13
ᑖᓐ ᒋᐹ ᐃᔑ ᑲᓇᐙᐸᐦᑕᒻ ᐊᐌᓐ ᑎᐯᔨᐦᒉᐎᓂᔫ
1 ᒥᓯᐌ ᐊᐌᓐ ᓂᑐᐌᔨᐦᑖᑯᓲ ᒉᒌ ᓇᓂᐦᐄᐦᑕᐦᒃ ᑎᐯᔨᐦᒉᐎᓂᔫ ᐅᑕᐦ ᐊᔅᒌᐦᒡ᙮ ᒥᓯᐌ ᑎᐯᔨᐦᒉᐎᓐ ᑳ ᐃᐦᑕᑯᐦᒡ ᒋᔐᒪᓂᑑ ᒌ ᐸᒋᔥᑎᓇᒻ᙮ ᐎᔭ ᒌ ᐐᔥᑖᐤ ᒥᓯᐌ ᑎᐯᔨᐦᒉᐎᓂᔫ ᑖᓐ ᒉ ᐃᔑᓈᑯᓂᔨᒡ᙮
2 ᐁᐅᒄ ᐌᐦᒋ ᐃᔑᓈᑯᓂᔨᒡ ᐊᐌᓐ ᐁ ᓂᔥᑰᔥᑕᐦᒃ ᑎᐯᔨᐦᒉᐎᓂᔫ ᓂᔥᑰᔥᑕᒻ ᒉᒀᔫ ᒋᔐᒪᓂᑑᐦ ᐁ ᒌ ᐃᑕᔓᐙᑕᒥᔨᒡ ᒉᒌ ᐃᐦᑕᑯᓂᔨᒡ᙮ ᓂᔥᑰᔥᑕᐦᑫ ᒫᒃ ᐊᐌᓐ ᑎᐯᔨᐦᒉᐎᓂᔫ ᒋᑲ ᐃᐦᑑᑖᓲ ᒉᒌ ᐃᔑᓈᑯᓂᔨᒡ ᒉᒌ ᐗᐌᔑᐦᐋᑲᓅᑦ᙮
3 ᐊᓂᒌ ᑯᐃᔅᒄ ᑳ ᐃᐦᑎᑣᐤ ᓇᒧᐃ ᐃᐦᑕᑯᓂᔫ ᒉᒌ ᑲᒀᒋᔅᑕᒉᔨᒫᑣᐤ ᐊᓂᔫᐦ ᐐᔓᐌᐎᓐᐦ ᑳ ᓈᓈᑲᒋᐦᑖᔨᒡ᙮ ᐊᓂᒌ ᐁᐅᒄ ᐁᑳ ᒫᒧᔮᒻ ᑳ ᐃᐦᑎᑣᐤ ᐁᐅᑯᓂᒡ ᐁ ᐃᐦᑕᑯᓂᔨᒡ ᒉᒌ ᑲᒀᒋᔅᑕᒉᔨᒫᑣᐤ᙮ ᐁᑳ ᐱᓯᒄ ᐙ ᑲᒀᒋᔅᑕᒉᔨᒫᐅᑌ ᐊᓐ ᐐᔓᐌᐎᓐᐦ ᑳ ᓈᓈᑲᒋᐦᑖᑦ ᑯᐃᔅᒄ ᐃᐦᑎᐦ᙮ ᒋᑲ ᒌ ᐃᔑᓈᑯᓂᔫ ᐙᐙᒡ ᒉᒌ ᒥᔪ ᐋᔨᒨᒥᔅᒃ᙮
4 ᐌᔥ ᒋᔐᒪᓂᑑ ᐊᓂᔫᐦ ᐅᑖᐸᒋᐦᐋᑲᓐᐦ᙮ ᒋᑲ ᒥᔪᐸᔨᐙᓐ ᒫᒃ ᓇᓂᐦᐄᐦᑑᒪᑌᓐᐦ᙮ ᒌᔥᐱᓐ ᒫᒃ ᐁᑳ ᒫᒧᔮᒻ ᐃᐦᑎᔨᓀ ᓂᑕᐙᒡ ᒋᑲ ᑲᒀᒋᔅᑕᒉᔨᒫᐤ ᐊᓐ ᐐᔓᐌᐎᓐᐦ ᑳ ᓈᓈᑲᒋᐦᑖᑦ᙮ ᑖᐺ ᐌᓯᓐ ᒌ ᒥᔮᑲᓅ ᒉᒌ ᐗᐌᔑᐦᐋᑦ ᐊᐌᔫᐦ ᐁᑳ ᒫᒧᔮᒻ ᑳ ᐃᐦᑎᔨᒡ᙮ ᒋᔐᒪᓂᑑᐦ ᐋᔔ ᐋᐸᒋᐦᐄᑰ ᒉᒌ ᐗᐌᔑᐦᐋᑦ ᐊᓂᔫᐦ ᐁᑳ ᒫᒧᔮᒻ ᑳ ᐃᐦᑎᔨᒡ᙮
5 ᒋᓂᑐᐌᔨᐦᑖᑯᓯᓐ ᒉᒌ ᓇᓂᐦᐄᐦᑕᒪᓐ ᑎᐯᔨᐦᒋᒉᐎᓐ᙮ ᓇᓂᐦᐄᐦᑕᐦ ᓇᒧᐃ ᒥᒄ ᐁᑳ ᒉᒌ ᐗᐌᔑᐦᐃᔅᒃ ᒋᔐᒪᓂᑑ, ᐁᐅᑰ ᐃᐦᑎᐦ ᒉᒌ ᒉᔥᑎᓈᐦᐅᔨᓐ ᑖᐺ ᑯᐃᔅᒄ ᐁ ᐃᐦᑎᔨᓐ᙮
6 ᐁᑯᓐ ᑲᔦ ᐌᐦᒋ ᓂᑐᐌᔨᐦᑖᑯᓯᔨᓐ ᒉᒌ ᒌᔒᐦᑳᓱᔨᓐ ᔔᓕᔮᐤ᙮ ᒋᔐᒪᓂᑑᐦ ᐊᑐᔥᑯᐌᐅᒡ ᐊᓂᒌ ᑎᐯᔨᐦᒉᐎᓂᐦᒡ ᑳ ᐃᔑ ᐋᐸᑎᓯᑣᐤ ᐁᐅᒄ ᒫᒃ ᐅᔫ ᐁ ᐃᔑ ᐋᐸᑎᓰᐦᑲᐦᑕᐦᒀᐤ᙮
7 ᑖᓐ ᒥᒄ ᐁ ᐃᔑ ᐃᐦᑕᑯᓂᑴ ᔔᓕᔮᔫ ᐁ ᓂᑐᐌᔨᐦᑖᑯᓯᔨᓐ ᒉᒌ ᒌᔒᐦᑲᒪᓐ ᒌᔒᐦᑲ᙮ ᑖᓐ ᐁ ᐃᔑ ᓂᑐᐌᔨᐦᑖᑯᓲᓀ ᒉᒌ ᒋᔅᑌᔨᒪᑣᐤ ᐊᓂᒌ ᑎᐯᔨᐦᒉᐎᓂᐦᒡ ᑳ ᐃᔑ ᐋᐸᑎᓯᑣᐤ ᒋᔅᑌᔨᒪᒡ᙮
ᑖᓐ ᒋᐹ ᐃᐦᑑᑖᑐᓈᓅ
8 ᐁᑳᐐ ᒋᑲ ᒪᓯᓇᐦᐊᒧᐙᐤ ᐊᐌᓐ ᒉᒀᔫ᙮ ᒥᒄ ᑖᓐ ᒨᔥ ᐁ ᐃᔑ ᐃᐦᑕᑯᐦᒡ ᒋᐹ ᐃᔑ ᓵᒋᐦᐄᑐᓈᐙᐤ ᐁᐅᑯᓐ ᐊᓐ ᒋᐹ ᒪᓯᓇᐦᐊᒫᑎᓈᐙᐤ᙮ ᒥᓯᐌ ᑎᐱᑑᑕᒧᐌᐤ ᐊᐌᓐ ᒋᔐᒪᓂᑑᐦ ᐅᐐᔓᐌᐎᓂᔫ ᐐᒋᔖᓐᐦ ᐁ ᓵᒋᐦᐋᑦ᙮
9 ᐅᔫᐦ ᑲᒉᔅᑴᐎᓐᐦ, ᐁᑳᐐ ᐱᓯᒀᑎᓰᐦ, ᐁᑳᐐ ᓂᐸᐦᐄᐌᐦ, ᐁᑳᐐ ᑲᒉᒧᑦᐦ, ᐁᑳᐐ ᒧᔥᑌᓀᔨᐦᑕᒨ ᑯᑕᒃ ᐊᐌᓐ ᑖᓐ ᐁ ᐃᔑ ᐊᔮᑦ᙮ ᑯᑕᒃ ᒫᒃ ᑲᒉᔅᑴᐎᓐᐦ ᐁ ᐃᐦᑕᑯᓇᐙᑴᓐᐦ, ᒥᓯᐌ ᒫᒨ ᒋᑲ ᒌ ᐃᔑ ᑲᓇᐙᐸᐦᑖᑲᓅᐦ ᐊᓂᑦ ᐊᓐ ᐯᔭᒄ ᑲᒉᔅᑴᐎᓐ ᑳ ᐃᑕᔓᐌᒪᑲᐦᒡ, ᓵᒋᐦᐄ ᒋᔐᒪᓂᑑ ᒬᐦᒡ ᒋᔭ ᐁ ᐃᔥᐱᔥ ᓵᒋᐦᐄᓱᔨᓐ᙮
10 ᐊᐌᓐ ᐁ ᓵᒋᐦᐋᑦ ᐐᒋᔖᓐᐦ ᓇᒧᐃ ᓂᐦᑖ ᑲᑕ ᐅᐦᒋ ᐗᓂᑑᑕᐌᐤ᙮ ᐁ ᓵᒋᐦᐋᑦ ᐊᐌᓐ ᐐᒋᔖᓐᐦ ᒥᓯᐌ ᐊᓂᔫᐦ ᑲᒉᔅᑴᐎᓐᐦ ᓇᓂᐦᐄᐦᑕᒻ᙮
11 ᐁᑯᓐ ᐆ ᒋᐹ ᐃᔑ ᐱᒫᑎᓰᓈᐙᐤ ᐁ ᒋᔅᒉᔨᐦᑕᒣᒄ ᑖᓐ ᒉ ᐃᔅᐸᔨᐦᒡ ᐁᒄ ᐐᐸᒡ᙮ ᐃᑌᔨᐦᑖᑯᓐ ᐁᒄ ᑖᐺ ᒉᒌ ᐯᑯᐸᔦᒄ ᑲᔦ ᒉᒌ ᐋᓯᐦᒉᔨᐦᑕᒣᒄ᙮ ᐊᓐ ᐁ ᒌᔑᑳᒡ ᒉ ᐱᒫᒋᐦᐄᑕᐦᒄ ᒋᔐᒪᓂᑑ ᐁᑎᑑ ᐁᒄ ᐯᔓᓈᑯᓐ ᑳ ᐃᔥᐱᔑᓈᑯᐦᒡ ᐊᓂᑦ ᓃᔥᑕᒻ ᑳ ᑖᐺᔨᒪᐦᒄ ᒌᓴᔅ᙮
12 ᔖᔥ ᒉᑳᑦ ᒥᔮᐅᐸᔫ ᐁ ᑎᐱᔅᑳᒡ᙮ ᔖᔥ ᒋᑲ ᐅᑎᐦᒋᐸᔫ ᐁ ᒌᔑᑳᒡ᙮ ᐴᓃᑖᐤ ᐁ ᐃᐦᑑᑕᒧᐦᒄ ᐊᓂᔫᐦ ᒉᒀᔫᐦ ᑖᓐ ᐁ ᐃᔑ ᐃᐦᑑᑖᑲᓅᐦᒀᐤ ᐗᓂᑎᐱᔅᑯᐐᐎᓂᐦᒡ᙮ ᐃᐦᑑᑕᐦᑖᐤ ᐊᓂᔫᐦ ᒉᒀᔫᐦ ᒉ ᐐᒋᐦᐄᑯᔨᐦᒄ ᒉᒌ ᓂᔥᑰᔥᑑᐦᒄ ᒪᒋᒪᓂᑑ ᐙᔥᑌᐎᓂᐦᒡ ᐁ ᐃᐦᑖᔨᐦᒄ᙮
13 ᑯᐃᔅᒄ ᐃᔑ ᐱᒫᑎᓰᑖᐤ ᒉ ᓅᑯᐦᒡ ᒫᒃ ᑖᐺ ᐙᔥᑌᐎᓂᐦᒡ ᐁ ᐃᔑ ᐱᒫᑎᓰᐦᒄ᙮ ᐁᑳᐐ ᒋᑲ ᐅᐦᒋ ᐐᒋᐦᐄᐌᓈᓅ ᐁ ᒥᔨᐆᐦᑲᓱᓈᓅᐦᒡ ᐁ ᐐᓂᓲ ᐃᐦᑎᓈᓅᐦᒡ ᑲᔦ ᐁᑳᐐ ᐐᒋᐦᐄᐌᒄ ᐊᓂᑌ ᐁ ᒥᓂᐦᒀᓅᐦᒡ᙮ ᐁᑳᐐ ᓇᓈᐦᑰ ᒋᑲ ᐅᐦᒋ ᐃᔑ ᐐᓂᓲ ᐱᒫᑎᓰᓈᓅ᙮ ᐁᑳᐐ ᒋᑲ ᐅᐦᒋ ᑲᒌᐦᑳᒥᑐᓈᓅ᙮ ᐁᑳᐐ ᑲᔦ ᒋᑲ ᐅᐦᒋ ᐗᐅᐦᑌᔨᒥᑐᓈᓅ᙮
14 ᓂᔅᐱᑐᐙᐦᒄ ᐅᑎᐯᔨᐦᒋᑫᐤ ᒌᓴᔅ ᙭ ᒉᒌ ᐅᐦᒋ ᐙᐸᒫᑣᐤ ᐊᐌᓂᒌ ᑖᓐ ᐁ ᐃᑌᔨᐦᑖᑯᓯᔨᒡ᙮ ᐁᑳᐐ ᐋᐸᑌᔨᐦᑕᒧᒄ ᒋᔮᓱᐙᐤᐦ ᒉᒌ ᐃᐦᑑᑕᒣᒄ ᑖᓐ ᐁ ᐃᔑ ᒪᒋ ᓂᑐᐌᔨᐦᑕᒨᒪᑲᐦᒀᐤᐦ᙮