3
ᒋᔐᒪᓂᑑ ᐅᑖᐸᒋᐦᐋᑲᓐᐦ
1 ᓃᒋᔖᓂᑎᒄ, ᐊᓂᑦ ᐁ ᐃᐦᑖᔦᒄ ᑳ ᐃᐦᑖᔮᓐ ᓇᒧᐃ ᑰᐦᒋ ᐃᔑ ᐊᔨᒥᐦᐄᑎᓈᐙᐤ ᑖᓐ ᐁ ᐃᔑ ᓂᑐᐌᔨᐦᑖᑯᐦᒡ ᒉᒌ ᐃᔑ ᐊᔨᒥᐦᐋᑲᓅᑣᐤ ᐊᐌᓂᒡ ᑳ ᐸᔦᐦᒋᓯᔨᒡ ᐊᐦᒑᐦᑾ ᑳ ᐊᔮᐙᑣᐤ᙮ ᒧᔮᒻ ᐊᐌᓂᒌ ᐁᑳ ᑳ ᐊᔮᐙᑣᐤ ᐸᔦᐦᒋ ᐊᐦᒑᐦᑾ ᒋᒌ ᐃᔑ ᐊᔨᒥᐦᐄᑎᓈᐙᐤ᙮ ᒧᔮᒻ ᑳ ᐅᔅᒋ ᑖᐺᔨᒫᑣᐤ ᙭ ᐁ ᐃᔑ ᐊᔨᒥᐦᐋᑲᓅᑣᐤ ᐁᑯᓐ ᑳ ᐃᔑ ᐊᔨᒥᐦᐄᑕᑯᒡ᙮
2 ᐊᐙᔥ ᓃᔥᑕᒻ ᒎᒎᔑᓈᐳᐃ ᒥᔮᑲᓅ ᐁᔥᒄ ᐁᑳ ᐃᔅᐱᐦᑎᓰᑦ ᒋᐦᒋᐌ ᒉᒌ ᒦᒋᓱᑦ᙮ ᒌ ᐌᐦᒋᐦᑖᑯᓐ ᑖᓐ ᑳ ᐃᔑ ᐐᐦᑕᒫᑕᑯᒡ ᒥᔻᒋᒧᐎᓐ ᒉᒌ ᓂᓯᑐᐦᑕᐦᒀᐤ ᐁ ᒌ ᐃᑌᔨᒥᑕᑯᒡ᙮ ᐊᓄᐦᒌᔥ ᒫᒃ ᔮᐸᒡ ᐁᔥᒄ ᓇᒧᐃ ᒋᒌ ᓂᓯᑐᐦᑌᓇᐙᐤ ᐊᓂᐦᐄᐦ ᐊᐦᒑᐦᒄ ᑖᐺᐎᓐᐦ ᐁ ᐋᔨᒥᐦᒀᐤᐦ ᒉᒌ ᓂᓯᑐᐦᑖᑲᓅᐦᒀᐤ᙮
3 ᐁᔥᒄ ᐁᑯᓐ ᐁ ᐃᔑ ᐱᒫᑎᓯᔦᒄ ᐁ ᐃᔑ ᐱᒫᑎᓰᑣᐤ ᐊᓂᒌ ᐁᔥᒄ ᐁᑳ ᑳ ᐸᒋᔥᑎᓈᑣᐤ ᐸᔦᐦᒋ ᐊᐦᒑᐦᑾ ᒉᒌ ᐱᒥᐸᔨᐦᑖᔨᒡ ᐅᐱᒫᑎᓰᐎᓇᐙᐤᐦ᙮ ᐌᔥ ᒋᒪᒪᒉᔨᒥᑐᓈᐙᐤ ᑲᔦ ᒋᒪᒪᒋᐸᔨᐦᑲᐦᑖᑐᓈᐙᐤ᙮ ᐁᑯᑦ ᒫᒃ ᐁ ᓅᑯᐦᒡ ᐁᔥᒄ ᐁ ᐃᔑ ᐱᒫᑎᓯᔦᒄ ᐊᓂᔫ ᑖᓐ ᐁ ᐃᔑ ᐱᒫᑎᓰᑣᐤ ᐊᓂᒌ ᐁᑳ ᑳ ᑖᐺᐦᑕᐦᒀᐤ᙮
4 ᐯᔭᒄ ᐊᓂᑦ ᐁ ᑕᔑᔦᒄ ᐁ ᐃᑗᑦ ᑆᓪ ᓂᔭ ᓂᓅᔔᔥᑯᐙᐤ, ᐁᒄ ᒦᓐ ᑯᑕᒃ ᐁ ᐃᑗᑦ ᐊᑆᓚᔅ ᓂᓅᔔᔥᑯᐙᐤ᙮ ᐁᑯᑦ ᒫᒃ ᐁ ᓅᑯᐦᒡ ᐁ ᐱᒫᑎᓯᔦᒄ ᐊᓂᔫ ᑖᓐ ᐁ ᐃᔑ ᐱᒫᑎᓰᑣᐤ ᐊᓂᒌ ᐁᔥᒄ ᐁᑳ ᑳ ᑖᐺᔨᒫᑣᐤ ᒌᓴᔅ᙮
5 ᐊᐌᓐ ᒫᒃ ᐆ ᐊᑆᓚᔅ ᑲᔦ ᒫᒃ ᐊᐌᓐ ᓂᔭ ᑆᓪ᙮ ᐋᐸᒋᐦᐋᑲᓂᒡ ᓂᔮᓐ᙮ ᐁᐅᑯᓂᒡ ᐅᒌ ᐋᐸᒋᐦᐋᑲᓂᒡ ᑳ ᐐᐦᑕᒫᑕᑯᒡ ᒥᔻᒋᒧᐎᓂᔫ ᐁᒄ ᒫᒃ ᑎᔮᐺᐦᑕᒣᒄ᙮ ᑖᐱᔥᑯᓐ ᓂᒌ ᓇᓂᐦᐄᐦᑌᓈᓐ ᑖᓐ ᑳ ᐃᑕᔓᒥᔨᒥᐦᑦ ᐅᑎᐯᔨᐦᒋᑫᐤ᙮
6 ᒧᔮᒻ ᓂᐦᑖᐅᒋᐦᒉᓲ ᐁ ᒋᐦᒋᐸᔨᐦᑖᑦ ᐁ ᓂᐦᑖᐅᒋᐦᒉᑦ, ᐁᑯᓐ ᐁ ᐃᔑᓈᑯᓯᔮᓐ ᓂᔭ, ᐌᔥ ᓂᔭ ᓃᔥᑕᒻ ᒋᒌ ᐐᐦᑕᒫᑎᓈᐙᐤ ᒥᔻᒋᒧᐎᓐ᙮ ᐁᒄ ᒫᒃ ᐊᑆᓚᔅ ᒧᔮᒻ ᐊᓐ ᓂᐦᑖᐅᒋᐦᒉᓲ ᒨᔥ ᑳ ᔔᒋᔥᑕᑖᑦ ᐊᓂᔫᐦ ᑳ ᓂᐦᑖᐅᒋᐦᑖᐅᒡ ᐃᔑᓈᑯᓲ᙮ ᐁᑎᑑ ᒋᒌ ᐐᐦᑕᒫᑯᐙᐤ ᑖᓐ ᒋᐹ ᐃᔑ ᐱᒫᑎᓰᐙᓈᐙᐤ ᐊᓂᑌ ᒋᔐᒪᓂᑑ ᐃᔑ ᐁ ᐃᐦᑖᑦ᙮ ᒥᒄ ᒫᒃ ᒋᔐᒪᓂᑑ ᐁᐅᒄ ᒋᐦᒋᐌ ᐁ ᐃᐦᑑᑖᑖᒄ ᒉᒌ ᒥᔪ ᓂᐦᑖᐅᒍᐌᒄ ᒋᑖᐺᐦᑕᒧᐎᓂᐙᐦᒡ᙮
7 ᓇᒧᐃ ᒫᒃ ᒉᒀᓐ ᐃᑌᔨᐦᑖᑯᓲ ᐊᓐ ᐊᐌᓐ ᑳ ᓂᐦᑖᐅᒋᐦᒉᑦ ᑲᔦ ᐊᓐ ᐊᐌᓐ ᑳ ᔔᒋᔥᑕᑖᑦ ᐊᓂᔫ ᓂᐦᑖᐅᒋᐦᑖᑲᓂᔫ᙮ ᒋᔐᒪᓂᑑ ᐁᐅᒄ ᒋᐦᒋᐌ ᐁ ᐃᑌᔨᐦᑖᑯᓯᑦ ᐊᓐ ᑳ ᐃᐦᑑᑕᐦᒃ ᒉᒌ ᓂᐦᑖᐅᑎᓂᔨᒡ ᐊᓂᔫ ᓂᐦᑖᐅᒋᐦᑖᑲᓂᔫ᙮
8 ᐊᓐ ᐊᐌᓐ ᑳ ᓂᐦᑖᐅᒋᐦᒉᑦ ᐁᒄ ᒫᒃ ᐊᓐ ᑳ ᔔᒋᔥᑕᑖᑦ ᐊᓂᔫ ᓂᐦᑖᐅᒋᐦᒋᑲᓂᔫ, ᓃᔓ ᐋᐸᑎᓲᒡ᙮ ᑖᐱᔥᑯᓐ ᐋᐸᑎᓰᐦᑲᐦᑕᒧᒡ ᐊᓂᔫ ᓂᐦᑖᐅᒋᐦᒋᑲᓂᔫ᙮ ᒋᔐᒪᓂᑑᐦ ᒫᒃ ᒋᑲ ᑎᐸᐦᐊᒫᑰᒡ ᑖᓐ ᒉ ᐃᔑ ᐋᐸᑎᓰᐦᑲᐦᑕᒧᐙᑴᓂᒡ᙮
ᑖᓐ ᒉ ᐃᔑ ᐐᑳᐴᐦᑖᒉᔭᐦᒄ
9 ᑖᐱᔥᑯᓐ ᓂᐐᒋ ᐊᑐᔅᒉᒫᓈᓐ ᒋᔐᒪᓂᑑ᙮ ᒋᔭᐙᐤ ᒫᒃ ᒬᐦᒡ ᓂᐦᑖᐅᒋᐦᒋᑲᓐ ᐊᔅᒌ ᒋᑎᔑᓈᑯᓯᓈᐙᐤ᙮ ᒫᒃ ᐅᑌ ᒋᐹ ᒌ ᐃᔑ ᑲᓇᐙᐸᐦᑌᓈᐙᐤ᙮ ᒬᐦᒡ ᒋᔐᒪᓂᑑ ᐅᐙᔅᑳᐦᐄᑲᓂᒻ ᒋᑎᔑᓈᑯᓯᓈᐙᐤ᙮
10 ᒋᔐᒪᓂᑑ ᑳ ᐃᔑ ᒋᔐᐙᒡ ᒥᔪᑑᑕᒨᑦ ᓂᒌ ᐃᑎᒄ ᒉᒌ ᐊᑐᔥᑰᒃ᙮ ᓂᒌ ᐃᔑ ᐋᐸᑎᓯᓐ ᒫᒃ ᒧᔮᒻ ᐊᓐ ᐊᐌᓐ ᓈᔥᒡ ᑳ ᑲᔅᒋᐦᐅᑦ ᐁ ᐅᔑᐦᑖᑦ ᑖᓂᑦ ᒉ ᑌᐦᒋᑳᐴᓂᔨᒡ ᐙᔅᑳᐦᐄᑲᓂᔫ᙮ ᐁᒄ ᒫᒃ ᑯᑕᑲᒡ ᐁ ᐊᑎ ᒌᔑᐦᑖᑣᐤ ᐊᓂᔫ ᑳ ᐃᔑ ᒋᐦᒋ ᐐᑳᐴᐦᑖᐅᒡ᙮ ᒥᒄ ᒫᒃ ᒥᓯᐌ ᐊᓂᒌ ᑳ ᐊᑎ ᐋᐸᑎᓰᐦᑲᐦᑕᐦᒀᐤ ᐊᓂᔫ ᑳ ᐃᔑ ᒋᐦᒋ ᐐᑳᐴᐦᑖᐅᒡ ᔮᐃᑌᐃ ᑯᐃᔅᒄ ᑲᑕ ᐐ ᐃᔑ ᐐᑳᐴᐦᑖᐅᒡ ᐊᓂᔫ ᐙᔅᑳᐦᐄᑲᓂᔫ᙮
11 ᒌᓴᔅ ᙭ ᐁ ᐃᐦᑖᔨᒡ ᐁᑯᑦ ᑳ ᐅᐦᒋ ᐐᑳᐴᐦᑖᑦ ᒋᔐᒪᓂᑑ ᐅᐙᔅᑳᐦᐄᑲᓂᒻ᙮ ᓇᒧᐃ ᑯᑕᒃ ᐊᐌᔫᐦ ᐁ ᐃᐦᑖᔨᒡ ᒋᑲ ᒌ ᐅᐦᒋ ᐐᑳᐴᐦᑖᑲᓅᔫ ᐅᐙᔅᑲᐦᐄᑲᓂᒻ᙮ ᐌᔥ ᒋᔐᒪᓂᑑ ᔖᔥ ᒌ ᐎᔦᔨᐦᑕᒻ ᒌᓴᔅ ᒥᒄ ᐁ ᐃᐦᑖᔨᒡ ᒉᒌ ᐅᐦᒋ ᐐᑳᐴᑖᑲᓄᔨᒡ ᐊᓂᔫ ᐙᔅᑳᐦᐄᑲᓂᔫ᙮
12 ᑯᑕᑲᒡ ᐊᐌᓂᒌ ᐅᔖᐅᔔᓕᔮᓈᐱᔅᑾ ᑲᑕ ᐋᐸᒋᐦᐁᐅᒡ ᒫᒃ ᐙᐱᔔᓕᔮᓈᐱᔅᑾ ᒫᒃ ᓇᓈᐦᑰ ᐁ ᐃᔑᓈᑯᓯᔨᒡ ᐊᓯᓃᐦ ᐁ ᔔᓕᔮᐎᔨᒡ᙮ ᐁᒄ ᑯᑕᑲᒡ ᒥᔅᑎᒄ ᑲᑕ ᐋᐸᒋᐦᐁᐅᒡ ᒫᒃ ᒪᔥᑯᔔᐦ ᑲᑕ ᐋᐸᒋᐦᑖᐅᒡ᙮
13 ᒥᓯᐌ ᒫᒃ ᐊᐌᓐ ᒋᑲ ᓅᑯᐦᑖᑲᓅᔫ ᑖᓐ ᓂᐦᐋᐤ ᐁ ᐃᑌᔨᐦᑖᑯᓂᔨᒡ ᐅᑖᐸᑎᓱᐎᓐ ᐎᔮᔅᑯᓂᒉᐤ ᒌᔑᑳᔨᒉ᙮ ᐌᔥ ᐃᔥᑯᑌᔫ ᑲᑕ ᐋᐸᑕᓂᔫ ᐁ ᓂᑑ ᒋᔅᒉᔨᐦᑖᑯᓂᔨᒡ ᑖᓐ ᓂᐦᐋᐤ ᐁ ᐃᑌᔨᐦᑖᑯᓂᔨᒡ ᐊᐌᓐ ᐅᑖᐸᑎᓱᐎᓐ᙮ ᐁᑯᑦ ᒉ ᐅᐦᒋ ᒋᔅᒉᔨᐦᑖᑯᓂᔨᒡ ᑖᐺ ᒣᔻᔨᑴ ᐅᑖᐸᑎᓱᐎᓐ᙮
14 ᐁᒄ ᒫᒃ ᐊᓂᔫ ᑖᓐ ᑳ ᐃᔑ ᐊᑐᔥᑯᐙᑴ ᐊᐌᓐ ᐅᑎᐯᔨᐦᒋᑫᐤ ᐁᑳ ᐗᓈᑕᓂᔨᒉ, ᒋᑲ ᒥᔮᑲᓅ ᐅᑎᐸᐦᐊᒫᑯᓱᐎᓐ᙮
15 ᐁᒄ ᒫᒃ ᐃᔥᒀᑌᔨᒉ ᓇᒧᐃ ᒉᒀᔫ ᒋᑲ ᐅᐦᒋ ᐊᔮᐤ, ᐋᑐᐐ ᑮᐹ ᒋᑲ ᐱᒫᒋᐦᐋᑲᓅ ᐎᔭ ᒬᐦᒡ ᐊᐌᓐ ᐁ ᒌ ᔖᐳᔥᑲᐦᒃ ᐃᔥᑯᑌᔫ ᐁᑳ ᐅᐦᒋ ᑳᐦᒋᐦᑖᑲᓱᑦ ᒋᑲ ᐃᔑᓈᑯᓲ᙮
16 ᓇᒧᐃ ᐋ ᒋᒋᔅᒉᔨᐦᑌᓈᐙᐤ ᒬᐦᒡ ᒋᔐᒪᓂᑑ ᐅᒋᔐᐊᔨᒥᐦᐁᐅᑲᒥᒄ ᐁ ᐃᔑᓈᑯᓯᔦᒄ, ᑲᔦ ᒫᒃ ᒋᔐᒪᓂᑑ ᐅᑕᐦᒑᐦᑾ ᐁ ᐲᐦᒋᔥᑳᑖᒄ᙮
17 ᐊᐌᓐ ᒫᒃ ᐗᓈᒋᐦᑖᐙᑌ ᒋᔐᒪᓂᑑ ᐅᒋᔐᐊᔨᒥᐦᐁᐅᑲᒥᑯᔫ, ᒋᔐᒪᓂᑑᐦ ᒋᑲ ᐗᓈᒋᐦᐄᑰ᙮ ᐌᔥ ᒋᔐᒪᓂᑑ ᐅᒋᔐᐊᔨᒥᐦᐁᐅᑲᒥᒄ ᐸᔦᐦᑲᓂᔫ, ᒋᔭᐙᐤ ᒫᒃ ᐁᐅᒄ ᒋᔐᒪᓂᑑ ᐅᒋᔐᐊᔨᒥᐦᐁᐅᑲᒥᒄ᙮
ᓇᒧᐃ ᐊᐌᓐ ᒋᐦᒋᐌ ᒋᐹ ᐅᐦᒋ ᐃᑌᔨᒥᓲ
18 ᐁᑳᐐ ᐊᐌᓐ ᒋᑲ ᐅᐦᒋ ᐐ ᐎᔦᔑᐦᐄᑎᓲ᙮ ᐁ ᐃᐦᑖᑴ ᐊᐌᓐ ᐊᓂᑦ ᐁ ᑕᔑᔦᒄ ᐁ ᐃᑌᔨᐦᑕᒧᑴ ᓈᔥᒡ ᐁ ᒋᔅᒉᔨᐦᑕᐦᒃ ᒉᒀᔫ ᐅᑕᐦ ᐊᔅᒌᐦᒡ ᐁᑯᔥ ᑲᑕ ᐃᔑᓈᑯᓲ ᐁᑳ ᐄᑆᐦᑳᑦ ᒉᒌ ᐅᐦᒋ ᑲᒉᐦᑖᐌᔨᐦᑕᐦᒃ᙮
19 ᐌᔥ ᐊᓂᔫ ᐁ ᐃᔑ ᑲᒉᐦᑖᐌᔨᐦᑕᐦᒀᐤ ᐊᐌᓂᒡ ᐅᑕᐦ ᐊᔅᒌᐦᒡ, ᒌᔥᑴᓈᑯᓐ ᐃᑌᔨᐦᑕᒻ ᐎᔭ ᒋᔐᒪᓂᑑ᙮ ᐌᔥ ᐃᑕᔥᑌᐤ ᒋᔐᒪᓂᑑ ᐅᑕᔨᒧᐎᓂᐦᒡ,
ᒋᔐᒪᓂᑑ ᐋᐸᒋᐦᑖᐌᐤ ᓈᐯᐤᐦ ᐅᑲᒉᐦᑖᐌᔨᐦᑕᒧᐎᓂᔫ ᒉᒌ ᐅᐦᒋ ᒋᔅᒉᔨᐦᑕᒥᐦᐋᑦ ᑖᓐ ᐁ ᐃᔑ ᒌᔥᑴᓈᑯᓂᔨᒡ ᐅᑲᒉᐦᑖᐌᔨᐦᑕᒧᐎᓂᔫ᙮
20 ᑲᔦ ᒫᒃ ᐃᑕᔥᑌᐤ ᒋᔐᒪᓂᑑ ᐅᑕᔨᒧᐎᓂᐦᒡ, ᐅᑎᐯᔨᐦᒋᑫᐤ ᒋᔅᒉᔨᐦᑕᒻ ᐁᑳ ᒉᒀᔫ ᐃᑌᔨᐦᑖᑯᓂᔨᒡ ᐊᓂᔫ ᑖᓐ ᐁ ᐃᔑ ᒫᒥᑐᓀᔨᐦᑕᒥᔨᒡ ᐊᓂᔫ ᑳ ᑲᒉᐦᑖᐌᔨᐦᑕᒦᑣᐤ ᐅᑕᐦ ᐊᔅᒌᐦᒡ ᑳ ᐃᐦᑖᔨᑣᐤᐦ᙮
21 ᐁᑳᐐ ᒫᒃ ᐊᐌᓐ ᑲᑕ ᐅᐦᒋ ᒫᒥᐦᒋᐦᐄᑰ ᓈᐯᐤᐦ, ᐌᔥ ᒥᓯᐌ ᐊᐌᓐ ᒋᔐᒪᓂᑑ ᐅᑖᐸᒋᐦᐋᑲᓂᑐᑖᑰ᙮ ᒥᓯᐌ ᒉᒀᔫ ᒋᔐᒪᓂᑑ ᒋᒌ ᒦᑯᐙᐤ ᒉᒌ ᑎᐱᔦᐅᓰᐌᒄ᙮
22 ᓂᔭ ᑆᓪ ᐁᒄ ᒫᒃ ᐊᑆᓚᔅ, ᑲᔦ ᐲᑕᕐ, ᒋᔐᒪᓂᑑ ᓂᒌ ᐯᒋ ᐃᑎᔕᐦᐅᑯᓈᓐ ᒉᒌ ᐐᒋᐦᐄᑖᐦᒡ᙮ ᒥᓯᐌ ᐅᔫ ᐊᔅᒌᔫ ᒋᒌ ᐸᒋᔥᑎᓇᒫᑯᐙᐤ, ᑲᔦ ᒋᒌ ᒦᑯᐙᐤ ᐱᒫᑎᓰᐎᓂᔫ ᑲᔦ ᓂᐳᐎᓂᔫ᙮ ᐅᔫ ᐊᓄᐦᒌᔥ ᒣᒀᒡ ᑳ ᐃᔅᐸᔨᔨᒡ ᑲᔦ ᒥᓯᐌ ᒉ ᐃᔅᐸᔨᔨᑴ ᐊᓂᑌ ᓃᔥᑕᒥᐦᒡ ᒋᒌ ᒦᑯᐙᐤ ᒋᔐᒪᓂᑑ ᒉᒌ ᐐᒋᐦᐄᑯᐌᒄ᙮
23 ᒋᔭᐙᐤ ᒫᒃ ᙭ ᐁ ᐃᐦᑖᑦ ᒋᑦ ᐃᔑ ᑎᐯᔨᐦᑖᑯᓯᓈᐙᐤ᙮ ᐎᔭ ᒫᒃ ᙭, ᒋᔐᒪᓂᑑᐦ ᐁ ᐃᐦᑖᔨᒡ ᐃᔑ ᑎᐯᔨᐦᑖᑯᓲ᙮