6
ᓃᔣᔥᒡ ᓈᐯᐅᒡ ᑳ ᐎᔦᔨᒫᑲᓅᑣᐤ ᒉᒌ ᐐᒋᐦᐄᐌᑣᐤ ᐊᔨᒥᐦᐁᐅᑲᒥᑯᐦᒡ
1 ᐃᔅᑯᑕᒃ ᒫᒃ ᐁᑎᑑ ᐁ ᐊᑎ ᒥᐦᒉᑎᑣᐤ ᐄᓅᒡ ᐁ ᑖᐺᔨᒫᑣᐤ ᒌᓴᔅ, ᐊᓂᒌ ᒎᐗ ᐄᓅᒡ ᒃᕇᒃ ᑳ ᐃᔑ ᐊᔨᒥᑣᐤ ᒌ ᒪᒋᐸᔨᑲᐦᑕᐌᐅᒡ ᐊᓂᔫ ᒎᐗ ᐄᓅ ᐦᐄᑉᕉ ᑳ ᐃᔑ ᐊᔨᒥᔨᒡ ᐁ ᒌ ᐃᑗᑣᐤ ᐊᓂᔫ ᑳ ᐹᐦᐯᔭᑯᔨᒡ ᐃᔅᑴᐤ ᐊᓂᑦ ᐁ ᐃᐦᑖᑣᐤ ᐁᑳ ᐅᐦᒋ ᐃᔥᐱᔥ ᐊᔕᒫᑲᓄᔨᒡ ᒦᒋᒥᔫ ᐊᓂᔫ ᑳ ᒌ ᒫᑎᓇᒧᐙᑲᓄᔨᒡ ᐃᔅᑴᐤ ᑳ ᐯᔭᑯᔨᒡ ᐁᔑᑯᒻ ᒌᔑᑳᐤ᙮
2 ᐁᒄ ᒫᒃ ᐊᓂᒌ ᓃᔓᔖᑉ ᐊᐸᔅᑕᓚᒡ ᒌ ᐐᔖᒣᐅᒡ ᒥᓯᐌ ᐊᓂᔫ ᐊᐌᔫ ᑳ ᑖᐺᔨᒫᔨᒡ ᒌᓴᔅ, ᐁᒄ ᑳ ᐃᑖᑣᐤ, ᓇᒧᐃ ᑯᐃᔅᑯᓈᑯᓐ ᐁᑳ ᐊᔮᔥᐱᔑᔮᐦᒡ ᒉᒌ ᑲᒉᔅᑴᔮᐦᒡ ᒋᔐᒪᓂᑑ ᐅᑕᔨᒧᐎᓐ ᓂᔮᓐ ᐁ ᓈᓈᑲᒋᐦᑖᔮᒡ ᒉᒌ ᒥᔪ ᐊᔕᒫᑲᓅᑣᐤ ᐊᓂᒌ ᐃᔅᑴᐅᒡ ᑳ ᐯᔭᑯᑣᐤ᙮
3 ᒋᔭᐙᐤ ᓃᒋᔖᓈᓂᒡ, ᐎᔮᐸᒫᐦᑯᒡ ᓃᔣᔥᒡ ᓈᐯᐅᒡ ᐊᓂᑦ ᐁ ᑕᔑᔦᒄ ᐊᓂᒌ ᐁ ᒥᔻᒋᒫᑲᓅᑣᐤ ᐊᓂᔫ ᐅᐦᒋ ᐁ ᑯᐃᔅᑯᑖᑎᓰᑣᐤ ᑲᔦ ᓈᔥᒡ ᐁ ᑲᒉᐦᑖᐌᔨᐦᑕᐦᒀᐤ ᑲᔦ ᒫᒃ ᐁ ᓵᑲᔅᒋᓀᔥᑳᑯᑣᐤ ᑳ ᐸᔦᐦᒋᓯᔨᒡ ᐊᐦᒑᐦᑾ᙮ ᐁᐅᑯᓂᒡ ᐅᒌ ᒉ ᒦᐦᒀᐤ ᐅᔫ ᐋᐸᑎᓱᐎᓂᔫ ᐁ ᓈᓈᑲᑐᐌᔨᒫᑣᐤ ᑳ ᐹᐦᐯᔭᑯᔨᒡ ᐃᔅᑴᐤ᙮
4 ᐁᒄ ᒫᒃ ᓂᔮᓐ ᒉ ᐃᔥᐱᔑᔮᐦᒡ ᒉᒌ ᐊᔨᒥᐦᒋᑫᔮᐦᒡ ᑲᔦ ᐁ ᑲᒉᔅᑴᔮᐦᒡ᙮
5 ᒥᓯᐌ ᒫᒃ ᒌ ᓇᐦᐁᔨᐦᑕᒧᒡ ᐊᓂᑦ ᐁ ᑕᔑᑣᐤ ᐊᓂᔫ ᑳ ᐃᑗᔨᒡ ᐊᓂᔫ ᐊᐸᔅᑕᓪᐦ᙮ ᐁᒄ ᑳ ᐎᔮᐸᒫᑣᐤ ᔅᑏᕙᓐ᙮ ᔅᑏᕙᓐ ᒫᒃ ᐅᑖᐺᐦᑕᒧᐎᓐ ᓈᔥᒡ ᒌ ᓲᐦᒉᔨᐦᑖᑯᓂᔫ, ᑲᔦ ᒌ ᓵᑲᔅᒋᓀᔥᑳᑰ ᑳ ᐸᔦᐦᒋᓯᔨᒡ ᐊᐦᒑᐦᑾ᙮ ᑲᔦ ᕕᓕᑉ ᒌ ᐎᔮᐸᒣᐅᒡ ᑲᔦ ᑉᕈᒀᕋᔅ, ᑲᔦ ᓂᑲᓄᕐ, ᑲᔦ ᑎᒸᓐ, ᑲᔦ ᐸᕐᒣᓇᔅ, ᐁᒄ ᒫᒃ ᓂᑯᓚᔅ᙮ ᐆ ᓂᑯᓚᔅ ᐊᓂᑌ ᐋᓐᑎᔻᒃ ᒌ ᐅᐦᒋᔫ ᐎᔭ, ᐋᑦ ᒫᒃ ᐁᑳ ᒎᐗ ᐅᐦᒋ ᐃᑎᔅᑳᓀᓯᑦ ᔮᐸᒡ ᒫᒃ ᒌ ᑖᐺᐦᑕᒻ ᑖᓐ ᐁ ᐃᔑ ᑖᐺᐦᑕᒥᔨᒡ ᒎᐗ ᐄᓅᐦ᙮
6 ᐁᒄ ᒫᒃ ᐊᓂᒌ ᑳ ᑖᐺᐦᑕᐦᒀᐤ ᑳ ᐃᑐᐦᑕᐦᐋᑣᐤ ᐊᓂᔫᐦ ᑳ ᐎᔮᐸᒫᑣᐤ ᓈᐯᐤ ᐊᓂᑌ ᐊᓂᔫᐦ ᐊᐸᔅᑕᓪᐦ ᐁ ᐃᐦᑖᔨᒡ᙮ ᐁᒄ ᒫᒃ ᐊᓂᒌ ᐊᐸᔅᑕᓚᒡ ᑳ ᓵᒥᓈᑣᐤ ᑲᔦ ᑳ ᐊᔨᒥᐦᐁᔥᑕᒧᐙᑣᐤ ᐊᓂᔫ ᓈᐯᐤᐦ᙮
7 ᒋᔐᒪᓂᑑ ᒫᒃ ᐅᑕᔨᒧᐎᓐ ᒌ ᒥᔑᐦᑌᐸᔨᓂᔫ᙮ ᐌᑖᒡ ᒥᐦᒉᑐ ᐄᓅᒡ ᐊᓂᑦ ᒉᕉᓴᓚᒥᐦᒡ ᑳ ᐃᐦᑖᑣᐤ ᒌ ᑖᐺᐦᑕᒧᒡ, ᑲᔦ ᒥᐦᒉᑐ ᐊᔨᒥᐦᐁᐅᒋᒫᐅᒡ ᒌ ᑖᐺᐦᑕᒧᒡ ᑲᔦ ᒌ ᓇᓂᐦᐄᐦᑕᒧᒡ ᒥᔻᒋᒧᐎᓂᔫ᙮
ᔅᑏᕙᓐ ᑳ ᒫᑯᓈᑲᓅᑦ
8 ᔅᑏᕙᓐ ᒫᒃ ᐊᓐ ᐊᐌᓐ ᑳ ᓵᒋᔅᒋᓀᔥᑳᑯᑦ ᒋᔐᒪᓂᑑ ᐅᔕᐌᔨᐦᒋᒉᐎᓂᔫ ᑲᔦ ᐅᓲᐦᑳᑎᓰᐎᓂᔫ ᒌ ᐃᑌᔨᐦᑖᑯᓲ, ᒌ ᐃᐦᑑᑕᒻ ᒫᒃ ᓇᓈᐦᑰ ᒫᒥᔥᑳᒡ ᒉᒀᔫᐦ ᑲᔦ ᓇᓈᐦᑰ ᒌ ᐃᔑ ᒫᒥᔥᑳᒡ ᐙᐸᐦᑏᐌᐤ ᐊᓂᑦ ᐄᓅ ᐁ ᐃᐦᑖᔨᒡ᙮
9 ᒌ ᐃᐦᑖᐅᒡ ᓈᐯᐅᒡ ᐁᑳ ᐅᐦᒋ ᓇᐦᐁᔨᒫᑣᐤ ᔅᑏᕙᓐ, ᐊᓂᒌ ᐊᓂᑌ ᑳ ᒌ ᐃᔑ ᓈᒐᔨᒥᐦᐋᑣᐤ ᐊᓂᔫ ᒎᐗ ᐊᔨᒥᐦᐁᐅᑲᒥᑯᔫ ᑳ ᐋᐱᐦᑯᓈᑲᓅᑣᐤ ᓈᐯᐅᒡ, ᑳ ᐃᔑᓂᐦᑳᑌᔨᒡ᙮ ᓇᓈᐦᑰ ᐃᐦᑖᐎᓂᐦᒡ ᒌ ᐅᐦᒋᔫᒡ ᓴᐃᕇᓐ ᐁᒄ ᒫᒃ ᐋᓕᒃᓵᓐᑦᕆᔭ ᑳ ᐃᔑᓂᐦᑳᑌᔨᒀᐤᐦ᙮ ᑯᑕᑲᒡ ᒫᒃ ᐊᓂᑌ ᓯᓕᓯᔭ ᐁᒄ ᒫᒃ ᐁᐃᔖ ᐊᔅᒌᐦᒡ ᒌ ᐅᐦᒋᔫᒡ᙮ ᐁᐅᑯᓐ ᒫᒃ ᐅᔫᐦ ᓈᐯᐤ ᑳ ᒪᒋᐸᔨᑲᐦᑖᑯᑦ ᔅᑏᕙᓐ᙮
10 ᓇᒧᐃ ᒫᒃ ᐅᐦᒌ ᓂᔥᑰᔑᐦᐄᑰ ᐅᔫᐦ ᔅᑏᕙᓐ ᐌᔥ ᑳ ᐸᔦᐦᒋᓯᔨᒡ ᐊᐦᒑᐦᑾ ᒌ ᒦᑰ ᑲᒉᐦᑖᐌᔨᐦᑕᒧᐎᓂᔫ ᒉᒌ ᑲᔅᒋᐦᐅᑦ ᐁ ᐊᔨᒥᑦ᙮
11 ᐁᒄ ᒫᒃ ᒌᒨᑦ ᑳ ᐋᐸᒋᐦᐋᑣᐤ ᓈᐯᐤᐦ ᒉᒌ ᓇᓇᑕᔮᒋᒫᔨᒡ ᔅᑏᕙᓐ ᐁ ᐃᑗᑣᐤ, ᓂᒌ ᐯᐦᑕᐙᓈᓐ ᔅᑏᕙᓐ ᐁ ᐸᐹᔥᑖᒫᑦ ᒧᓯᔅ ᐁᒄ ᒫᒃ ᒋᔐᒪᓂᑑᐦ᙮
12 ᐅᔫ ᒫᒃ ᐁ ᒌ ᐃᐦᑎᑣᐤ ᒌ ᐃᐦᑑᑕᐌᐅᒡ ᐊᓂᔫ ᑳ ᓃᑳᓇᐲᑣᐤᐦ ᑲᔦ ᑳ ᒋᔅᑯᑕᒫᒉᔨᑣᐤᐦ ᐐᔓᐌᐎᓂᔫ ᑲᔦ ᐄᓅᐦ ᒉᒌ ᒋᔓᐙᐦᐄᑯᑣᐤ ᐊᓂᔫ ᔅᑏᕙᓐ᙮ ᐊᓂᒌ ᒫᒃ ᑳ ᓃᑳᓇᐱᑣᐤ ᒌ ᐃᑕᔓᐌᐅᒡ ᒉᒌ ᒫᑯᓈᑲᓄᔨᒡ ᔅᑏᕙᓐ ᑲᔦ ᒉᒌ ᐃᑐᐦᑕᐦᐋᑲᓄᔨᒡ ᐊᓂᑌ ᐁ ᓂᔥᑐᐎᔨᒡ ᐊᓂᔫᐦ ᑳ ᒫᒨᐱᔥᑕᒥᔨᒡ ᐎᔮᔅᑯᓂᒉᐎᓂᔫ᙮
13 ᑲᔦ ᒌ ᐐᔖᒣᐅᒡ ᓈᐯᐤᐦ ᒉᒌ ᓂᑕᐐᓐ ᐃᑖᒋᒫᔨᒡ ᔅᑏᕙᓐ ᐊᓂᑦ ᐁ ᓂᔥᑐᐐᓈᓄᔨᒡ᙮ ᒌ ᐃᑗᔫᐦ ᒫᒃ, ᐆ ᓈᐯᐤ, ᓇᒧᐃ ᒋᐱᐦᑐᐌᐤ ᐁ ᒪᒫᔦᔨᐦᑕᐦᒃ ᐅᔫ ᒫᐅᒡ ᑳ ᐸᔦᐦᑲᓂᔨᒡ ᑲᔦ ᐊᓂᔫ ᐐᔓᐌᐎᓂᔫ ᒋᔐᒪᓂᑑ ᑳ ᒥᔮᔨᒡ ᐊᓂᔮᓈ ᒧᓯᔅ᙮
14 ᐌᔥ ᓂᒌ ᐯᐦᑕᐙᓈᓐ ᐁ ᐃᑗᑦ, ᐅᔫᐦ ᒌᓴᔅ, ᓈᓴᕆᑦ ᑳ ᐅᐦᒋᔨᒡ ᒉ ᐗᓈᒋᐦᑖᔨᒡ ᐅᔫ ᒎᐗ ᐊᔨᒥᐦᐁᐅᑲᒥᑯᔫ, ᑲᔦ ᒫᒃ ᒉ ᑴᔅᑎᓇᐦᒃ ᐊᓂᔫᐦ ᒎᐗ ᐄᓅ ᐃᐦᑐᐎᓐᐦ ᐊᓂᔮᓈ ᒧᓯᔅ ᑳ ᐃᑕᔓᐌᑯᐸᓀ ᒉ ᐃᐦᑑᑖᑲᓄᔨᒀᐤᐦ᙮ ᐁᐅᒄ ᐅᔫ ᑳ ᐃᑖᒋᒧᑣᐤ ᐊᓂᒌ ᓈᐯᐅᒡ᙮
15 ᒥᓯᐌ ᒫᒃ ᐊᓂᒌ ᐊᓂᑦ ᑳ ᒫᒨᐱᔥᑕᐦᒀᐤ ᐎᔮᔅᑯᓂᒉᐎᓂᔫ ᓈᔥᒡ ᒌ ᑲᓄᐙᐸᒣᐅᒡ ᔅᑏᕙᓐ ᐁ ᐙᐸᐦᑕᒧᐙᑣᐤ ᐅᑖᔥᑕᒧᐦᑯᔫ ᒬᐦᒡ ᐁᓐᒋᓪ ᐅᑖᔥᑕᒧᐦᒄ ᐁ ᐃᔑᓈᑯᓂᔨᒡ᙮