11
ᒋᔐᒪᓂᑑ ᐁ ᒋᔐᐙᑐᑕᐙᑦ ᐅᑏᓃᒻᐦ ᐃᔅᕋᐁᓪ
1 ᒦᓐ ᑯᑕᒡ ᒉᒀᓐ ᓂᐐ ᑲᑴᒋᐦᒉᔨᒧᓐ᙮ ᒌ ᐌᐱᓀᐤ ᐋ ᒋᔐᒪᓂᑑ ᐅᑏᓃᒻ᙮ ᓇᒧᐃ ᑮᐹ ᐅᐦᒋ ᐌᐱᓀᐤ᙮ ᐃᔅᕋᐁᓪ ᐄᓅ ᑲᔦ ᓂᔭ᙮ ᐁᑉᕋᐦᐊᒻ ᐁ ᐃᐦᑖᑦ ᓂᒌ ᐅᐦᒋ ᐋᓂᔅᒉ ᐱᒫᑎᓰᓐ᙮ ᐯᓐᒐᒥᓐ ᑳ ᐃᔑᓂᐦᑳᓱᑣᐤ ᐅᐯᔭᑯᑌᐅᓯᔫᒡ ᐁᑯᑦ ᐌᐦᒋᔮᓐ᙮
2 ᓇᒧᐃ ᐅᐦᒋ ᐌᐱᓀᐤ ᒋᔐᒪᓂᑑ ᐅᑏᓃᒻᐦ, ᐊᓂᔫᐦ ᔖᔥ ᐊᓂᑌ ᐌᔅᑲᒡ ᑳ ᐎᔮᐸᒫᑦ ᐎᔭ ᒉᒌ ᑎᐱᔦᐅᓰᑦ᙮ ᒋᒋᔅᒉᔨᐦᑌᓈᐙᐤ ᑖᓐ ᐁ ᐃᔑ ᐋᔨᒨᒫᑲᓅᑦ ᐁᓚᐃᒐ ᐊᓂᑌ ᒋᔐᒪᓂᑑ ᐅᑕᔨᒧᐎᓂᐦᒡ᙮ ᒌ ᐋᔨᒨᑕᒧᐌᐤ ᒋᔐᒪᓂᑑᐦ ᑖᓐ ᑳ ᐃᔑ ᐁᑳ ᒫᒧᔮᒻ ᐅᐦᒋ ᐃᐦᑎᔨᒡ ᐃᔅᕋᐁᓪ ᐄᓅᐦ, ᒌ ᐃᑗᐤ,
3 ᐅᑎᐯᔨᐦᒋᑫᐤ, ᒌ ᓂᐸᐦᐁᐅᒡ ᒋᒋᔅᒋᐌᐦᐄᒉᓰᒻᐦ ᐅᒌ ᐄᓅᒡ᙮ ᒌ ᐗᓈᒋᐦᑖᐅᒡ ᒋᐸᒋᔥᑎᓂᒉᓈᐱᔅᑾᐦ᙮ ᓂᔭ ᒫᐦᒋᔥᑕᐃ ᓂᐯᔭᑯᔑᓐ ᐁ ᓅᔔᔥᑳᑖᓐ᙮ ᓂᐐ ᓂᐸᐦᐄᑰᒡ ᒫᒃ ᑲᔦ ᓂᔭ᙮
4 ᐁᒄ ᒫᒃ ᑳ ᐃᑎᑯᑦ ᐅᑎᐯᔨᐦᒋᑫᐤᐦ,
ᓃᔣᔣ ᒋᔐ ᒥᑖᐦᑐᒥᑕᓅ ᓂᒌ ᐸᐦᑳᓂᐦᐋᐅᒡ ᐊᓂᒌ ᐊᐌᓂᒌ ᐁᑳ ᐐᔅᑳᑦ ᐅᐦᒋ ᓃᐱᔅᑰᐱᔅᑕᐙᑣᐤ ᐊᓂᔫᐦ ᒪᓂᑑᐦᑳᓐ ᐯᓪ ᑳ ᐃᔑᓂᐦᑳᓱᔨᒡ᙮
5 ᐁᑯᓐ ᒫᒃ ᒬᐦᒡ ᐁ ᐃᔅᐸᔨᐦᒡ ᐊᓄᐦᒌᔥ᙮ ᐃᐦᑖᐅᒡ ᐃᔅᕋᐁᓪ ᐄᓅᒡ ᐁᑳ ᒥᐦᒉᑎᑣᐤ ᒋᔐᒪᓂᑑᐦ ᐁ ᒌ ᐎᔮᐸᒥᑯᑣᐤ ᐊᓂᔫ ᐅᐦᒋ ᐁ ᒋᔐᐙᑎᓰᑦ᙮
6 ᐁ ᒋᔐᐙᑎᓰᑦ ᒋᔐᒪᓂᑑ ᐁᐅᒄ ᐅᔫ ᐌᐦᒌ ᐎᔦᔨᒥᑯᑣᐤ᙮ ᓇᒧᐃ ᐐ ᐊᓂᔦᔫ ᐁ ᒥᔪᑑᑕᐦᒀᐤ᙮ ᐌᔥ ᐎᔦᔨᒫᑦ ᐊᐌᔫ ᐊᓂᔫ ᐅᐦᒋ ᐁ ᒥᔪᑑᑕᒥᔨᒡ, ᓇᒧᐃ ᒋᐦᒋᐌ ᒋᐹ ᐅᐦᒋ ᐃᔑᓈᑯᓂᔫ ᐊᓂᔫ ᐅᒋᔐᐙᑎᓰᐎᓐ᙮
7 ᓇᒧᐃ ᒫᒃ ᐅᐦᒋ ᒥᔅᑲᒧᒡ ᐊᓂᒌ ᐃᔅᕋᐁᓪ ᐄᓅᒡ ᐊᓂᔫ ᓈᔥᒡ ᑳ ᓈᓂᑐᐌᔨᐦᑕᐦᒀᐤ᙮ ᒥᒄ ᐊᓂᒌ ᒋᔐᒪᓂᑑᐦ ᑳ ᐎᔮᐸᒥᑯᑣᐤ ᐁᐅᑯᓂᒡ ᐊᓂᒌ ᑳ ᒥᔅᑲᐦᒀᐤ᙮ ᐁᒄ ᐊᓂᒌ ᑯᑕᑲᒡ ᐌᑖᒡ ᓇᒧᐃ ᐅᐦᒌ ᐯᐦᑕᐌᐅᒡ ᒋᔐᒪᓂᑑᐦ ᑲᔦ ᓇᒧᐃ ᐅᐦᒌ ᓂᓯᑐᐦᑕᒧᒡ᙮
8 ᐁᐅᒄ ᐌᔥ ᑖᐺ ᑳ ᐃᑕᔥᑌᒡ ᐊᓂᑌ ᒋᔐᒪᓂᑑ ᐅᑕᔨᒧᐎᓂᐦᒡ,
ᒌ ᐃᐦᑑᑖᑰᒡ ᒋᔐᒪᓂᑑᐦ ᒥᑐᓐ ᐁᑳ ᒉᒀᔫ ᒉᒌ ᓂᓯᑐᐦᑕᐦᒀᐤ ᐊᐦᒑᐦᑯᐎᓂᐦᒡ ᐃᔑ᙮ ᒌ ᐃᐦᑑᑖᑰᒡ ᐁᑳ ᒉᒌ ᐙᐸᐦᑕᒧᐙᑣᐤ ᑖᓐ ᐁ ᐃᐦᑎᔨᒡ ᑲᔦ ᐁᑳ ᒉᒌ ᐯᐦᑕᐦᐙᑣᐤ ᑖᓐ ᐁ ᐃᑗᔨᒡ᙮ ᐁᔥᒄ ᐊᓄᐦᒌᔥ ᑳ ᒌᔑᑳᔨᒡ ᐁᑯᓐ ᐁ ᐃᔑᓈᑯᓯᑣᐤ᙮
9 ᐊᓂᔮ ᒋᔐᐅᒋᒫᐤ ᑌᐱᑦ ᑲᔦ ᐎᔭ ᒌ ᐃᑕᓯᓇᐦᐄᒉᐤ,
ᐁᑯᔥ ᐁ ᑕᓱᐐᑯᑣᐤ ᒫᒃ ᐁ ᓇᒀᑎᑯᑣᐤ ᒋᑲ ᐃᔑᓈᑯᓂᔫᐦ ᐅᒪᑯᔐᐎᓇᐙᐤᐦ᙮ ᐁᑯᔥ ᒋᑲ ᐸᐦᒋᔑᒥᑰᒡ ᐊᓂᔫᐦ ᐅᒪᑯᔐᐎᓇᐙᐤᐦ᙮ ᐁᑯᔥ ᑲᑕ ᐗᐌᔑᐦᐋᑲᓅᒡ᙮
10 ᓂᑐᑕᒫᓐ ᒉᒌ ᐋᑰᒑᐱᓈᑲᓅᑣᐤ ᒉᒌ ᐁᑳ ᐙᐸᐦᑕᐦᒀᐤ᙮ ᓂᑐᑕᒫᓐ ᑳᒋᒉ ᒉᒌ ᐙᒋᓯᑣᐤ ᐁ ᐃᔥᐱᔥ ᑯᔑᑯᔥᑳᑯᑣᐤ ᐅᑖᔨᒣᔨᐦᑕᒧᐎᓇᐙᐤᐦ᙮
11 ᒦᓐ ᑯᑕᒡ ᒉᒀᓐ ᓂᐐ ᑲᑴᒋᐦᒉᒧᓐ᙮ ᐃᔅᑯᑕᒃ ᑳ ᐋᑕᐌᔨᒫᑣᐤ ᒋᔐᒪᓂᑑᐦ ᐊᓂᒌ ᒎᐗ ᑳ ᐃᑎᔅᑳᓀᓯᑣᐤ, ᒌ ᓈᔅᐱᒡ ᐸᐦᒋᔑᓅᒡ ᐋ ᐊᓂᔫ ᑳ ᐸᐦᒋᔑᐦᒀᐤ᙮ ᓇᒧᐃ ᐅᐦᒋ ᓈᔅᐱᒡ ᐸᐦᒋᔑᓅᒡ᙮ ᐊᓂᔫ ᐁ ᐋᑕᐌᔨᒫᑣᐤ ᒋᔐᒪᓂᑑᐦ ᐁᑯᑦ ᑳ ᐅᐦᒋ ᓂᐦᐄᐸᔨᐦᑖᔨᒡ ᒉᒌ ᐱᒫᒋᐦᐋᔨᒡ ᐊᓂᔫᐦ ᐁᑳ ᒎᐗ ᑳ ᐃᑎᔅᑳᓀᓯᔨᒡ᙮ ᒌ ᐱᒫᒋᐦᐁᔫᐦ ᒫᒃ ᐊᓂᔫ ᐁᑳ ᒎᐗ ᑳ ᐃᑎᔅᑳᓀᓯᔨᒡ ᒉᒌ ᐅᐦᑌᔨᐦᑕᐦᒀᐤ ᐊᓂᒌ ᒎᐗ ᑳ ᐃᑎᔅᑳᓀᓯᑣᐤ᙮
12 ᐊᓂᑦ ᑳ ᒪᒋᑑᑕᐦᒀᐤ ᐊᓂᒌ ᒎᐗ ᑳ ᐃᑎᔅᑳᓀᓯᑣᐤ ᐁᑯᑦ ᓈᔥᒡ ᑳ ᔕᐌᔨᒫᑦ ᒋᔐᒪᓂᑑ ᒥᓯᐌ ᐊᓂᔫ ᑯᑕᒃ ᐊᐌᔫᐦ ᐋᐦᒌᐤᐦ ᑳ ᐃᑎᔅᑳᓀᓯᔨᒡ᙮ ᑲᔦ ᒫᒃ ᐊᓂᔫ ᐁ ᒌ ᐸᐦᒋᔑᓂᑣᐤ ᐁᑯᑦ ᑲᔦ ᒋᔐᒪᓂᑑ ᑳ ᐅᐦᒋ ᒥᔅᑕ ᔕᐌᔨᒫᑦ ᐊᓂᔫᐦ ᐁᑳ ᒎᐗ ᑳ ᐃᑎᔅᑳᓀᓯᑣᐤ᙮ ᒉᔥᑎᓈᑌᔨᐦᑖᑯᓐ ᒫᒃ ᐁᑎᑑ ᒉ ᒥᔖᔨᒡ ᒋᔐᒪᓂᑑᐦ ᐅᔕᐌᔨᐦᒋᒉᐎᓐ ᑳᐤ ᓂᑐᐙᐸᒥᑯᑌ ᒥᓯᐌ ᒎᐗ ᐄᓅᐦ᙮
ᒋᔐᒪᓂᑑ ᐁ ᐱᒫᒋᐦᐋᑦ ᐁᑳ ᒎᐗ ᑳ ᐃᑎᔅᑳᓀᓯᔨᒡ ᐊᐌᔫᐦ
13 ᐁᒄ ᒫᒃ ᒋᔭᐙᐤ ᐁᑳ ᒎᐗ ᑳ ᐃᑎᔅᑳᓀᓯᔦᒄ ᒉ ᐊᔨᒥᐦᐄᑕᑯᒡ᙮ ᐁᐅᒄ ᓂᔭ ᒋᑕᐸᔅᑕᓕᒧᐙᐤ᙮ ᒨᔥ ᒫᒃ ᒋᐦᒋᐌ ᓂᑲ ᐃᑌᔨᐦᑕᒥᐦᐄᑰᓐ ᐆ ᐋᐸᑎᓱᐎᓐ᙮
14 ᐗᐸᒥᑣᐌᓂᒡ ᓃᒡ ᒎᐗ ᐄᓅᒡ ᐁ ᐙᐐᐦᑕᒫᑕᑯᒡ ᒥᔻᒋᒧᐎᓐ ᒋᑲ ᒌ ᐃᔑᓈᑯᓂᔫ ᒉᒌ ᐃᐦᑑᑖᑯᑣᐤ ᐸᔅᒡ ᑳᐤ ᒉᒌ ᓂᑐᐙᐸᒫᑣᐤ ᒋᔐᒪᓂᑑᐦ ᐁᒄ ᒫᒃ ᒉ ᐱᒫᒋᐦᐅᑣᐤ᙮
15 ᒣᒀᒡ ᐁᑳ ᑳ ᐱᔅᑳᑎᑯᑣᐤ ᒋᔐᒪᓂᑑᐦ ᐊᓂᒌ ᒎᐗ ᑳ ᐃᑎᔅᑳᓀᓯᑣᐤ ᐁᑯᑦ ᑳ ᐅᐦᒋᐸᔨᔨᒡ ᒥᓯᐌ ᐊᓂᒌ ᑯᑕᑲᒡ ᐋᐦᒌᐤᐦ ᑳ ᐃᑎᔅᑳᓀᓯᑣᐤ ᒉᒌ ᐐᒉᐙᑲᓂᔅᑕᒧᐙᑲᓅᑣᐤ ᒋᔐᒪᓂᑑᐦ᙮ ᐃᔅᑯᑕᒃ ᒫᒃ ᑳᐤ ᐅᑎᓂᑯᑣᐌᓂᒡ ᒋᔐᒪᓂᑑᐦ ᐊᓂᒌ ᒎᐗ ᑳ ᐃᑎᔅᑳᓀᓯᑣᐤ ᒬᐦᒡ ᐊᐌᓂᒌ ᐁ ᒌ ᓂᐱᑣᐤ ᑳᐤ ᒫᒃ ᐁ ᐱᒫᑎᓰᑣᐤ ᒋᑲ ᐃᔑᓈᑯᓲᒡ᙮
16 ᐁ ᐸᐦᑴᓈᑦ ᐊᐌᓐ ᐅᔅᒑᐃᐦᑯᓈᐤᐦ ᐁ ᒪᒋᔥᑕᐌᐦᐊᒫᑦ ᒋᔐᒪᓂᑑ ᐃᔑ ᐁ ᐃᐦᑖᔨᒡ ᒥᓯᐌ ᐁ ᐃᔅᐱᒋᔥᑎᔨᒡ ᐊᓂᔫᐦ ᐋᐃᐦᑯᓈᐤ ᐎᔭ ᒋᔐᒪᓂᑑ ᐁ ᐊᔮᐙᑦ ᐃᔑᓈᑯᓂᔫ᙮ ᑲᔦ ᒫᒃ ᐎᔭ ᒋᔐᒪᓂᑑ ᑳ ᐸᒋᔥᑎᓇᒧᐙᑲᓅᑴ ᐊᓂᔫ ᐅᑕᐱᔫ ᑲᔦ ᐊᓂᔫᐦ ᐗᑎᐦᑯᓐᐦ ᐸᔦᐦᑲᓐᐦ ᐃᔑᓈᑯᓐ᙮
17 ᐊᓂᒌ ᐄᓅᒡ ᒎᐗ ᑳ ᐃᑎᔅᑳᓀᓯᑣᐤ ᐁᐅᒄ ᐅᒌ ᐊᓕᕝ ᒥᔅᑎᒄ ᐊᓂᑌ ᓂᐦᑖᐅᒋᐦᒋᑲᓐ ᐊᔅᒌᐦᒡ ᑳ ᓂᐦᑖᐅᒋᐦᐋᑲᓅᑦ᙮ ᒌ ᐃᐦᑕᑯᓐᐦ ᐗᑎᐦᑯᓐᐦ ᐁ ᒌ ᓈᑣᑲᐦᐄᑲᓅᐦᒀᐤ ᐊᓂᑦ ᐅᐦᒋ ᒥᔅᑎᑯᐦᒡ᙮ ᐯᔭᒄ ᒫᒃ ᐅᐗᑎᐦᑯᓐ ᓂᑕᒧᒄ ᐁ ᓂᐦᑖᐅᒋᑦ ᐊᓕᕝ ᒥᔅᑎᒄ ᒌ ᒋᑲᒧᐦᑖᑲᓅᔫ ᐊᓂᑦ᙮ ᒋᔭᐙᐤ ᒫᒃ ᐁᑳ ᒎᐗ ᑳ ᐃᑎᔅᑳᓀᓯᔦᒄ ᐁᐅᑯᓐ ᐊᓐ ᐊᓕᕝ ᒥᔅᑎᒄ ᐊᓂᑌ ᓂᑕᐐᓐ ᑳ ᓂᐦᑖᐅᒋᑦ᙮ ᐊᓄᐦᒌᔥ ᒫᒃ ᒋᒥᔪ ᓂᐦᑖᐅᒋᓈᐙᐤ ᐊᐦᒑᐦᑯᐎᓂᐦᒡ ᑲᔦ ᒋᔭᐙᐤ, ᒧᔮᒻ ᑖᓐ ᐁ ᐃᔑ ᒥᔪ ᓂᐦᑖᐅᒋᑣᐤ ᐊᐦᒑᐦᑯᐎᓂᐦᒡ ᐊᓂᒌ ᒎᐗ ᐄᓅᒡ᙮
18 ᐁᑳᐐ ᒫᒃ ᒋᑲ ᐅᐦᒋ ᒫᔦᔨᒫᐙᐅᒡ ᐊᓂᒌ ᒬᐦᒡ ᐗᐦᑎᐦᑯᓐᐦ ᐁ ᒌ ᓈᑣᑲᐦᐄᑲᓅᐦᒀᐤ ᑳ ᐃᔑᓈᑯᓯᑣᐤ᙮ ᒉᒀᓐ ᒉ ᐅᐦᒋ ᐐ ᓇᓈᐯᐅᒧᔦᒄ᙮ ᒬᐦᒡ ᑖᐺ ᐊᓂᑦ ᒥᔅᑎᑯᐦᒡ ᐁ ᐅᐦᒋᔦᒄ ᒋᑎᔑᓈᑯᓯᓈᐙᐤ᙮ ᐁᑯᑌ ᐌᐦᒋ ᒥᔪ ᓂᐦᑖᐅᒋᔦᒄ᙮ ᓇᒪᔦᐤ ᒋᔭᐙᐤ ᓀᐦᑖᐅᒋᐦᐁᒄ ᐆ ᒥᔅᑎᒄ᙮
19 ᒫᔅᑰᒡ ᐸᔅᒡ ᐊᓂᑦ ᐁ ᑕᔑᔦᒄ ᒋᑲ ᒌ ᐃᑗᓈᐙᐤ, ᐸᔅᒡ ᐗᑎᐦᑯᓐᐦ ᒌ ᓈᑣᓇᒻ ᒋᔐᒪᓂᑑ ᓂᔭ ᒦᔅᑯᒡ ᒉᒌ ᓂᐦᑖᐅᒋᔮᓐ ᑖᓂᑦ ᑳ ᓂᐦᑖᐅᒋᐦᒀᐤ ᐊᓂᔫᐦ ᐗᑎᐦᑯᓐᐦ᙮
20 ᑖᐺ ᑮᐹ᙮ ᒥᒄ ᒫᒃ, ᒋᔐᒪᓂᑑ ᒌ ᐄᒉᓀᐤ ᐊᓂᔫᐦ ᒎᐗ ᐄᓅᐦ ᐌᓴ ᐁ ᒌ ᐋᓄᐌᐦᑖᑯᑦ᙮ ᒋᔭ ᒫᒃ ᐐ, ᒋᒥᔪᓂᐦᑖᐅᒋᓐ ᐊᓂᑦ ᐊᓐ ᒥᔅᑎᒄ ᐌᔥ ᒋᒌ ᑖᐺᔨᒫᐤ ᒋᔐᒪᓂᑑ᙮ ᐁᑳᐐ ᒋᑲ ᐅᐦᒋ ᓇᓈᐯᐅᒧᓐ᙮ ᐃᐦᑕᑯᓐ ᑌᔭᑯᒡ ᒉᒌ ᔮᒀᒥᔨᓐ᙮
21 ᓇᒧᐃ ᐅᐦᒋ ᒪᓈᒋᐦᐁᐤ ᒋᔐᒪᓂᑑ ᐊᓂᔫᐦ ᒎᐗ ᑳ ᐃᑎᔅᑳᓀᓯᔨᒡ, ᐊᓂᔫᐦ ᒋᐦᒋᐌ ᐗᑎᐦᑯᓐᐦ ᐊᓂᑦ ᒥᔅᑎᑯᐦᒡ ᑳ ᐃᔑ ᑲᓇᐙᐸᒫᑲᓄᔨᒡ᙮ ᒋᑎᑌᔨᐦᑌᓐ ᐋ ᒫᒃ ᒉ ᒪᓈᒋᐦᐄᔅᒃ ᒋᔭ᙮
22 ᒋᐙᐸᐦᑕᒧᐙᓈᓅ ᒫᒃ ᑖᓐ ᐁ ᐃᔥᐱᔥ ᒥᔦᔨᐦᑖᑯᓯᑦ ᒋᔐᒪᓂᑑ ᑲᔦ ᒋᐙᐸᐦᑕᒧᐙᓈᓅ ᑖᓐ ᒉᒌ ᐃᔥᐱᔥ ᐁᑳ ᒪᓈᑎᓰᑦ᙮ ᓇᒧᐃ ᒪᓈᒋᐦᐁᐤ ᐊᓂᔫᐦ ᑳ ᐸᐦᒋᔑᓂᔨᒡ ᒥᒄ ᒫᒃ ᒥᔪᑑᑕᒧᐌᐤ ᐊᓂᔫ ᒨᔥ ᑳ ᐐ ᒥᔪᑑᑕᒥᔨᒡ ᐎᔭ ᐃᔑ ᐁ ᐃᐦᑖᑦ᙮ ᐁᑳ ᒫᒃ ᐆ ᐃᐦᑎᔨᓀ ᑲᔦ ᒋᔭ ᒋᑲ ᒪᓂᔔᒄ ᒋᔐᒪᓂᑑ᙮
23 ᒌᔥᐱᓐ ᒫᒃ ᒥᐦᒌᐌᔨᐦᑕᐦᒀᐌᓂᒡ ᐁ ᒌ ᐋᓄᐌᐦᑕᐦᒀᐤ ᐊᓂᒌ ᒎᐗ ᐄᓅᒡ ᒦᓐ ᑳᐤ ᒋᑲ ᒋᑲᒧᐦᐋᑲᓅᒡ ᑖᓂᑦ ᑳ ᐅᐦᒋ ᓂᐦᑖᐅᒋᑣᐤ᙮ ᐁᑯᓐ ᑖᐺ ᒉᒌ ᐃᐦᑑᑖᑯᑣᐤ ᒋᔐᒪᓂᑑᐦ᙮
24 ᒋᔭᐙᐤ ᐁᑳ ᒎᐗ ᑳ ᐃᑎᔅᑳᓀᓯᔦᒄ ᐁᐅᒄ ᒋᔭᐙᐤ ᐅᐗᑎᐦᑯᓐ ᓂᑕᒧᒄ ᑳ ᓂᐦᑖᐅᒋᑦ ᐊᓕᕝ ᒥᔅᑎᒄ ᒋᑎᔑᓈᑯᓯᓈᐙᐤ᙮ ᐆ ᒫᒃ ᐗᑎᐦᑯᓐ, ᓂᐦᑖᐅᒋᐦᒋᑲᓐ ᐊᔅᒌᐦᒡ ᑳ ᓂᐦᑖᐅᒋᑦ ᐊᓕᕝ ᒥᔅᑎᒄ ᐁᑯᑌ ᑳ ᒋᑲᒧᐦᑖᑲᓅᐦᒡ ᐋᑦ ᐁᑳ ᐊᓂᑦ ᐅᐦᒋ ᓂᐦᑖᐅᒋᐦᒡ᙮ ᐆ ᒫᒃ ᐊᓕᕝ ᒥᔅᑎᒄ ᑳ ᓂᐦᑖᐅᒋᐦᐋᑲᓅᑦ ᐁᐅᒄ ᐅᒌ ᒎᐗ ᐄᓅᒡ᙮ ᒉᔥᑎᓈᔥ ᒫᒃ ᒋᑲ ᒌ ᐃᐦᑑᑕᐌᐤ ᒋᔐᒪᓂᑑ ᐊᓂᔫᐦ ᒎᐗ ᑳ ᐃᑎᔅᑳᓀᓯᔨᒡ ᑳᐤ ᒉᒌ ᒋᐦᒋ ᓂᐦᑖᐅᒋᔨᒡ ᑖᓂᑦ ᔖᔥ ᑳ ᓂᐦᑖᐅᒋᔨᒡ ᐊᓂᑌ ᐯᒋ᙮
ᒥᓯᐌ ᐊᐌᔫᐦ ᐁ ᒋᔐᐙᑐᑕᐙᑦ ᒋᔐᒪᓂᑑ
25 ᓃᒋᔖᓂᑎᒄ, ᒋᓂᑐᐌᔨᒥᑎᓈᐙᐤ ᒉᒌ ᓂᓯᑐᐦᑕᒧᐌᒄ ᐅᔫ ᑳ ᐃᔑ ᒋᔅᒉᔨᐦᑖᑯᐦᑖᑦ ᒋᔐᒪᓂᑑ ᐁᒄ ᒫᒃ ᓇᒧᐃ ᒋᑲ ᐅᐦᒋ ᐃᑌᔨᐦᑌᓈᐙᐤ ᓈᔥᒡ ᐁ ᐄᑆᐦᑳᔦᒄ᙮ ᐊᓄᐦᒌᔥ ᒣᒀᒡ ᒥᐦᒉᑐ ᐊᓂᒌ ᒎᐗ ᑳ ᐃᑎᔅᑳᓀᓯᑣᐤ ᐐ ᓲᐦᒋᑕᒧᒡ᙮ ᓇᒧᐃ ᐐ ᑖᐺᐅᒉᔨᒣᐅᒡ ᒋᔐᒪᓂᑑᐦ᙮ ᒥᒄ ᒫᒃ ᒋᑲ ᐅᑎᐦᒋᐸᔫ ᑖᓂᑦ ᒉ ᑖᐺᐦᑕᐦᒀᐤ᙮ ᐁᔥᒄ ᒫᒃ ᐁᑳ ᐅᑎᐦᒋᐸᔨᐦᒡ ᐆ ᒥᓯᐌ ᐊᓂᒌ ᐁᑳ ᒎᐗ ᑳ ᐃᑎᔅᑳᓀᓯᑣᐤ ᑕᐦᑐ ᒥᒄ ᒉ ᐎᔮᐸᒥᑯᐙᑴᓂᒡ ᒋᔐᒪᓂᑑᐦ ᒉᒌ ᐱᒫᒋᐦᐅᑣᐤ, ᒋᑲ ᐱᒫᒋᐦᐆᒡ᙮
26 ᐁᒄ ᒫᒃ ᒥᓯᐌ ᐃᔅᕋᐁᓪ ᐄᓅᐦ ᒉ ᐱᒫᒋᐦᐋᑦ ᒋᔐᒪᓂᑑ᙮ ᒬᐦᒡ ᐁ ᐃᑕᔥᑌᒡ ᐊᓂᑌ ᒋᔐᒪᓂᑑ ᐅᑕᔨᒧᐎᓂᐦᒡ,
ᐊᓐ ᒉ ᐱᒫᒋᐦᐋᑦ ᐊᐌᔫ, ᓵᐃᔭᓂᐦᒡ ᒋᑲ ᐅᐦᑐᐦᑌᐤ᙮ ᒋᑲ ᐃᐦᑑᑕᐌᐤ ᐊᓂᔫᐦ ᒉᑲᑉ ᐅᑕᐙᔒᒥᔫ ᒉᒌ ᐴᓂᔨᒡ ᐁ ᒪᒋᑑᑕᒥᔨᒡ᙮
27 ᐁᐅᒄ ᐅᔫ ᒉ ᐃᔑ ᓂᔅᑯᒨᒡ ᒉᒌ ᐃᐦᑑᑕᒨᒀᐤ ᐌᐯᔨᐦᑕᒨᒀᐌᓂᒡ ᐅᒪᒋᐦᑣᐎᓇᐙᐤᐦ᙮
28 ᐊᓂᒌ ᒎᐗ ᑳ ᐃᑎᔅᑳᓀᓯᑣᐤ ᒌ ᐋᑕᐌᔨᐦᑕᒧᒡ ᒥᔻᒋᒧᐎᓂᔫ᙮ ᐁᑯᑦ ᐌᐦᒋ ᓅᑯᓂᔨᒡ ᐁ ᐅᐦᑳᑌᔨᒫᑣᐤ ᒋᔐᒪᓂᑑᐦ᙮ ᒉᒌ ᐱᒫᒋᐦᐅᔦᒄ ᒫᒃ ᒋᔭᐙᐤ ᐁᑳ ᒎᐗ ᑳ ᐃᑎᔅᑳᓀᓯᔦᒄ ᐁᑯᓐ ᐌᐦᒌ ᐃᔅᐸᔨᐦᒡ ᐆ᙮ ᔮᐸᒡ ᒫᒃ ᓵᒋᐦᐁᐤ ᒋᔐᒪᓂᑑ ᐊᓂᔫᐦ ᒎᐗ ᑳ ᐃᑎᔅᑳᓀᓯᔨᒡ᙮ ᐌᔥ ᐅᑖᓂᔅᒉ ᐙᐦᑯᒫᑲᓂᔫᐦ ᐊᓂᑌ ᐃᔑ ᐅᑖᐦᒡ ᒌ ᐎᔮᐸᒣᐤ ᒉᒌ ᐅᑏᓃᒥᑦ᙮ ᐁᒄ ᒫᒃ ᐊᓄᐦᒌᔥ ᑌᐱᔦᐅᓰᑦ ᐊᓂᔫᐦ ᒎᐗ ᑳ ᐃᑎᔅᑳᓀᓯᔨᒡ᙮
29 ᑖᐹ ᐐᔅᑳᑦ ᐄᒉᓀᐤ ᒋᔐᒪᓂᑑ ᐊᓂᔫᐦ ᑳ ᐎᔮᐸᒫᑦ᙮ ᑲᔦ ᓇᒧᐃ ᓂᐦᑖ ᑳᐤ ᐅᑎᓇᒻ ᐊᓂᔫ ᑖᓐ ᔖᔥ ᑳ ᐃᔑ ᒥᔮᑦ᙮
30 ᓇᒧᐃ ᑰᐦᒋ ᓇᓂᐦᐄᐦᑐᐙᐙᐤ ᒋᔐᒪᓂᑑ ᐊᓂᑌ ᐅᑖᐦᒡ ᒋᔭᐙᐤ ᐁᑳ ᒎᐗ ᑳ ᐃᑎᔅᑳᓀᓯᔦᒄ᙮ ᐊᓂᔫ ᒫᒃ ᐊᓄᐦᒌᔥ ᐁᑳ ᓇᓂᐦᐄᐦᑐᐙᑣᐤ ᐊᓂᒌ ᒎᐗ ᑳ ᐃᑎᔅᑳᓀᓯᑣᐤ ᐁᑯᓐ ᐌᐦᒋ ᒋᔅᑎᒫᒉᔨᒥᑖᒄ ᒋᔐᒪᓂᑑ᙮
31 ᐁᑯᓐ ᒫᒃ ᒬᐦᒡ ᒉ ᐃᐦᑑᑕᒧᐙᑲᓅᑣᐤ ᐊᓂᒌ ᒎᐗ ᑳ ᐃᑎᔅᑳᓀᓯᑣᐤ ᑖᓐ ᑳ ᐃᐦᑑᑕᒫᑯᔦᒄ᙮ ᐊᓄᐦᒌᔥ ᓇᒧᐃ ᓇᓂᐦᐄᐦᑐᐌᐅᒡ ᒋᔐᒪᓂᑑᐦ᙮ ᒥᒄ ᐁᔥᒄ ᒋᑲ ᐅᑎᐦᒋᐸᔫ ᐁ ᒋᔅᑎᒫᒉᔨᒥᑯᑣᐤ ᒋᔐᒪᓂᑑᐦ ᒬᐦᒡ ᑳ ᐃᔑ ᒋᔅᑎᒫᒉᔨᒥᑖᒄ ᑲᔦ ᒋᔭᐙᐤ᙮
32 ᒥᓯᐌ ᐊᐌᔫᐦ ᓇᒧᐃ ᓇᓂᐦᐄᐦᑖᑰ ᒋᔐᒪᓂᑑ᙮ ᐁᒄ ᒫᒃ ᑳ ᐃᐦᑑᑕᐙᑦ ᒥᓯᐌ ᐊᐌᔫᐦ ᒉᒌ ᒫᐦᒋᒀᐱᐦᑳᑎᑯᔨᒡ ᐊᓂᔫ ᐁᑳ ᓇᓂᐦᐄᐦᑖᑯᑦ ᐊᑎ ᒉᒌ ᐅᐦᒋ ᓂᐦᐄᐸᔨᐦᑖᑦ ᒥᓯᐌ ᐊᐌᔫᐦ ᒉᒌ ᒋᔅᑎᒫᒉᔨᒫᑦ᙮
ᒋᔅᑌᔨᐦᑖᑯᓲ ᒋᔐᒪᓂᑑ
33 ᓈᔥᒡ ᑖᐺ ᒥᔦᔨᐦᑖᑯᓲ ᒋᔐᒪᓂᑑ᙮ ᑖᐺ ᑲᒉᐦᑖᐌᔨᐦᑕᒻ ᑲᔦ ᒥᓯᐌ ᒉᒀᔫ ᒋᔅᒉᔨᐦᑕᒻ᙮ ᐃᔅᑯᑕᒃ ᐌᔦᔨᐦᑕᐦᒃ ᒉᒀᔫ ᓇᒧᐃ ᒥᑐᓐ ᐊᐌᔫᐦ ᒌ ᐐᐦᑕᒥᔫᐦ ᒉᒀᔫ ᐊᓂᑌ ᐌᐦᒋ ᐃᔑ ᐎᔦᔨᐦᑕᐦᒃ ᐊᓂᔫ ᒉᒀᔫ᙮ ᓇᒧᐃ ᐊᐌᔫᐦ ᒌ ᒥᔪ ᒋᔅᒉᔨᐦᑕᒥᔫᐦ ᑖᓐ ᐁ ᐃᐦᑎᑦ᙮
34 ᒬᐦᒡ ᐁ ᐃᑕᔥᑌᒡ ᐊᓂᑌ ᒋᔐᒪᓂᑑ ᐅᑕᔨᒧᐎᓂᐦᒡ,
ᓇᒧᐃ ᒥᑐᓐ ᐊᐌᓐ ᒋᔅᒉᔨᐦᑕᒻ ᑖᓐ ᐁ ᐃᑌᔨᐦᑕᒥᔨᒡ ᐅᑎᐯᔨᐦᒋᑫᐤᐦ᙮ ᓇᒧᐃ ᒥᑐᓐ ᐊᐌᓐ ᒋᑲ ᒌ ᐐᐦᑕᒧᐌᐤ ᑖᓐ ᒋᐹ ᐃᐦᑎᔫᐦ᙮
35 ᐃᐦᑖᐤ ᐋ ᐊᐌᓐ ᐁ ᒌ ᐅᐦᐋᑦ ᒋᔐᒪᓂᑑ ᒉᒀᔫ ᐁᒄ ᒫᒃ ᒉᒌ ᐃᔑᓈᑯᓂᔨᒡ ᐁ ᒪᓯᓇᐦᐊᒫᑯᑦ᙮
36 ᐎᔭ ᒋᔐᒪᓂᑑ ᒥᓯᐌ ᒉᒀᔫ ᒌ ᐅᔑᐦᑖᐤ᙮ ᐎᔭ ᒥᓯᐌ ᒉᒀᔫ ᓈᓈᑲᒋᐦᑖᐤ᙮ ᐎᔭ ᒥᓯᐌ ᒉᒀᔫ ᑎᐱᔦᐅᓰᐤ᙮ ᐎᔭ ᒫᒃ ᑳᒋᒉ ᑲᑕ ᐐ ᒋᔅᑌᔨᒫᑲᓅ᙮ ᐊᒣᓐ᙮