6
ᓃᔣᔥᒡ ᓈᐹᐅᒡ ᑳ ᐎᔮᔨᒫᑭᓂᐎᒡ ᒑ ᒌ ᐐᒋᐦᐄᐙᒡ ᐊᔨᒥᐦᐋᐅᑭᒥᑯᐦᒡ
1 ᐄᔥᐱᐦ ᒫᒃ ᐊᑎᑎᐤ ᐋᑎ ᒥᐦᒑᑎᒡ ᐄᔨᔨᐅᒡ ᐋ ᑖᑆᔮᔨᒫᒡ ᒌᓴᔅᐦ, ᐊᓂᒌ ᒎᐤ ᐄᔨᔨᐅᒡ ᒃᕇᒃ ᑳ ᐄᔑ ᐊᔨᒥᒡ ᒌ ᐎᔮᔅᑖᔨᒫᐎᒡ ᐊᓂᔮᔨᐤ ᒎᐄᔨᔨᐤ ᐦᐄᑉᕉ ᑳ ᐄᔑ ᐊᔨᒥᔨᒡ ᐋ ᒌ ᐃᑖᒡ ᐊᓂᔮᔨᐤ ᑳ ᐹᐦᐹᔨᑯᔨᒡ ᐃᔅᒀᐤ ᐊᓂᑎᐦ ᐋᐦ ᑖᒡ ᐋᐦᐋᑳ ᐅᐦᒋ ᐃᔥᐱᔥ ᐊᔑᒫᑭᓂᐎᔨᒡ ᒦᒋᒥᔨᐤ ᐊᓂᔮᔨᐤ ᑳ ᒌ ᒫᑎᓂᒧᐙᑭᓂᐎᔨᒡ ᐃᔅᒀᐤ ᑳ ᐹᔨᑯᔨᒡ ᐋᔑᑯᒻ ᒌᔑᑳᐤᐦ᙮
2 ᐋᒄ ᒫᒃ ᐊᓂᒌ ᓃᔓᔖᑉ ᐋᑆᔅᑎᓕᒡ ᒌ ᓂᑑᒫᐅᒡ ᒥᓯᐙ ᐊᓂᔮᔨᐤᐦ ᐊᐙᔨᐤᐦ ᑳ ᑖᑆᔮᔨᒫᔨᒡ ᒌᓴᔅᐦ, ᐋᒄ ᑳᐦ ᐄᑖᒡ, “ᓂᒧᐃ ᑯᐃᔅᒄ ᐃᓯᓈᑯᓐ ᐋᐦᐋᑳ ᐃᔮᔥᐱᔑᔮᐦᒡ ᒑ ᒌ ᑭᒑᔅᒀᔮᐦᒡ ᒋᔖᒥᓂᑑ ᐅᑎᔨᒧᐎᓐᐦ ᐅᐦᒋ ᐊᓐ ᐋᔨᐤᐦ ᐋ ᓈᓈᑭᒋᐦᑖᔮᐦᒡ ᒑ ᒌ ᒥᔪ ᐊᔑᒫᑭᓂᐎᒡ ᐊᓂᒌ ᐃᔅᒀᐅᒡ ᑳ ᐹᔨᑯᒡ᙮
3 ᒌᔨᐙᐤ ᓃᒋᔖᓈᓂᒡ, ᐅᐙᔮᐱᒫᐦᑯᒡ ᓃᔣᔥᒡ ᓈᐹᐅᒡ ᐊᓂᑎᐦ ᐋ ᑎᔑᔮᒄ ᐊᓂᒌ ᐋ ᒥᔻᒋᒫᑭᓂᐎᒡ ᐊᓂᔮᔨᐤ ᐅᐦᒋ ᐋ ᑯᐃᔅᑯᑖᑎᓰᔨᒡ ᑭᔮᐦ ᓈᔥᒡ ᐋ ᑭᒑᐦᑖᐙᔨᐦᑎᐦᒡ ᑭᔮᐦ ᒫᒃ ᐋ ᓵᑭᔅᒋᓈᔥᑳᑯᒡ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ᙮ ᐋᐅᑯᓂᒡ ᐅᒌ ᒑ ᒥᔨᒡ ᐅᔮᔨᐤ ᐋᐱᑎᓰᐎᓂᔨᐤ ᐋ ᓈᓈᑭᑐᐙᔨᒫᒡ ᑳ ᐹᐦᐹᔨᑯᔨᒡ ᐃᔅᒀᐤᐦ᙮
4 ᐋᒄ ᒫᒃ ᓃᔮᓐ ᒑ ᐃᔥᐱᔑᔮᐦᒡ ᒑ ᒌ ᐊᔨᒥᐦᐋᔮᐦᒡ ᑭᔮᐦ ᐋ ᑭᒑᔅᒀᔮᐦᒡ ᒋᔖᒥᓂᑑ ᐅᑎᔨᒧᐎᓐᐦ᙮”
5 ᒥᓯᐙ ᒫᒃ ᒋᓂᐦᐋᔨᐦᑎᒧᒡ ᐊᓂᑎᐦ ᐋ ᐃᑎᔑᒡ ᐊᓂᔮᔨᐤᐦ ᑳ ᐄᔨᔨᒡ ᐊᓂᔮᔨᐤᐦ ᐋᑆᔅᑎᓪᐦ᙮ ᐋᒄ ᑳ ᐅᐙᔮᐱᒫᒡ ᔅᑏᕙᓐ᙮ ᔅᑏᕙᓐ ᒫᒃ ᐅᑖᑆᔮᔨᐦᑎᒧᐎᓐ ᓈᔥᒡ ᒌ ᓲᐦᒑᔨᐦᑖᑯᓂᔨᐤ, ᑭᔮᐦ ᒌ ᓵᑭᔅᒋᓈᔥᑳᑰ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ᙮ ᑭᔮᐦ ᕕᓕᑉ ᒌ ᐅᐙᔮᐱᒫᐅᒡ ᑭᔮᐦ ᑉᕈᒀᕋᔅ, ᑭᔮᐦ ᓂᑭᓄᕐ, ᑭᔮᐦ ᑎᒸᓐ, ᑭᔮᐦ ᐹᕐᒣᓈᔅ, ᐋᒄ ᒫᒃ ᓂᑯᓚᔅ᙮ ᐆ ᓂᑯᓚᔅ ᐊᓂᑖᐦ ᐋᓐᑎᔻᑭᐦᒡ ᒌ ᐅᐦᒋᔨᐤ ᐐᔨ, ᐋᑦ ᒫᒃ ᐋᐦᐋᑳ ᒎᐤ ᐅᐦᒋ ᐄᑎᔅᑳᓈᓯᑦ ᔖᔥ ᑭᔮᐦ ᐐᔨ ᒌ ᑖᑆᐦᑎᒻ ᑖᓐ ᐋ ᐄᔑ ᑖᑆᐦᑎᒥᔨᒡ ᒎᐄᔨᔨᐤ᙮
6 ᐋᒄ ᒫᒃ ᐊᓂᒌ ᑳ ᑖᑆᐦᑎᐦᒡ ᑳ ᐄᑐᐦᑎᐦᐋᒡ ᐊᓂᔮᔨᐤ ᑳ ᐅᐙᔮᐱᒫᒡ ᓈᐹᐤ ᐊᓂᑖᐦ ᐊᓂᔮᔨᐤ ᐋᑆᔅᑎᓪᐦ ᐋᐦ ᑖᔨᒡ᙮ ᐋᒄ ᒫᒃ ᐊᓂᒌ ᐋᑆᔅᑎᓕᒡ ᑳ ᑖᐦᒋᓈᒡ ᑭᔮᐦ ᑳ ᐊᔨᒥᐦᐋᔥᑎᒧᐙᒡ ᐊᓂᔮᔨᐤ ᓈᐹᐤ᙮
7 ᒋᔖᒥᓂᑑ ᒫᒃ ᐅᑎᔨᒧᐎᓐᐦ ᒌ ᒥᔑᐦᑖᐱᔨᔨᐤ᙮ ᓈᓈᓂᒌᒻ ᒥᐦᒑᑐ ᐄᔨᔨᐅᒡ ᐊᓂᑎᐦ ᒋᕉᓯᓕᒥᐦᒡ ᑳᐦ ᑖᒡ ᒌ ᑖᑆᐦᑎᒧᒡ, ᑭᔮᐦ ᒥᐦᒑᑐ ᐊᔨᒥᐦᐋᐅᒋᒫᐅᒡ ᒌ ᑖᑆᐦᑎᒧᒡ ᑭᔮᐦ ᒌ ᓂᓂᐦᐄᐦᑎᒧᒡ ᒥᔻᒋᒧᐎᓂᔨᐤ᙮
ᔅᑏᕙᓐ ᑳ ᒫᑰᓈᑭᓅᑦ
8 ᔅᑏᕙᓐ ᒫᒃ ᐊᓐ ᐊᐙᓐ ᑳ ᓵᒋᔅᒋᓈᔥᑳᑯᑦ ᒋᔖᒥᓂᑑ ᐅᒥᔪᑳᒑᐎᓂᔨᐤ ᑭᔮᐦ ᐅᓲᐦᑳᑎᓰᐎᓂᔨᐤ ᒌ ᐄᑖᔨᐦᑖᑯᓯᐤ, ᒌᐦ ᑐᑎᒻ ᒫᒃ ᓂᓈᐦᑭᐤ ᒫᒥᔥᑳᒡ ᒑᒀᔨᐤ ᑭᔮᐦ ᒫᒥᔅᑳᒡ ᐙᐱᐦᑏᐙᐎᓐᐦ ᐊᓂᑎᐦ ᐄᔨᔨᐤ ᐋᐦ ᑖᔨᒡ᙮
9 ᒌᐦ ᑖᐅᒡ ᓈᐹᐅᒡ ᐋᐦᐋᑳ ᐅᐦᒋ ᓂᐦᐋᔨᒫᒡ ᔅᑏᕙᓐ, ᐊᓂᒌ ᐊᓂᑖᐦ ᑳ ᒌ ᐄᔑ ᓈᒋᐊᔨᒥᐦᐋᒡ ᐊᓂᔮᔨᐤ ᒎᐤ ᐊᔨᒥᐦᐋᐅᑭᒥᑯᔨᐤ, ᑳ ᐱᑯᐦᐋᑭᓂᐎᒡ ᓈᐹᐅᒡ ᑳ ᐃᔑᓂᐦᑳᑖᔨᒡ᙮ ᓂᓈᐦᑭᐤ ᐃᐦᑖᐎᓂᐦᒡ ᒌ ᐅᐦᒌᐅᒡ ᓵᐃᕇᓐ ᑭᔮᐦ ᐋᓕᒃᓵᓐᑦᕆᔮ ᑳ ᐃᔑᓂᐦᑳᑖᔨᒡ᙮ ᑯᑎᑭᒡ ᒫᒃ ᐊᓂᑖᐦ ᓯᓕᓯᔮ ᑭᔮᐦ ᐋᐃᔖ ᐊᔅᒌᐦᒡ ᒌ ᐅᐦᒌᐅᒡ᙮ ᐋᔨᐅᑯᓐ ᒫᒃ ᐅᔮᔨᐤ ᓈᐹᐤ ᑳ ᐎᔮᔅᑖᒥᑯᑦ ᔅᑏᕙᓐ᙮
10 ᓂᒧᐃ ᒫᒃ ᐅᐦᒌ ᓂᔥᒀᐅᔑᐦᐄᑰ ᐅᔮᔨᐤ ᐄᔨᔨᐤ ᔅᑏᕙᓐ ᐙᔥ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᒌ ᒥᔨᑰ ᑭᒑᐦᑖᐙᔨᐦᑎᒧᐎᓂᔨᐤ ᒑ ᒌ ᑭᔅᒋᐦᐅᑦ ᐋ ᐊᔨᒥᑦ᙮
11 ᐋᒄ ᒫᒃ ᒌᒧᒡ ᑳᐦ ᐋᐱᒋᐦᐋᒡ ᓈᐹᐤᐦ ᒑ ᒌ ᓂᓂᑎᔮᒋᒫᔨᒡ ᔅᑏᕙᓐ ᐋᐦ ᐄᔨᔨᒡ, “ᓂᒌ ᐹᐦᑎᐙᓈᓐ ᔅᑏᕙᓐ ᐋ ᐱᐹᔥᑖᒫᑦ ᒧᓱᔅ ᑭᔮᐦ ᒋᔖᒥᓂᑑ᙮”
12 ᐅᔮᔨᐤ ᒫᒃ ᐋ ᒌ ᐃᔨᐦᑎᒡ ᒌᐦ ᑐᑎᐙᐅᒡ ᐊᓂᔮᔨᐤ ᑳ ᓃᑳᓂᔑᔨᒡ ᑭᔮᐦ ᑳ ᒋᔅᑯᑎᒫᒑᔨᒡ ᐐᔓᐙᐎᓂᔨᐤ ᑭᔮᐦ ᐄᔨᔨᐤ ᒑ ᒌ ᒋᔑᐙᐦᐄᑯᔨᒡ ᐊᓂᔮᔨᐤ ᔅᑏᕙᓐ᙮ ᐊᓂᒌ ᒫᒃ ᑳ ᓃᑳᓂᔒᒡ ᒌ ᐄᑎᔓᐙᐅᒡ ᒑ ᒌ ᐅᑎᓂᒫᑭᓂᐎᔨᒡ ᔅᑏᕙᓐ ᑭᔮᐦ ᒑ ᒌ ᐄᑐᐦᑎᐦᐄᒫᑭᓂᐎᔨᒡ ᐊᓂᑖᐦ ᐋ ᓂᔥᑐᐎᔨᒡ ᐊᓂᔮᔨᐤ ᑳ ᒫᒨᐲᔨᒡ᙮
13 ᑭᔮᐦ ᒌ ᐐᔖᒫᐅᒡ ᐊᓂᔮ ᐱᔅᒡ ᓈᐹᐤ ᓂᑎᐐ ᒑ ᒌ ᐄᑖᒋᒫᔨᒡ ᔅᑏᕙᓐ ᐊᓂᑎᐦ ᐋ ᓂᔥᑐᐐᓈᓂᐎᔨᒡ᙮ ᒌᐦ ᐄᔨᐤ ᒫᒃ, “ᐆ ᓈᐹᐤ, ᓂᒧᐃ ᒋᐱᐦᑐᐙᐤ ᐋ ᒥᒫᔮᔨᐦᑎᐦᒃ ᐅᔮᔨᐤ ᒫᐅᒡ ᑳ ᐱᔮᐦᑭᓃᔨᒡ ᒎᐤ ᐊᔨᒥᐦᐋᐅᑭᒥᑯᔨᐤ ᑭᔮᐦ ᐊᓂᔮᔨᐤ ᐐᔓᐙᐎᓂᔨᐤ ᒋᔖᒥᓂᑑ ᑳ ᒥᔮᔨᒡ ᐊᓂᔮᐦ ᒧᓱᔅ᙮
14 ᐙᔥ ᓂᒌ ᐹᐦᑎᐙᓈᓐ ᐋᐦ ᐃᔨᑦ, ᐅᔮᔨᐤ ᒌᓴᔅᐦ, ᓈᓵᕆᕠᐦᒡ ᑳ ᐅᐦᒌᔨᒡ, ᒑ ᓂᔑᐅᓈᒋᑖᔨᒡ ᐅᔮᔨᐤ ᒎᐤ ᐊᔨᒥᐦᐋᐅᑭᒥᑯᔨᐤ, ᑭᔮᐦ ᒫᒃ ᒑ ᒀᔅᒋᓂᒥᔨᒡ ᐊᓂᔮᔨᐤ ᒎᐄᔨᔨᐤ ᐃᔨᐦᑎᐎᓐ ᐊᓂᔮᔨᐤ ᒧᓱᔅ ᑳᐦ ᐄᑎᔓᐙᔨᑯᐱᓈᓂᐦᐄ ᒑ ᑐᑖᑭᓂᐎᔨᒡ᙮” ᐋᔪᐎᒄ ᐅᔮᔨᐤ ᑳ ᐄᑖᒋᒧᒡ ᐊᓂᒌ ᓈᐹᐅᒡ᙮
15 ᒥᓯᐙ ᒫᒃ ᐊᓂᒌ ᐊᓂᑎᐦ ᑳ ᒫᒨᐱᒡ ᓈᔥᒡ ᒌ ᑭᓂᐙᐱᒫᐅᒡ ᔅᑏᕙᓐ ᐋ ᐙᐱᐦᑎᒸᒡ ᐅᑖᔥᑎᒥᐦᑯᔨᐤ ᒧᔮᒻ ᐋᓐᒋᓐ ᐅᑖᔥᑎᒥᐦᑯᔨᐤ ᐋ ᐃᓯᓈᑯᓃᔨᒡ᙮