤᐦ᙮
3 ᒋᓀᐅᔥ ᒫᒃ ᒌ ᐃᐦᑖᐅᒡ ᐊᓂᑦ ᐊᓂᒌ ᐊᐸᔅᑕᓚᒡ᙮ ᒌ ᐋᔨᒨᒣᐅᒡ ᒫᒃ ᐅᑎᐯᔨᐦᒋᑫᐤ ᐁᑳ ᒥᑐᓐ ᑯᔥᑖᒋᑣᐤ᙮ ᐁᒄ ᒫᒃ ᑳ ᒦᑯᑣᐤ ᓲᐦᑳᑎᓰᐎᓂᔫ ᒫᒥᔥᑳᒡ ᐙᐸᐦᑏᐌᐎᓐᐦ ᒉᒌ ᐙᐸᐦᑏᐌᑣᐤ ᑲᔦ ᒉᒌ ᐃᐦᑑᑕᐦᒀᐤ ᐁ ᒫᒥᔥᑳᑌᔨᐦᑖᑯᓂᔨᒀᐤᐦ ᒉᒀᔫᐦ, ᐊᓂᑦ ᐁ ᐅᐦᒋ ᓅᑯᐦᑖᑲᓄᔨᒡ ᐁ ᑖᐺᑣᐤ ᐊᓂᔫ ᑳ ᐃᔑ ᐙᐐᐦᑕᐦᒀᐤ ᐁ ᒋᔐᐙᑐᑖᑕᐦᒄ ᐅᑎᐯᔨᐦᒋᑫᐤ᙮
4 ᐁᒄ ᒫᒃ ᐄᓅᒡ ᐊᓂᑦ ᐃᐦᑖᐎᓂᐦᒡ ᑳ ᐃᐦᑖᑣᐤ ᒌ ᐸᐦᑳᓂᐦᐄᑑᒡ, ᐸᔅᒡ ᒌ ᑖᐺᐦᑕᐌᐅᒡ ᐊᓂᔫ ᑆᓪ ᐁᒄ ᒫᒃ ᐸᕐᓇᐸᔅ, ᐁᒄ ᑯᑕᑲᒡ ᐊᓂᔫᐦ ᒎᐗ ᐄᓅᐦ ᑳ ᑖᐺᐦᑕᐙᑣᐤ᙮
5 ᐁᒄ ᐊᓂᒌ ᐁᑳ ᒎᐗ ᑳ ᐃᑎᔅᑳᓀᓯᑣᐤ ᐁᒄ ᒫᒃ ᐊᓂᒌ ᒎᐗ ᐄᓅᒡ ᑲᔦ ᐊᓂᔫ ᑳ ᓃᑳᓂᔥᑳᑯᑣᐤ ᒌ ᑲᑴᑌᔨᒣᐅᒡ ᒉᒌ ᓇᓀᐦᑳᒋᐦᐋᑣᐤ ᐊᓂᔫ ᑆᓪ ᐁᒄ ᒫᒃ ᐸᕐᓇᐸᔅ ᑲᔦ ᒉᒌ ᓂᐸᐦᐋᑣᐤ ᐁ ᐹᐦᐱᒧᓯᓈᑕᐦᐙᑣᐤ᙮
6 ᐃᔅᑯᑕᒃ ᒫᒃ ᑆᓪ ᐁᒄ ᒫᒃ ᐸᕐᓇᐸᔅ ᐱᔦᐦᑕᐦᒀᐤ ᐅᔫ, ᐊᓂᑌ ᓕᔅᑦᕋ ᐁᒄ ᒫᒃ ᑎᕐᐲ ᑳ ᐃᔑᓂᐦᑳᑌᔨᒀᐤᐦ ᐃᐦᑖᐎᓐᐦ ᒌ ᐃᔑ ᐅᔑᒨᒡ᙮ ᐊᓂᑌ ᓚᐃᒀᓂᔭ ᐊᔅᒌᐦᒡ ᒌ ᐃᐦᑕᑯᓂᔫ ᐅᔫ ᐃᐦᑖᐎᓐᐦ᙮ ᐊᓂᑌ ᑲᔦ ᐙᔅᑳ ᐊᓂᔫ ᐊᔅᒌᔫ ᐁᑯᑌ ᑳ ᐸᐹᐃᑐᐦᑌᑣᐤ᙮
7 ᐁᑯᑦ ᐊᓂᑌ ᑳ ᐙᐐᐦᑕᐦᒀᐤ ᐅᔫ ᒥᔻᒋᒧᐎᓂᔫ᙮
ᓕᔅᑦᕋ ᐁᒄ ᒫᒃ ᑎᕐᐲ ᑳ ᐃᔑᓂᐦᑳᑌᒀᐤᐦ ᐃᐦᑖᐎᓐᐦ ᑳ ᐃᑐᐦᑌᑣᐤ ᐸᕐᓇᐸᔅ ᐁᒄ ᒫᒃ ᑆᓪ
8 ᐊᓂᑌ ᒫᒃ ᓕᔅᑦᕋ ᒌ ᐃᐦᑖᐤ ᐯᔭᒄ ᓈᐯᐤ ᐁ ᒌ ᒫᔅᑳᓂᔨᒀᐤᐦ ᐅᓯᑦ ᐁᑳ ᐅᐦᒋ ᓂᐦᑖᐅᑌᑦ ᐁᑯᓐ ᒫᒃ ᔖᔥ ᑳ ᐃᔑᓈᑯᓯᑯᐸᓀ ᑳ ᐱᒫᑎᓰᑦ᙮
9 ᒣᒀᒡ ᒫᒃ ᐊᓂᑦ ᐁ ᐊᐱᑦ ᐊᓐ ᓈᐯᐤ ᒌ ᓂᑐᐦᑕᐌᐤ ᐊᓂᔫ ᑆᓪ ᐁ ᐊᔨᒥᔨᒡ᙮ ᐃᔅᑯᑕᒃ ᒫᒃ ᑆᓪ ᑳ ᒋᔅᒉᔨᐦᑕᐦᒃ ᐁ ᑖᐺᐦᑕᒥᔨᒡ ᐊᓂᔫ ᓈᐯᐤ ᒉᒌ ᒦᓄᐙᒋᐦᐋᑲᓄᔨᒡ, ᑯᐃᔅᒄ ᒌ ᑲᓇᐙᐸᒣᐤ
10 ᐁᒄ ᑳ ᐃᑖᑦ ᐁ ᒋᔐᐌᑦ, ᐱᓯᑰᐦ, ᑕᔓᑳᐴ ᒫᒃ᙮ ᒌ ᐅᐦᒋ ᐱᓯᑯᔑᐸᐦᑖᐤ ᐊᓐ ᓈᐯᐤ, ᑳ ᐊᑎ ᐸᐹᒧᐦᑌᑦ᙮
11 ᐃᔅᑯᑕᒃ ᑳ ᐙᐸᐦᑕᐦᒀᐤ ᐊᓂᒌ ᐄᓅᒡ ᑖᓐ ᑳ ᐃᐦᑑᑕᒥᔨᒡ ᑆᓪ, ᒌ ᑌᐺᐅᒡ ᓚᐃᒀᓂᔭ ᐊᔨᒧᐎᓂᔫ ᐁ ᐃᔑ ᐊᔨᒥᑣᐤ, ᒋᔐᒪᓂᑑᒡ ᑰᑎᐦᑎᑯᓅᒡ ᒬᐦᒡ ᓈᐯᐅᒡ ᐁ ᐃᔑᓈᑯᓯᑣᐤ᙮
12 ᐊᓂᔫ ᐸᕐᓇᐸᔅ ᐁᐅᒄ ᐆ ᓲᔅ ᒌ ᐃᑌᔨᒣᐅᒡ᙮ ᐁᒄ ᐊᓂᔫ ᑆᓪ ᐦᐁᕐᒣᔅ ᒌ ᐃᑌᔨᒣᐅᒡ᙮ ᐌᔥ ᐊᓂᔫ ᑆᓪ ᒨᔥ ᐎᔭ ᐁ ᒌ ᐊᔨᒥᔨᒡ ᐁᐅᒄ ᐅᔫ ᐦᐁᕐᒣᔅ ᐌᐦᒋ ᐃᑌᔨᒫᑣᐤ᙮ ᐌᔥ ᐁᐅᒄ ᑳ ᐃᔑ ᑖᐺᐦᑕᐦᒀᐤ ᐁ ᐃᐦᑎᔨᒡ ᐦᐁᕐᒣᔅ ᑳ ᐃᔑᓂᐦᑳᓱᔨᒡ ᐅᒋᔐᒪᓂᑑᒥᐙᐤ᙮
13 ᒌ ᐃᐦᑖᐤ ᒫᒃ ᐊᔨᒥᐦᐁᐅᒋᒫᐤ ᐁ ᐊᑐᔥᑯᐙᑦ ᐊᓂᔫ ᓲᔅ ᑳ ᐃᔑᓂᐦᑳᓱᔨᒡ᙮ ᐊᓐ ᒫᒃ ᐊᔨᒥᐦᐁᐅᑲᒥᒄ ᐊᓂᑌ ᑳ ᒌ ᒫᒥᐦᒋᒫᑲᓅᑦ ᐆ ᓲᔅ ᐐᐐᑕᒥᐦᒡ ᐊᓂᑦ ᐊᓐ ᐃᐦᑖᐎᓐ ᒌ ᐃᐦᑕᑯᓐ᙮ ᐊᓐ ᒫᒃ ᐊᔨᒥᐦᐁᐅᒋᒫᐤ ᒋᐐ ᐲᐦᑕᑲᐦᐁᐤ ᒥᔅᑐᓴ ᑲᔦ ᐙᐱᑯᓐ ᐊᓂᑌ ᐁ ᐃᔥᒀᐦᑌᒨᓂᔨᒡ ᐊᓂᔫ ᐃᐦᑖᐎᓂᔫ ᒉᒌ ᒪᒋᔥᑕᐌᐦᐊᒫᓄᔨᒡ᙮ ᒌ ᐐ ᐃᐦᑑᑕᒻ ᐅᔫ ᑲᔦ ᐊᓂᔫᐦ ᐄᓅᐦ ᒌ ᐐ ᐃᐦᑑᑕᒥᔫᐦ ᐁ ᒌ ᐐ ᒪᒋᔥᑕᐌᐦᐊᒧᐙᑣᐤ ᐊᓂᔫ ᐊᐸᔅᑕᓪᐦ᙮
14 ᐃᔅᑯᑕᒃ ᑆᓪ ᐁᒄ ᒫᒃ ᐸᕐᓇᐸᔅ ᑳ ᒋᔅᒉᔨᒫᑣᐤ ᐊᓂᔫ ᐄᓅ ᒪᓂᑑᐦᑳᓐ ᐁ ᐐ ᐃᑖᐸᒋᐦᐄᑯᑣᐤ ᒌ ᐲᑯᐱᑕᒧᒡ ᐅᒉᒀᓂᒧᐙᐤᐦ ᐁ ᓅᑯᐦᑖᑣᐤ ᐁᑳ ᓇᐦᐁᔨᐦᑕᐦᒀᐤ ᐊᓂᔫ ᐙ ᐃᐦᑎᔨᒡ, ᐁᒄ ᑳ ᐃᔅᐸᐦᐄᑐᑣᐤ ᐊᓂᑌ ᐊᓂᔫ ᐄᓅ ᐁ ᐃᐦᑖᔨᒡ ᐁᒄ ᑳ ᐃᑖᑣᐤ ᐁ ᒋᔐᐌᑣᐤ,
15 ᓈᐯᐅᑎᒄ ᐁᑳᐐ ᐃᐦᑑᑕᒧᒄ ᐆ, ᓈᐯᐅᒡ ᐌᓯᓐ ᑲᔦ ᓂᔮᓐ ᒧᔮᒻ ᒋᔭᐙᐤ ᐁ ᐃᑌᔨᐦᑖᑯᓯᔦᒄ ᐁᑯᓐ ᐁ ᐃᑌᔨᐦᑖᑯᓯᔮᐦᒡ᙮ ᒋᐐ ᐐᐦᑕᒫᑎᓈᓐ ᒥᔻᒋᒧᐎᓐ ᒉᒌ ᐅᐦᒋ ᐴᓂᐦᐁᑯᒡ ᐁ ᐊᔨᒥᐦᐁᔥᑕᐌᑯᒡ ᐊᓂᒌ ᓂᑕᒧᒄ ᒪᓂᑑᐦᑳᓂᒡ᙮ ᒦᔅᑯᒡ ᐊᓂᑌ ᒋᔐᒪᓂᑑ ᑳ ᐱᒫᑎᓰᑦ ᐁ ᐃᐦᑖᑦ ᒉᒌ ᐃᔑ ᐊᔨᒥᐦᐋᔦᒄ, ᐊᓐ ᑳ ᐅᔑᐦᑖᑦ ᑭᐦᒋᑮᔑᑯᔫ, ᐊᔅᒌᔫ, ᒋᐦᒋᑲᒥᔫ ᑲᔦ ᒥᓯᐌ ᒉᒀᔫ ᑳ ᐃᔑ ᐱᒫᑎᓰᒪᑲᓂᔨᒡ ᐊᓂᑌ᙮
16 ᐊᓂᑌ ᐅᑖᐦᒡ ᒌ ᐸᒋᔥᑎᓀᐤ ᒋᔐᒪᓂᑑ ᒥᓯᐌ ᐁ ᐃᑎᔅᑳᓀᓯᔨᒡ ᐊᐌᔫ ᒉᒌ ᐃᔑ ᐱᒫᑎᓯᔨᒡ ᑖᓐ ᐙ ᐃᔑ ᐱᒫᑎᓯᔨᒡ ᑲᔦ ᒉᒌ ᐃᔑ ᐊᔨᒥᐦᐋᔨᒡ ᑖᓐ ᐙ ᐃᔑ ᐊᔨᒥᐦᐋᔨᒡ᙮
17 ᔮᐸᒡ ᒫᒃ ᒋᔐᒪᓂᑑ ᒨᔥ ᒌ ᒋᔅᒉᔨᐦᑕᒥᐦᐁᐤ ᐄᓅ ᑖᓐ ᐁ ᐃᑌᔨᐦᑖᑯᓯᑦ ᐊᓂᔫ ᐅᐦᒋ ᑖᓐ ᑳ ᐃᔑ ᒥᔪᑑᑕᐦᒃ, ᒬᐦᒡ ᑲᔦ ᒋᔭᐙᐤ ᒋᒌ ᐃᐦᑑᑕᒫᑯᐙᐤ ᒉᒌ ᒋᒨᓂᔨᒡ ᒉᒌ ᐅᐦᒋ ᓂᐦᑖᐅᒋᓂᔨᒡ ᒦᒋᒥᔫ᙮ ᒋᒌ ᒦᑯᐙᐤ ᒦᒋᒥᔫ ᑲᔦ ᒋᑎᐦᑑᑖᑯᐙᐤ ᒉᒌ ᒥᔦᔨᐦᑕᒣᒄ᙮ ᐁᐅᒄ ᐅᔫ ᑳ ᐃᑖᑦ ᑆᓪ ᐊᓂᔫ ᐄᓅ ᐁ ᐐ ᓂᑳᐦᐙᑦ ᐊᓂᔫ ᐁ ᐐ ᓅᒌᔥᑖᑯᑣᐤ᙮
18 ᐋᑦ ᒫᒃ ᐅᔫ ᐁ ᒌ ᐃᔑ ᐐᐦᑕᒧᐙᑲᓅᑣᐤ ᐅᒌ ᐄᓅᒡ ᔮᐸᒡ ᒌ ᐐ ᓂᐸᐦᐁᐅᒡ ᒥᔅᑐᓴ ᒉᒌ ᒪᒋᔥᑕᐌᐦᐊᒧᐙᑣᐤ ᐊᓂᔫ ᐊᐸᔅᑕᓪᐦ᙮ ᒉᒃ ᒫᒃ ᑳ ᔖᑰᒋᒥᑯᑣᐤ ᐊᓂᔫ ᐊᐸᔅᑕᓪᐦ ᐁᑳ ᒉᒌ ᐃᐦᑑᑕᐦᒀᐤ ᐅᔫ᙮
19 ᐸᔅᒡ ᒎᐗ ᐄᓅᒡ ᒌ ᐅᐦᑐᐦᑌᐅᒡ ᐊᓂᑌ ᐋᓐᑎᔻᑭᐦᒡ ᐊᓐ ᐃᐦᑖᐎᓐ ᐊᓂᑌ ᐱᓯᑎᔭ ᐊᔅᒌᐦᒡ ᑳ ᐃᐦᑕᑯᐦᒡ, ᑲᔦ ᐸᔅᒡ ᐊᓂᑌ ᐊᐃᒀᓂᔭᒻ ᒌ ᐅᐦᑐᐦᑌᐅᒡ, ᐁᒄ ᑳ ᔖᑰᒋᒫᑣᐤ ᐊᓂᔫ ᐄᓅ ᒉᒌ ᐐᒋᐦᐄᑯᑣᐤ ᐁ ᐐ ᓂᐸᐦᐋᑣᐤ ᑆᓪ᙮ ᐁᒄ ᑳ ᐹᐦᐱᒧᓯᓈᑕᐦᐙᑣᐤ ᐁᒄ ᑳ ᐐᐐᑖᐹᑖᑣᐤ ᐊᓂᑦ ᐊᓂᔫ ᐃᐦᑖᐎᓂᔫ ᐁ ᒌ ᐃᑌᔨᒫᑣᐤ ᐁ ᓂᐱᔨᒡ ᐊᓂᔫ ᑆᓪ᙮
20 ᒥᒄ ᒫᒃ ᐃᔅᑯᑕᒃ ᐊᓂᒌ ᑳ ᑖᐺᔨᒫᑣᐤ ᒌᓴᔅ ᑳ ᐙᔅᑳᐴᔥᑕᐙᑣᐤ ᐊᓂᔫ ᑆᓪ, ᒌ ᐗᓂᔥᑳᐤ ᐁᒄ ᒦᓐ ᑳᐤ ᑳ ᐲᐦᒉᑦ ᐊᓂᔫ ᐃᐦᑖᐎᓂᔫ᙮ ᒦᓐ ᒫᒃ ᐊᓂᔫ ᐎᔮᐸᓂᔨᒡ ᑆᓪ ᐁᒄ ᒫᒃ ᐸᕐᓇᐸᔅ ᐊᓂᑌ ᑎᕐᐲᐦᒡ ᒌ ᐃᑐᐦᑌᐅᒡ᙮
ᑆᓪ ᐁᒄ ᒫᒃ ᐸᕐᓇᐸᔅ ᑳᐤ ᑳ ᒌᐌᑣᐤ ᐊᓂᑌ ᐋᓐᑎᔻᑭᐦᒡ ᐊᓂᑌ ᓯᕆᔮ ᐊᔅᒌᐦᒡ ᑳ ᐃᐦᑕᑯᐦᒡ ᐃᐦᑖᐎᓐ
21 ᑆᓪ ᐁᒄ ᒫᒃ ᐸᕐᓇᐸᔅ ᒌ ᐙᐐᐦᑕᒧᒡ ᒥᔻᒋᒧᐎᓂᔫ ᐊᓂᑌ ᑎᕐᐲ, ᒥᐦᒉᑐ ᒫᒃ ᐊᐌᔫ ᒌ ᑖᐺᔨᒣᔫ ᒌᓴᔅ᙮ ᐁᒄ ᒦᓐ ᑳᐤ ᐊᓂᑌ ᓕᔅᑦᕋ ᑳ ᐃᑐᐦᑌᑣᐤ, ᒦᓐ ᐊᓂᑌ ᐊᐃᒀᓂᔭᒥᐦᒡ, ᐁᒄ ᒦᓐ ᐊᓂᑌ ᐋᓐᑎᔻᑭᐦᒡ᙮
22 ᐁᑯᑦ ᐊᓂᑦ ᑳ ᐊᔨᒥᐦᐋᑣᐤ ᐊᓂᔫ ᐊᐌᔫ ᑳ ᑖᐺᔨᒫᔨᒡ ᒌᓴᔅ ᐁ ᓰᐦᒋᒫᑣᐤ ᒉᒌ ᒣᒣᒋᒥᓂᒥᔨᒡ ᐅᑖᐺᐦᑕᒧᐎᓂᔫ᙮ ᒌ ᐃᑌᐅᒡ ᑲᔦ ᐁ ᓂᑐᐌᔨᐦᑖᑯᓂᔨᒡ ᐊᐌᓐ ᒉᒌ ᓇᒋᔥᑲᐦᒃ ᓇᓈᐦᑰ ᒉᒀᔫᐦ ᐁ ᐋᔨᒪᓂᔨᒀᐤ ᐁᒄ ᒫᒃ ᒉᒌ ᐲᐦᒉᑦ ᒋᔐᒪᓂᑑ ᐅᒋᔐᐅᒋᒫᐎᓂᐦᒡ᙮
23 ᐁᒄ ᒫᒃ ᒥᓯᐌ ᑖᓂᑌ ᑳ ᐊᑎ ᐃᐦᑖᔨᒡ ᐅᒫᒨᐊᔨᒥᐦᐋᐤᐦ ᑆᓪ ᐁᒄ ᒫᒃ ᐸᕐᓇᐸᔅ ᒌ ᐎᔦᔨᒣᐅᒡ ᐊᐌᔫ ᒉᒌ ᓃᑳᓂᔥᑯᐙᔨᒡ ᐊᓂᔫ ᐅᒫᒨᐊᔨᒥᐦᐋᐤᐦ ᐊᓂᑦ ᑳ ᐃᐦᑖᔨᒡ᙮ ᐃᔅᑯᑕᒃ ᒫᒃ ᑳ ᒌᔑᐦᑖᑣᐤ ᐊᓂᔫ ᐁᑳ ᒦᒋᓱᑣᐤ ᒥᒄ ᐁ ᐊᔨᒥᐦᐋᑣᐤ ᐁᒄ ᑳ ᐊᔨᒥᐦᐁᔥᑕᒧᐙᑣᐤ ᒉᒌ ᐋᐸᒋᐦᐄᑯᑣᐤ ᐅᑎᐯᔨᐦᒋᑫᐤᐦ, ᐊᓂᔫᐦ ᑳ ᑖᐺᔨᒫᑣᐤ᙮
24 ᐃᔅᑯᑕᒃ ᒫᒃ ᑳ ᔖᐳᐌᔥᑲᐦᒀᐤ ᐊᓂᔫ ᐊᔅᒌᔫ ᐱᓯᑎᔭ ᑳ ᐃᔑᓂᐦᑳᑌᔨᒡ ᐁᒄ ᐊᓂᑌ ᐸᒻᕕᓕᔮ ᑳ ᐃᔑᓂᐦᑳᑌᔨᒡ ᐊᔅᒌᔫ ᑳ ᐲᐦᒉᑣᐤ᙮
25 ᑳ ᐙᐐᐦᑕᐦᒀᐤ ᒋᔐᒪᓂᑑ ᐅᑕᔨᒧᐎᓂᔫ ᐊᓂᑌ ᐯᕐᑲᐦᒡ᙮ ᐁᒄ ᒦᓐ ᐊᓂᑌ ᐋᑕᓕᔭᐦᒡ ᑳ ᐃᑐᐦᑌᑣᐤ᙮
26 ᐁᑯᑦ ᒫᒃ ᐊᓂᑦ ᐅᐦᒋ ᑳᐤ ᑳ ᐃᓯᒋᒣᑣᐤ ᐊᓂᑌ ᐋᓐᑎᔻᑭᐦᒡ, ᐊᓂᑦ ᑳ ᐅᐦᒋ ᒋᐦᒋᑎᔕᐦᐙᑲᓅᑣᐤ ᐁᒄ ᒫᒃ ᑳ ᒌᔑᐦᑖᑣᐤ ᐊᓂᔫ ᐋᐸᑎᓱᐎᓂᔫ ᑳ ᐃᑕᔓᒫᑲᓅᑣᐤ ᒉᒌ ᐃᐦᑑᑕᐦᒀᐤ᙮ ᐁᔥᒄ ᒫᒃ ᐁᑳ ᐅᐦᒋ ᒋᔅᑐᐦᑌᑣᐤ ᐋᓐᑎᔻᑭᐦᒡ ᐅᐦᒋ, ᒌ ᐊᔨᒥᐦᐁᔥᑕᒫᑯᒡ ᐄᓅ ᒉᒌ ᔕᐌᔨᒥᑯᑣᐤ ᒋᔐᒪᓂᑑ ᒣᒀᒡ ᐁ ᐋᐸᑎᓰᔥᑕᒧᐙᑣᐤ᙮
27 ᐃᔅᑯᑕᒃ ᒫᒃ ᑳᐤ ᒣᓯᑳᑣᐤ ᐊᓂᒌ ᐊᐸᔅᑕᓚᒡ ᐊᓂᑌ ᐋᓐᑎᔻᑭᐦᒡ, ᒌ ᓂᔥᑑᓀᐅᒡ ᐊᓂᔫ ᒥᓯᐌ ᐅᒫᒨᐊᔨᒥᐦᐋᐤᐦ ᐁ ᐙᐐᐦᑕᒧᐙᑣᐤ ᑖᓐ ᑳ ᐃᐦᑑᑕᒥᔨᒡ ᒋᔐᒪᓂᑑ ᐎᔭᐙᐤ ᐁ ᒌ ᐋᐸᒋᐦᐄᑯᑣᐤ᙮ ᐁᒄ ᒫᒃ ᐊᓂᒌ ᐄᓅᒡ ᒌ ᐐᐦᑕᒫᑯᒡ ᐊᓂᔫ ᐊᐸᔅᑕᓪᐦ, ᐊᓂᔫ ᐄᓅᐦ ᐁᑳ ᒎᐗ ᑳ ᐃᑎᔅᑳᓀᓰᑣᐤᐦ ᑲᔦ ᐎᔭᐙᐤ ᐁ ᑖᐺᔨᒫᑣᐤ ᒌᓴᔅ᙮
28 ᐁᑯᑦ ᒫᒃ ᐅᑕᐦ ᑳ ᐃᐦᑖᑣᐤ ᒋᓀᐅᔥ ᑆᓪ ᐁᒄ ᒫᒃ ᐸᕐᓇᐸᔅ ᐊᓂᔫ ᑳ ᑖᐺᔨᒫᔨᒡ ᒌᓴᔅ ᐁ ᐃᐦᑖᔨᒡ᙮