8
ᐊᓂᔮᔨᐤ ᐱᒫᑎᓰᐎᓂᔨᐤ ᑳ ᐱᔮᐦᒋᓰᑦ ᐊᐦᒑᐦᒄ ᒫᔮᑦ ᐊᐙᔨᐤᐦ
1 ᓂᒧᐃ ᔖᔥ ᑎᑯᓐ ᐊᓂᑎᐦ ᒑ ᐅᐦᒋ ᓂᔑᐎᓈᒋᒥᑯᒡ ᐊᓂᒌ ᐄᔨᔨᐅᒡ ᙭ ᒌᓴᔅ ᑳ ᐐᒑᐙᒡ᙮
2 ᐙᔥ ᒋᔖᒥᓂᑑ ᐅᑎᐦᒑᐦᒄ ᒌ ᑐᑖᑯᔨᓂᐤ ᒑ ᒌ ᐱᒫᑎᓰᐅᒄ ᙭ ᒌᓴᔅᐦ ᐅᐦᒋ᙮ ᐋᐅᒄ ᑳ ᐱᑯᐦᐄᑦ ᑖᓐ ᑳ ᐄᔑ ᑎᐹᔨᒥᑯᒡ ᒥᒑᑎᓰᐎᓂᔨᐤ ᑭᔮᐦ ᓂᐱᐎᓂᔨᐤ᙮
3 ᐆ ᐐᔓᐙᐎᓐ ᓂᒧᐃ ᑰᐦᒋ ᐱᒫᒋᐦᐄᑯᓈᓂᐤ ᐅᐦᒋ ᐙᔥ ᒋᔮᓂᐤ ᐄᔨᔨᐅᒡ ᓈᔥᒡ ᐊᐦᐋᑳ ᓵᐲᒡ ᑭᔮᐦ ᓂᒧᐃ ᑖᑭᔥ ᑰ ᒌ ᓂᓃᐦᑖᓈᓂᐤ ᐐᔓᐙᐎᓐ᙮ ᒥᒄ ᒫᒃ ᒋᔖᒥᓂᑑ ᒌᐦ ᑐᑎᒻ ᐊᓂᔮᔨᐤ ᐋᐦᐋᑳ ᐅᐦᒋ ᒌᐦ ᐄᑖᐱᑎᓰᒥᑭᓃᒡ ᐊᓂᔮᔨᐤ ᐐᔓᐙᐎᓐ᙮ ᑳ ᐹᒋ ᐄᑎᔑᐦᐙᑦ ᐅᑯᓯᔅᐦ, ᒨᔮᒻ ᒌᔮᓂᐤ ᐋᒥᒋᐦᑣᐦᔨᐦᒄ ᐋ ᐃᓯᓈᑯᓲᐦᒄ ᒑ ᒌ ᐄᔑᓈᑯᓯᒡ᙮ ᒌ ᐹᒋ ᐄᑎᔑᐦᐙᐤ ᒑ ᒌ ᓂᐴᔅᑏᒫᑏᑖᐦᒄ ᒑ ᒌ ᐱᒋᔅᑏᓂᒑᓲᐐᒡ ᐅᐦᒋ ᐊᓂᔮᔨᐤ ᒋᒥᒋᐦᑣᐎᓂᐤ᙮ ᐋᑯᑎᐦ ᒫᒃ ᑳ ᐅᐦᒋ ᐄᔮᔨᐆᐦᑖᑦ ᐊᓂᔮᔨᐤ ᑳ ᐅᐦᒋ ᑎᐹᔨᒥᑰᐦᒃ ᒫᒋᐦᑣᐎᓂᔨᐤ᙮
4 ᒌᐦ ᑐᑎᒻ ᐅᔮᔨᐤ ᒑ ᒌ ᐅᐦᒋ ᒥᑐᓐ ᑎᐱᑑᑎᒥᐦᒄ ᑖᓐ ᐋ ᐄᔑ ᑯᐃᔅᒄ ᐄᑖᔨᐦᑖᑯᓃᔨᒡ ᐊᑎᔓᐙᒥᑭᓃᔨᒡ ᐅᐐᔓᐙᐎᓐ᙮ ᑳ ᐱᔮᐦᒋᓰᑦ ᐊᐦᒑᐦᒄ ᐋ ᑎᐹᔨᒥᑎᐦᒄ ᐋᒄ ᐃᔮᒄ ᒑ ᒌ ᑎᐱ ᑐᑎᒥᐦᒄ ᐆ, ᓂᒧᐃ ᐐᔨ ᒌ ᒥᒑᑎᓰᐎᓂᓂᐤ ᐋ ᑎᐹᔨᒥᑯᔨᐦᒄ᙮
5 ᐊᓂᒌ ᒫᒃ ᒥᒄ ᑖᐹᔨᒥᑯᒡ ᒑ ᒌ ᒥᒑᑎᓯᒡ ᐋ ᐄᔑ ᐱᒫᑎᓰᔨᒡ, ᒥᒄ ᐐᔨᐙᐤ ᓂᑎᐐ ᒥᒄ ᒑ ᒌ ᐄᔑ ᓂᓂᐦᐋᔨᐦᑎᒥᐦᐄᓯᐎᒡ ᐄᔑ ᒫᒥᑐᓈᔨᐦᑎᒧᒡ᙮ ᐋᒄ ᐊᓂᒌ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᑳ ᐱᒋᔅᑎᓈᒡ ᒑ ᒌ ᑎᐹᔨᒥᑯᒡ ᑖᓐ ᒑ ᐄᔑ ᐱᒫᑎᓰᔨᒡ, ᐱᔑᔑᐦᒄ ᒑ ᒌ ᓂᓂᐦᐋᔨᐦᑎᒥᐦᐋᒡ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᐄᔑ ᒫᒥᑐᓈᔨᐦᑎᒧᒡ᙮
6 ᓂᑎᐐ ᒥᒄ ᐐᔑ ᓂᓂᐦᐋᔨᐦᑎᒥᐦᐄᓱᒑ ᐊᐙᓐ, ᑭᑎ ᓂᐱᐦᐄᑰ ᐅᔮᔨᐤ ᐋᐦᑎᒃ᙮ ᐱᔑᔑᐦᒄ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᒑ ᒌ ᓂᓂᐦᐋᔨᐦᑎᒥᐦᐋᑦ ᐋ ᐄᔑ ᒫᒥᑐᓈᔨᐦᑎᐦᒃ ᐊᐙᓐ ᐱᒫᑎᓰᐎᓂᔨᐤ ᑭᔮᐦ ᒋᔮᒫᔨᐦᑎᒧᐎᓂᔨᐤ ᐃᔮᐤ᙮
7 ᐙᔥ ᐊᓂᒌ ᓂᑎᐐ ᒥᒄ ᒑ ᒌ ᐄᔑ ᓂᓂᐦᐋᔨᐦᑎᒥᐦᐄᓱᒡ ᑳ ᐄᔑ ᒫᒥᑐᓈᔨᐦᑎᐦᒡ ᓂᔥᑰᔥᑎᐙᐅᒡ ᒋᔖᒥᓂᑑ᙮ ᓂᒧᐃ ᑐᑎᒧᒡ ᑖᓐ ᐋᑎᔓᐙᔨᒡ᙮ ᓂᒧᐃ ᒋᑭ ᒌᐦ ᑐᑎᒧᐙᐅᒡ᙮
8 ᐊᓂᒌ ᓂᑎᐐ ᒥᒄ ᑳ ᐄᔑ ᐱᒫᑎᓰᔨᒡ ᓂᒧᐃ ᒋᑭ ᒌ ᓂᐦᐋᔨᐦᑎᒥᐦᐋᐅᒡ ᒋᔖᒥᓂᑑ᙮
9 ᒌᔨᐙᐤ ᒫᒃ ᐐ, ᓂᒧᐃ ᒋᑎᐹᔨᒥᑯᓈᐙᐤ ᓂᑎᐐ ᒥᒄ ᐋ ᐐᐦ ᐄᔑ ᓂᐦᐋᔨᐦᑎᒥᐦᐄᓱᔮᒄ᙮ ᑳ ᐱᔮᐦᒋᓰᑦ ᐊᐦᒑᐦᒄ ᐋᐅᒄ ᑖᐹᔨᒥᑖᒄ ᒥᔔ ᑖᑆᐦ ᐹᐦᒋᔥᑳᑎᐙᒀ᙮ ᐊᐙᓐ ᒫᒃ ᐋᑳ ᐹᐦᒋᔥᑳᑰᒀ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᓂᒧᐃ ᑎᐹᔨᒥᑰ ᙭᙮
10 ᙭ ᒫᒃ ᐋ ᐲᐦᒋᔥᑳᑖᒄ ᐋᑯᑖᐦ ᐙᐦᒋ ᐄᔅᐱᔨᔨᒡ ᑖᑆᐦ ᒑ ᒌ ᐱᒫᑎᓰᔨᒡ ᒋᑎᐦᒑᐦᑯᐙᐅᒡ, ᐙᔥ ᐋ ᑯᐃᔅᑯᑖᑎᓰᐙᒄ ᒋᑎ ᐄᔑ ᑭᓂᐙᐱᒥᑯᐙᐤ ᒋᔖᒥᓂᑑ, ᐋᑦ ᐋᓅᐦᒡ ᐋᐦ ᐋᑎ ᓂᐲᒥᑭᐦᒡ ᒌᔨᐙᐤ ᐊᓐ ᐅᐦᒋ ᐋ ᒥᒑᑎᓯᔮᒄ᙮
11 ᒥᔔ ᐹᐦᒋᔥᑳᑎᑎᐙᒀ ᒋᔖᒥᓂᑑ ᐅᑎᐦᒑᐦᒄ, ᒋᔖᒥᓂᑑ ᐊᓐ ᑳ ᐙᓂᔥᑳᓈᑦ ᒌᓴᔅᐦ ᓂᐱᐎᓂᐦᒡ ᐅᐦᒋ, ᒑᔥᑎᓈᔥ ᒋᔖᒥᓂᑑ ᒋᑭ ᐎᓂᔥᑳᓂᑯᐙᐤ ᑭᔮᐦ ᒌᔨᐙᐤ᙮ ᐋᑯᑖᐦ ᒫᒃ ᒑ ᒌ ᐅᐦᒋ ᐱᒫᒋᐦᑖᑭᓂᐎᒡ ᐊᓂᐦᐄ ᐋ ᓂᐲᒥᑭᐦᒡ ᒋᔮᐙᐤᐦ, ᐋ ᐐᒑᑏᑖᒄ ᒋᔖᒥᓂᑑ ᐅᑎᐦᒑᐦᒄ ᐅᐦᒋ᙮
12 ᓃᒋᔖᓂᑎᒄ, ᔮᔨᑖᐃ ᒋᓂᑎᐙᔨᐦᑖᑯᓯᓈᓂᐤ ᐋᑳ ᒑ ᒌ ᒥᒋᓂᑐᐙᔨᐦᑎᒧᒥᑭᐦᒡ ᐄᔑ ᐱᒫᑎᓰᔨᐦᒄ, ᓂᒧᐃ ᒋᐱᐦ ᐅᐦᒋ ᐄᔑ ᐱᒫᑎᓰᓈᓂᐤ ᑖᓐ ᐋ ᐄᔑ ᒥᒋᓂᑐᐙᔨᐦᑎᒧᒥᑭᐦᒡ᙮
13 ᐙᔥ ᐊᓐ ᐄᔑ ᐱᒫᑎᓰᔨᓈ ᑖᓐ ᐋ ᐄᔑ ᓂᑎᐙᔨᐦᑎᒨᒥᑭᐦᒡ ᒋᔮᔅ ᒋᑭ ᓂᐱᓐ᙮ ᐱᒋᔅᑎᓂᑖ ᒫᒃ ᑳ ᐱᔮᐦᒋᓰᑦ ᐊᐦᒑᐦᒄ ᒑ ᒌ ᐐᒋᐦᐄᔅᒃ ᒑ ᒌ ᐴᓂᐦᑖᐙᑦ ᑖᓐ ᐙᐦ ᐄᔑ ᐙᐦᒋᐱᔨᔨᒡ ᒑ ᒌ ᒥᒋᐦᑑᑎᒧᑦ ᐋᒄ ᑭᔨᑆ ᑖᑆᐦ ᒑ ᐱᒫᑎᓰᔨᓐ᙮
14 ᒥᓯᐙ ᐊᓂᒌ ᑳ ᐱᔮᐦᒋᓰᔨᒡᐦ ᐊᐦᒑᐦᒄᐦ ᑳ ᒋᔅᒋᓄᐦᑎᐦᐄᑯᒡ ᒋᔖᒥᓂᑑ ᐅᑎᐙᔑᔒᒥᑐᑖᑰᐎᒡ᙮
15 ᐙᔥ ᑖᐹ ᒋᑎᐦᑐᑖᑯᐙᐤ ᐊᓐ ᐊᐦᒑᐦᒄ ᒋᔖᒥᓂᑑ ᑳ ᒥᔨᑖᒄ ᒦᓐ ᑳᐤ ᒑ ᒌ ᑎᐹᔨᒥᑯᐙᒄ ᓵᒋᓯᐎᓂᔨᐤ᙮ ᐆ ᐊᐦᒑᐦᒄ ᐅᐦᒋ ᐋᑯᑖᐦ ᐙᐦᒋ ᐄᔑᐦᐄᑎᐦᒄ ᒋᔖᒥᓂᑑ ᒑ ᒌ ᐅᑎᐙᔑᔒᒥᑖᑎᐦᒄ᙮ ᑭᔮᐦ ᒫᒃ ᒑ ᒌ ᐄᑎᒄ, “ᐋᐹ, ᓅᐦᑖ᙮”
16 ᑳ ᐱᔮᐦᒋᓰᑦ ᐊᐦᒑᐦᒄ ᒌ ᒋᔅᒑᔨᐦᑎᒥᐦᐄᑯᓂᐤ ᒋᑖᐦᐄᓈᐦᒡ ᑖᑆᐦ ᒋᔖᒥᓂᑑ ᐋ ᐅᑎᐙᔑᔒᒥᑖᑎᐦᒄ᙮
17 ᐋᒄ ᒫᒃ ᐋ ᐅᑎᐙᔑᔒᒥᑖᑎᐦᒄ ᒋᔖᒥᓂᑑ ᒑᔥᑎᓈᔥ ᒋᑭ ᒥᔨᑯᓂᐤ ᐊᓂᔮᔨᐤ ᒥᔪᑐᑎᒫᒑᐎᓐ ᑳ ᐃᔮᔅᑰᔥᑎᒧᐙᑦ ᐅᑎᐙᔑᔒᒻ᙮ ᒌᔮᓂᐤ ᑭᔮᐦ ᒑ ᐃᔮᔨᐦᒄ ᑖᓐ ᑳ ᐄᔑ ᐋᓂᔅᒑ ᒥᔮᑭᓅᑦ ᐐᔨ ᙭᙮ ᐙᔥ ᒥᔔ ᐐᒋᓂᓈᐦᑳᑖᔨᒨᒥᐦᒀ ᙭ ᑭᔮᐦ ᒌᔮᓂᐤ ᒋᑭ ᒋᔅᑖᔨᐦᑖᑯᐦᐄᑯᓈᓂᐤ ᒋᔅᑖᔨᐦᑖᑯᐦᐋᑭᓄᒑ᙮
ᐋᔥᒄ ᒋᑭ ᒋᔅᑖᔨᐦᑖᑯᐦᐄᑯᓈᓂᐤ
18 ᓃᔨ ᐋ ᐄᑖᔨᐦᑎᒫᓐ ᑖᓐ ᐋ ᐄᔑ ᓂᓈᐦᑳᑖᔨᒧᔨᐦᒄ ᐊᓅᐦᒡ ᓂᒧᐃ ᒥᑐᓐ ᒑᒀᓐ ᒋᑭ ᐅᐦᒋ ᐄᑖᔨᐦᑖᑯᓐ ᒑ ᐃᔥᐱᔥ ᓈᔥᒡ ᒨᒌᒑᔨᐦᑖᑯᐦᒡ ᐄᔥᐱᐦ ᐅᑎᐦᒋᐱᔨᐦᒑ ᐊᓂᑎᐦ ᒑ ᓅᑯᐦᑖᑭᓂᐎᒡ ᐋ ᒋᔅᑖᔨᐦᑖᑯᐦᐄᑎᐦᒄ ᒋᔖᒥᓂᑑ᙮
19 ᒥᓯᐙ ᒑᒀᔨᐤ ᑖᓐ ᑳ ᐄᔑ ᐅᔑᐦᑖᑦ ᒋᔖᒥᓂᑑ ᓈᔥᒡ ᐱᒀᔨᐦᑎᒨᒥᑭᓂᔨᐤ ᐋ ᐊᔓᐙᐱᐦᑎᒧᒥᑭᓃᔨᒡ ᒑ ᐃᔥᐱᔥ ᒧᔖ ᓅᑯᐦᐋᑦ ᐅᑎᐙᔑᔒᒻ᙮
20 ᐙᔥ ᐊᓐ ᒥᓯᐙ ᒑᒀᓐ ᑳ ᐅᔑᐦᑖᑭᓂᐎᒡ ᔖᔥ ᓂᒥ ᒥᔻᓯᐤ ᐊᓐ ᑳ ᐃᓯᓈᑯᐦᒡ ᐊᓂᑖᐦ ᐅᔅᑭᒡ᙮ ᓂᒥᔮᔨᐤ ᐐᔨᐙᐤ ᑳᑑᑎᐦᒡ᙮ ᒋᔖᒥᓂᑑ ᒌ ᐱᒋᔅᑎᓂᒻ ᒥᓯᐙ ᒑᒀᔨᐤ ᒑᒃ ᒑ ᐋᑎ ᐃᔮᔫᐎᓃᒡ, ᒥᒄ ᒫᒃ ᐊᔮᐱᒡ ᒋᔖᒥᓂᑑ ᒌ ᒥᔨᐙᐤ ᐊᔅᐹᔨᒧᐎᓂᔨᐤ,
21 ᐊᓂᔮᔨᐤ ᒥᓯᐙ ᑳ ᐅᔑᐦᑖᑦ ᐋᔥᒄ ᐹᔨᒀᐤ ᐋ ᒌᔑᑳᔨᒡ, ᒋᑭ ᐱᑯᐦᐅᒥᑭᓄᔨᐤ ᐊᓂᑎᐦ ᑳ ᐄᔑ ᑎᐹᔨᐦᑖᑯᓃᔨᒡ ᐃᔮᔪᔒᐎᓂᒡ, ᑭᔮᐦ ᒫᒨ ᒑ ᐄᔑ ᐱᑯᐦᐅᔨᒡ ᒋᔖᒥᓂᑑ ᐅᑎᐙᔑᔒᒻ ᑖᐱ ᒦᔻᔨᐦᑎᒧᐎᓂᒡ᙮
22 ᒋᒋᔅᒑᔨᐦᑖᓈᓂᐤ ᐊᓂᑎᐦ ᒥᓯᐙ ᑖᓐ ᑳ ᐄᔑ ᐅᔑᐦᑖᑦ ᒋᔖᒥᓂᑑ ᐋᔥᒄ ᑭᔮᐦ ᐊᓅᐦᒡ ᐋ ᒥᒫᑣᐦᐄᐙᔨᒡ ᓂᓈᐦᑳᑖᔨᒨᐐᓂᔨᐤ, ᒧᔮᒻ ᐃᔅᒀᐤ ᐋ ᐄᔑ ᒥᒫᑣᐄᑯᑦ ᐄᔥᐱᐦ ᐋᐦ ᐋᑎ ᒋᐦᒋᐱᔨᔨᒡ ᒑ ᐙᐱᒫᐅᓱᑦ᙮
23 ᓂᒧᐃ ᒫᒃ ᒥᒄ ᐅᐦᐄ ᒑᒀᓂᐦᐄ ᓂᓈᐦᑳᑖᔨᒨᒥᑭᓐ᙮ ᒌᔮᓂᐤ ᑭᔮᐦ ᒌ ᓂᓈᐦᑳᑖᔨᒧᓈᓂᐤ ᐋ ᒥᒫᑣᐦᐄᑯᔨᐦᒄ ᒋᑖᐦᐄᓈᐦᒡ ᒫᒀᒡ ᓈᔥᒡ ᐋ ᐱᒀᔨᐦᑎᒥᐦᒄ ᐋ ᐊᔑᓂᐙᓰᔨᐦᒄ ᒋᔖᒥᓂᑑ ᐅᑎᐙᔑᔒᒻ, ᒑ ᒌ ᐄᔑ ᓅᑯᐦᐄᑭᐎᔨᐦᒄ ᐋ ᐄᔑ ᐅᑎᓂᑭᐎᔨᐦᒄ ᐋᑳ ᓂᐦᑖ ᒦᓐ ᒑ ᒌ ᓂᓈᐦᑳᑖᔨᒧᔨᐦᒄ ᒋᔮᓈᐦᒡ᙮ ᔖᔥ ᒫᒃ ᒋᒌ ᒥᔨᑯᓂᐤ ᒋᔖᒥᓂᑑ ᐅᑎᐦᒑᐦᒄ ᒑ ᒌ ᐅᐦᒋ ᒋᔅᒑᔨᐦᑎᒥᐦᒄ ᒥᓯᐙ ᑖᑆᐦ ᒑ ᐄᔅᐱᔨᔨᒡ ᐅᔮᔨᐤ᙮
24 ᐙᔥ ᐋᐅᒄ ᑳ ᐄᔑ ᐊᔅᐹᔨᒧᔨᐦᒄ ᐃᔥᐱᔥ ᑳ ᐱᒫᒋᐦᐄᑭᐎᔨᐦᒄ᙮ ᐄᔥᐱᐦ ᒫᒃ ᒌ ᐅᑎᐦᒋᐱᔨᐦᒑ ᑭᔨᑆ ᓂᒧᐃ ᐋᒄ ᒋᑭ ᐅᐦᒋ ᐊᔅᐹᔨᒧᓈᓂᐤ᙮ ᐙᔥ ᑖᐹ ᐊᔅᐹᔨᒨ ᐊᐙᓐ ᒑᒀᔨᐤ ᒑ ᒌ ᐄᔅᐱᔨᔨᒡ ᔖᔥ ᐋ ᒌ ᐄᔅᐱᔨᔨᒡ᙮
25 ᒌ ᐱᑯᓵᔮᐱᑖᓈᓂᐤ ᒫᒃ ᒑᒀᓐ ᐋᐦᐋᑳ ᓂᐦᑖ ᐅᐦᒋ ᐙᐱᐦᑎᒧᒄ᙮ ᓂᒧᐃ ᒌ ᐱᒋᔥᑖᔨᒧᓈᓂᐤ ᒫᒃ ᐋᐦ ᐋᔓᐙᐱᐦᑎᒥᐦᒄ᙮
26 ᐋᑳ ᓵᐱᓯᔨᐦᒄ, ᐊᔨᒥᐦᐋᔨᐦᒄ ᓂᒧᐃ ᒋᒋᔅᒑᔨᐦᑖᓈᓂᐤ ᒑ ᐄᔑ ᐋ ᐊᔨᒥᐦᐋᔨᐦᒄ, ᑳ ᐱᔮᐦᒋᓰᑦ ᐊᐦᒑᐦᒄ ᐋᐅᒄ ᐙᒋᐦᐄᑎᐦᒄ᙮ ᐋᑯᑖᐦ ᒫᒃ ᓈᑐᑎᒫᔅᑎᒫᑎᐦᒄ ᑳ ᐱᔮᐦᒋᓰᑦ ᐊᐦᒑᐦᒄ ᐋ ᒫᒫᑣᐦᐄᑯᑦ ᐋᐦᐋᑳ ᒌ ᐐᐦᑖᑭᓅᐎᒡ ᐊᔨᒧᐎᓂᔨᐤ ᐅᐦᒋ᙮
27 ᒋᔖᒥᓂᑑ ᒫᒃ ᑳ ᒋᔅᒑᔨᐦᑎᐦᒃ ᒥᓯᐙ ᒋᑖᐦᐄᓂᐤᐦ ᒋᔅᒑᔨᐦᑎᒻ ᑖᓐ ᓂᐦᐋᐤ ᐋ ᐄᔑ ᓂᑐᑎᒫᔅᑎᒫᒑᔨᒡ ᐊᐦᒑᐦᒄ, ᐙᔥ ᓂᑐᑎᒫᔅᑎᒫᒑᔨᐤ ᒋᔖᒥᓂᑑ ᐅᑎᑖᔨᐦᑎᒧᐎᓂᔨᐤ ᐄᔑ᙮
28 ᒋᒋᔅᒑᔨᐦᑖᓈᓂᐤ ᒫᒃ ᒥᓯᐙ ᒑᒀᔨᐤ ᐋᐦ ᐄᔅᐱᔨᔨᒡ ᐅᐱᒫᑎᓯᐎᓃᔨᒡ ᐊᓂᔮᔨᐤ ᑳ ᓵᒋᐦᐄᑯᑦ ᒋᔖᒥᓂᑑ ᑐᑎᒧᐙᐤ ᒥᓯᐙ ᒑ ᒌ ᒥᔪᑐᑖᑯᔨᒡ᙮ ᐋᔪᐎᒄ ᐋᐦ ᑐᑎᒧᐙᑦ ᐊᓂᔮᔨᐤ ᐐᔨ ᑳ ᐄᑖᔨᐦᑎᐦᒃ ᒑ ᐅᐙᔮᐱᒫᑦ ᒑ ᒌ ᐅᑏᔨᔨᒥᑦ᙮
29 ᐙᔥ ᓂᔮᑭᓐᐦ ᒌ ᒋᔅᒑᔨᒫᐤ ᒋᔖᒥᓂᑑ ᐊᐙᔨᐤᐦ ᒑ ᐅᑏᔨᔨᒥᑦ, ᐋᔨᐅᑯᓐ ᒫᒃ ᐅᔮᔨᐤ ᑳ ᐅᐙᔮᐱᒫᑦ ᒑ ᓂᔅᐱᑎᐙᔨᒡ ᐅᑯᓯᔅᐦ᙮ ᐋᔪᐎᒄ ᐅᔮᔨᐤ ᑳᐦ ᑎᒃ ᒋᔖᒥᓂᑑ ᒑ ᒌ ᓃᔥᑎᒨᔖᓂᐎᔨᒡ ᐅᑯᓯᔅᐦ ᐊᓂᑎᐦ ᑖᐙᔨᔥ ᐋ ᒥᐦᒑᑎᔨᒡ ᐐᒋᔖᓂᒫᐤ᙮
30 ᐊᓂᔮᔨᐤ ᒫᒃ ᓂᔮᑭᓐᐦ ᑳ ᐎᔮᔨᒫᑦ ᐊᐙᔨᐤᐦ ᒌ ᓂᑑᒫᐤ ᒑ ᒌ ᓈᑎᑯᑦ᙮ ᐅᔮᔨᐤ ᒫᒃ ᑳ ᓂᑑᒫᑦ ᒌ ᑯᐃᔅᑯᓈᑯᐦᐋᐤ ᐐᔨ ᐄᔑ ᐋᐦ ᑖᑦ᙮ ᐅᔮᔨᐤ ᒫᒃ ᑳ ᑯᐃᔅᑯᓈᑯᐦᐋᑦ ᒌ ᒋᔅᑖᔨᐦᑖᑯᐦᐋᐤ ᑭᔮᐦ᙮
ᐋ ᐃᔥᐱᔥ ᓵᒋᐦᐄᑎᐦᒄ ᒋᔖᒥᓂᑑ
31 ᒥᓯᐙ ᒫᒃ ᐆ ᐋ ᒋᔅᒑᔨᐦᑎᒥᐦᒄ ᒫᐤ ᒑ ᒌ ᐃᔨᐦᒄ, ᑖᑆᐦ ᒋᔖᒥᓂᑑ ᐙᒋᐦᐄᑐᐦᒀ ᓂᒧᐃ ᐊᐙᓐ ᒋᑭ ᒌ ᓵᑯᐦᐄᑯᓂᐤ᙮
32 ᓂᒧᐃ ᐙᐙᒡ ᐅᑯᓯᔅᐦ ᑰᐦᒋ ᒋᔖᑎᓂᒫᑯᓂᐤ᙮ ᒌ ᐱᒋᔅᑎᓈᐤ ᒥᒄ ᒑ ᒌ ᓂᐳᔅᑎᒫᑏᑎᐦᒄ ᒌᔮᓂᐤ ᐅᐦᒋ, ᐋᑯᑖᐦ ᒑ ᐅᐦᒋ ᒑᔥᑎᓈᐦᐅᔨᐦᒄ ᒥᒄ ᒑ ᐄᔑ ᒥᔨᑎᐦᒄ ᒥᓯᐙ ᑯᑎᒋᔨᐤ ᒑᒀᔨᐤ ᐃᔥᒡ᙮
33 ᐊᐙᓐ ᒑ ᒌ ᒫᒥᔑᒫᑦ ᒋᔖᒥᓂᑑ ᐅᐙᔮᐱᒫᑭᓂᔨᐤ᙮ ᐐᔨ ᒋᔖᒥᓂᑑ ᐅᑯᐃᔅᑯᑖᑎᓰᐎᒡ ᐄᔑ ᑭᓂᐙᐱᒫᐤ ᐊᓂᔮᔨᐤ ᑳ ᐅᐙᔮᐱᒫᑦ᙮
34 ᓂᒧᐃ ᒫᒃ ᐊᐙᓐ ᒋᑭ ᒌ ᓂᔑᐎᓈᒋᒫᐤ ᒋᔖᒥᓂᑑ ᐅᐙᔮᐱᒫᑭᓂᔨᐤ ᒑ ᒌ ᐄᑖᑦ ᐋ ᐄᑖᔨᐦᑖᑯᓃᔨᒡ ᒑ ᒌ ᒫᑯᐦᐄᒫᑭᓂᐎᔨᒡ ᐅᒥᒋᐦᑣᐎᓂᔨᐤ ᐅᐦᒋ᙮ ᐙᔥ ᓂᒧᐃ ᒥᒄ ᑰᐦᒋ ᓂᐳᔅᑎᒫᑯᓂᐤ ᙭ ᐋᔨᐤᐦ ᒌ ᐎᓂᔥᑳᓈᑭᓂᐤ ᓂᐱᐎᓂᐦᒡ ᐅᐦᒋ᙮ ᒫᒀᒡ ᒫᒃ ᒋᔖᒥᓂᑑ ᐅᓂᐦᐄᐎᓃᔨᐦᒡ ᐊᐱᐤ ᐋ ᐊᔨᒥᐦᐋᔅᑎᒫᑎᐦᒄ᙮
35 ᐊᐙᓐ ᒫᒃ ᒑ ᒌ ᐄᒑᓂᑎᐦᒄ ᙭ ᐅᓵᒋᐦᐄᐙᐎᓃᐦᒡ ᐅᐦᒋ? ᐋᑦ ᓈᔥᒡ ᓂᓈᐦᑳᑖᔨᒧᔨᒀ ᑭᔮᐦ ᒫᒃ ᓈᔥᒡ ᐋᔨᒧᐦᐅᔨᐦᒀ, ᑭᔮᐦ ᐋᑎᐙᐐᓯᒑᔨᐦᑎᒥᐦᐄᑭᐎᔨᒀ, ᐋᑦ ᐄᔑᓈᑯᐦᒑ ᒑ ᒌ ᑭᐎᐦᑭᑖᔨᐦᒄ, ᑭᔮᐦ ᐋᑎ ᓈᔥᒡ ᒋᔅᑎᒫᑎᓯᔨᒀ, ᐋᑎ ᓈᔥᒡ ᑯᔥᑖᑎᑯᐦᒑ ᐊᓂᑎᐦ ᐋᐦ ᑖᔨᐦᒄ ᑭᔮᐦ ᒫᒃ ᐋᑎ ᓂᐱᐦᐄᑭᐎᔨᐦᒀ ᓂᒧᐃ ᐊᔮᐱᒡ ᒋᑭ ᒌ ᐄᒑᐦᑎᐦᐄᑯᓈᓂᐤ ᒌᓴᔅ ᐅᓵᒋᐦᐄᐙᐎᓂᐦᒡ ᐅᐦᒋ᙮
36 ᐊᒀᒋᔥᑖᒡ ᒋᐦᒋᒥᓯᓂᐦᐄᑭᓂᐦᒡ,
ᐋᔑᑯᒻ ᒌᔑᑳᐤᐦ ᑯᔥᐱᓈᔨᐦᑖᑯᓐ ᒑ ᒌ ᓂᐱᐦᐄᑭᐎᔮᐦᒡ ᐋ ᓅᔔᔥᑳᑖᐦᒡ᙮ ᒧᔮᒻ ᒫᓂᔥᒑᓂᔑᒡ ᑳ ᐹᔑᐙᑭᓂᐎᒡ ᒑ ᒌ ᓂᐱᐦᐋᑭᓂᐎᒡ ᐋᐅᒄ ᐋ ᐃᓯᓈᑯᓯᔮᐦᒡ᙮
37 ᐋᐦᐋᑦ ᒫᒃ ᒥᓯᐙ ᐆ ᐄᔑ ᓂᓈᐦᑭᐤ ᐄᔅᐱᔨᒡ ᐊᓂᑎᐦ ᐋᐦ ᑖᔨᐦᒄ ᒋᑎᔮᓈᓂᐤ ᐱᔅᒋᔮᒑᐎᓐ ᙭ ᐅᐦᒋ, ᐊᓐ ᑳ ᓵᒋᐦᐄᑎᐦᒄ ᐙᔥ ᐐᔨ ᒌ ᐐᒋᐦᐄᑯᓂᐤ᙮
38 ᓂᒑᔥᑎᓈᐦᐅᓐ ᐋᐦᐋᑳ ᒑᒀᓐ ᑎᑯᐦᒡ ᒑ ᒌ ᐄᒑᐦᑎᐦᐄᑯᔨᐦᒄ ᙭ ᐅᓵᒋᐦᐄᐙᐎᓂᐦᒡ ᐅᐦᒋ᙮ ᐴᓂᐱᒫᑎᓰᔮᒀ ᑭᔮᐦ ᒫᒃ ᒫᒀᒡ ᐋ ᐱᒫᑎᓰᔨᐦᒄ ᐊᔮᐱᒡ ᒋᓵᒋᐦᐄᑯᓂᐤ᙮ ᓂᒧᐃ ᐙᐙᒡ ᐋᓐᒋᓂᒡ ᑭᔮᐦ ᒫᒃ ᒥᒋᐊᐦᒑᐦᑯᐦᒡ ᒋᑭ ᒌ ᐄᒑᐦᑎᐦᐄᑯᓂᐎᒡ ᙭ ᐅᓵᒋᐦᐄᐙᐎᓃᔨᒡ ᐅᐦᒋ᙮ ᓂᒧᐃ ᒑᒀᓐ ᒋᑭ ᒌ ᐄᔅᐱᔨᐤ ᐊᓅᐦᒡ ᒫᒃ ᐊᓂᑖᐦ ᓃᔥᑖᒥᐦᒡ ᒑ ᒌ ᐄᒑᐦᑎᐦᐄᑯᔨᐦᒄ ᐅᓵᒋᐦᐄᐙᐎᓂᐦᒡ ᐅᐦᒋ᙮
39 ᓂᒧᐃ ᑎᑯᓐ ᓲᐦᒑᔨᐦᑖᑯᓯᐎᓐ ᐊᓂᑖᐦ ᐃᔥᐱᒥᐦᒡ ᑭᔮᐦ ᒫᒃ ᐅᑖᐦ ᓃᐦᑖᐦᒡ ᒑ ᒌ ᐄᒑᐦᑎᐦᐄᑯᐦᒄ ᐅᓵᒋᐦᐄᐙᐎᓂᐦᒡ᙮ ᑭᔮᐦ ᓂᒧᐃ ᑎᑯᓂᔨᐤ ᒑᒀᔨᐤ ᐋ ᒌ ᐅᔑᐦᑖᑦ ᒋᔖᒥᓂᑑ ᒑ ᒌ ᐄᒑᐦᑎᐦᐄᑯᐦᒄ ᙭ ᐆ ᓵᒋᐦᐄᐙᐎᓂᐦᒡ ᐅᐦᒋ᙮ ᐊᓂᔮᔨᐤ ᑖᓐ ᑳ ᐄᔑ ᑐᑎᒫᑎᐦᒄ ᒌᓴᔅ ᙭ ᒋᑎᐹᔨᐦᒋᒑᓰᒥᓂᐤ ᐋᑯᑖᐦ ᑳ ᐙᐱᐦᑎᔨᑎᐦᒄ ᑖᓐ ᐋ ᐃᔥᐱᔥ ᓵᒋᐦᐄᑎᐦᒄ ᒋᔖᒥᓂᑑ᙮