10
ᐋᓐᒋᓐ ᑭᔮᐦ ᐊᓐ ᑳ ᐊᐱᔖᔑᒡ ᐋᐦ ᒋᑎᑎᐱᓂᑭᓄᐐᒡ ᒥᓯᓂᐦᐄᑭᓐ
1 ᒦᓐ ᑯᑎᒃ ᐋ ᓲᐦᒑᔨᐦᑖᑯᓯᑦ ᐋᓐᒋᓐ ᓂᒌᐙᐱᒫᐤ ᒋᐦᒋᒌᔑᑯᐦᒡ ᐋ ᐅᐦᒋ ᐹᒋ ᔮᓰᑦ, ᑭᔥᑭᐎᓂᔥᒄ ᐋ ᐅᑎᑯᐦᐱᑦ᙮ ᐐᑯᐲᓵᑭᓈᔮᐱᔨᐤ ᒌ ᐙᔅᑳᑯᑖᔨᐤ ᑎᐦᑯᐦᒡ ᐊᓂᑎᐦ ᐅᔥᑎᒀᓂᒡ᙮ ᐅᑖᔥᑎᒥᐦᒄ ᒧᔮᒻ ᐲᓯᒻ ᐋ ᐄᔑ ᒌᐦᑳᔮᔥᑎᐙᑦ ᒌ ᐃᓯᓈᑯᓂᔨᐤ᙮ ᐋᒄ ᐅᔅᑳᑎᐦ ᒧᔮᒻ ᒌᑎᐙᔅᑯᐦᐄᑭᓐ ᐋ ᐃᔥᑯᑖᐐᔨᒡ ᒌ ᐃᓯᓈᑯᓂᔨᐤ᙮
2 ᒌ ᑎᐦᑯᓂᒻ ᐋ ᒋᑎᑎᐱᓂᑭᓄᐐᒡ ᒥᓯᓂᐦᐄᑭᓂᔑᔨᐤ ᐅᑎᐦᒌᐦᒡ᙮ ᐋ ᒌ ᐋᐱᐦᐙᒋᓂᑭᓄᐎᔨᑯᐱᓈ᙮ ᐋᒄ ᐊᓂᔮᔨᐤ ᐅᓂᐦᐄᐎᓂᐦᒡ ᐄᑖᒑ ᐅᓯᑦ ᐊᓂᑖᐦ ᐄᑖᐦᒑ ᒋᐦᒋᑭᒦᐦᒡ ᒌ ᐄᔑ ᑎᐦᑯᔅᒑᐤ ᐋᒄ ᐊᓂᔮᔨᐤ ᐅᓂᒥᐦᑎᓂᒡ ᐄᑖᒑ ᐅᓯᑦ ᐊᔅᒌᐦᒡ ᒌ ᐄᔑ ᑎᐦᑯᔅᒑᐤ᙮
3 ᐋᒄ ᑳ ᑖᑆᑦ ᐋ ᒌᔂᐙᑦ ᒧᔮᒻ ᒥᔑᐱᔑᒡ ᐋᐦ ᐄᑎᐦᑖᑯᓯᑦ᙮ ᐄᔥᐱᐦ ᒫᒃ ᑳ ᑖᑆᑦ ᐊᓂᒌ ᓃᔣᔥᒡ ᑳ ᐃᑎᔑᒡ ᓂᒥᔅᒋᐅᒡ ᒌ ᐅᐦᒋ ᐹᐦᑖᑯᓯᐎᒡ ᒧᔮᒻ ᐋ ᐊᔨᒥᒡ ᐋᐦ ᐄᑎᐦᑖᑯᓯᒡ᙮
4 ᐄᔥᐱᐦ ᒫᒃ ᑳ ᐹᐦᑖᑯᓯᒡ ᐊᓂᒌ ᓃᔣᔥᒡ ᑳ ᐃᑎᔑᒡ ᓂᒥᔅᒋᐅᒡ ᒧᔮᒻ ᐋ ᐊᔨᒥᒡ ᑳ ᐄᑎᐦᑖᑯᓯᒡ, ᓂᒌ ᐐᐦ ᒋᐦᒋ ᒥᓯᓂᐦᐄᒑᓐ᙮ ᐋᒄ ᑳ ᐅᐦᒋ ᐹᐦᑎᒫᓐ ᐹᐦᑖᑯᓯᐎᓐ ᒋᐦᒋᒌᔑᑯᐦᒡ ᐅᐦᒋ ᐋᐦ ᐄᑎᑯᐎᔮᓐ, “ᐊᑳᐐ ᒥᓯᓂᐦᐋᐦ ᑖᓐ ᑳᐦ ᐃᔨᒡ ᐊᓂᒌ ᓂᒥᔅᒋᐅᒡ᙮ ᐊᑳᐐ ᐊᐙᓐ ᒋᑭ ᐅᐦᒋ ᒋᔅᒑᔨᐦᑎᒻ᙮”
5 ᐋᒄ ᐊᓐ ᐋᓐᒋᓐ ᓂᐱᑖ ᐊᓂᑖᐦ ᒋᐦᒋᑭᒦᐦᒡ ᑭᔮᐦ ᓂᐱᑖ ᐊᔅᒌᐦᒡ ᑳ ᐄᔑ ᑎᐦᑯᔅᒑᑦ ᑳ ᐅᐦᐱᓂᔥᒑᐱᔨᐦᑖᑦ ᐅᓂᐦᐄᐎᓐ ᒋᐦᒋᒌᔑᑯᐦᒡ ᐄᔑ᙮
6 ᐋᒄ ᑳ ᒋᐦᒋ ᓂᔅᑯᒫᑦ ᐅᐦᑎᔅᑰ ᒋᔖᒥᓂᑑᐦ ᐋᐦ ᑖᔨᒡ, ᐊᓂᔮᔨᐤᐦ ᑳᒋᒡ ᑳ ᐱᒫᑎᓰᔨᒡ, ᑳ ᐅᔑᐦᑖᔨᒡ ᒌᔑᑯᔨᐤ, ᐊᔅᒌᔨᐤ ᑭᔮᐦ ᒋᐦᒋᑭᒥᔨᐤ ᑭᔮᐦ ᒥᓯᐙ ᐋ ᐄᔑ ᑎᑯᓃᔨᒡ ᐊᓂᑖᐦ᙮ ᐋᒄ ᑳᐦᐄᑦ, “ᐋᓐ ᑳ ᐄᔑ ᐐᐦᑖᑭᓂᐎᒡ ᓃᑳᓐ ᒑ ᐄᔅᐱᔨᒡ, ᔖᔥ ᒋᑭ ᐄᔅᐱᔨᐤ, ᓂᒥ ᒋᑭ ᐊᓯᓂᐙᓰᓈᓂᐤ᙮”
7 ᐄᔥᐱᐦ ᒫᒃ ᐊᓐ ᓃᔣᔥᒡ ᐋᐦ ᑖᑦ ᐋᓐᒋᓐ ᐴᑖᑎᐦᑳ ᐅᐴᑖᒋᑭᓐ ᐋᒄ ᒑ ᒌᐦᔑᐦᑖᑦ ᒋᔖᒥᓂᑑ ᐋ ᑎᐱᐦᑑᑎᐦᒃ ᑖᓐ ᑳ ᐄᑖᔨᐦᑎᒥᐦᐄᑯᑦ ᒑ ᑐᑎᐦᒃ ᐊᓂᔮᔨᐤ ᒑᒀᔨᐤ ᐋᑳ ᐊᐙᔨᐤᐦ ᐙᐦᒋ ᒋᔅᒑᔨᐦᑎᒥᔨᒡ, ᐊᓂᔮᔨᐤ ᑳ ᐄᔑ ᐐᐦᑎᒧᐙᑯᐱᓈ ᐊᓂᔮᔨᐤ ᐅᑖᐱᒋᐦᐋᑭᓐᐦ ᑳ ᐹᒋ ᒋᔅᒋᐙᐦᐄᒑᔨᔨᒡ᙮
8 ᐋᒄ ᒦᓐ ᑳ ᐹᐦᑎᒫᓐ ᐹᐦᑖᑯᓲᐎᓐ ᒋᐦᒋᒌᔑᑯᐦᒡ ᐅᐦᒋ ᐋ ᐹᒋ ᐄᔑᑦ, “ᒫᒌᐦ ᐅᑎᓂᒻ ᐊᓂᔮᔨᐤ ᑭᑎᑎᐱᓂᑳᓄᐐᒡ ᒥᓯᓂᐦᐄᑭᓂᔑᔨᐤ ᑳᐦ ᐋᐱᐦᐄᔅᑖᔨᒡ ᐅᑎᐦᒌᐦᒡ ᐊᓐ ᐋᓐᒋᓐ ᐊᓂᑖᐦ ᒋᐦᒋᑭᒦᐦᒡ ᑭᔮᐦ ᐊᔅᒌᐦᒡ ᑳ ᐄᔑ ᑎᐦᑯᔅᒑᑦ᙮”
9 ᐋᒄ ᑳ ᓈᑎᒃ ᐊᓐ ᐋᓐᒋᓐ ᐋᒄ ᑳᐦ ᐄᑎᒄ ᒑ ᒌ ᐹᒋ ᒥᔨᑦ ᐊᓂᔮᔨᐤ ᑭᑎᑎᐱᓂᑳᓄᐐᒡ ᒥᓯᓂᐦᐄᑭᓂᔑᔨᐤ ᑳ ᑎᐦᑯᓂᐦᒃ᙮ ᐋᒄ ᑳ ᐹᒋ ᐄᔑᑦ, “ᐅᑎᓐ ᒑ ᒦᒋᔨᓐ᙮ ᐄᔥᐱᐦ ᒌ ᑯᐦᒋᐱᔨᐦᑖᔨᓈ ᒋᑭ ᐋᑎ ᐐᓯᑭᓐ ᐊᓂᑖᐦ ᒋᑖᐦᒡ᙮ ᒥᒄ ᒫᒃ ᒋᑭ ᔒᐙᐤ ᒋᑑᓂᐦᒡ ᒧᔮᒻ ᐋᒨᓲᑳᐤ ᐋᒄ ᒑ ᐃᔥᐱᑎᒥᓐ᙮”
10 ᑳ ᐅᑎᓂᒧᒡ ᐊᓂᔮᔨᐤ ᑭᑎᑎᐱᓂᑳᓄᐐᒡ ᒥᓯᓂᐦᐄᑭᓂᔑᔨᐤ ᑳ ᑎᐦᑯᓂᐦᒃ ᐅᑎᐦᒌᐦᒡ ᐊᓐ ᐋᓐᒋᓐ ᐋᒄ ᑳ ᒦᒋᐎᒡ᙮ ᐄᔥᐱᐦ ᒫᒃ ᑳ ᓯᔅᑭᒧᔮᓐ ᓂᒌ ᒥᔅᐱᑖᓐ ᐋ ᔒᐙᒡ ᒧᔮᒻ ᐋᒨᓲᑳᐤ ᐋᒄ ᑳ ᐄᔥᐱᑎᒫᓐ᙮ ᒥᒄ ᒫᒃ ᐄᔥᐱᐦ ᑳ ᑯᐦᒋᐱᔨᐦᑖᔮᓐ ᒌ ᐋᑎ ᐐᓯᑭᓐ ᐊᓂᑖᐦ ᓂᑖᐦᒡ᙮
11 ᐋᒄ ᑳ ᐄᑎᑯᐎᔮᓐ, “ᒦᓐ ᒋᐱᐦ ᒋᔅᒋᐙᐦᐄᒑᓐ, ᒋᑭ ᐋᔨᒨᑖᓐ ᑖᓐ ᐋ ᐄᔑ ᐋᔨᒨᒥᑯᒡ ᒋᔖᒥᓂᑑᐦ ᒥᐦᒑᑐ ᐄᔨᔨᐅᒡ, ᓂᓈᐦᑭᐤ ᐋᐦ ᐄᑎᔅᑳᓈᓯᒡ, ᑭᔮᐦ ᒫᒃ ᓂᓈᐦᑭᐤ ᐋ ᐄᔑ ᐊᔨᒥᒡ ᑭᔮᐦ ᒋᐦᒋᐅᒋᒫᐅᒡ ᒋᑭ ᐋᔨᒨᑎᒧᐙᐅᒡ ᒑ ᑐᑎᐙᑭᓂᐎᒡ᙮”