6
1 ᓃᑳᓂᐦᒡ ᐋᒄ ᐄᔑ ᐋᐦᒌᑖᐤ᙮ ᒋᔅᑯᑎᒫᓱᑖᐤ ᐊᓂᐦᐄ ᐊᑎᑎᐤ ᐋᐦ ᐋᑎ ᐋᔨᒥᐦᒡ ᒑᒀᓂᐦᐄ ᐙᔥ ᐋᐅᑰᓐ ᒑ ᐐᒋᐦᐄᑯᔨᐦᒄ ᐊᑎᑎᐤ ᒑ ᒌ ᓂᐦᑖᐅᒋᔨᐦᒄ ᒋᑖᑆᔮᔨᐦᑎᒧᐎᓂᓈᐦᒡ᙮ ᓂᒧᐃ ᑳᐤ ᒦᓐ ᒋᐱᐦ ᐅᐦᒋ ᒋᔅᑯᑎᒫᒑᓈᓂᐤ ᐊᓂᐦᐄ ᓃᔥᑎᒻ ᑳ ᒋᔅᑎᒫᐆᐦᒡ ᙭ ᐋ ᐄᔑ ᐋᔨᒨᒫᑭᓅᑦ ᒋᔅᑯᑎᒫᒑᐎᓐ, ᒥᒄ ᒫᒃ ᐋᐎᔅᑖᐦ ᒋᔅᑰᑎᒫᓱᑖᐤ ᐊᓂᐦᐄ ᐊᑎᑎᐤ ᓃᑳᓐ ᒑ ᒌ ᐄᑐᐦᑎᐦᐄᑯᔨᐦᒄ ᒋᑖᑆᔮᔨᐦᑎᒧᐎᓈᐦᒡ ᐊᑎᑎᐤ ᒑ ᒌ ᓲᐦᒋᑳᐳᐦᐄᑯᔨᐦᒄ᙮ ᐋᑯᔥ ᐋᑳ ᒦᓐ ᒋᔅᑯᑎᒫᒑᐤ ᐊᓐ ᒑ ᒌ ᒌᐙᑳᐳᔅᑎᒥᐦᒄ ᐊᓐ ᐋ ᐄᔑ ᒥᒋᑐᑎᒥᐦᒄ, ᓂᐱᐎᓂᐦᒡ ᒑ ᒌ ᐄᑐᐦᑎᐦᐄᑯᔨᐦᒄ ᑭᔮᐦ ᒫᒃ ᒦᓐ ᒑ ᒌ ᐄᑎᑯᐎᔨᐦᒄ ᒑ ᒌ ᑖᑆᔮᔨᒥᐦᒄ ᒋᔖᒥᓂᑑ, ᐙᔥ ᔖᔥ ᒋᒋᔅᒑᔨᐦᑖᓈᓂᐤ ᐅᐦᐄ᙮
2 ᑭᔮᐦ ᔖᔥ ᐋ ᒌ ᒋᔅᑯᑎᒫᑭᐎᔨᐦᒄ ᓰᑭᐦᐋᐦᑖᒑᐎᓐ, ᑭᔮᐦ ᐋ ᑖᐦᒋᓈᑭᓂᐎᒡ ᐄᔨᔨᐅᒡ ᒑ ᒌ ᐊᔨᒥᐦᐋᐅᒋᒫᐤ ᐋᐱᑎᔒᒡ, ᑭᔮᐦ ᐋ ᒌ ᒋᔅᑯᑎᒫᑭᐎᔨᐦᒄ ᒑ ᐎᓂᔥᑳᓈᑭᓅᑦ ᐊᐙᓐ ᓂᐱᐎᓂᐦᒡ ᐅᐦᒋ ᑭᔮᐦ ᒫᐦᒋᒡ ᑳᒋᒡ ᑎᐹᔅᑯᓂᒑᐎᓐ, ᐋᓐ ᒑᐦ ᐋᑳ ᓂᐦᑖ ᒌ ᐋᐦᑎᓂᑭᓂᐎᒡ᙮
3 ᐋᒄ ᒑ ᒌᐦ ᑐᑎᒫᐦᒄ ᒫᒃ ᐊᓂᐦᐄ ᐊᑎᑐ ᒋᔅᑯᑎᒫᒑᐎᓐ, ᐄᑖᔨᐦᑎᐦᑳ ᑭᔨᑆ ᒋᔖᒥᓂᑑ᙮
4 ᑖᐅᒡ ᐄᔨᔨᐅᒡ ᐋ ᓂᔅᑐᐦᑎᐦᒡ ᑖᓐ ᑳ ᐄᔑ ᒋᔅᑯᑎᒧᐙᑭᓂᐎᒡ ᒌᓴᔅ ᐋᐦ ᐋᔨᒨᒫᑭᓂᐎᒡ᙮ ᐙᔥ ᔖᔥ ᐐᔨᐙᐤ ᒌ ᐋᐱᒋᐦᑖᐅᒡ ᐊᓂᔮᔨᐤ ᑳ ᒥᔨᑯᒡ ᒋᔖᒥᓂᑑ ᐆ ᒥᔨᐙᐎᓂᔨᐤ ᑭᔮᐦ ᔖᔥ ᒌ ᒥᔨᑯᒡ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ᙮ ᐊᔮᐱᒡ ᒫᒃ ᒋᐦᒋᐙ ᒌ ᐋᑎ ᒌᐙᑳᔥᐴᑎᐙᐅᒡ ᙭᙮ ᓂᒧᐃ ᒫᒃ ᑭᑎ ᒌ ᐐᒋᐦᐋᑭᓂᐎᒡ ᐅᒌ ᒦᓐ ᒑ ᒌ ᒀᔅᒌᑳᐳᐎᒡ ᐅᒥᒋᐦᑣᐎᓂᐙᒡ᙮
5 ᒌ ᐹᐦᑎᒸᐎᒡ ᐐᔨᐙᐤ ᐋ ᐃᔥᐱᔥ ᒥᔪᐦᑖᑯᓃᔨᒡ ᒋᔖᒥᓂᑑ ᐅᒥᔻᒋᒧᐎᓂᔨᐤ᙮ ᑭᔮᐦ ᒌ ᒨᔑᐦᑖᐙᐅᒡ ᑖᓐ ᐋ ᐃᔥᐱᔥ ᓲᐦᒑᔨᐦᑖᑯᓃᔨᒡ ᐅᓲᐦᑳᑎᓰᐎᓂᔨᐤ ᐊᓅᐦᒡ ᑭᔮᐦ ᐊᓂᑖᐦ ᐄᔑ ᓃᔥᑖᒥᐦᒡ᙮
6 ᒑ ᒌᐙᑳᐳᔥᑎᒧᐙᒀ ᒫᒃ ᐅᒌ ᐄᔨᔨᐅᒡ ᒥᓯᐙ ᑳ ᐄᔑ ᒋᔅᒑᔨᐦᑎᒥᐦᐋᑭᓂᐎᒡ ᒑ ᐄᔑ ᑖᑆᔮᔨᐦᑎᒧᐙᑯᐱᓈ ᓂᒧᐃ ᒦᓐ ᒋᑭ ᒌᐦ ᑐᑎᐙᑭᓂᐎᒡ ᒑ ᒌ ᒀᔅᒌᑳᐳᐎᒡ ᐅᒥᒋᐦᑣᐎᓂᐙᒡ᙮ ᒧᔮᒻ ᒦᓐ ᐋ ᒌᔅᑖᔅᑯᐦᐙᒡ ᒋᔖᒥᓂᑑ ᐅᑯᓯᔨᐤᐦ ᐋᔑᑖᔮᐦᑎᑯᐦᒡ ᐃᓯᓈᑯᓂᔨᐤ ᐊᓂᔮᔨᐤ ᐋᐦ ᐋᑎᐙᔨᒫᐅᒡ ᑭᔮᐦ ᒫᔮᔨᒫᐅᒡ ᐋ ᒥᐦᒑᑎᓈᓂᐐᒡ᙮
7 ᐊᔅᒌ ᐋ ᒥᔪ ᒥᓂᐦᒀᒥᑭᐦᒡ ᒋᒨᓈᐴᔨ ᑭᔮᐦ ᒫᒃ ᒨᔥ ᐋ ᒋᒨᐦᒡ ᐊᓂᑎᐦ᙮ ᐋᑯᑎᐦ ᐙᐦᒋ ᒥᔪ ᓂᐦᑖᐅᒋᐦᑖᒥᑭᓃᔨᒡ ᐊᓐ ᐋ ᐄᔑ ᓃᐦᑖᐆᒋᐦᒑᑦ, ᒋᔖᒥᓂᑑ ᐋ ᒋᔖᐙᑐᑎᒦᒡ ᐊᓂᔮᔨᐤ ᐊᔅᒌᔨᐤ᙮
8 ᐊᔅᒌ ᒫᒃ ᐋ ᓈᐦᑖᐅᒋᐦᒡ ᒑᒀᓐ ᐋᐦᐋᑳ ᐎᔮᔥ ᐄᑖᐱᑎᐦᒡ ᑭᔮᐦ ᒫᒃ ᒑ ᒌ ᐅᓯᑯᐦᐄᐙᒡ, ᐊᓐ ᓂᐦᑖᐆᒋᐦᒑᓲᐤ ᑖᐹ ᒋᑭ ᒌ ᐋᐱᒋᐦᑖᐤ ᐊᓂᔮᔨᐤ ᐊᔅᒌᔨᐤ ᒑ ᒌ ᒥᔪᓂᐦᑖᐆᒋᐦᑖᑦ ᒑᒀᔨᐤ, ᓂᒧᐃ ᒋᑭ ᒋᔖᐙᑐᑖᑳᓅᔨᐤ, ᑭᔮᐦ ᒫᒃ ᒋᑭ ᐃᔥᒀᓯᑳᓅᔨᐤ ᓯᑑ᙮
9 ᓃᒋᔖᓂᑑᒄ ᑳ ᓵᒋᐦᐄᑖᒡ, ᐋᐦᐋᑦ ᐆ ᒌ ᐃᔨᑎᐦᒡ ᐅᐦᐄ ᒑᒀᓂᐦᐄ, ᒋᑖᑆᐅᒑᔨᒥᑎᓈᓐ ᐙᔥ ᓂᔅᑑᓈᑯᓐ ᑖᓐ ᐋ ᐄᑖᑎᓯᔮᒄ ᑖᑆᐦ ᐋ ᒌ ᐱᒫᒋᐦᐅᔮᒄ᙮
10 ᒋᔖᒥᓂᑑ ᑯᐃᔅᒄ ᐄᐦᑐ᙮ ᒌ ᒋᔅᒑᔨᒥᑯᐙᐤ ᑖᓐ ᑳ ᐄᔑ ᒥᔪᑐᑎᒸᒄ ᑭᔮᐦ ᑖᓐ ᑳ ᐄᔑ ᓅᑯᐦᑎᐙᒄ ᐋ ᓵᒋᐦᐋᒄ ᐋ ᒌ ᐐᒋᐦᐄᒫᒄ ᑳ ᑖᑆᔮᔨᐦᑎᒥᔨᒡ ᑭᔮᐦ ᐋᔥᒄ ᐊᓅᐦᒡ ᐋ ᐐᒋᐦᐄᒫᒄ᙮ ᓂᒧᐃ ᒫᒃ ᒋᑭ ᐅᐦᒋ ᐎᓂᒋᔅᒋᓲ ᐅᔮᔨᐤ᙮
11 ᒋᐱᑯᓵᔨᒥᑎᓈᓐ ᒥᓯᐙ ᑭᓂᐙᒡ ᒑ ᒌ ᒥᔪᑐᑎᒫᒄ ᐲᐦᐃᒻ ᐋᑎ ᐃᔅᒀᔮᒀᐙ ᒋᐱᒫᑎᓰᐎᓂᐙᐤ᙮ ᐋᒄ ᒫᒃ ᒑ ᒑᔥᑎᓈᐦᐅᔮᒄ ᑖᑆᐦ ᒑ ᒥᔨᑖᒄ ᒋᔖᒥᓂᑑ ᐊᓂᔮᔨᐤ ᑳᐦᐄᑦ ᒑᔅᑎᓈᔅ ᒥᓯᐙ ᒑ ᒥᔨᑖᒄ᙮
12 ᓂᒧᐃ ᒋᓂᑎᐙᔨᒥᑎᓈᓐ ᒑ ᒌ ᒋᐦᑎᒥᔮᒄ, ᐊᐅᔅᑖ ᓂᔅᐱᑐᐙᐦᑯᒡ ᐊᓂᒌ ᑳ ᑖᑆᔮᔨᐦᑎᐦᒡ ᑭᔮᐦ ᑳ ᓵᐱᒡ, ᐙᔥ ᐋᐅᑯᓂᒡ ᐅᒌ ᒑ ᒥᔨᑯᒡ ᒋᔖᒥᓂᑑ ᑖᓂᔮᔨᐤ ᑳ ᐄᔨᔨᒡ ᒑᔥᑎᓈᔥ ᒑ ᒥᔨᑯᒡ᙮
ᑖᓐ ᐋ ᐄᔑ ᒑᔥᑎᓈᑖᔮᔨᐦᑖᑯᓃᔨᒡ ᐊᓂᔮᔨᐤ ᒋᔖᒥᓂᑑ ᑳᐦ ᐃᔨᑦ ᒑ ᑐᑎᐦᒃ
13 ᐃᔥᐱᔥ ᒋᔖᒥᓂᑑ ᑳᐦ ᐄᑖᑦ ᐋᑉᕋᐦᐋᒻ ᒑᔥᑎᓈᔥ ᒑ ᒥᔪᑐᑎᐙᑦ ᑭᔮᐦ ᔮᔨᑖᐃ ᒑ ᑎᐱᑐᑎᒸᑦ᙮ ᓂᒧᐃ ᑯᑎᒃ ᐊᐙᔨᐤᐦ ᐅᐦᒋ ᐐᐦᐋᐤ ᒑ ᒌ ᐙᐱᐦᑏᔮᑦ ᐊᓂᔮ ᐋᑉᕋᐦᐋᒻ ᐋ ᑖᑆᑦ ᑖᓐ ᑳᐦ ᐃᔨᑦ᙮ ᐙᔥ ᑖᐹ ᑖᐤ ᑯᑎᒃ ᐊᐙᓐ ᐋ ᐃᔥᐱᔥ ᒋᔅᑖᔨᐦᑖᑯᓯᑦ ᐋ ᐃᔥᐱᔥ ᒋᔅᑖᔨᐦᑖᑯᓯᑦ ᐐᔨ ᒋᔖᒥᓂᑑ᙮
14 ᒌᐦ ᐄᑖᐤ ᒫᒃ, “ᒑᔥᑎᓈᔥ ᒋᑭ ᒋᔖᐙᑐᑖᑎᓐ ᐋ ᒥᔨᑖᓐ ᒥᐦᒑᑐ ᐄᔨᔨᐅᒡ ᐊᓂᑎᐦ ᐋᐦ ᑖᔨᓐ ᒑ ᒌ ᐅᐦᒋ ᐋᓂᔅᒑ ᐱᒫᑎᓰᔨᒡ᙮”
15 ᒑᒃ ᒥᐦᒑᑐ ᐱᐳᓐ ᐋᑉᕋᐦᐋᒻ ᑳᐦ ᐋᔑᓂᐙᓯᑦ ᐋ ᓰᐱᔨᐙᓰᑦ, ᐋᒄ ᑳ ᒥᔨᑯᑦ ᒋᔖᒥᓂᑑ ᐊᓂᔮᔨᐤ ᑳ ᐄᔨᔨᒡ ᒑᔥᑎᓈᔥ ᒑ ᒥᔨᑯᑦ᙮
16 ᐄᔥᐱᐦ ᐊᐙᓐ ᐋ ᒋᐦᒋ ᓂᔅᑯᒧᑦ ᒑᒀᔨᐤ ᐋᐦ ᐃᔨᑦ ᑯᑎᒃ ᐊᐙᔨᐤᐦ ᐐᐦᐋᐤ ᐊᐅᔅᑖ ᐋ ᒋᔅᑖᔨᐦᑖᑯᓰᔨᒡ ᐃᔥᐱᔥ ᐐ᙮ ᐋᒄ ᒫᒃ ᓂᒧᐃ ᐊᐙᔨᐤᐦ ᒌ ᐊᓍᐦᑖᑰ ᐊᓂᔮᔨᐤ ᑳ ᐄᔑ ᒋᐦᒋ ᓂᔅᑯᒧᑦ᙮
17 ᒋᔖᒥᓂᑑ ᒋᓂᑐᐙᔨᐦᑎᒻ ᒑ ᒌ ᒋᔅᒑᔨᐦᑎᒥᔨᒡ ᐅᑎᔨᔨᒻᐦ ᐋᑳ ᓂᐦᑖ ᒑ ᐅᐦᒋ ᐋᐦᒋᐦᑖᑦ ᑖᓐ ᑳ ᐐᐦ ᑐᑎᒧᐙᑦ᙮ ᐙᔥ ᑳᐦ ᐃᔨᑦ ᒑᔥᑎᓈᔥ ᒑ ᒋᔖᑐᑎᐙᑦ ᐋᒄ ᒫᒃ ᐋᔨᐤᐦ ᑳ ᒋᐦᒋ ᓂᔅᑯᒫᑦ ᐋᐦ ᐄᑖᑦ ᒑᔥᑎᓈᔥ ᒨᔥ ᒑ ᒋᔖᑐᑎᐙᑦ᙮
18 ᐙᔥ ᓃᔣ ᑳ ᐦᐄᑦ ᒑᔅᑎᓈᔅ ᒑ ᒋᓵᐙᑐᑖᐙᑦ ᐅᑎᔨᔨᒻᐦ, ᐋᔪᐎᒄ ᐊᓂᔮᔨᐤ ᒑ ᑐᑎᒧᐙᑦ, ᓂᒧᐃ ᑭᔮᐦ ᒋᑭ ᒌ ᐋᐦᒋᑖᑭᓅᔨᐤ᙮ ᓂᒧᐃ ᒋᑭ ᒌ ᓂᑎᔨᐤ ᒋᔖᒥᓂᑑ᙮ ᐋᒄ ᒫᒃ ᐄᔥᐱᐦ ᓂᑖᔑᒧᔅᑐᐦᒀ ᒑ ᒌ ᐱᒫᒋᐦᐄᑎᐦᒄ, ᒑ ᔮᔨᑎᐦᒡ ᒋᑎᔅᐹᔨᒧᐎᓂᐤ ᐋ ᒑᔥᑎᓈᑖᔨᐦᑎᒥᐦᒄ ᑖᓐ ᑳ ᐄᔑ ᒋᐦᒋ ᓂᔅᑯᒧᑦ᙮
19 ᐋ ᒑᔥᑎᓈᑖᔨᐦᑎᒥᐦᒄ ᒫᒃ ᐅᔮᔨᐤ ᑳ ᐄᔑ ᒋᐦᒋ ᓂᔅᑯᒧᑦ ᒋᔖᒥᓂᑑ ᒑ ᐄᔑ ᑐᑎᒫᑎᐦᒄ ᒧᔮᒻ ᐋᑖᐱᑎᐦᒡ ᐴᓂᓯᓈᒋᑭᓐ ᒑ ᒌ ᐅᐦᒋ ᒌᑑᑯᐦᑎᐦᒡ ᐅᑎᐦ ᐃᓯᓈᑯᓐ, ᐋᔪᐎᒄ ᑭᔮᐦ ᐐᔨ ᒧᔮᒻ ᐋᓯᓈᑯᓰᑦ ᒋᑎᐦᒑᐦᑰᓅᒡ᙮ ᐊᓐ ᒫᒃ ᐊᐙᓐ ᑳ ᒑᔥᑎᓈᑖᔮᔨᒥᐦᒄ ᐋᐅᒄ ᐊᓐ ᐹᐦᒑᑦ ᐊᓂᑖᐦ ᐊᓂᔮᔨᐤ ᑳᐦ ᐋᑭᐙᐦᐄᑭᓂᐎᔨᒡ ᒫᐅᒡ ᑳ ᐱᔮᐦᒋᓰᒥᑭᐦᒡ ᑳ ᐃᔑᓂᐦᑳᑖᔨᒡ ᐊᓂᑖᐦ ᒋᐦᒋᒌᔑᑯᐦᒡ ᑳᐦ ᑎᑯᓃᔨᒡ ᐊᔨᒥᐦᐋᐅᑭᒥᑯᔨᐤ᙮
20 ᐋᑯᑎᐦ ᐊᓂᑎᐦ ᒌᓴᔅ ᓃᑳᓐ ᐐᔨ ᑳ ᐲᐦᒑᑦ ᒑ ᒌ ᐊᔨᒥᐦᐋᔅᑎᒫᑎᐦᒄ, ᐙᔥ ᐋᐅᒄ ᐐᔨ ᒫᐅᒡ ᑳᒋᒡ ᒑᔖᐋᔮᒥᐦᐋᐆᒋᒫᐆᑦ ᒨᔮᒻ ᐊᓂᔮᔨᐤ ᐊᔨᒥᐦᐋᐆᒋᒫᐤ ᒣᓪᑭᓯᑌᒃᐦ᙮