13
ᓵᒋᐦᐄᐌᐎᓐ ᐁᐅᒄ ᒫᐅᒡ ᒉᔅᑌᔨᐦᑖᑯᐦᒡ
1 ᐋᑦ ᒦᑯᔮᓐ ᒉᒌ ᐃᔑ ᐊᔨᒥᔮᓐ ᐁ ᐃᔑ ᐊᔨᒥᑣᐤ ᑯᑕᑲᒡ ᐊᐌᓂᒌ ᑲᔦ ᐁ ᐃᔑ ᐊᔨᒥᑣᐤ ᐁᓐᒋᓕᒡ, ᐁᑳ ᒫᒃ ᐊᔮᔮᓐ ᓵᒋᐦᐄᐌᐎᓐ ᓇᒧᐃ ᐎᔦᔥ ᒋᐹ ᐅᐦᒋ ᐃᑖᐸᑕᓐ ᐊᓐ ᑳ ᐃᔑ ᒦᑯᔮᓐ ᒉᒌ ᐃᔑ ᐊᔨᒥᔮᓐ ᐌᔥ ᒬᐦᒡ ᒥᒄ ᐁ ᒪᒪᑗᔮᐱᔅᑲᐦᐄᑲᓅᐦᒡ ᐱᔻᐱᔅᒄ ᓂᐹ ᐃᑎᐦᑖᑯᓯᓐ᙮
2 ᑲᔦ ᒫᒃ ᐋᑦ ᒦᑯᔮᓐ ᒉᒌ ᑲᔅᒋᐦᐅᔮᓐ ᐁ ᒋᔅᒋᐌᐦᐄᒉᔮᓐ, ᑲᔦ ᒫᒃ ᐋᑦ ᒥᓯᐌ ᒋᔅᒉᔨᐦᑕᒫᓐ ᓂᔭ ᑖᓐ ᐁ ᐃᔑ ᐁᑳ ᒋᔅᒉᔨᐦᑕᐦᒀᐤ ᑯᑕᑲᒡ ᐊᐌᓂᒡ, ᑲᔦ ᐋᑦ ᒦᑯᔮᓐ ᒥᓯᐌ ᒉᒌ ᒋᔅᒉᔨᐦᑕᒫᓐ ᒉᒀᓐ ᐁᑳ ᐅᐦᒋ ᒋᔅᒉᔨᐦᑕᒥᐦᐄᐙᓅᐦᒡ ᐊᓂᑌ ᐅᑖᐦᒡ ᑲᔦ ᒫᒃ ᐋᑦ ᐊᔮᔮᓐ ᑖᐺᐦᑕᒧᐎᓐ ᒉᒌ ᐋᐦᑎᓇᒫᓐ ᐗᒌᐦ ᐁᑳ ᒫᒃ ᐊᔮᔮᓐ ᓵᒋᐦᐄᐌᐎᓐ ᔮᐸᒡ ᓇᒧᐃ ᒥᑐᓐ ᒉᒀᓐ ᓂᐹ ᐅᐦᒋ ᐃᑌᔨᐦᑖᑯᓯᓐ᙮
3 ᑲᔦ ᐋᑦ ᒥᓯᐌ ᒉᒀᓐ ᐸᒋᔥᑎᓇᒫᓐ ᑖᓐ ᐁ ᐃᔑ ᑎᐱᔦᐅᓯᔮᓐ ᒉᒌ ᐐᒋᐦᐋᑲᓅᑣᐤ ᑳ ᒋᔅᑎᒫᑎᓰᑣᐤ, ᐋᑦ ᒫᒃ ᑲᔦ ᐸᒋᔥᑎᓇᒫᓐ ᒉᒌ ᐃᔥᒀᓰᑲᓅᐦᒡ ᓂᔫ, ᐁᑳ ᒫᒃ ᐊᔮᔮᓐ ᓵᒋᐦᐄᐌᐎᓐ ᔮᐸᒡ ᓇᒧᐃ ᐎᔦᔥ ᐃᑖᐸᑕᓐ ᐊᓐ ᑖᓐ ᑳ ᐊᐃᐦᑎᔮᓐ᙮
4 ᐊᐌᓐ ᐁ ᓵᒋᐦᐋᑦ ᐊᐌᔫ ᓈᔥᒡ ᒥᔪᑑᑕᐌᐤ ᑲᔦ ᓰᐲᐌᓰᔅᑐᐌᐤ, ᓇᒧᐃ ᑲᔦ ᐙᐅᐦᑌᔨᐦᑕᒻ ᑲᔦ ᓇᒧᐃ ᒫᒥᐦᒋᒨ,
5 ᓇᒧᐃ ᒋᐦᒋᐌ ᐃᑌᔨᒥᓲ, ᑲᔦ ᓇᒧᐃ ᒫᔦᔨᐦᒉᐤ᙮ ᓇᒧᐃ ᒥᒄ ᐎᔭ ᐙ ᐃᐦᑎᑦ ᐃᐦᑑ ᓯᔮᒋᐦᐋᑴ ᐊᐌᔫᐦ᙮ ᓇᒧᐃ ᐅᐦᑳᔅᑳᑰ ᐊᐌᔫᐦ ᑲᔦ ᓇᒧᐃ ᑲᓄᐌᔨᐦᑕᒻ ᐊᓂᔫ ᑖᓐ ᑳ ᐃᔑ ᒋᔓᐙᐦᐄᑯᑦ ᐊᐌᔫᐦ᙮
6 ᐊᐌᓐ ᐁ ᓵᒋᐦᐋᑦ ᐊᐌᔫᐦ, ᓇᒧᐃ ᒥᔦᔨᐦᑕᒻ ᐁ ᐗᓂᑑᑕᒦᒡ᙮ ᒥᒄ ᒫᒃ ᓇᐙᒡ ᒥᔦᔨᐦᑕᒻ ᐃᔅᑯᑕᒃ ᒣᔫᑑᑕᒥᔨᒡ᙮
7 ᐁ ᓵᒋᐦᐋᑦ ᐊᐌᓐ ᐊᐌᔫᐦ ᒨᔥ ᓰᐲᐌᓰᔅᑐᐌᐤ ᒥᒄ ᑖᓐ ᐁ ᐃᐦᑎᔨᑴᓐ᙮ ᑲᔦ ᒨᔥ ᑖᐺᐅᒉᔨᒣᐤ ᐊᓂᔫᐦ ᐊᐌᔫᐦ ᑲᔦ ᒨᔥ ᐃᐦᑕᑯᓂᔫ ᐁ ᐃᔑ ᐊᔅᐯᔨᒧᑦ ᒉᒌ ᒥᔪᐸᔨᔨᒡ᙮ ᓇᒧᐃ ᐴᓂᔫ ᐁ ᓰᐲᐌᓰᔅᑐᐙᑦ ᐊᓂᔫᐦ ᐊᐌᔫᐦ᙮
8 ᓇᒧᐃ ᐐᔅᑳᑦ ᒋᑲ ᐅᐦᒋ ᐃᔅᒀᐸᔫ ᓵᒋᐦᐄᐌᐎᓐ᙮ ᐃᐦᑕᑯᓐ ᐌᒌᐦᒡ ᐁ ᐊᔨᒥᔅᑕᒧᐙᑲᓅᑦ ᒋᔐᒪᓂᑑ ᒥᒄ ᒫᒃ ᐁᔥᒄ ᒋᑲ ᐃᔅᒀᐸᔫ ᐆ ᐁ ᐃᐦᑎᓈᓅᐦᒡ᙮ ᑲᔦ ᒋᑲ ᐴᓂᐸᔫ ᐁ ᑴᔅᒐᔨᒥᓈᓅᐦᒡ᙮ ᑲᔦ ᒫᒃ ᒋᔅᒉᔨᐦᑕᒧᐎᓐ ᑲᑕ ᐃᔅᒀᐸᔫ᙮
9 ᐌᔥ ᓇᒧᐃ ᒥᓯᐌ ᒉᒀᓐ ᒋᒋᔅᒉᔨᐦᑌᓈᓅ, ᑲᔦ ᒫᒃ ᓇᒧᐃ ᓂᐦᐋᐤ ᒋᒌ ᐃᔑ ᒋᔅᒋᐌᐦᐄᒉᓈᓅ ᑖᓐ ᒋᐹ ᐃᔑ ᒋᔅᒋᐌᐦᐄᒉᓈᓅ᙮
10 ᐁᔥᒄ ᐯᔭᒀᐤ ᒋᑲ ᐅᑎᐦᒋᐸᔫ ᒉᒌ ᒋᔅᒉᔨᒪᐦᒄ ᑖᓐ ᓂᐦᐋᐤ ᐁ ᐃᑌᔨᐦᑖᑯᓯᑦ ᒋᔐᒪᓂᑑ᙮
11 ᑳ ᐊᐙᔑᔫᔮᓐ, ᒬᐦᒡ ᐊᐙᔥ ᐁ ᐃᔑ ᐊᔨᒥᑦ ᓂᒌ ᐃᔑ ᐊᔨᒥᓐ, ᑲᔦ ᒬᐦᒡ ᐊᐙᔥ ᐁ ᐃᔑ ᒫᒥᑐᓀᔨᐦᑕᐦᒃ ᓂᒌ ᐃᔑ ᒫᒥᑐᓀᔨᐦᑌᓐ, ᑲᔦ ᒫᒃ ᒬᐦᒡ ᐊᐙᔥ ᓂᒌ ᐃᑌᔨᐦᑖᑯᓯᓐ᙮ ᒥᒄ ᒫᒃ ᐊᓄᐦᒌᔥ ᐁᒄ ᓂᔮᐯᐅᔮᓐ, ᓇᒧᐃ ᐁᒄ ᓂᑕᐙᔓᐌᔨᐦᑖᑯᓯᓐ᙮
12 ᒧᔮᒻ ᑲᔦ ᐁ ᑲᓇᐙᐸᒧᐦᒄ ᐊᐌᓐ ᐊᓂᑌ ᐙᐸᒥᓱᓂᐦᒡ, ᓇᒧᐃ ᒋᐱᔦᑲᔅᒋᓄᐙᓅ ᐁ ᐃᔥᐱᔥ ᐱᔦᑲᓯᓅᐦᒄ ᑎᐲᐌ ᒋᔅᒌᓯᑯᓈᐦᒡ ᐁ ᑲᓇᐙᐸᒧᐦᒄ᙮ ᐁᑯᓐ ᒫᒃ ᒬᐦᒡ ᐁ ᐃᔑ ᒋᔅᒉᔨᒪᐦᒄ ᒋᔐᒪᓂᑑ ᐊᓄᐦᒌᔥ᙮ ᓇᒧᐃ ᑌᑲᔥ ᒋᒋᔅᒉᔨᒫᓅ᙮ ᒥᒄ ᒫᒃ ᐃᔅᑯᑕᒃ ᐅᐦᒋᔥᑰ ᐙᐸᒪᐦᑴ ᐁᒄ ᑌᑲᔥ ᒉ ᒋᔅᒉᔨᒪᐦᒄ, ᒧᔮᒻ ᒋᔮᓅ ᐁ ᐃᔥᐱᔥ ᑌᑲᔥ ᒋᔅᒉᔨᒥᑕᐦᒄ᙮
13 ᓂᔥᑐ ᒉᒀᔫ ᓇᒧᐃ ᐐᔅᑳᑦ ᒋᑲ ᐅᐦᒋ ᐃᔅᒀᐸᔫᐦ, ᐁᐅᒄ ᐅᔫᐦ᙮ ᑖᐺᐦᑕᒧᐎᓐ, ᐊᔅᐯᔨᒧᐎᓐ ᐁᒄ ᒫᒃ ᓵᒋᐦᐄᐌᐎᓐ᙮ ᐊᓐ ᒫᒃ ᒫᐅᒡ ᒉᔅᑌᔨᐦᑖᑯᐦᒡ ᐁᐅᑰ ᓵᒋᐦᐄᐌᐎᓐ᙮