2
ᒥᓯᐌ ᐊᐌᓐ ᐯᔭᑯᓂᐦᒡ ᒉᒌ ᐃᔑ ᑲᓇᐙᐸᒫᑲᓅᑦ
1 ᓃᒋᔖᓂᑎᒄ, ᐁ ᑖᐺᔨᒣᒄ ᐅᑎᐯᔨᐦᒋᑫᐤ ᒌᓴᔅ ᙭ ᐊᓐ ᒫᐅᒡ ᒉᔅᑌᔨᐦᑖᑯᓯᑦ, ᐁᑳᐐ ᐋᑐᐌᔨᒫᐦᒄ ᐊᐌᓐ, ᒥᓯᐌ ᐊᐌᓐ ᐯᔭᑯᓂᐦᒡ ᒋᐹ ᐃᑌᔨᒫᐙᐤ᙮
2 ᐅᑎᐦᑎᑖᒄ ᐋᐦᒡ ᐁ ᒦᓯᑎᓰᑦ ᓈᐯᐤ ᒣᒀᒡ ᐁ ᓂᔥᑕᐎᔦᒄ ᐁ ᐊᔨᒥᐦᐋᔦᒄ, ᐁ ᐅᔖᐅᔔᓕᔮᓈᐱᔅᑯᔨᒡ ᒫᒃ ᑖᐱᒋᔅᒉᐦᐱᓱᓐᐦ ᒋᒋᔥᑲᐙᑦ, ᑲᔦ ᒫᒃ ᓈᔥᒡ ᒥᔻᔑᔨᒀᐤ ᐅᒉᒀᓂᒻᐦ, ᒉᒃ ᒫᒃ ᒦᓐ ᑯᑕᒃ ᓈᐯᐤ ᐅᐦᒋ ᐲᐦᒉᑦ, ᓈᔥᒡ ᐁ ᒋᔅᑎᒫᑎᓰᑦ ᑲᔦ ᓈᔥᒡ ᐁ ᒋᔅᑎᒫᓯᓈᑯᓂᔨᒀᐤᐦ ᐅᒉᒀᓂᒻᐦ,
3 ᒋᔅᑌᔨᒪᑦ ᒫᒃ ᐊᓐ ᑳ ᒦᓯᑎᓰᑦ ᓈᐯᐤ ᐁ ᐃᑕᑦ, ᐋᔥᑕᒻ ᒫ, ᐅᑌ ᐁ ᒥᔻᒡ ᐯᒋ ᐊᐱᐦ᙮ ᐁᒄ ᒫᒃ ᐃᑕᑦ ᐊᓐ ᑳ ᒋᔅᑎᒫᑎᓰᑦ ᓈᐯᐤ, ᓀᑌ ᓂᑑ ᓃᐴ, ᒫᒃ ᐃᑕᑦ, ᐅᑌ ᓂᓯᑎᐦᒡ ᐯᒋ ᐊᐱᐦ,
4 ᑯᐃᔅᒄ ᐋ ᒋᑎᐦᑎᓈᐙᐤ ᐆ ᐁ ᐃᐦᑎᔦᒄ᙮ ᒋᒥᔪᑑᑕᐙᐤ ᐯᔭᒄ ᐁᒄ ᐊᓐ ᑯᑕᒃ ᓇᒧᐃ ᒧᔮᒻ ᒋᑎᐦᑑᑕᐙᐤ ᒥᒄ ᐊᓂᔫ ᐁ ᐃᔑᓈᑯᓯᑣᐤ ᐅᔅᒋᒡ᙮ ᒋᐗᓂᐸᔨᓈᐙᐤ ᐊᓂᔫ ᐁ ᐃᔑ ᑲᓇᐙᐸᒣᑯᒡ᙮
5 ᔮᒀᐤ ᓂᑐᐦᑕᒧᒄ ᓃᒋᔖᓂᑎᒄ᙮ ᓇᒧᐃ ᐋ ᐊᓂᔫ ᑳ ᒋᔅᑎᒫᑎᓯᔨᒡ ᐅᑕᐦ ᐊᔅᒌᐦᒡ ᑳ ᐃᐦᑖᔨᒡ ᐅᐦᒋ ᐎᔦᔨᒣᐤ ᒋᔐᒪᓂᑑ ᒥᔅᑕᐦᐄ ᒉᒌ ᐊᔮᔨᒡ ᑖᐺᐦᑕᒧᐎᓂᔫ ᑲᔦ ᒉᒌ ᐊᔮᔨᒡ ᒋᔐᐅᒋᒫᐎᓂᔫ ᐊᓂᔫ ᑳ ᐃᑗᑦ ᒉᔥᑎᓈᔥ ᒉ ᒥᔮᑦ ᐊᓂᔫ ᑳ ᓵᒋᐦᐄᑯᑦ᙮
6 ᐁᒄ ᒫᒃ ᒋᔭᐙᐤ ᓇᒧᐃ ᒋᒋᔅᑌᔨᒫᐙᐅᒡ ᐊᓂᒌ ᑳ ᒋᔅᑎᒫᑎᓰᑣᐤ᙮ ᒥᒄ ᒫᒃ ᓇᒪᔦᐅᒡ ᐋ ᐊᓂᒌ ᑳ ᒦᓯᑎᓰᑣᐤ ᓈᔥᒡ ᑳ ᐐ ᐃᐦᑑᑖᑖᑯᒡ, ᒫᒃ ᐎᔮᔅᑯᓂᒉᐅᑲᒥᑯᐦᒡ ᑳ ᐃᑐᐦᑕᐦᐄᑖᑯᒡ
7 ᐁᐅᑯᓂᒡ ᐅᒌ ᑳ ᒦᓯᑎᓰᑣᐤ ᓈᔥᒡ ᒥᔮᔦᔨᐦᑕᐦᒀᐤ ᐊᓂᔫ ᐃᔑᓂᐦᑳᓱᐎᓂᔫ ᑳ ᒋᔅᑌᔨᐦᑖᑯᓂᔨᒡ᙮ ᐁᐅᒄ ᐅᔫ ᐃᔑᓂᐦᑳᓱᐎᓂᔫ ᑳ ᐅᐦᒋ ᐎᔦᔨᒥᑖᒄ ᒋᔐᒪᓂᑑ ᒉᒌ ᑎᐱᔦᐅᓰᑐᑖᑯᐌᒄ᙮
8 ᑖᐺ ᒫᒃ ᒋᑲ ᒥᔪᑑᑌᓈᐙᐤ ᓇᓂᐦᐄᐦᑕᒣᑴ ᐊᓐ ᒫᐅᒡ ᑳ ᒋᔅᑌᔨᐦᑖᑯᐦᒡ ᐐᔓᐌᐎᓐ, ᐊᓐ ᑳ ᐃᑕᔥᑌᒡ ᒋᔐᒪᓂᑑ ᐅᑕᔨᒧᐎᓂᐦᒡ, ᓵᒋᐦᐄ ᑯᑕᒃ ᐊᐌᓐ ᒬᐦᒡ ᒌ ᐁ ᐃᔥᐱᔥ ᓵᒋᐦᐄᓱᔨᓐ᙮
9 ᒌᔥᐱᓐ ᒫᒃ ᐋᐦᒌᐤᐦ ᐃᑌᔨᒣᑴ ᐯᔭᒄ ᐊᐌᓐ ᑖᓐ ᐁ ᐃᑌᔨᒣᒄ ᑯᑕᒃ ᒋᒪᒋᑑᑌᓈᐙᐤ᙮ ᒋᑖᐺᒪᑯᓈᐙᐤ ᐁ ᒪᒋᑑᑕᒣᒄ ᐐᔓᐌᐎᓐ ᐅᐦᒋ᙮
10 ᐌᔥ ᐊᓐ ᐊᐌᓐ ᒥᓯᐌ ᐊᓂᔫ ᐐᔓᐌᐎᓂᔫ ᑳ ᓇᓂᐦᐄᐦᑕᐦᒃ ᒥᒄ ᒫᒃ ᐯᔭᒄ ᒉᒀᔫ ᐊᓂᑦ ᑖᓐ ᐁ ᐃᑕᔥᑌᔨᒡ ᐲᑯᓇᐦᑫ ᒥᓯᐌ ᐊᓂᔫ ᐐᔓᐌᐎᓂᔫ ᐁ ᐲᑯᓇᐦᒃ ᐃᔑᓈᑯᓲ᙮
11 ᐊᓐ ᐊᐌᓐ ᑳ ᐃᑗᑦ, ᐁᑳᐐ ᐱᓯᒀᑎᓰᐦ, ᒌ ᐃᑗᐤ ᑲᔦ, ᐁᑳᐐ ᓂᐸᐦᐄ ᐊᐌᓐ᙮ ᐋᑦ ᒫᒃ ᐁᑳ ᐯᔑᒀᑎᓰᐗᓀ ᑳ ᓂᐸᐦᐋᐅᑌ ᒫᒃ ᐊᐌᓐ ᒋᐲᑯᓀᓐ ᒥᓯᐌ ᐐᔓᐌᐎᓐ᙮
12 ᒋᐹ ᐃᔑ ᐊᔨᒥᓈᐙᐤ ᒫᒃ ᑲᔦ ᒋᐹ ᐃᐦᑎᓈᐙᐤ ᒬᐦᒡ ᐊᐌᓂᒌ ᐁᔥᒄ ᒉ ᐎᔮᔅᑯᓈᑲᓅᑣᐤ ᐊᓂᔫ ᐐᔓᐌᐎᓂᔫ ᑳ ᐋᐱᐦᑯᓂᐌᒪᑲᓂᔨᒡ ᐅᐦᒋ᙮
13 ᐊᐌᓐ ᐁᑳ ᑳ ᒋᔅᑎᒫᒉᔨᒫᑦ ᑯᑕᒃ ᐊᐌᔫ ᓇᒧᐃ ᑲᔦ ᐎᔭ ᑲᑕ ᐅᐦᒋ ᒋᔅᑎᒫᒉᔨᒫᑲᓅ ᐃᔅᑯᑕᒃ ᐎᔮᔅᑯᓈᑲᓅᑌ᙮ ᒥᒄ ᒫᒃ ᐊᓐ ᐊᐌᓐ ᑳ ᒋᔅᑎᒫᒉᔨᒫᑦ ᑯᑕᒃ ᐊᐌᔫᐦ ᓇᒧᐃ ᑲᑕ ᐅᐦᒋ ᑯᔥᑖᒎ ᒉᒌ ᐎᔮᔅᑯᓈᑲᓅᑦ᙮
ᑖᐺᐦᑕᒧᐎᓐ ᐁᒄ ᒫᒃ ᓵᒋᐦᐄᐌᐎᓐ
14 ᓃᒋᔖᓂᑎᒄ, ᑖᓐ ᐃᔑ ᐎᔮᐦᐸᒡ ᐊᐌᓐ ᐁ ᐃᑗᑦ, ᓂᑖᐺᔨᒫᐤ ᒋᔐᒪᓂᑑ, ᐁᑳ ᒫᒃ ᒥᔪᑑᑕᒧᐙᑦ ᐊᐌᔫ᙮ ᑲᑕᒌ ᐱᒫᒋᐦᐄᑰ ᐋ ᒥᒄ ᐁ ᐃᑗᑦ, ᓂᑖᐺᐦᑌᓐ᙮
15 ᐃᐦᑖᑦ ᐋᐦᒡ ᒌᒋᔖᓅ ᒫᒃ ᒌᒋᔖᓂᔅᑴᒥᓅ ᐁ ᓂᑕᐌᔨᐦᑕᐦᒃ ᒉᒀᔫ ᒉ ᒋᒋᔥᑲᐦᒃ, ᒫᒃ ᒦᒋᒥᔫ ᐁ ᓅᐦᑌᐸᔨᑦ,
16 ᑖᓐ ᐃᔑ ᐎᔮᐦᐸᒡ ᒥᒄ ᐁ ᐃᑖᑦ, ᒋᔐᒪᓂᑑ ᒋᑲ ᔕᐌᔨᒧᒄ᙮ ᒌᔓᐙᔅᐱᓲ ᑲᔦ ᒌᔥᐳᐦᐄᓱᐦ, ᐁᑳ ᒫᒃ ᒥᔭᑌ ᐊᓂᔫᐦ ᒉᒀᔫ ᑖᓐ ᐁ ᐃᔑ ᓂᑕᐌᔨᐦᑕᐦᒃ᙮
17 ᐁᑯᓐ ᒫᒃ ᒬᐦᒡ ᐁ ᐃᔑᓈᑯᐦᒡ ᐊᐌᓐ ᐁ ᐃᑗᑦ, ᓂᑖᐺᔨᒫᐤ ᒋᔐᒪᓂᑑ ᐁᑳ ᒫᒃ ᓅᑯᓂᔨᒡ ᑖᓐ ᐁ ᐃᔑ ᒥᔪᑑᑕᐦᒃ᙮ ᓇᒧᐃ ᐋᐸᑕᓂᔫ ᐅᑖᐺᐦᑕᒧᐎᓐ᙮
18 ᑲᑕ ᒌ ᐃᔑᓈᑯᓐ ᐸᔅᒡ ᐊᐌᓂᒌ ᒉᒌ ᐃᑗᑣᐤ, ᒋᑕᔮᓐ ᑖᐺᐦᑕᒧᐎᓐ ᒋᔭ, ᐁᒄ ᓂᔭ ᓂᒥᔪ ᐊᑐᔥᒉᓐ᙮ ᓂᐹ ᐃᑖᐤ ᐆ ᐊᐌᓐ, ᐯᒋ ᐙᐸᐦᑏᐦ ᐋᐦᒡ ᒋᑖᐺᐦᑕᒧᐎᓐ ᐁᑳ ᐁ ᐊᓯᑎᓇᒪᓐ ᒋᒥᔫ ᐊᑐᔥᒉᐎᓐ ᐁᒄ ᒫᒃ ᒉ ᐙᐸᐦᑏᑖᓐ ᓂᔭ ᓂᒥᔪ ᐊᑐᔥᒉᐎᓐ ᐁ ᐊᓯᑎᓇᒫᓐ ᐊᓂᑦ ᓂᑖᐺᐦᑕᒧᐎᓐ᙮
19 ᒋᑖᐺᐦᑌᓐ ᐋ ᒥᒄ ᐁ ᐯᔭᑯᔑᑦ ᒋᔐᒪᓂᑑ᙮ ᒥᔻᔔ ᐆ ᐁ ᑖᐺᐦᑕᒪᓐ᙮ ᑲᔦ ᐎᔭᐙᐤ ᒪᒋᐊᐦᒑᐦᑯᒡ ᑖᐺᐦᑕᒧᒡ ᐅᔫ, ᓇᓇᒥᐸᔫᒡ ᒫᒃ ᐁ ᐃᔥᐱᔥ ᓭᒋᓯᑣᐤ᙮
20 ᒋᓂᑕᐌᔨᐦᑌᓐ ᐋ ᒉᒌ ᐙᐸᐦᑏᑯᔨᓐ, ᒋᔭ ᒌᔥᑴᐦᑳᓐ, ᐁᑳ ᐎᔦᔥ ᐃᔑᓈᑯᓂᔨᒡ ᐊᐌᓐ ᐅᑖᐺᐦᑕᒧᐎᓐ ᐁᑳ ᓅᑯᓂᔨᒉ ᐅᑕᑐᔥᒉᐎᓐ᙮
21 ᑖᓂᑌ ᑳ ᐅᐦᒋ ᑯᐃᔅᑯᓈᑯᐦᐋᑲᓅᑦ ᐐ ᐊᓂᔮᓈ ᑰᐦᑖᐐᓅ ᐁᑉᕋᐦᐊᒻ ᒋᔐᒪᓂᑑ ᐃᔑ ᐁ ᐃᐦᑖᔨᒡ᙮ ᓇᒧᐃ ᐋ ᐊᓂᔫ ᐁ ᒌ ᐸᒋᔥᑌᔨᒫᑦ ᐅᑯᓯᓴ ᐊᐃᓴᒃ ᒋᔐᒪᓂᑑ ᐃᔑ ᐁ ᐃᐦᑖᔨᒡ ᐌᐦᒌ ᑯᐃᔅᑯᓈᑯᐦᐋᑲᓅᑦ, ᐸᒋᔥᑎᓂᒉᓈᐱᔅᑯᐦᒡ ᑳ ᐸᒋᔥᑎᓈᑦ᙮
22 ᒋᐙᐸᐦᑕᒧᐙᓐ ᐋ ᑖᓐ ᑳ ᐃᔑ ᒫᒨ ᐋᐸᑎᓰᒪᑲᓂᔨᒡ ᐅᑖᐺᐦᑕᒧᐎᓐ ᐁᒄ ᒫᒃ ᐅᑕᑐᔅᒉᐎᓐ᙮ ᐊᓂᔫ ᐅᑖᐺᐦᑕᒧᐎᓐ ᒌ ᒥᑐᓈᑯᓂᔫ ᐅᑕᑐᔅᒉᐎᓂᐦᒡ ᐅᐦᒋ᙮
23 ᒌ ᑎᐱᐸᔫ ᒫᒃ ᐊᓐ ᑳ ᐃᑕᔥᑌᒡ ᒋᔐᒪᓂᑑ ᐅᑕᔨᒧᐎᓂᐦᒡ,
ᐁᑉᕋᐦᐊᒻ ᒌ ᑖᐺᔨᒣᐤ ᒋᔐᒪᓂᑑ ᐁᐅᒄ ᒫᒃ ᐌᐦᒌ ᐃᑌᔨᒥᑯᑦ ᐁ ᑯᐃᔅᑯᑖᑎᓰᑦ᙮ ᐁᑉᕋᐦᐊᒻ ᒫᒃ ᒋᔐᒪᓂᑑ ᐅᐐᒉᐙᑲᓐ ᒌ ᐃᔑᓂᐦᑳᑖᑲᓅ᙮
24 ᒋᐙᐸᐦᑌᓐ ᒫᒃ, ᑯᐃᔅᑯᓈᑯᐦᐋᑲᓅ ᐊᐌᓐ ᐊᑐᔥᒉᐎᓂᐦᒡ ᐅᐦᒋ ᓇᒧᐃ ᒥᒄ ᑖᐺᐦᑕᒧᐎᓂᐦᒡ ᐅᐦᒋ᙮
25 ᒬᐦᒡ ᐊᓐ ᐱᓯᒀᑎᓰᔅᑴᐤ ᕃᐦᐋᑉ ᓇᒧᐃ ᐋ ᐅᐦᒋ ᑯᐃᔅᑯᓈᑯᐦᐋᑲᓅ ᐊᓂᔫ ᐅᐦᒋ ᑖᓐ ᑳ ᐃᐦᑎᑦ᙮ ᒌ ᐐᒋᐦᐁᐤ ᒎᐗ ᔑᒫᑲᓂᔕ ᐁ ᒌ ᐲᐦᑕᑲᐦᐋᑦ ᐐᒋᐦᒡ ᑲᔦ ᒫᒃ ᐁ ᒌ ᒋᐦᒋᑎᔕᐦᐙᑦ ᑯᑕᒋᔫ ᒣᔅᑲᓈᔫ ᐁ ᒌ ᐙᐸᐦᑎᔮᑦ ᒉ ᐋᐸᒋᐦᑖᔨᒡ᙮
26 ᐌᔥ ᐁᑳ ᐃᐦᑖᑦ ᐊᐦᒑᐦᒄ ᒦᔫᐦᒡ ᓂᐲᒪᑲᓐ ᐊᓐ ᒦᔫ᙮ ᐁᑯᓐ ᒬᐦᒡ ᐁ ᐃᔑᓈᑯᐦᒡ ᑖᐺᐦᑕᒧᐎᓐ ᐁᑳ ᐁ ᐊᓯᒡ ᐃᐦᑕᑯᐦᒡ ᒥᔪ ᐊᑐᔥᒉᐎᓐ ᓂᐲᒪᑲᓐ ᐊᓐ ᑖᐺᐦᑕᒧᐎᓐ᙮