3
ᐋᑳ ᓂᐦᑖᐅᐦᑖᑦ ᓈᐹᐤ ᑳ ᒦᓂᐙᒋᐦᐋᑭᓅᑦ
1 ᐹᔨᒀᐤ ᐲᑎᕐ ᑭᔮᐦ ᒞᓐ ᒌ ᐄᑐᐦᑖᐅᒡ ᐊᓂᑖᐦ ᒋᔖᐊᔨᒥᐦᐋᐅᑭᒥᑯᐦᒡ ᓂᔥᑐ ᐋᐦ ᐄᔅᐱᔨᔨᒡ ᐋ ᒌ ᐃᔥᒀᐱᐦᑖᒌᔒᑳᔨᒡ, ᐊᓂᑎᐦ ᐋ ᐅᑎᐦᒋᐱᔨᔨᒡ ᑳ ᒌ ᐊᔨᒥᐦᐋᓂᐎᔨᒡ᙮
2 ᓈᔥᒡ ᒌ ᒥᓯᒋᔥᑑ ᐊᓐ ᒋᔥᑐᐦᑭᓐ ᐊᓂᑎᐦ ᐋ ᐅᐦᒋ ᐲᐦᒑᓂᐎᔨᒡ ᐊᓐ ᒋᔖᐊᔨᒥᐦᐊᐅᑭᒥᒄ ᑳ ᒥᔻᔑᒡ ᐃᔥᒀᐦᑖᒻ ᒌ ᐃᔑᓂᐦᑳᑖᑭᓂᐤ, ᐋᑯᑖᐦ ᑳ ᐊᐱᑦ ᓈᐹᐤ ᐋᐦᐋᑳ ᓂᐦᑖ ᐅᐦᒋ ᓂᐦᑖᐅᐦᑖᑦ᙮ ᐋᔑᑯᒻ ᒌᔑᑳᐤᐦ ᐋ ᒌ ᐄᑐᐦᑎᐦᐋᑭᓅᑦ ᐊᓂᑖᐦ, ᒑ ᒌ ᓂᑐᑎᒧᐙᑦ ᐊᐙᔨᐤᐦ ᔓᐎᔮᓐ ᐊᓂᑖᐦ ᐊᔨᒥᐦᐋᐅᑭᒥᑯᐦᒡ ᐋᐦ ᐄᑐᐦᑖᔨᒡ᙮
3 ᐄᔥᐱᐦ ᒫᒃ ᐊᓐ ᓈᐹᐤ ᐎᔮᐱᒫᑦ ᐊᓂᔮ ᐲᑎᕐᐦ ᑭᔮᐦ ᒞᓐ ᒑ ᐋᑎ ᐲᐦᒑᔨᒡ ᐊᓂᔮᔨᐤ ᒋᔖᐊᔨᒥᐦᐋᐅᑭᒥᑯᔨᐤ ᒌ ᓂᑎᐙᔨᐦᑎᒧᐙᐤ ᔓᐎᔮᓐ᙮
4 ᑯᐃᔅᒄ ᒫᒃ ᒌ ᑭᓂᐙᐱᒫᐆᒡ ᐊᓂᔮᔨᐤ ᓈᐹᐤ, ᐋᒄ ᐲᑎᕐ ᑳᐦ ᐄᑖᑦ, “ᐹᒋ ᑭᓂᐙᐱᒥᓈᓐ ᒫᐦ᙮”
5 ᐋᒄ ᑳ ᑭᓂᐙᐱᒥᑯᒡ ᐊᓂᔮᔨᐤ ᓈᐹᐤ, ᐋ ᐱᑯᓵᔨᒥᑯᒡ ᒑᒀᔨᐤ ᒑ ᒌ ᒥᔮᒡ᙮
6 ᐋᒄ ᐲᑎᕐ ᑳᐦ ᐄᑖᑦ, “ᓂᒧᐃ ᓈᔥᑎᔨᒡ ᓂᑎᔮᐙᐤ ᔓᐎᔮᓐ ᒑ ᒌ ᒥᔨᑖᓐ, ᒥᒄ ᒫᒃ ᒋᑭ ᒌ ᒥᔨᑖᓐ ᑯᑎᒡ ᒑᒀᓐ᙮ ᒌᓴᔅ ᙭ ᐅᑎᔑᓂᐦᑳᓱᐎᓂᐦᒡ ᐅᐦᒋ, ᓈᓵᕆᕠᐦᒡ ᑳ ᐅᐦᒌᑦ, ᐱᓯᑰᐦ ᒑ ᐱᒧᐦᑖᔨᓐ᙮”
7 ᐋᒄ ᐲᑎᕐ ᑳ ᐅᑎᓂᒸᑦ ᐊᓂᔮᔨᐤ ᐅᓂᐦᐄᐎᓂᑎᐦᒋᔨᐤ ᑳ ᐐᒋᐦᐋᑦ ᐋ ᐱᓯᑯᔨᒡ᙮ ᑏᐙᐦᒡ ᒫᒃ ᐊᓐ ᓈᐹᐤ, ᐅᓯᑦ ᑭᔮᐦ ᐅᐦᑯᓐ ᒌ ᐅᐦᒋ ᓵᐲᒥᑭᓂᔨᐤ᙮
8 ᒌ ᐱᓯᑯᔑᐲᐦᑖᐤ ᒫᒃ, ᑳ ᓃᐴᐎᑦ, ᑳᐦ ᐋᑎ ᐱᐹᒧᐦᑖᑦ᙮ ᑳ ᐐᒑᐙᑦ ᐊᓂᔮᔨᐤᐦ ᐲᑎᕐᐦ ᑭᔮᐦ ᒞᓐᐦ ᐋ ᐲᐦᒑᔨᒡ ᐊᓂᑖᐦ ᒋᔖᐊᔨᒥᐦᐋᐅᑭᒥᑯᐦᒡ, ᐋ ᐱᒧᐦᑖᑦ, ᐋ ᒀᔥᒀᔥᑯᐦᑎᒃ, ᐋ ᒫᒥᐦᒋᒫᑦ ᒋᔖᒥᓂᑑ᙮
9 ᒥᓯᐙ ᒫᒃ ᐊᐙᔨᐤᐦ ᐊᓂᑎᐦ ᑳᐦ ᑖᔨᒡ ᒌ ᐙᐱᒥᑰ ᐋ ᐱᒧᐦᑖᑦ ᑭᔮᐦ ᐋ ᒫᒥᐦᒋᒫᑦ ᒋᔖᒥᓂᑑ᙮
10 ᒌ ᓂᓯᑑᓄᐙᐅᒡ ᒫᒃ ᐋᐎᔨᒡ ᐊᓂᔮᔨᐤᐦ ᓈᐹᐤᐦ ᑳ ᒌ ᐊᐱᔨᒡ ᐋ ᐱᑯᔑᐦᑖᔨᒡ ᐊᓂᑖᐦ ᑳ ᒥᔻᔒᔨᒡ ᐃᔥᒀᐦᑖᒻ ᑳ ᐃᔑᓂᐦᑳᑖᔨᒡ᙮ ᒥᓯᐙ ᒫᒃ ᒌ ᑯᔥᑯᒀᔨᑎᒧᒡ ᑭᔮᐦ ᒌ ᒥᔅᑳᑖᔨᐦᑎᒧᒡ ᑖᓐ ᑳ ᐄᔅᐱᔨᔨᒡ᙮
ᑖᓐ ᑳ ᐄᔑ ᐐᐦᑎᐦᒃ ᐲᑎᕐ ᐊᓂᑖᐦ ᒋᔖᐊᔨᒥᐦᐋᐅᑭᒥᑯᐦᒡ
11 ᐊᓐ ᒫᒃ ᓈᐹᐤ ᐋᑳ ᐙᐦᒋ ᓂᐦᑖᐅᐦᑖᑦ ᒌ ᒥᒫᐦᒋᑯᓈᐤ ᐊᓂᔮᔨᐤᐦ ᐲᑎᕐᐦ ᑭᔮᐦ ᒞᓐᐦ, ᐋᒄ ᒥᓯᐙ ᐄᔨᔨᐅᒡ ᑳ ᐄᔥᐱᐦᐄᑐᒡ ᐊᓂᑖᐦ ᐋ ᓃᐴᐎᔨᒡ ᐊᓂᑖᐦ ᔂᓚᒥᓐ ᐅᐲᐦᑎᐎᔥᒀᒻ ᑳ ᐃᔑᓂᐦᑳᑖᔨᒡ, ᒥᓯᐙ ᓈᔥᒡ ᒌ ᑯᔥᒀᐳᒨᐎᒡ᙮
12 ᐄᔥᐱᐦ ᒫᒃ ᐲᑎᕐ ᐎᔮᐱᒫᑦ ᐊᓂᔮᔨᐤ ᐄᔨᔨᐤᐦ, ᒌᐦ ᐄᑖᐤ, “ᒌᔨᐙᐤ ᐃᔅᕋᐃᓕᐦᒡ ᑳ ᐅᐦᒋᔮᒄ, ᒑᒀᓐ ᐙᐦᒋ ᓈᔥᒡ ᑯᔥᒀᐳᒧᔮᒄ ᐆ, ᑭᔮᐦ ᒑᒀᓐ ᐙᐦᒋ ᓈᔥᒡ ᒥᔅᑳᔑᓂᐎᔮᐦᒡ? ᒋᑎᐄᑖᔨᐦᑎᓈᐙᐤ ᐋ ᓃᔮᓐ ᑎᐱᔨᐙ ᓂᒥᔅᑭᐎᓰᐎᓈᐦᒡ ᑭᔮᐦ ᒫᒃ ᓂᑎᔨᒥᐦᐋᐙᑎᓰᐎᓂᓈᐦᒡ ᐙᐦᒋ ᐱᒧᐦᑖᑦ ᐆ ᓈᐹᐤ?
13 ᐊᓂᔮᔨᐤ ᒋᔖᒥᓂᑑ ᑳᐦ ᐋᐱᑎᔒᔥᑑᐙᒡ ᐊᓂᔮᐦᑳ ᐋᑉᕋᐦᐋᒻ, ᐋᐃᓵᒃ ᑭᔮᐦ ᒉᑭᑉ ᑭᔮᐦ ᐅᑖᐦᒡ ᒋᑖᓂᔅᑰᓰᒥᓅᒡ, ᒋᔅᑖᔨᐦᑖᑯᐦᐋᐤ ᐊᓂᔮᔨᐤ ᐅᑖᐱᒋᐦᐋᑭᓐᐦ, ᐋᔨᐅᑯᓐ ᐅᔮᔨᐤ ᒌᓴᔅᐦ᙮ ᒌᔨᐙᐤ ᒫᒃ ᒋᒌ ᑐᑎᐙᐙᐤ ᒑ ᒌ ᐱᒋᔅᑎᓈᑭᓅᑦ ᐊᓂᑖᐦ ᕎᒻ ᒋᐦᒋᐅᒋᒫᐤ ᐋᐦ ᑖᔨᒡ᙮ ᐋ ᒌ ᐋᑎᐙᔨᒫᒄ ᐅᐦᑎᔅᑰ ᐹᔨᓕᑦ ᐋᐦ ᑖᔨᒡ, ᐋᑎᐄᔅᐱ ᐹᔨᓕᑦ ᑳ ᐐᐦ ᐱᒋᔅᑎᓈᑦ᙮
14 ᐊᔮᐱᒡ ᒌᔨᐙᐤ ᒋᒌ ᐋᑎᐙᔨᒫᐙᐤ ᐊᓐ ᑳ ᐱᔮᐦᒋᓰᑦ ᑭᔮᐦ ᑳ ᑯᐃᔅᑯᑖᑎᓰᑦ ᑭᔮᐦ ᐋ ᒌ ᐃᔮᒄ ᑳ ᓂᐱᐦᐄᐙᑦ ᓈᐹᐤ ᐊᐅᔅᑖ ᒑ ᒌ ᐱᒋᔅᑎᓂᒫᑯᔮᒄ᙮
15 ᑭᔮᐦ ᒋᒌ ᑐᑎᐙᐙᐤ ᒌᓴᔅ ᒑ ᒌ ᓂᐱᐦᐋᑭᓅᑦ ᐊᓐ ᑳ ᒥᔮᑦ ᐊᐙᔨᐤᐦ ᐱᒫᑎᓰᐎᓂᔨᐤ᙮ ᒥᒄ ᒫᒃ ᒋᔖᒥᓂᑑ ᒌ ᐎᓂᔥᑳᓈᐤ ᒌᓴᔅᐦ ᓂᐱᐎᓂᐦᒡ ᐅᐦᒋ᙮ ᒋᐐᐦᑎᒫᑎᓈᓐ ᐋ ᑖᑆᒥᑭᐦᒡ, ᐙᔥ ᓂᒌᐙᐱᒥᓈᓐ ᒦᓐ ᑳᐤ ᐋ ᐱᒫᑎᓰᑦ ᒌᓴᔅ᙮
16 ᐊᓂᔮᔨᐤ ᒌᓴᔅ ᐅᑎᔑᓂᐦᑳᓱᐎᓐ ᐋᔪᐎᒄ ᐅᔮᔨᐤ ᐙᐦᒋ ᒦᓂᐙᑎᓰᑦ ᒑ ᒌ ᐱᒨᐦᑖᑦ ᐆ ᓈᐹᐤ᙮ ᒋᒌ ᒋᔅᒑᔨᒫᐙᐤ ᑭᔮᐦ ᒋᒌ ᐙᐱᒫᐙᐤ ᑖᓐ ᑳ ᐃᓯᓈᑯᓯᑦ᙮ ᒋᒌ ᐙᐱᒫᐙᐤ ᒫᒃ ᐊᓂᑎᐦ ᐅᐦᑎᔅᑰ ᐋᐦᑖᐙᒄ ᑳ ᒦᓂᐙᒋᐦᐋᑭᓅᑦ ᐊᓂᔮᔨᐤ ᐋ ᑖᑆᔮᔨᒫᑭᓂᐎᔨᒡ ᒌᓴᔅᐦ ᐅᐦᒋ᙮”
17 “ᐋᒄ ᒫᒃ ᓃᒋᔖᓂᑎᒄ, ᓂᒋᔅᒑᔨᐦᑖᓐ ᒌᔨᐙᐤ ᑭᔮᐦ ᐊᓂᒌ ᑳ ᓃᑳᓂᔥᑳᑖᑯᒡ ᐋᐦᐋᑳ ᐅᐦᒋ ᒋᔅᒑᔨᐦᑎᒫᒄ ᑖᓐ ᓂᐦᐋᐤ ᐋᐃᐦᑎᔮᒄ ᐊᓂᔮᔨᐤ ᑳᐦ ᑐᑎᐙᒄ ᒌᓴᔅ᙮
18 ᒋᔖᒥᓂᑑ ᒌ ᒥᔮᐤ ᐊᓂᔮᔨᐤ ᒥᓯᐙ ᐅᒋᔅᒋᐙᐦᐄᒑᓯᐤ ᒑ ᒌ ᓃᑳᓐ ᐐᐦᑎᒥᔨᒡ ᒑ ᐙᐐᓯᒑᔨᐦᑎᒥᔨᒡ ᙭ ᐊᓂᔮᔨᐤ ᑳ ᐅᐙᔮᐱᒫᑦ᙮ ᒋᔖᒥᓂᑑ ᒫᒃ ᒌ ᑎᐱᐱᔨᐦᑖᐤ ᐅᔮᔨᐤ᙮
19 ᒀᔅᑳᑎᓰᒄ, ᒥᐦᒋᔨᐙᔮᔨᐦᑎᒧᒄ ᑖᓐ ᑳ ᐄᔑ ᒥᒋᐦᑑᑎᒫᒄ᙮ ᓈᑖᐦᒄ ᒋᔖᒥᓂᑑ ᒑ ᒌ ᐙᐹᔨᐦᑎᒫᑖᒄ ᒋᒥᒋᐦᑣᐎᓂᐙᐤ᙮
20 ᐋᒄ ᒫᒃ ᑎᐹᔨᐦᒋᒑᓯᐤ ᒑ ᑐᑖᑖᒄ ᒦᓐ ᒑ ᒌ ᒋᔓᒥᐦᒋᐦᐅᔮᒄ ᒋᑎᐦᒑᐦᑯᐙᐦᒡ᙮ ᑭᔮᐦ ᑭᑎ ᐹᒋ ᐄᑎᔑᐦᐙᐤ ᒌᓴᔅ ᙭, ᐊᓂᔮᔨᐤ ᔖᔥ ᑳ ᐅᐙᔮᐱᒫᑦ ᒑ ᐄᑎᔑᐦᐊᒫᑖᒄ᙮
21 ᐋᑯᑖᐦ ᒫᒃ ᐊᓂᑖᐦ ᒋᐦᒋᒌᔑᑯᐦᒡ ᒋᐱᐦ ᑖᐤ ᐹᑎᔥ ᐅᑎᐦᒋᐱᔨᒑ ᒥᓯᐙ ᒑᒀᔨᐤ ᐅᔅᒋᐦᑖᑭᓂᐎᔨᒑ᙮ ᐋᔪᐎᒄ ᐅᔮᔨᐤ ᒋᔖᒥᓂᑑ ᑳᐦ ᑐᑎᐙᑦ ᑳ ᐱᔮᐦᒋᓰᔨᒡ ᐅᒋᔅᒋᐙᐦᐄᒑᓲᐤ ᒑ ᒌ ᓃᑳᓐ ᐐᐦᑎᐦᒥᒡ ᒑ ᐄᔅᐱᔨᔨᒡ᙮
22 ᐙᔥ ᐊᓂᔮ ᒧᓱᔅ ᒌ ᐃᔨᐤ,
ᑎᐹᔨᐦᒋᒑᓯᐤ ᒋᒋᔖᒥᓂᑑᒥᓂᐤ ᒌ ᐅᐙᔮᐱᒫᐤ ᐊᓂᔮᔨᐤᐦ ᐊᐙᔨᐤᐦ ᐊᓂᑖᐦ ᓃᑳᓂᐦᒡ ᒑ ᒋᔅᒋᐙᐦᐄᒑᔨᒡ, ᒧᔮᒻ ᓃᔨ ᐋ ᐄᔑ ᐋᐱᒋᐦᐄᑦ, ᐋ ᒋᔅᒋᐙᐦᐄᒑᔮᓐ᙮ ᐊᓂᑎᐦ ᒌᔨᐙᐤ ᐋᐦ ᐄᑎᔅᑳᓈᓰᔮᒄ, ᐋᑯᑖᐦ ᒑ ᐅᐦᒌᔨᒡ᙮ ᓂᑑᐦᑎᐙᐙᒄ ᑭᔮᐦ ᓂᓂᐦᐄᐦᑐᐙᐙᒄ ᑖᓐ ᒑ ᐄᑎᑖᒄ᙮
23 ᐊᓐ ᒫᒃ ᐊᐙᓐ ᐋᑳ ᒑ ᓂᑑᐦᑎᐙᒀ ᐅᔮᔨᐤ ᒑ ᐅᒋᔅᒋᐙᐦᐄᒑᓯᐎᔨᒡ, ᒋᑭ ᐄᒑᓈᑭᓂᐤ ᐊᓂᑎᐦ ᐅᐦᒋ ᒋᔖᒥᓂᑑ ᐅᑏᔨᔨᒥᔨᐤ ᐋᐦ ᑖᔨᒡ, ᐋᒄ ᒫᒃ ᒑ ᓂᔑᐎᓈᒋᐦᐋᑭᓅᑦ᙮”
ᐋᔪᐎᒄ ᐅᔮᔨᐤ ᑳ ᐐᐦᑎᐦᒃ ᐲᑎᕐ ᐋ ᒌ ᐃᔨᑯᐱᓈᓂᐦᐄ ᐊᓂᔮ ᒧᓱᔅ᙮
ᐋᒄ ᑳᐦ ᐋᑎ ᐃᔨᑦ ᒦᓐ ᐲᑎᕐ,
24 “ᓵᒥᔪᓪ ᑭᔮᐦ ᐊᓂᒌ ᒥᓯᐙ ᑯᑎᑭᒡ ᐅᒋᔅᒋᐙᐦᐄᒑᓱᒡ ᐹᑎᒫ ᒦᓐ ᑳᐦ ᑖᒡ ᓃᑳᓐ ᒌ ᐐᐦᑎᒧᒡ ᐅᔮᔨᐤ ᐊᓅᐦᒡ ᑳᔑᑳᔨᒡᐦ ᐋᔅᐱᔨᔨᒡ᙮
25 ᐊᓂᔮᔨᐤ ᒋᔅᒌᐙᐦᐄᒑᐎᓂᔨᐤ, ᑭᔮᐦ ᐊᓂᔮᔨᐤ ᓂᔅᑯᒧᐎᓂᔨᐤ ᑖᓐ ᑳ ᐄᔑ ᒥᔨᑯᒡ ᒋᔖᒥᓂᑑ ᐊᓂᔮᐦᑳ ᒋᑖᓂᔅᑰᓰᒥᐙᐅᒡ ᑭᔮᐦ ᒌᔨᐙᐤ ᒋᑎᔅᑎᓯᓈᓱᓈᐙᐤ ᐊᓂᑎᐦ᙮ ᐙᔥ ᒋᔖᒥᓂᑑ ᒌᐦ ᐄᑖᐤ ᐊᓂᔮ ᐋᑉᕋᐦᐋᒻ,
ᐊᓂᑖᐦ ᓃᔥᑖᒥᐦᒡ ᒋᑎᐙᔑᔒᒥᒡ ᓂᑭ ᐅᐦᒋ ᐅᐦᑎᓈᐤ ᐹᔨᒄ ᐊᐙᓐ ᐊᓂᑎᐦ ᐅᐦᒋ ᒑ ᒌ ᐅᐦᒋ ᒥᔪᑐᑖᐦᒡ ᒥᓯᐙ ᐄᔨᔨᐅᒡ ᐅᑎᐦ ᐊᔅᒌᐦᒡ᙮
26 ᒌ ᐅᐙᔮᐱᒫᐤ ᒫᒃ ᒋᔖᒥᓂᑑ ᐅᔮᔨᐤ ᐅᑖᐱᒋᐦᐋᑭᓐᐦ ᒌᔨᐙᐤ ᒫᐅᒡ ᓃᔥᑎᒻ ᐋ ᒌ ᐄᑎᔑᐦᐊᒫᑖᒄ᙮ ᒋᑭ ᒥᔪᑐᑖᑯᐙᐤ ᐋᐦ ᑐᑖᑖᒄ ᒥᓯᐙ ᐋ ᑎᔑᔮᒄ ᒑ ᒌ ᓂᑭᑎᒫᒄ ᒋᒥᒑᑎᓰᐎᓂᐙᐤ᙮”