8
ᒌᓴᔅ ᐋᐅᒄ ᒋᒋᔖᐊᔨᒥᐦᐋᐅᒋᒫᒥᓂᐤ
1 ᐋᐅᒄ ᐆ ᒌᔮᓂᐤ ᐋᔮᐎᐦᒄ ᒫᐅᒡ ᑳ ᓃᑳᓈᔮᔨᐦᑖᑯᔑᑦ ᒋᔖᐊᔨᒥᐦᐋᐅᒋᒫᐤ ᐄᑖᔨᐦᑖᑰᓯᑦ, ᐊᓂᑎᐦ ᐙᐦᑎᐱᑦ ᐅᓂᐦᐄᐎᓃᔨᐦᒡ ᒫᐅᒡ ᑳ ᓲᐦᒑᔨᐦᑖᑯᓰᔨᒡ ᒋᔖᒥᓂᑑ ᐅᒋᐦᒌᐅᒋᒫᐎᓐ ᑖᐦᑎᐱᐎᓂᐦᒡ ᐊᓂᑖᐦ ᒋᐦᒋᒌᔑᑯᐦᒡ᙮
2 ᐋᑯᑎᐦ ᒋᔖᐊᔨᒥᐦᐋᐅᒋᒫᐤ ᐋᐱᑎᓰᑦ ᐆ ᒋᒋᔖᐊᔨᒥᐦᐋᐅᒋᒫᒥᓂᐤ᙮ ᐐᔨ ᑎᐹᔨᐦᒋᒑᓯᐤ ᒌ ᐎᔨᑳᐳᐦᑖᐤ ᐊᓂᔮᔨᐤ ᐊᔨᒥᐦᐋᐤ ᒫᐦᑮᔨᐤ ᒫᐅᒡ ᑳ ᐱᔮᐦᑭᓃᔨᒡ, ᓂᒧᐃ ᐐᔨ ᓈᐹᐤ ᐅᐦᒋ ᐐᑳᐳᐦᑖᐤ᙮
3 ᐊᓐ ᐊᐙᓐ ᑳ ᐎᔮᔨᒫᑭᓅᑦ ᒑ ᒌ ᒋᔖᐊᔨᒥᐦᐋᐅᒋᒫᐅᑦ ᐋᐅᒄ ᐊᓐ ᑳ ᐹᑖᐙᑦ ᐊᓂᔮᔨᐤ ᐄᔨᔨᐤᐦ ᐅᐱᒋᔅᑎᓂᒑᐎᓂᔨᐤ ᑭᔮᐦ ᐅᒥᒋᔥᑎᐦᐊᒫᐎᓂᔨᐤ ᐊᓂᑖᐦ ᒋᔖᒥᓂᑑ ᐋᐦ ᑖᔨᒡ᙮ ᐋᒄ ᒫᒃ ᑭᔮᐦ ᒌᔮᓂᐤ ᒋᒋᔖᐊᔨᒥᐦᐋᐅᒋᒫᒥᓂᐤ ᙭ ᑭᔮᐦ ᐐᔨ ᒋᐱᐦ ᑎᑯᓂᔨᐤ ᒑᒀᔨᐤ ᐋ ᐄᔑ ᐱᒋᔅᑎᓂᒧᐙᑦ ᒋᔖᒥᓂᑑ᙮
4 ᒥᒄ ᒫᒃ ᐅᑎᐦ ᐊᔅᒌᐦᒡ ᒌᐦ ᑖᑯᐱᓈ ᓂᒧᐃ ᒋᐱᐦ ᐅᐦᒋ ᐊᔨᒥᐦᐋᐅᒋᒫᐤ ᐙᔥ ᔖᔥ ᑖᐅᒡ ᑯᑎᑭᒡ ᐊᔨᒥᐦᐋᐅᒋᒫᐅᒡ ᐅᑎᐦ ᐊᔅᒌᐦᒡ, ᐋ ᒥᔨᐙᒡ ᐊᓂᔮᔨᐤ ᒥᔨᐙᐎᓐ ᐋ ᐄᔑ ᒥᓯᓈᑖᒡ ᐊᓂᑎᐦ ᒎᐤ ᐐᔓᐙᐎᓂᐦᒡ᙮
5 ᐅᒌ ᒫᒃ ᐊᔨᒥᐦᐋᐅᒋᒫᐅᒡ ᑳᐦ ᐋᐱᑎᔒᒡ ᐊᓂᑖᐦ ᐊᔨᒥᐦᐋᐤ ᒫᐦᑮᐦᒡ, ᓂᐦᐋᐤ ᑳ ᐐᐦ ᐃᓯᓈᑯᐦᑖᑭᓂᐎᔨᒡ ᐊᓂᔮᔨᐤ ᐊᔨᒥᐦᐋᐤ ᒫᐦᑭᔨᐤ ᐊᓂᑖᐦ ᒋᐦᒋᔒᑯᐦᒡ ᑳᐦ ᑎᑯᓃᔨᒡ᙮ ᐙᔥ ᐃᔥᐱᔥ ᒧᓱᔅ ᑳ ᐐᔨᑳᐳᐦᑖᑦ ᐊᓂᔮᔨᐤ ᐊᔨᒥᐦᐋᐤ ᒫᐦᑭᔨᐤ, ᒌ ᐃᔮᒀᒥᑰ ᒋᔖᒥᓂᑑ ᐋᐦ ᐄᑎᑯᑦ, “ᐊᓂᑖᐦ ᐋᐱᔅᑯᑎᓈᐦᒡ ᑳ ᑖᔨᓐ ᑳ ᐙᐱᐦᑎᔨᑖᓐ ᑖᓐ ᒑ ᐃᓯᓈᑯᐦᑖᔨᓐ ᐋᐅᒄ ᔮᔨᑖᐃ ᓂᐦᐋᐤ ᒑ ᐃᓯᓈᑯᐦᑖᔨᓐ᙮”
6 ᐋᓂᔮᔨᐤ ᒫᒃ ᐋᐱᑎᓰᐎᓂᔨᐤ ᒋᔖᒥᓂᑑ ᑳ ᒥᔮᑦ ᒌᓴᔅᐦ ᐊᑎᑎᐤ ᒋᔅᑎᒫᐎᓂᔨᐤ ᐋ ᐄᑖᔨᐦᑖᑯᓃᔨᒡ ᐊᔨᒥᐦᐋᐅᒋᒫᐤ ᐋᐱᑎᓰᐎᓂᔨᐤ ᐅᑎᐦ ᐊᔅᒌᐦᒡ, ᒨᔮᒻ ᐊᓂᔮᔨᐤ ᑳ ᐅᔥᑳᔨᒡ ᓂᔅᑯᒧᐎᓂᔨᐤ ᑳ ᐅᔑᐦᑖᑦ ᑳ ᐄᔑ ᑎᐱᐲᐦᑖᔨᒡ ᒌᓴᔅᐦ, ᐋᔪᐎᒄ ᐊᓂᔮᔨᐤ ᐊᐅᔅᑖ ᒑᔅᑖᔨᐦᑖᑯᓃᔨᒡ ᐃᔥᐱᔥ ᐐ ᐊᓂᔮᔨᐤ ᐙᔥᑭᒡ ᓂᔅᑯᒧᐎᓂᔨᐤ᙮ ᐙᔥ ᒋᔖᒥᓂᑑ ᒑᔅᑎᓈᔅ ᒌ ᐃᔨᐤ ᒑ ᑐᑎᐦᒃ ᐊᐅᔅᑖ ᒥᔥᑏᐦ ᒑ ᒥᔪᑐᑎᒧᐙᑦ ᐄᔨᔨᐤ ᐊᓂᔮᔨᐤ ᑳ ᐅᔥᑳᔨᒡ ᓂᔅᑯᒧᐎᓂᔨᐤ ᐅᐦᒋ᙮
7 ᒌ ᐃᔥᐱᔥ ᒥᔻᐱᑎᓂᑯᐱᓈ ᒫᒃ ᐊᓐ ᓃᔥᑎᒻ ᓂᔅᑯᒧᐎᓐ ᒑ ᒌ ᐱᒫᒋᐦᐅᒡ ᐄᔨᔨᐅᒡ, ᓂᒧᐃ ᒋᐱᐦ ᐅᐦᒋ ᓂᑎᐙᔨᐦᑖᑯᓐ ᐋ ᐅᔅᑳᒡ ᓂᔅᑯᒧᐎᓐ᙮
8 ᒌᐦ ᑎᑯᓂᔨᐤ ᒫᒃ ᑖᓐ ᑳ ᐄᔑ ᐋᑳ ᓂᐦᐋᔨᐦᑎᒥᐦᐄᑯᑦ ᐅᑎᔨᔨᒻᐦ ᒋᔖᒥᓂᑑ᙮ ᒌᐦ ᐄᑖᐤ,
ᒋᑭ ᐅᑎᐦᒋᐱᔨᐤ ᐋ ᐅᔥᑳᔨᒡ ᓂᔅᑯᒧᐎᓂᔨᐤ ᒑ ᐅᔑᐦᑎᒨᒀᐤ ᐃᔅᕋᐄᓪ ᐄᔨᔨᐅᒡ ᑭᔮᐦ ᒍᑖ ᐄᔨᔨᐅᒡ᙮ ᐋᔪᐎᒄ ᐃᔮᑦ ᑎᐹᔨᐦᒋᒑᓯᐤ᙮
9 ᐅᔮᔨᐤ ᑯᑎᒋᔨᐤ ᓂᔅᑯᒧᐎᓂᔨᐤ ᒑ ᐅᔑᐦᑎᒨᒀᐤ ᓂᑎᐄᔨᔨᒥᒡ ᐃᔨᐦᒡ ᒋᑭ ᐄᑖᔨᐦᑖᑯᓂᔨᐤ ᑳ ᐄᑖᔨᐦᑖᑯᓃᔨᒡ ᐊᓂᔮᔨᐤ ᓂᔅᑯᒧᐎᓂᔨᐤ ᑳ ᐅᔑᐦᑎᒫᒥᒡ ᐊᓂᔮᔨᐤ ᐅᑖᓂᔥᒑ ᐅᐦᑖᐐᐙᐤ ᐄᔥᐱᐦ ᓃᔨ ᑎᐱᔨᐙ ᑳ ᐱᑯᐦᐄᒥᒡ ᐊᓂᑖᐦ ᐄᒋᐱᑎᐦᒡ ᐅᐦᒋ᙮ ᐙᔥ ᐐᔨᐙᐤ ᓂᒧᐃ ᐅᐦᒋ ᓂᓂᐦᐄᐦᑎᒧᒡ ᐊᓂᔮᔨᐤ ᓂᔅᑯᒧᐎᓂᔨᐤ᙮ ᐋᔪᐎᒄ ᒫᒃ ᐊᓂᔮᔨᐤ ᐙᐦᒋ ᐋᑳ ᐅᐦᒋ ᐃᔮᐱᑖᔨᒫᒀᐤ᙮
10 ᒥᒄ ᒫᒃ ᒫᐅᔮᔨᐤ ᑳ ᐅᔥᑳᔨᒡ ᓂᔅᑯᒧᐎᓂᔨᐤ ᒑ ᒥᔨᒀᐤ ᐃᔅᕋᐄᓪ ᐄᔨᔨᐅᒡ ᐄᔥᐱᐦ ᐅᑎᐦᒋᐱᔨᔨᒀᐙ ᐊᓂᔮᔨᐤ ᐋ ᒌᔑᑳᔨᔨᒡ᙮ ᐅᔮᔨᐤ ᓃᔨ ᐐᔓᐙᐎᓐᐦ ᒑ ᒥᔨᒀᐤ ᓂᑭ ᐐᔨᔅᑖᐙᓐ ᐅᒥᑐᓈᔨᐦᒑᑭᓅᐙᐦᒡ ᑭᔮᐦ ᐅᑖᐦᐄᐙᐦᒡ᙮ ᓃᔨ ᓂᑭ ᐅᒋᔖᒥᓂᑑᒥᑐᑖᑯᒡ ᑭᔮᐦ ᐐᔨᐙᐤ ᓂᑭ ᐅᑏᔨᔨᒥᓐ
11 ᓂᒧᐃ ᒋᑭ ᐅᐦᒋ ᓂᑎᐙᔨᐦᑖᑯᓂᔨᐤ ᒑ ᒌ ᒋᔅᒋᓂᐦᐊᒧᐙᑦ ᐊᐙᓐ ᐐᒋᔖᓐᐦ ᐋᐦ ᐄᑖᑦ, ᒋᑭ ᒋᔅᑯᑎᒫᑎᓐ ᒑ ᒌ ᒋᔅᒑᔨᒥᑦ ᑎᐹᔨᐦᒋᒑᓯᐤ᙮ ᐙᔥ ᒥᓯᐙ ᐊᐙᓐ ᓂᑭ ᒋᔅᒑᔨᒥᒄ, ᑳ ᒋᔖᐄᔨᔨᐎᑦ ᑭᔮᐦ ᐊᓐ ᑳ ᐊᐙᔑᔒᐎᑦ, ᑖᐱᐦᑖᔨᐦᑖᑯᓯᒀᐤ ᐲᐦᐃᒻ ᐊᓂᑖᐦ ᒑᔅᑖᔨᐦᑖᑯᓯᒀᐤ᙮
12 ᓂᑭ ᒋᔅᑎᒫᒑᔨᒫᐅᒡ ᐋ ᒥᒑᑎᓯᒡ ᑭᔮᐦ ᓂᒧᐃ ᒦᓐ ᓂᐦᑖ ᓂᑭᐃᔮᐲᐦᑖᔨᐦᑖᒨᐙᐅᒡ ᒌ ᐙᐹᔨᐦᑎᒨᒀᐙ ᐅᒥᒋᐦᑣᐎᓂᐙᐤ᙮
13 ᐄᔥᐱᐦ ᒋᔖᒥᓂᑑ ᑳᐦ ᐃᔨᑦ ᒦᓐ ᐋᐅᔅᑳᔨᒡ ᓂᔅᑯᒧᐎᓂᔨᐤ ᒑ ᐅᔑᐦᑎᒧᐙᑦ ᐅᑎᔨᔨᒻᐦ ᐋᑯᑖᐦ ᐙᐦᒋ ᒋᔅᒑᔨᐦᑖᑯᐦᒡ ᐊᓐ ᓃᔥᑎᒻ ᑳ ᐅᔑᐦᑖᑭᓂᐎᒡ ᔖᔥ ᐋ ᒌᓵᔫᐎᒥᑭᐦᒡ ᑭᔮᐦ ᔖᔥ ᒑᐦ ᐋᑳ ᐋᐱᑎᐦᒡ ᑭᔮᐦ ᔖᔥ ᐋ ᐹᔓᓈᑯᐦᒡ ᒑᐦ ᐋᑳ ᑎᑯᐦᒡ᙮