13
ᓃᔓ ᒥᒋᐊᐅᐦᑳᓂᒡ
1 ᐊᓐ ᒫᒃ ᑳ ᒥᓯᒋᔅᑎᒃ ᒥᓂᑐᔥ ᐊᓂᑖᐦ ᔑᔓᒡ ᒋᐦᒋᑭᒦᐦᒡ ᒌ ᓃᐴᐦ᙮ ᐋᒄ ᑳ ᐙᐱᒥᒄ ᒥᒋᐊᐅᐦᑳᓐ ᐊᓂᑖᐦ ᒋᐦᒋᑭᒦᐦᒡ ᐋ ᐅᐦᒋ ᓅᑯᓯᑦ᙮ ᓃᔣᔥᒡ ᒌ ᑎᐦᑎᓂᔨᐤ ᐅᔥᑎᒀᓐ ᑭᔮᐦ ᒥᑖᐦᑐ ᒌ ᐊᑎᓯᐦᔨᐤ ᐅᑖᔅᑭᓐ᙮ ᒋᐦᒋᐅᒋᒫᐤ ᐊᔥᑐᑎᓐ ᒌ ᐊᑯᑖᔨᐤ ᐹᐦᐹᔨᒄ ᐊᓂᑎᐦ ᐊᓂᔮᔨᐤ ᐅᑖᔅᑭᓐᐦ᙮ ᐹᐦᐹᔨᒄ ᒫᒃ ᐊᓂᔮᔨᐤ ᐅᔥᑎᒀᓐ ᒌ ᒥᓯᓈᑖᔨᐤ ᐊᓂᑎᐦ ᐃᔑᓂᐦᑳᓱᐎᓐ ᐋ ᒫᔮᔨᒥᑯᔨᒡ ᒋᔖᒥᓂᑑ ᐋᐦ ᐄᑎᐦᑖᑯᓃᔨᒡ᙮
2 ᐊᓐ ᒫᒃ ᒥᒋᐊᐅᐦᑳᓐ ᒧᔮᒻ ᑳ ᐱᐹᐦᑖᐎᓰᔨᒡ ᓅᔖ ᒥᔑᐱᔑᐤ ᒌ ᐃᓯᓈᑯᓯᐤ᙮ ᐅᓯᑎᐦ ᒧᔮᒻ ᒋᔖᔮᑯᓯᑦ ᒌ ᐃᓯᓈᑯᓂᔨᐤ᙮ ᐅᑑᓐ ᒧᔮᒻ ᒥᔑᐱᔑᐤ ᒥᑑᓂᔨᐤ ᒌ ᐃᓯᓈᑯᓂᔨᐤ᙮ ᐋᒄ ᐊᓐ ᑳ ᒥᓯᒋᔅᑎᒃ ᒥᓂᑐᔥ ᑳ ᒥᔮᑦ ᐊᓂᔮᔨᐤ ᒥᒋᐊᐅᐦᑳᓐ ᐐᔨ ᑎᐱᔨᐙ ᐅᓲᐦᑳᑎᓰᐎᓐ ᑭᔮᐦ ᐐᔨ ᑎᐱᔨᐙ ᐅᒋᔖᑎᐹᔨᐦᒋᒑᐎᓐ᙮ ᒌ ᒥᔮᐤ ᒑ ᒌ ᐊᐱᔨᒡ ᐊᓂᑖᐦ ᐅᒋᐦᒋᐅᒋᒫᐤ ᑖᐦᑎᐱᐎᓂᐦᒡ᙮
3 ᐹᔨᒄ ᐊᓂᔮᔨᐤ ᐅᔥᑎᒀᓐ ᐊᓐ ᒥᒋᐊᐅᐦᑳᓐ ᒧᔮᒻ ᐋ ᒌ ᓂᐱᐦᑖᑭᓂᐎᔨᒡ ᒌ ᐃᓯᓈᑯᓂᔨᐤ᙮ ᒥᒄ ᒫᒃ ᔖᔥ ᒌ ᒦᔻᔨᐤ᙮ ᒥᓯᐙ ᒫᒃ ᐊᓂᒌ ᐊᔅᒌᐦᒡ ᑳᐦ ᑖᒡ ᒌ ᒫᒥᔥᑳᑖᔨᒫᐅᒡ ᐊᓂᔮᔨᐤ ᒥᒋᐊᐅᐦᑳᓐ ᑭᔮᐦ ᒌ ᓅᔔᔥᑯᐙᐅᒡ᙮
4 ᒌ ᒫᒥᐦᒋᒫᐅᒡ ᐊᓂᔮᔨᐤ ᑳ ᒥᓯᒋᔅᑏᔨᒡ ᒥᓂᑐᔥ ᒧᔮᒻ ᒋᔖᒥᓂᑑ ᐋ ᐄᔑ ᒫᒥᐦᒋᒫᑭᓅᑦ, ᐊᓂᔮᔨᐤ ᐅᐦᒋ ᐋ ᒌ ᒥᔮᔨᒡ ᑎᐹᔨᐦᒋᒑᐎᓂᔨᐤ ᒥᒋᐊᐅᐦᑳᓐ᙮ ᑭᔮᐦ ᐊᓂᔮᔨᐤ ᒥᒋᐊᐅᐦᑳᓐ ᒌ ᒫᒥᐦᒋᒫᐅᒡ, ᐋᐦ ᐃᔨᒡ, “ᐊᐙᓐ ᐋ ᐄᑖᔨᐦᑖᑯᓯᑦ ᐋ ᐄᑖᔨᐦᑖᑯᓰᔨᒡ ᐅᔮᔨᐤ ᒥᒋᐊᐅᐦᑳᓐ? ᐊᐙᓐ ᑭᔅᒋᐦᐅᑦ ᒑ ᒌ ᒫᓯᐦᐋᑦ?”
5 ᐊᓐ ᒫᒃ ᒥᒋᐊᐅᐦᑳᓐ ᒌ ᐱᒋᔅᑎᓈᑭᓂᐤ ᓈᔥᒡ ᒑ ᒌ ᒫᒥᐦᒋᒧᑦ ᑭᔮᐦ ᒑ ᒌ ᒫᔮᔨᒫᑦ ᒋᔖᒥᓂᑑᐦ᙮ ᒌ ᐱᒋᔅᑎᓈᑭᓂᐤ ᑭᔮᐦ ᒑ ᒌ ᑎᐹᔨᐦᒋᒑᑦ ᓈᒥᑎᓂᐤ ᓃᔓᔖᑉ ᑎᐦᑐ ᐲᓯᒻ ᐃᔥᐱᔥ᙮
6 ᒌ ᒋᐦᒋ ᒫᔮᔨᒫᐤ ᒋᔖᒥᓂᑑ ᑭᔮᐦ ᒌ ᒫᔮᔨᐦᑎᒸᐤ ᐅᑎᔑᓂᐦᑳᓱᐎᓂᔨᐤ᙮ ᒌ ᒫᔮᔨᐦᑎᒸᐤ ᐊᓂᑖᐦ ᐋᐦ ᑖᔨᒡ ᑭᔮᐦ ᒥᓯᐙ ᐊᓂᔮᔨᐤ ᒋᐦᒋᒌᔑᑯᐦᒡ ᑳᐦ ᑖᔨᒡ ᒌ ᒫᔮᔨᒫᐤ᙮
7 ᒌ ᐱᒋᔅᑎᓈᑭᓂᐤ ᒑ ᒌ ᒫᓯᐦᐋᑦ ᒋᔖᒥᓂᑑ ᐅᑏᔨᔨᒥᔨᐤᐦ ᑭᔮ ᒑ ᒌ ᔖᑯᐦᐋᑦ᙮ ᒌ ᒥᔮᑭᓂᐤ ᑭᔮᐦ ᑎᐹᔨᐦᒋᒑᐎᓂᔨᐤ ᒑ ᒌ ᐅᒋᒫᑭᑎᐙᑦ ᒥᓯᐙ ᐋᐦ ᐄᑎᔅᑳᓈᓰᔨᒡ ᐊᐙᔨᐤᐦ ᑭᔮᐦ ᒥᓯᐙ ᓂᓈᐦᑭᐤ ᐋ ᐄᔑ ᐊᔨᒥᔨᒡ ᑭᔮᐦ ᒥᓯᐙ ᐋ ᐄᔑ ᒫᒨᑖᐅᔑᔨᒡ᙮
8 ᐋᒄ ᒫᒃ ᒥᓯᐙ ᐊᐙᓐ ᐊᔅᒌᐦᒡ ᑳᐦ ᑖᑦ ᒋᑭ ᒫᒥᐦᒋᒫᐤ ᐊᓂᔮᔨᐤ ᒥᒋᐊᐅᐦᑳᓐ᙮ ᒥᒄ ᐊᓂᒌ ᐱᒫᑎᓰᐤ ᒥᓯᓂᐦᐄᑭᓂᐦᒡ ᑳ ᒥᓯᓈᑖᔨᔨᒡ ᐅᑎᔑᓂᐦᑳᓱᐎᓂᐙᐤ ᐋᒸᔮ ᐅᐦᒋ ᐅᔑᐦᑖᑭᓂᐎᒡ ᐋᔅᒋᔨᐤ, ᓂᒥ ᑭᑎ ᒫᒥᐦᒋᒫᐆᒡ᙮ ᐆ ᒫᒃ ᒥᓯᓂᐦᐄᑭᓐ ᐊᓐ ᒫᓂᔥᒑᓂᔥ ᑳ ᓂᐱᐦᐋᑭᓅᑦ ᑎᐹᔨᐦᑎᒻ᙮
9 ᒥᓯᐙ ᒌᔨᐙᐤ ᑳ ᐹᐦᑎᒫᒄ ᓲᐦᒃ ᒥᑐᓐ ᐐ ᓂᑐᐦᑎᒫᒄ ᐆ᙮
10 “ᐊᓐ ᐊᐙᓐ ᑳᐦ ᐋᔥᑰᔅᑖᔨᑯᐱᓈ ᒑ ᒌ ᒋᐳᐦᐙᑭᓅᑦ ᒋᑭ ᒋᐳᐦᐙᑭᓂᐤ, ᑭᔮᐦ ᐊᓐ ᐊᐙᓐ ᑳᐦ ᐋᔥᑰᔅᑖᔨᑯᐱᓈ ᓂᑐᐱᔫᐦᑯᒫᓂᔨᐤ ᐋᐦ ᐋᐱᑎᓃᔨᒡ ᒑ ᓂᐱᐦᐋᑭᓅᑦ ᒑᔥᑎᓈᔥ ᐋᔪᐎᒄ ᒑ ᑐᑎᐙᑭᓅᑦ᙮” ᐋᑯᑖᐦ ᒫᒃ ᐅᑎᐦ ᐙᐦᒋ ᒋᔥᑎᒫᐙᔮᔨᐦᑖᑰᓃᒡ ᔮᔨᑖᐃ ᒑ ᒌ ᓰᐲᐙᓯᐦᒡ ᐋ ᐋᔨᒋᑳᐳᐎᒡ ᐅᑖᑆᔮᔨᐦᑎᒧᐎᓂᐙᐦᒡ, ᐊᓂᔮᔨᐤᐦ ᒋᔖᒥᓂᑑ ᐅᑎᔨᔨᒻᐦ᙮
11 ᐋᒄ ᒦᓐ ᑯᑎᒃ ᒥᒋᐊᐅᐦᑳᓐ ᑳ ᐙᐱᒥᒄ ᐊᓂᑖᐦ ᐊᔅᒌᐦᒡ ᐋ ᐅᐦᒋ ᒨᔥᒋᐱᔨᐦᐅᑦ᙮ ᒌ ᓃᔑᔨᐤ ᐅᑖᔅᑭᓐ ᒧᔮᒻ ᒫᓂᔥᒑᓂᔥ ᐅᑖᔅᑭᓐ ᐋᓯᓈᑯᓰᔨᒡ ᐋᒄ ᑳ ᐃᓯᓈᑯᓰᔨᒡ᙮ ᒧᔮᒻ ᒫᒃ ᑳ ᒥᓯᒋᔅᑎᒃ ᒥᓂᑐᔥ ᐋ ᒋᔅᑐᑦ ᐋᒄ ᑳ ᐄᑎᐦᑖᑯᓯᑦ ᐋ ᒋᔅᑐᑦ᙮
12 ᐆ ᒫᒃ ᑯᑎᒃ ᒥᒋᐊᐅᐦᑳᓐ ᒥᔥᑏᐦ ᒌ ᒥᔨᑰ ᑎᐹᔨᐦᒋᒑᐎᓂᔨᐤ ᐊᓂᔮᔨᐤ ᓃᔥᑎᒻ ᒥᒋᐊᐅᐦᑳᓐ ᐋ ᐅᒋᒫᐅᑦ ᒑ ᒌ ᐄᑖᐱᒋᐦᐄᑯᑦ ᐊᓂᑎᐦ ᐋᐦ ᑖᔨᒡ᙮ ᐋᒄ ᑳᐦ ᐋᔨᐦᑭᒥᐦᐋᑦ ᒥᓯᐙ ᐊᐙᔨᐤᐦ ᐊᓂᑖᐦ ᐊᔅᒌᐦᒡ ᑳ ᐱᒫᑎᓰᔨᒡ ᒑ ᒌ ᒫᒥᐦᒋᒫᔨᒡ ᐊᓂᔮᔨᐤ ᓃᔥᑎᒻ ᑳᐦ ᑖᔨᒡ ᒥᒋᐊᐅᐦᑳᓐ, ᐊᓂᔮᔨᐤ ᒥᒋᐊᐅᐦᑳᓐ ᒋᐦᒋᐙ ᑳ ᒥᔣᑭᓂᐦᑳᑎᒫᑭᓄᐐᑯᐱᓈᓂᐦᐄ ᐅᔥᑎᒀᓃᔨᒡ ᐋᒄ ᒫᒃ ᑳ ᒦᓂᐙᒋᐦᑖᑭᓂᐎᔨᒡ᙮
13 ᐋᒄ ᐊᓐ ᓃᔔ ᑳᐦ ᑖᑦ ᒥᒋᐊᐅᐦᑳᓐ ᓂᓈᐦᑭᐤ ᒌ ᐄᔑ ᒥᔥᑎᐦ ᒫᒥᔥᑳᒡ ᐊᔨᐦᑑ᙮ ᐙᐙᒡ ᒌᐦ ᑐᑎᒻ ᐃᔥᑯᑖᔨᐤ ᒑ ᒌ ᐱᐦᒋᔥᑎᓃᔨᒡ ᒌᔑᑯᐦᒡ ᐅᐦᒋ ᐊᓂᑖᐦ ᐄᔑ ᐊᔅᒌᐦᒡ ᒥᓯᐙ ᐊᐙᔨᐤᐦ ᐋ ᑭᓂᐙᐱᒥᑯᑦ᙮
14 ᐋᒄ ᒫᒃ ᒌ ᐎᓂᐱᐦᐄᑯᒡ ᐊᓂᒌ ᐄᔨᔨᐅᒡ ᐊᓂᑖᐦ ᐊᔅᒌᐦᒡ ᑳᐦ ᑖᒡ ᐊᓂᔮᔨᐤ ᐋ ᒌ ᒥᔨᒫᑳᓄᐐᒡ ᒫᒥᔥᑳᒡ ᐙᐲᐦᑏᐙᐎᓐᐦ ᒑ ᒌ ᐋ ᐃᔨᐦᑎᔨᒡ ᐊᓂᔮᔨᐤ ᓃᔥᑎᒻ ᒥᒋᐊᐅᐦᑳᓐ, ᐊᓂᔮᔨᐤ ᑳ ᐅᐦᒋ ᓅᑯᓰᔨᒡ ᐊᓂᑖᐦ ᒋᐦᒋᑭᒦᐦᒡ᙮ ᐊᓂᒌ ᐄᔨᔨᐅᒡ ᐊᔅᒌᐦᒡ ᑳᐦ ᑖᒡ ᒌ ᐄᑎᔓᒥᑯᒡ ᐊᓂᔮᔨᐤ ᓃᔓ ᑳᐦ ᑖᔨᒡ ᒥᒋᐊᐅᐦᑳᓐ ᒑ ᒌ ᐅᔑᐦᐋᒡ ᑯᑎᒃ ᒥᓂᑑᐦᑳᓐᐦ ᐋ ᒋᔅᑖᔨᐦᑖᑯᐦᐋᒡ ᐊᓂᔮᔨᐤ ᓃᔥᑎᒻ ᒥᒋᐊᐅᐦᑳᓐ ᒋᐦᒋᐙ ᑳ ᒥᔣᑭᓂᐦᑳᑎᑯᔨᒡ ᓂᑐᐱᔫᐦᑯᒫᓂᔨᐤ ᒥᒄ ᒫᒃ ᐊᔮᐱᒡ ᐋ ᒌ ᐱᒫᑎᓰᔨᒡ᙮
15 ᒌ ᐱᒋᔅᑎᓈᑭᓂᐤ ᒫᒃ ᐆ ᒥᒋᐊᐅᐦᑳᓐ ᒑ ᒌᐦ ᑐᑎᐙᑦ ᐊᓂᔮᔨᐤ ᒥᓂᑑᐦᑳᓐ ᒑ ᒌ ᔮᐦᔮᔨᒡ᙮ ᐋᒄ ᒫᒃ ᑳ ᐊᔨᒥᔨᒡ ᑭᔮᐦ ᒌᐦ ᑐᑎᐙᔨᐤ ᐊᐙᔨᐤᐦ ᐋᑳ ᑳ ᐐᐦ ᐊᔨᒥᐦᐋᔥᑎᐙᔨᒡ ᐊᓂᔮᔨᐤ ᒥᓂᑑᐦᑳᓐ ᒑ ᒌ ᓂᐱᐦᐄᒫᑭᓂᐐᔨᒡ᙮
16 ᐆ ᒫᒃ ᒥᒋᐊᐅᐦᑳᓐ ᒌ ᐄᑎᔓᒫᐤ ᐋᓰᐦᒋᒫᑦ ᒥᓯᐙ ᐊᐙᔨᐤᐦ ᒑ ᒌ ᒌᔥᒋᓄᐙᒋᓯᓂᐦᐅᒫᑭᓂᐎᔨᒡ ᐅᓂᐦᐄᐎᓃᔨᐦᒡ ᑭᔮᐦ ᒫᒃ ᐅᔅᑭᐦᑎᑯᔨᒡ, ᒥᓯᐙ ᐊᓂᔮᔨᐤ ᑳ ᒋᔅᑖᔨᐦᑖᑯᓰᔨᒡ ᑭᔮᐦ ᐊᓂᔮᔨᐤ ᐋᑳ ᑳ ᒋᔅᑖᔨᐦᑖᑯᓰᔨᒡ, ᐊᓂᔮᔨᐤ ᑳ ᒦᓯᒋᓰᔨᒡ ᑭᔮᐦ ᐊᓂᔮᔨᐤ ᑳ ᒋᔅᑎᒫᑎᓰᔨᒡ, ᐊᓂᔮᔨᐤ ᑳ ᑖᐱ ᑎᐹᔨᒫᑭᓅᑦ ᐋᐱᒋᐦᐋᑭᓐ ᑭᔮᐦ ᐊᓂᔮᔨᐤ ᐋᑳ ᑖᐱ ᑎᐹᔨᒫᑭᓅᑦ ᐋᐱᒋᐦᐋᑭᓐ᙮
17 ᓂᒧᐃ ᒫᒃ ᐊᐙᓐ ᐅᐦᒌ ᐊᑖᐙᐤ ᑭᔮᐦ ᓂᒧᐃ ᐊᐙᓐ ᐅᐦᒌ ᐅᑎᓂᒑᐤ ᒥᔔ ᐋᑳ ᐙᐦᒋ ᒌᔥᒋᓄᐙᒋᓯᓂᐦᐙᑭᓅᒀ᙮ ᐊᓂᔮᔨᐤ ᒫᒃ ᐊᓂᑎᐦ ᑳ ᒌᔥᒋᓄᐙᒋᓯᓂᐦᐅᒫᑭᓂᐎᔨᒡ, ᐊᓂᔮᔨᐤ ᐋ ᐃᔑᓂᐦᑳᓱᔨᒡ ᐊᓂᔮᔨᐤ ᒥᒋᐊᐅᐦᑳᓐ ᑭᔮᐦ ᒫᒃ ᐊᓂᔮᔨᐤ ᐅᑎᒋᑖᓱᓂᔨᐤ ᒌ ᒥᓯᓈᑖᔨᐤ ᐊᓂᑎᐦ᙮
18 ᐋᑯᑖᐦ ᒫᒃ ᐅᑎᐦ ᑭᒑᐦᑖᐙᔨᐦᑎᒧᐎᓐ ᓈᑐᐙᔨᐦᑖᑯᐦᒡ᙮ ᐊᓐ ᒫᒃ ᐊᐙᓐ ᑳᒑᑖᐙᔨᐦᑎᒧᒀ ᒋᑭ ᒌ ᒋᔅᒑᔨᐦᑎᒻ ᑖᓐ ᐋ ᐄᔑ ᐐᐦᑎᒫᒑᒥᑭᓃᔨᒡ ᐊᓂᔮᔨᐤ ᐊᒋᐦᑖᓱᐎᓂᔨᐤ, ᐙᔥ ᐊᓐ ᐊᒋᐦᑖᓱᓐ ᓈᐹᐤ ᐊᓂᔮᔨᐤ ᐅᑎᔑᓂᐦᑳᓱᐎᓐ᙮ ᑯᑣᔥᒡ ᑯᑣᔥᒡ ᑯᑣᔥᒡ ᒫᒃ ᐄᑎᓯᓈᑖᔨᐤ ᐅᑎᔑᓂᐦᑳᓱᐎᓐ᙮