13
ᑖᓐ ᒋᐱᐦ ᐄᔑ ᑭᓂᐙᐱᐦᑎᒻ ᐊᐙᓐ ᑎᐹᔨᐦᒋᒑᐎᓂᔨᐤ
1 ᒥᓯᐙ ᐊᐙᓐ ᓂᑎᐙᔨᐦᑖᑯᓲ ᒑ ᒌ ᓂᓃᐦᑎᐦᒃ ᑎᐹᔨᐦᒋᒑᐎᓂᔨᐤ ᐅᑎᐦ ᐊᔅᒌᐦᒡ᙮ ᒥᓯᐙ ᑎᐹᔨᐦᒋᒑᐎᓐ ᑳᐦ ᑎᑯᐦᒡ ᒋᔖᒥᓂᑑ ᒌ ᐱᒋᔅᑎᓂᒻ᙮ ᐐᔨ ᒌ ᐎᔨᔥᑖᐤ ᒥᓯᐙ ᑎᐹᔨᐦᒋᒑᐎᓂᔨᐤ ᑖᓐ ᒑ ᐃᓯᓈᑯᓃᔨᒡ᙮
2 ᐊᐙᓐ ᐋ ᓂᔥᑰᔥᑎᐦᒃ ᑎᐹᔨᐦᒋᒑᐎᓂᔨᐤ ᓂᔥᑰᔥᑎᒻ ᒑᒀᔨᐤ ᒋᔖᒥᓂᑑ ᐋ ᒌ ᐄᑎᔓᐙᑎᒥᔨᒡ ᒑ ᒌ ᑎᑯᓃᔨᒡ᙮ ᓂᔥᑰᔥᑎᐦᑳ ᒫᒃ ᐊᐙᓐ ᑎᐹᔨᐦᒋᒑᐎᓂᔨᐤ ᒋᑭ ᑐᑖᔓ ᒑ ᒌ ᑎᐹᔅᑯᓈᑭᓅᑦ᙮
3 ᐊᓂᒌ ᑯᐃᔅᒄ ᑳᐦ ᑎᒡ ᓂᒧᐃ ᑎᑯᓂᔨᐤ ᒑ ᒌ ᐅᐦᒋ ᑯᔥᐱᓃᔅᑎᐙᒡ ᐊᓂᔮᔨᐤᐦ ᐐᔓᐙᐎᓐᐦ ᑳ ᓈᓈᑭᒋᐦᑖᔨᒡ᙮ ᐊᓂᒌ ᐋᑳ ᑳ ᒫᒨᔮᒻ ᐋᐃᐦᔨᑎᒡ ᐋᐅᑯᓂᒡ ᐋᐦᑎᑯᓃᔨᒡ ᒑ ᒌ ᐅᐦᒋ ᑯᔥᐱᓃᔅᑎᐙᒡ᙮ ᐋᑳ ᐱᔑᔑᐦᒄ ᐙᐦ ᑯᔥᐱᓃᔅᑎᐙᐅᑖ ᐊᓐ ᐐᔓᐙᐎᓐ ᑳ ᓈᓈᑭᒋᐦᑖᑦ, ᑯᐃᔅᒄ ᑎᐦ᙮ ᒋᑭ ᒌ ᐃᓯᓈᑯᓂᔨᐤ ᐙᐙᒡ ᒑ ᒌ ᒥᔪ ᐋᔨᒨᒥᔅᒃ᙮
4 ᐙᔥ ᒋᔖᒥᓂᑑ ᐊᓂᔮᔨᐤ ᐅᑖᐱᒋᐦᐋᑭᓐᐦ᙮ ᒋᑭ ᒥᔪᐱᔨᐙᓐ ᒫᒃ ᓂᓂᐦᐄᐦᑎᒧᑖ᙮ ᒥᔔ ᒫᒃ ᐋᑳ ᒫᒨᔮᒻ ᐋᔨᑎᔨᓈ ᑎᑯᓂᔨᐤ ᑖᑆᐦ ᒑᒀᔨᐤ ᒑ ᒌ ᐅᐦᒋ ᑯᔥᐱᓃᔅᑎᐎᑦ ᐊᓐ ᐐᔓᐙᐎᓐ ᑳ ᓈᓈᑭᒋᐦᑖᑦ᙮ ᑖᑆᐦ ᐙᔥ ᒌ ᒥᔮᑭᓂᐤ ᐎᔮᔅ ᒑ ᒌ ᐄᑎᔓᒫᑦ ᐊᐙᔨᐤᐦ ᐋᐦᐋᑳ ᒫᒨᔮᒻ ᐋ ᐄᔨᐦᑎᔨᒡ᙮ ᒋᔖᒥᓂᑑ ᐋᔔ ᐋᐱᒋᐦᐄᑰ ᐎᔮᔅ ᒑ ᒌ ᐄᑎᔓᒫᑦ ᐊᓂᔮᔨᐤ ᐋᑳ ᑳ ᒫᒨᔮᒻ ᐋ ᐄᔨᐦᑎᔨᒡ᙮
5 ᒌ ᓂᑎᐙᔨᐦᑖᑯᓯᓐ ᒑ ᒌ ᓂᓂᐦᐄᐦᑎᒥᓐ ᑎᐹᔨᐦᒋᒑᐎᓐ᙮ ᓂᓂᐦᐄᐦᑎᐦ ᓂᒧᐃ ᒥᒄ ᒦᔥᑯᒡ ᒑᐦ ᐋᑳ ᐎᔮᔅ ᒌ ᐄᑎᔓᒥᔅᒃ ᒋᔖᒥᓂᑑ, ᐋᐅᒄ ᑎᐦ ᒑ ᒌ ᒑᔥᑎᓈᐦᐅᔨᓐ ᑖᑆᐦ ᑯᐃᔅᒄ ᐋᐦᑎᔨᓐ᙮
6 ᐋᐅᒄ ᑭᔮᐦ ᐙᐦᒋ ᓂᑎᐙᔨᐦᑖᑯᓯᔨᓐ ᒑ ᒌ ᑎᐱᐦᐄᒑᔨᓐ ᑎᐹᔨᐦᒋᒑᐎᓂᐦᒡ᙮ ᒋᔖᒥᓂᑑ ᐋᐱᑎᔒᔥᑑᐙᐅᒡ ᐊᓂᒌ ᑎᐹᔨᐦᒋᒑᐎᓂᐦᒡ ᑳ ᐄᔑ ᐋᐱᑎᔒᒡ ᐋᔪᐎᒄ ᒫᒃ ᐅᔮᔨᐤ ᐋ ᐄᔑ ᓂᑎᐙᔨᐦᑖᑯᓯᒡ ᒑ ᒌᐦ ᑐᑎᒡ᙮
7 ᑖᓐ ᒥᒄ ᐋ ᐄᔑ ᑎᑯᓃᒀ ᒑ ᒌ ᐄᔑ ᑎᐱᐦᐅᓱᔨᓐ ᔓᐎᔮᓐ, ᑎᐱᐦᐅᓲ᙮ ᑖᓐ ᒥᒄ ᐋ ᐄᔑ ᓂᑎᐙᔨᐦᑖᑯᓲᓈ ᒑ ᒌ ᐄᔑ ᒋᔅᑖᔨᒥᑣᐤ ᐊᓂᒌ ᑎᐹᔨᐦᒋᒑᐎᓂᐦᒡ ᑳ ᐄᔑ ᐋᐱᑎᔒᒡ, ᒋᔅᑖᔨᒥᒡ᙮
ᑖᓐ ᒋᐱᐦ ᑐᑖᑐᓈᓂᐤ
8 ᑳᐦ ᐋᐆᐦᐋᓱᒫᐆᑖ ᒑᒀᔨᐤ ᐊᐙᓐ ᔮᔨᑖ ᒌᐙᒦᐦ᙮ ᒥᒄ ᑖᓐ ᒨᔥ ᐋ ᐄᔑ ᑎᑯᐦᒡ ᒑ ᒌ ᐄᔑ ᓵᒋᐦᐄᑐᐙᑯᐱᓈ ᐋᐅᒄ ᒫᐦ ᐄᔑ ᑭᓂᐙᐱᐦᑎᐦᑖᐤ ᒑᐦ ᐋᑳ ᓂᐦᑖ ᒌ ᐃᔥᐱᔥ ᒌ ᒌᔑ ᒌᐙᑎᐱᐦᐄᒑᔨᐦᒄ᙮ ᒥᓯᐙ ᑎᐱᑑᑎᒸᐤ ᐊᐙᓐ ᒋᔖᒥᓂᑑ ᐅᐐᔓᐙᐎᓂᔨᐤ ᐐᒋᐄᔨᔨᐤ ᐋ ᓵᒋᐦᐋᑦ᙮
9 ᐅᐦᐄ ᐄᑎᔓᐙᐎᓐ, “ᐊᑳᐐ ᒋᑭ ᐱᓯᒀᑎᓯᓐ, ᐊᑳᐐ ᒋᑭ ᓂᐱᐦᐄᐙᓐ, ᐊᑳᐐ ᒋᑭ ᑭᒑᒧᑎᓐ, ᐊᑳᐐ ᒋᑭ ᒧᔥᑖᓂᒧᐙᐤ ᑯᑎᒃ ᐊᐙᓐ ᑖᓐ ᐋ ᐄᔑ ᑎᐱᔨᐙᐎᓰᑦ᙮” ᑯᑎᒃ ᒫᒃ ᐄᑎᔓᐙᐎᓐ ᐋᐦᑎᑯᓄᐙᒀ, ᒥᓯᐙ ᒫᒨ ᒋᑭ ᒌ ᐋᔥᑎᒋᐦᑖᑭᓄᐤ ᐊᓂᑎᐦ ᐊᓐ ᐹᔨᒄ ᐄᑎᔓᐙᐎᓐ ᑳ ᐄᑎᔥᑖᒡ, “ᓵᒋᐦᐄᐦ ᒌᒋᐄᔨᔨᐤ ᒧᔮᒻ ᒌᔨ ᐋ ᐃᔥᐱᔥ ᓵᒋᐦᐄᓱᔨᓐ᙮”
10 ᐊᐙᓐ ᐋ ᓵᒋᐦᐋᑦ ᐐᒋᐄᔨᔨᐤ ᓂᒧᐃ ᓂᐦᑖ ᑭᑎ ᐅᐦᒋ ᐎᓂᑐᑎᐙᐤ᙮ ᐋ ᓵᒋᐦᐋᑦ ᐊᐙᓐ ᐐᒋᐄᔨᔨᐤ ᐊᓂᔮᔨᐤ ᐄᑎᔓᐙᐎᓂᔨᐤ ᓂᓂᐦᐄᐦᑎᒻ᙮
11 ᐋᐅᒄ ᐆ ᒋᐱᐦ ᐄᔑ ᐱᒫᑎᓰᓈᐙᐤ ᐋ ᒋᔅᒑᔨᐦᑎᒫᒄ ᑖᓐ ᒑ ᐄᔅᐱᔨᔨᒡ ᔖᔥ ᐐᐱᒡ᙮ ᐄᑖᔨᐦᑖᑯᓐ ᐋᒄ ᑖᑆᐦ ᒑ ᒌ ᐹᑯᐱᔮᒄ ᑭᔮᐦ ᒑ ᒌ ᐋᓯᐦᒑᔨᐦᑎᒫᒄ᙮ ᐊᓐ ᐋ ᒌᔑᑳᒡ ᒑ ᐱᒫᒋᐦᐄᑎᐦᒄ ᒋᔖᒥᓂᑑ ᔖᔥ ᐊᑎᑎᐤ ᐹᔓᓈᑯᓐ ᑳ ᐃᔥᐱᔑᓈᑯᐦᒡ ᐊᓂᑎᐦ ᓃᔥᑎᒻ ᑳ ᑖᑆᔮᔨᒥᐦᒄ ᒌᓴᔅ᙮
12 ᔖᔥ ᒑᑳᑦ ᒥᔮᐅᐱᔨᐤ ᐋ ᑎᐱᔅᑳᒡ᙮ ᔖᔥ ᒋᑭ ᐅᑎᐦᒋᐱᔨᐤ ᐋ ᒌᔑᑳᒡ᙮ ᐴᓃᑖᐤ ᐋᐦ ᑐᑎᒥᐦᒄ ᐊᓂᐦᐄ ᒑᒀᓂᐦᐄ ᑖᓐ ᐋ ᐄᔑ ᒥᒌᐦᑐᑖᑭᓂᐎᒡ ᐊᐅᑳᔥᑖᔮᐎᓂᐦᒡ᙮ ᑐᑎᐦᑖᐤ ᐊᓂᐦᐄ ᒑᒀᓂᐦᐄ ᒑ ᐐᒋᐦᐄᑯᔨᐦᒄ ᒑ ᒌ ᓂᔥᑰᔥᑑᐦᒄ ᒥᒋᒥᓂᑑ ᐙᔥᑖᐎᓂᐦᒡ ᐋᐦ ᑖᔨᐦᒄ᙮
13 ᑯᐃᔅᒄ ᐄᔑ ᐱᒫᑎᓰᑖᐤ ᒑ ᓅᑯᐦᒡ ᒫᒃ ᑖᑆᐦ ᐙᔥᑖᐎᓂᐦᒡ ᐋ ᐄᔑ ᐱᒫᑎᓰᔨᐦᒄ᙮ ᐊᑳᐐ ᒋᑭ ᐅᐦᒋ ᐐᒋᐦᐄᐙᓈᓂᐤ ᐋ ᐐᓂᓯᐤ ᐋ ᐃᐦᑎᓈᓂᐎᒡ ᑭᔮᐦ ᐊᑳᐐ ᐐᒋᐦᐄᐙᑖᐤ ᐊᓂᑖᐦ ᐋ ᒥᓂᐦᒀᓂᐎᒡ᙮ ᐊᑳᐐ ᓂᓈᐦᑭᐤ ᒋᑭ ᐅᐦᒋ ᐄᔑ ᐐᓂᓯᐤ ᐱᒫᑎᓰᓈᓂᐤ᙮ ᐊᑳᐐ ᒋᑭ ᐅᐦᒋ ᒥᒌᔨᓰᐦᑳᑑᓈᐙᐤ᙮ ᐊᑳᐐ ᑭᔮᐦ ᒋᑭ ᐅᐦᒋ ᐅᐎᐦᑖᔨᒥᑐᓈᓂᐤ᙮
14 ᓂᔅᐱᑎᐙᐦᒄ ᑎᐹᔨᐦᒋᒑᓯᐤ ᒌᓴᔅ ᙭, ᑳ ᐄᔑ ᐱᒫᑎᓰᑦ᙮ ᐊᑳᐐ ᐄᑖᔨᐦᑎᒧᒄ ᒑ ᒌ ᐃᔮᐱᑖᔨᐦᑎᒫᒄ ᒋᔮᓯᐙᐤ ᒑ ᒌ ᐃᔨᐦᑐᑎᒫᒄ ᑖᓐ ᐋ ᐄᔑ ᒥᒋᓂᑐᐙᔨᐦᑎᒨᒥᑭᐦᒡ᙮