3
ᒌᓴᔅ ᐊᐅᔅᑖ ᒋᑳᔮᔨᐦᑖᑯᓯᐤ ᐃᔥᐱᔥ ᐐᔨ ᒧᓱᔅ
1 ᓃᒋᔖᓂᑎᒄ, ᒋᔖᒥᓂᑑ ᑳ ᐎᔮᔨᒥᑖᒄ ᒑ ᐱᔮᐦᒋᐱᒫᑎᓰᔮᒄ ᐋ ᐅᑏᔨᔨᒥᑐᑖᑎᐦᒄ᙮ ᒫᒥᑐᓈᔨᒫᐦᒄ ᒫᐦ ᒌᓴᔅ, ᐋᔨᐅᑯᓐ ᐅᔮᔨᐤ ᒋᔖᒥᓂᑑ ᑳ ᐹᒋ ᐄᑎᔑᐦᐙᑦ ᑭᔮᐦ ᒑ ᒌ ᓃᑳᓐ ᒋᔖᐊᔨᒥᐦᐋᐅᒋᒫᐐᒡ, ᐊᓐ ᐃᔮᔨᐦᒄ ᒑᔥᑎᓈᔥ ᐋ ᑖᑆᔮᔨᒫᐦᒄ᙮
2 ᒌᓴᔅᐦ ᒌ ᑖᑆᓯᔅᑎᐙᐤ ᒋᔖᒥᓂᑑ, ᐊᓂᔮᔨᐤ ᑳ ᐅᐙᔮᐱᒥᑯᑦ ᐅᔮᔨᐤ ᒑ ᒌ ᐄᑖᐱᑎᓰᑦ᙮ ᒧᔮᒻ ᒧᓱᔅ ᑳ ᐄᔑ ᑖᑆᐅᒑᔨᐦᑖᑯᓰᔨᒡ ᐋᐦ ᐋᐱᑎᓰᑦ ᒥᓯᐙ ᒋᔖᒥᓂᑑ ᐆ ᐙᔅᑳᐦᐄᑭᓂᒥᔨᒡ᙮
3 ᐊᐅᔅᑖ ᒫᒃ ᒋᑳᔮᔨᐦᑖᑯᓯᐤ ᒌᓴᔅ ᑖᓐ ᑳ ᐄᑖᔨᐦᑖᑯᓰᔨᒡ ᒧᓱᔅ᙮ ᒧᔮᒻ ᐊᐙᓐ ᑳ ᐙᔅᑳᐦᐄᑭᓂᐦᒑᑦ ᐊᐅᔅᑖ ᐐᔨ ᒋᑳᔮᔨᐦᑖᑯᓯᐤ ᐃᔥᐱᔥ ᐐ ᐊᓂᔮᔨᐤ ᐙᔅᑳᐦᐄᑭᓂᔨᐤ ᑳ ᐐᔨᑳᐳᐦᑖᑦ᙮
4 ᐙᔥ ᒥᓯᐙ ᐙᔅᑳᐦᐄᑭᓐ ᐋᐦ ᑎᑎᒡ ᑖᐤ ᐊᓐ ᐊᐙᓐ ᑳ ᐅᔑᐦᑖᑦ, ᒥᒄ ᒫᒃ ᐐᔨ ᒋᔖᒥᓂᑑ ᒥᓯᐙ ᒑᒀᔨᐤ ᒌ ᐅᔑᐦᑖᐤ᙮
5 ᒧᓱᔅ ᒫᒃ ᑖᑆᐅᒑᔨᐦᑖᑰᓲ ᐋᐦ ᐋᐱᑎᓰᓲᑦ ᐊᓂᑎᐦ ᒥᓯᐙ ᒋᔖᒥᓂᑑ ᐆ ᐙᔅᑳᐦᐄᑭᓂᒥᔨᒡ᙮ ᓃᑳᓐ ᒌ ᐄᔑ ᐐᐦᑎᒻ ᑖᓐ ᒑ ᐃᔥᐱᐦᑖᔨᒡ ᒋᔖᒥᓂᑑ ᐊᓂᑎᐦ ᐄᔑ ᓃᔥᑖᒥᐦᒡ᙮
6 ᙭ ᒫᒃ ᐋᔪᐎᒄ ᒋᔖᒥᓂᑑ ᑳ ᑖᑆᐅᒑᔨᐦᑖᑰᓰᔨᒡ ᐅᑯᓯᔅᐦ, ᐋ ᓃᑳᓂᔅᑳᒸᑦ ᐅᐦᑖᐐᐦ ᐆ ᐙᔅᑳᐦᐄᑭᓂᒥᔨᐤ᙮ ᑭᔮᐦ ᒌᔮᓂᐤ ᒫᒃ ᐋᑯᑎᐦ ᐋᔅᑎᒋᐦᑖᑯᓰᔨᐦᒄ ᐊᓂᑎᐦ ᐅᑎᔨᔨᒻᐦ ᐋᐦ ᑖᔨᒡ ᐊᓂᑎᐦ ᐅᐙᔅᑳᐦᐄᑭᓂᒦᐦᒡ, ᓲᐦᒋᑖᐦᐋᔨᐦᒀ ᑖᑆᔮᔨᐦᑎᒧᐎᓂᐦᒡ ᑭᔮᐦ ᓲᐦᒃ ᒥᒫᒋᑯᓂᒧᐦᒀ ᑖᓐ ᐋ ᐄᔑ ᐊᔅᐹᔨᒧᔨᐦᒄ᙮
ᐋᓍᑎᒧᐎᓐ ᐃᔮᒀᒧᐙᐎᓐ
7 ᐋᒄ ᒫᒃ ᒫᒥᑐᓈᔨᐦᑎᒧᒄ ᑖᓐ ᐃᔮᑦ ᑳ ᐱᔮᐦᒋᓰᑦ ᐊᐦᒑᐦᒄ,
ᐊᓅᐦᒡ ᑳᔑᑳᒡ ᐋ ᐹᐦᑎᐙᒄ ᒋᔖᒥᓂᑑ ᐋ ᐊᔨᒥᐦᐄᑖᒄ,
8 ᐊᑳᐐ ᒥᔅᑭᐎᐦᑖᒄ ᒋᑖᐦᐄᐙᐤ ᒧᔮᒻ ᑳᐦ ᑎᒡ ᐊᓂᔮᐦᑳ ᐋᓂᔅᒑ ᒋᐙᐦᑯᒫᑭᓄᐙᐅᒡ ᐋ ᒌ ᓂᔥᑰᔥᑐᐙᒡ ᒋᔖᒥᓂᑑ ᒫᒀᒡ ᑳ ᐱᒧᐦᑖᒡ ᐊᓂᑖᐦ ᐱᐦᒀᑎᔅᑭᒥᑳᐦᒡ ᑳ ᑯᒀᒋᐦᐋᑭᓂᐎᒡ᙮
9 ᐋᑯᑖᐦ ᒫᒃ ᐊᓂᑎᐦ ᓄᐎᒡ ᓂᒌ ᑯᒀᒋᐦᐄᑯᒡ ᒋᑖᓂᔅᑰᓰᒥᐙᐅᒡ ᐋᐦ ᐋᑦ ᒌ ᐙᐱᐦᑎᐦᒡ ᒑᒀᔨᐤ ᑳᐦ ᑐᑎᒨᒡ ᓈᒥᑎᓂᐤ ᑎᐦᑐ ᐱᐳᓐ ᐃᔥᐱᔥ᙮
10 ᐋᔪᐎᒄ ᒫᒃ ᐙᐦᒋ ᒋᔑᐙᐦᐄᒡ ᐊᓂᒌ ᐄᔨᔨᐅᒡ ᐋᒄ ᑳ ᐄᑎᒀᐤ ᐋᐦ ᐋᔨᒨᒥᒀᐤ, ᐆᐦᑖᐄᐙᐤ ᒨᔥ ᐎᓄᐦᑎᐦᐄᑰᒡ ᑭᔮᐦ ᓂᒧᐎ ᒌ ᒋᔅᒑᔨᐦᑎᒨᒡ ᐊᓂᔮᔨᐤ ᓂᒫᔅᑳᓈᔨᐤ᙮
11 ᐋ ᒌ ᒋᔑᐙᐦᐄᒡ ᒋᐦᒋᐙ ᓂᒌᐦ ᐃᔨᓐ ᐊᓐ ᑳ ᐃᔮᓐ ᓂᒧᐃ ᓂᐦᑖ ᒋᑭ ᒌ ᐲᐦᒑᐅᒡ ᐊᓂᑎᐦ ᑳ ᐄᔑ ᐃᔮᔅᑰᔥᑎᒧᒀᐤ ᒑ ᒌ ᐋᔨᐙᓯᒡ᙮
12 ᓃᒋᔖᓂᑎᒄ, ᐃᔮᒀᒦᒄ ᐋᑳ ᒑ ᒌ ᒥᒋᑖᐦᐋᔮᒄ ᑭᔮᐦ ᒑ ᒌ ᐃᔮᔮᒄ ᐋᓍᔨᐦᑎᒧᐎᓐ, ᐙᔥ ᒋᑭ ᒌ ᒌᐙᑳᐳᔥᑎᐙᐙᐤ ᒋᔖᒥᓂᑑ ᐊᓐ ᐹᒫᑎᓯᔨᑦ᙮
13 ᐋᔑᑯᒻ ᒌᔑᑳᐤᐦ ᒫᒃ ᐋᔨᐦᑭᒥᑐᒄ ᐋᔥᒄ ᒫᒀᒡ ᐋᐦ ᑐᐙᒡ ᐊᓅᐦᒡ ᐆ ᒑ ᒌᐦ ᑎᔮᒄ᙮ ᐋᒄ ᒫᒃ ᓂᒧᐃ ᐙᒋ ᐹᔨᒄ ᐋ ᑎᔑᔮᒄ ᒋᑭ ᐅᐦᒋ ᑳᒌᔑᒥᑯᓈᐙᐤ ᒑ ᒌ ᑖᑆᐦᑎᒫᒄ ᐋᐦᐋᑳ ᐎᔮᔥ ᐃᓯᓈᑯᐦᒡ ᒥᒑᑎᓰᐎᓐ᙮
14 ᙭ ᐋᐦ ᑖᑦ ᑰᐦᒋ ᑎᐹᔨᐦᑖᑯᓰᓈᓂᐤ ᓲᐦᒋᑳᐳᐎᔨᐦᒀᐤ ᒋᑖᑆᔮᔨᐦᑎᒧᐎᓂᓈᐦᒡ ᒨᔮᒻ ᑳ ᐃᔥᐱᔥ ᑖᑆᐦᑎᒥᐦᒄ ᐊᓂᑎᐦ ᐅᔅᑭᒡ ᐲᐦᐃᒻ ᐊᓂᑎᐦ ᐄᔑ ᐋᐦ ᐄᔥᒀᔮᒡ᙮
15 ᐊᒀᒋᔥᑖᒡ ᒋᐦᒋᒥᓯᓂᐦᐄᑭᓂᐦᒡ,
ᐊᓅᐦᒡ ᑳᔑᑳᒡ ᐋ ᐹᐦᑎᐙᒄ ᒋᔖᒥᓂᑑ ᐋ ᐊᔨᒥᐦᐄᑖᒄ ᐊᑳᐐ ᒥᔅᑭᐎᐦᑖᒄ ᒋᑖᐦᐄᐙᐤ ᒧᔮᒻ ᑳᐦ ᑎᒡ ᐊᓂᔮᐦᑳ ᐋᓂᔅᒑ ᒋᐙᐦᑯᒫᑭᓄᐙᐅᒡ ᐋ ᒌ ᓂᔥᑰᔥᑐᐙᒡ ᒋᔖᒥᓂᑑ᙮
16 ᐄᔨᔨᐅᒡ ᒫᒃ ᐊᓂᒌ ᑳ ᓂᔅᑰᔅᑐᐙᒡ ᒋᔖᒥᓂᑑ ᐋᐦ ᐋᑦ ᓈᐦᐄᔪ ᒌ ᐹᐦᑎᐙᒡ ᐋ ᐊᔨᒥᐦᐄᑯᒡ? ᐋᐅᑯᓂᒡ ᐊᓂᒌ ᑳ ᒋᔅᒋᓄᐦᑎᐦᐄᑯᒡ ᒧᓱᔅ ᐄᒋᐱᑎᐦᒡ ᐊᔅᒌᐦᒡ ᑳ ᐅᐦᒋ ᐎᔨᐐᐦᑎᐦᐄᑯᒡ᙮
17 ᐄᔨᔨᐅᒡ ᒫᒃ ᐊᓂᒌ ᑳ ᒋᔑᐙᐦᐋᒡ ᒋᔖᒥᓂᑑ ᓈᒥᑎᓂᐤ ᑎᐦᑐ ᐱᐳᓐ ᐃᔥᐱᔥ? ᐋᐅᑯᓂᒡ ᐊᓂᒌ ᑳ ᒥᒑᑎᓯᐎᒡ ᐄᔨᔨᐅᒡ, ᐋᑯᑖᐦ ᒫᒃ ᐊᓂᑖᐦ ᐱᑯᑎᔅᑭᒥᑳᐦᒡ ᑳ ᐱᒋᓯᐦᒡ ᐋᐦ ᐋᑎ ᐳᓂᐱᒫᑎᓰᔨᒡ᙮
18 ᐋᐙᔨᐤᐦ ᒫᒃ ᐊᓂᔮᔨᐤ ᑳᐦ ᐄᑖᑦ ᒋᔖᒥᓂᑑ, ᓂᒧᐃ ᓂᐦᑖ ᒋᑭ ᒌ ᐲᐦᒑᐅᒡ ᐊᓂᑖᐦ ᑳ ᐄᔑ ᐋᔮᔥᑯᔅᑎᒧᒀᐤ ᐊᓂᑎᐦ ᒑ ᒌ ᐋᔨᐙᓯᒡ᙮ ᐋᔪᐎᑯᓐᐦ ᐊᓂᔮᔨᐤ ᑳᐦ ᐄᑖᑦ ᐊᐙᔨᐤᐦ ᐋᑳ ᒥᑐᓐ ᐙᐦᒋ ᐐᔨ ᓂᓂᐦᐄᐦᑖᑯᑦ᙮
19 ᐋᒄ ᒫᒃ ᒑᔅᒑᔨᐦᑎᒥᐦᒄ ᐅᑖᓍᐦᑎᒧᐎᓂᐙᐤ ᐋ ᒌ ᑐᑖᑯᒡ ᐊᓂᒌ ᐄᔨᔨᐅᒡ ᐙᐦᒋ ᐋᑳ ᐅᐦᒋ ᒌ ᐲᐦᒑᐙᒡ ᐊᓂᑎᐦ ᒋᔖᒥᓂᑑ ᑳ ᐃᔮᔅᑰᔥᑎᒫᑯᒡ ᐊᓂᑎᐦ ᒑ ᒌ ᐋᔨᐙᓯᒡ᙮