17
ᑳ ᐱᓯᒀᑎᓰᑦ ᐃᔅᒀᐤ ᑳ ᑖᐦᑎᐱᑦ ᒥᒋᐊᐅᐦᑳᓐ
1 ᐋᒄ ᐹᔨᒄ ᐊᓂᒌ ᓃᔣᔥᒡ ᑳ ᐃᑎᔑᒡ ᐋᓐᒋᓂᒡ ᑳ ᐃᔮᒡ ᐊᓂᔮᔨᐤ ᓃᔣᔥᒡ ᐎᔮᑭᓐ ᑳ ᒨᑖᔮᔨᒡ ᑳ ᐹᒋ ᓂᑎᐙᐱᒥᑦ ᐋᒄ ᑳ ᐄᔑᑦ, “ᐋᔥᑎᒻ ᒫᐦ᙮ ᒋᑭ ᐙᐱᐦᑎᔨᑎᓐ ᑖᓐ ᒑ ᐄᔑ ᒥᒫᑯᐦᐋᑦ ᒋᔖᒥᓂᑑ ᐊᓂᔮᔨᐤ ᑳ ᒥᒋᒋᔅᑖᔨᐦᑖᑰᓰᔨᒡ ᐃᔅᒀᐤ ᑳ ᑎᐱᐦᐆᒫᑭᓂᐎᔨᒡ, ᐊᓐ ᐃᔅᒀᐤ ᑳ ᐊᐱᑦ ᐊᓂᑖᐦ ᐋᐦᑎᑯᓃᔨᒡ ᒥᐦᒑᑐ ᓰᐲ᙮
2 ᒋᐦᒋᐅᒋᒫᐅᒡ ᐅᑎᐦ ᐊᔅᒌᐦᒡ ᑳᐦ ᑖᒡ ᒌ ᐐᒋᐱᓯᒀᑎᓰᒫᐅᒡ ᐊᓂᔮᔨᐤ ᐃᔅᒀᐤ᙮ ᑭᔮᐦ ᒫᒃ ᐊᓂᒌ ᐄᔨᔨᐅᒡ ᐅᑎᐦ ᐊᔅᒌᐦᒡ ᑳᐦ ᑖᒡ, ᒧᔮᒻ ᐋ ᒌᔥᒀᐹᒡ ᐅᐦᒋ ᐊᓂᔮᔨᐤ ᐋ ᒌ ᒥᓂᐦᒀᐙᒡ ᐅᔔᒥᓈᐴᒥᔨᐤ, ᐋᔪᐎᒄ ᐅᔮᔨᐤ ᐋ ᐄᔑ ᐐᓂᓯᐤ ᑐᑖᑯᒡ᙮”
3 ᐋᒄ ᐊᓐ ᐋᓐᒋᓐ ᐊᓂᑖᐦ ᐱᑯᑎᔅᑭᒥᑳᐦᒡ ᑳ ᐹᒋ ᐄᑐᐦᑎᐦᐄᑦ ᓂᑎᐦᒑᐦᑯᒡ᙮ ᓂᒌᐙᐱᒫᐤ ᒫᒃ ᐊᓂᑖᐦ ᐃᔅᒀᐤ ᐋ ᑖᐦᑎᐱᑦ ᒥᒋᐊᐅᐦᑳᓐ ᐋ ᒥᐦᑯᓰᔨᒡ᙮ ᐆ ᒫᒃ ᒥᒋᐊᐅᐦᑳᓐ, ᐃᔑᓂᐦᑳᓱᐎᓐᐦ ᐋ ᒫᔮᔨᒥᑯᔨᒡ ᒋᔖᒥᓂᑑ ᒌ ᒥᓯᓈᑖᔨᐤ ᐊᓂᑎᐦ ᐋᐦ ᑖᑦ᙮ ᓃᔣᔥᒡ ᒌ ᑎᐦᑎᓂᔨᐤ ᐅᔥᑎᒀᓐ᙮ ᒌ ᒥᑖᐦᑎᔒᔨᐤ ᐅᑖᔅᑭᓐ᙮
4 ᐊᓐ ᒫᒃ ᐃᔅᒀᐤ ᒌ ᒥᐦᒀᔅᐱᓲ ᑭᔮᐦ ᒌ ᐐᔓᒥᐦᒀᔨᐤ ᐅᒑᒀᓂᒻ᙮ ᒌ ᐙᐙᔑᐦᐆ ᐋ ᐅᔖᐅᔓᐎᔮᓈᐱᔥᑯᐎᔨᒡ ᒑᒀᔨᐤ ᑭᔮᐦ ᓂᓈᐦᑭᐤ ᐋ ᒥᔪᔑᔨᒡ ᐊᓯᓃᐦ ᑭᔮᐦ ᐋ ᐙᓵᔮᐱᔅᒋᔨᒡ ᐊᓯᓃᔥ ᐋ ᒋᒋᔥᑭᐙᑦ᙮ ᒌ ᑎᐦᑯᓂᒻ ᒫᒃ ᐋ ᐅᔖᐅᔓᐎᔮᓈᐱᔥᑯᐎᔨᒡ ᒥᓂᐦᒀᑭᓂᔨᐤ᙮ ᐊᓂᑎᐦ ᒫᒃ ᒥᓂᐦᒀᑭᓂᒡ ᒌ ᓵᑭᔅᒋᓈᔅᑖᔨᐤ ᓂᓈᐦᑭᐤ ᐐᓂᓯᐤ ᐃᔨᐦᑎᐎᓐ, ᓈᔥᒡ ᐋ ᐐᓈᔨᐦᑖᑰᓃᒡ᙮
5 ᐊᓂᑎᐦ ᒫᒃ ᐅᔅᑭᐦᑎᑯᐦᒡ ᒌ ᒥᓯᓈᑖᔨᐤ ᐃᔑᓂᐦᑳᓱᐎᓂᔨᐤ ᐋᐦᐋᑳ ᒋᔅᒑᔨᐦᑖᑯᓃᔨᒡ ᑖᓐ ᐋᔅᒌᔂᒥᑭᓃᔨᒡ᙮ ᒫᐤ ᑳᐦ ᐄᑎᔥᑖᔨᒡ, “ᐹᐱᓨᓐ ᐊᓐ ᑳ ᒋᔅᑖᔨᐦᑖᑯᐦᒡ ᐃᐦᑖᐎᓐ, ᐅᑳᐐᑖᐙᐅᒡ ᐱᓯᒀᑎᓰᔅᒀᐅᒡ ᑳ ᑎᐱᐦᐙᑭᓅᐎᒡ ᑭᔮᐦ ᒥᓯᐙ ᐊᓂᒌ ᑳ ᒥᔻᔨᐦᑎᐦᒡ ᐋ ᐎᓂᓲ ᑐᑎᐦᒡ ᐅᑎᐦ ᐊᔅᒌᐦᒡ᙮”
6 ᓂᒌᐙᐱᒫᐤ ᒫᒃ ᐊᓐ ᐃᔅᒀᐤ ᐋ ᒌᔥᒀᐹᑦ ᐋ ᒌ ᒥᓂᐦᒀᐙᑦ ᐅᒥᐦᑯᔨᐤ ᒋᔖᒥᓂᑑ ᐅᑏᔨᔨᒥᔨᐤ ᑭᔮᐦ ᐅᒥᐦᑯᔨᐤ ᐊᓂᔮᔨᐤ ᑳ ᓂᐱᐦᐄᒫᑭᓄᔨᑯᐱᓈᓂᐦᐄ ᐅᐦᒋ ᐊᓂᔮᔨᐤ ᐋ ᒌ ᐐᐦᑎᒥᔨᒡ ᐋ ᑖᑆᔮᔨᒫᔨᒡ ᒌᓴᔅᐦ᙮
ᐄᔥᐱᐦ ᒫᒃ ᑳ ᐙᐱᒥᒄ ᐊᓐ ᐃᔅᒀᐤ ᓈᔥᒡ ᓂᒌ ᑯᔅᒀᔨᐦᑖᓐ᙮
7 ᐋᒄ ᑳ ᐹᒋ ᑯᒀᒋᒥᑦ ᐊᓐ ᐋᓐᒋᓐ, ᑳ ᐄᔑᑦ, “ᒑᒀᔨᐤ ᐙᐦᒋ ᓈᔥᒡ ᑯᔅᒀᔨᐦᑎᒥᓐ᙮ ᒋᑭ ᐐᐦᑎᒫᑎᓐ ᒑᒀᓐ ᑖᓐ ᐋ ᐄᔑ ᐋᑳ ᒋᔅᒑᔨᒥᑭᓅᑦ ᐊᓐ ᐃᔅᒀᐤ ᑭᔮᐦ ᐊᓂᔮᔨᐤ ᒥᒋᐊᐅᐦᑳᓐ ᑳ ᑖᐦᑎᐱᑦ ᓃᔣᔥᒡ ᑳ ᑎᐦᑎᓃᔨᒡ ᐅᔥᑎᒀᓂᔨᐤ ᑭᔮᐦ ᒥᑖᐦᑐ ᑳ ᑎᔑᔨᒡ ᐅᑖᔅᑭᓂᔨᐤ᙮
8 ᐊᓐ ᒥᒋᐊᐅᐦᑳᓐ ᑳ ᐙᐱᒥᑦ ᒌ ᑖᐦᑖᑰᐱᓐ ᒥᒄ ᒫᒃ ᓂᒧᐃ ᔖᔥ ᑖᐤ᙮ ᐊᓂᑖᐦ ᐊᓂᔮᔨᐤ ᑳ ᒥᔥᑎᐦ ᐱᑯᓂᔮᔨᒡ ᒋᑭ ᐅᐦᒋ ᒨᔅᒌᐤ, ᐋᒄ ᒫᒃ ᒑ ᐄᑐᐦᑖᑦ ᐊᓂᑖᐦ ᒑ ᓂᔑᐎᓈᒋᐦᐋᑭᓅᑦ᙮ ᐊᓂᒌ ᒫᒃ ᐄᔨᔨᐅᒡ ᐅᑎᐦ ᐊᔅᒌᐦᒡ ᑳ ᐱᒫᑎᓰᔨᒡ ᒋᑭ ᒥᔅᑳᓯᓂᐙᐅᒡ ᐙᐱᒫᑣᐙ ᐊᓂᔮᔨᐤ ᒥᒋᐊᐅᐦᑳᓐ, ᐙᔥ ᒌ ᑖᐦᑖᑯᐱᓐ ᒥᒄ ᒫᒃ ᓂᒧᐃ ᔖᔥ ᑖᐤ, ᒦᓐ ᒫᒃ ᑳᐤ ᒋᑭ ᑎᑯᔑᓐ᙮ ᐊᐅᑯᓂᒡ ᐅᒌ ᐋᑳ ᑳ ᒥᓯᓈᑖᔨᒡ ᐅᑎᔑᓂᐦᑳᓱᐎᓂᐙᐤ ᐊᓂᑖᐦ ᒥᓯᓂᐦᐄᑭᓂᐦᒡ ᐊᓐ ᔖᔥ ᑳ ᑎᑯᓂᑯᐱᓈ ᐋᐦᐋᑦ ᐋᔥᒄ ᐋᒸᔮ ᐅᐦᒋ ᐅᔑᐦᑖᑭᓂᐎᒡ ᐆ ᐊᔅᒌ᙮ ᐊᓂᑎᐦ ᒫᒃ ᐊᓐ ᒥᓯᓂᐦᐄᑭᓐ ᑳ ᒥᓯᓈᑖᔨᐙᑯᐱᓈ ᐅᑎᔑᓂᐦᑳᓱᐎᓂᐙᐤ ᐊᓂᒌ ᒑ ᐃᔮᒡ ᑳᒋᒡ ᐱᒫᑎᓰᐎᓂᔨᐤ᙮
9 ᐋᑯᑖᐦ ᐅᑎᐦ ᓈᑎᐙᔨᐦᑖᑯᐦᒡ ᑭᒑᐦᑖᐙᔨᐦᑎᒨ ᒥᑐᓈᔨᐦᒋᑭᓐ᙮ ᐊᓂᔮᔨᐤ ᓃᔣᔥᒡ ᑳ ᑎᐦᑎᓃᔨᒡ ᐅᔥᑎᒀᓐ ᐊᓐ ᒥᒋᐊᐅᐦᑳᓐ ᐋᐅᒄ ᐋᓐ ᐊᓂᔮᔨᐤ ᓃᔣᔥᒡ ᐎᒌᐦ ᐊᓂᑎᐦ ᑎᔮᐦᑎᐱᑦ ᐊᓐ ᐃᔅᒀᐤ᙮ ᐋᐅᑯᓂᒡ ᑭᔮᐦ ᓃᔣᔥᒡ ᒋᐦᒋᐅᒋᒫᐅᒡ᙮
10 ᓂᔮᔪ ᐊᓂᒌ ᒋᐦᒋᐅᒋᒫᐅᒡ ᔖᔥ ᓂᒧᐃ ᑖᐅᒡ᙮ ᐹᔨᒄ ᒫᒀᒡ ᒋᐦᒋᐅᒋᒫᐤ᙮ ᐋᒄ ᐊᓐ ᑯᑎᒃ ᒋᐦᒋᐅᒋᒫᐤ ᐋᔥᒄ ᓂᒧᐃ ᐅᐦᒋᑎᑯᓯᓐ᙮ ᐄᔥᐱᐦ ᓅᑯᓯᒑ ᒥᒄ ᐙᐃᐱᔥᒌᔥ ᒋᑭ ᒋᐦᒋᐅᒋᒫᐤ᙮
11 ᐊᓐ ᒫᒃ ᒥᒋᐊᐅᐦᑳᓐ ᑳᐦ ᑖᐦᑖᑯᐱᓐ, ᒥᒄ ᔖᔥ ᐋᑳ ᑖᑦ, ᐋᐅᒄ ᐊᓐ ᓂᔮᓈᓈᐤ ᐋᐦ ᑖᑦ ᒋᐦᒋᐅᒋᒫᐤ ᑭᔮᐦ ᐋᐅᒄ ᐹᔨᒄ ᐊᓂᒌ ᓃᔣᔥᒡ ᑳ ᐃᑎᔑᒡ ᒋᐦᒋᐅᒋᒫᐅᒡ, ᐐᔨ ᐄᑐᐦᑖᐤ ᐊᓂᑖᐦ ᒑ ᓂᔑᐎᓈᒌᐦᐋᑭᓅᑦ᙮
12 ᐊᓂᔮᔨᐤ ᒫᒃ ᒥᑖᐦᑐ ᑳ ᑎᔑᔨᒡ ᐅᑖᔅᑭᓐ ᐊᓐ ᒥᒋᐊᐅᐦᑳᓐ ᑳᐙᐱᒥᑦ, ᐐᐦᑎᒫᒑᒥᑭᓂᔨᐤ ᒥᑖᐦᑐ ᒑ ᑎᔑᔨᒡ ᒋᐦᒋᐅᒋᒫᐤ ᐋᔥᒄ ᐋᑳ ᐅᐦᒋ ᒦᔮᑭᓅᐎᒡ ᒋᐦᒋᐅᒋᒫᐎᓂᔨᐤ᙮ ᒋᑭ ᒦᔮᑭᓅᐎᒡ ᑎᐹᔨᐦᒋᒑᐎᓂᔨᐤ ᑭᔮᐦ ᐐᔨᐙᐤ ᒥᒄ ᐹᔨᒀᐤ ᐋᐦᒋᓂᒀᓃᐦᑖᔨᒡ ᒑ ᒌ ᒋᐦᒋᐅᒋᒫᐅᒡ ᐅᒌ ᒋᐦᒋᐅᒋᒫᐅᒡ ᒫᒀᒡ ᒋᐦᒋᐅᒋᒫᐎᔨᒑ ᐊᓂᔮᔨᐤ ᒥᒋᐊᐅᐦᑳᓐ᙮
13 ᒥᓯᐙ ᒫᒃ ᐅᒌ ᒥᑖᐦᑐ ᐋ ᐃᑎᔑᒡ ᒋᐦᒋᐅᒋᒫᐅᒡ ᐹᔨᑯᓂᐦᒡ ᒋᑭ ᐄᑖᔨᐦᑎᒧᒡ ᐊᓂᔮᔨᐤ ᑖᓐ ᐙᐦ ᑎᒡ᙮ ᒥᓯᐙ ᒫᒃ ᑖᓐ ᐋ ᐄᔑ ᐃᔮᒡ ᓲᐦᑳᑎᓰᐎᓂᔨᐤ ᑭᔮᐦ ᑎᐹᔨᐦᒋᒑᐎᓂᔨᐤ ᒋᑭ ᒦᔮᐅᒡ ᐊᓂᔮᔨᐤ ᒥᒋᐊᐅᐦᑳᓐ᙮
14 ᐅᒌ ᒫᒃ ᒥᑖᐦᑐ ᒋᐦᒋᐅᒋᒫᐅᒡ ᑭᔮᐦ ᐊᓐ ᒥᒋᐊᐅᐦᑳᓐ ᒋᑭ ᓂᑐᐱᔨᐦᑭᐦᑎᐙᐅᒡ ᐊᓂᔮᔨᐤ ᒫᓂᔥᒑᓂᔥ᙮ ᒥᒄ ᒫᒃ ᒋᑭ ᒫᑯᐦᐄᑯᒡ ᐊᓂᔮᔨᐤ ᒫᓂᔥᒑᓂᔥ᙮ ᐙᔥ ᐐᔨ ᐊᓐ ᒫᓂᔥᒑᓂᔥ ᐋᐅᒄ ᐊᓐ ᑎᐹᔨᐦᒋᒑᓯᐤ ᑖᐹᔨᒫᑦ ᒥᓯᐙ ᑎᐹᔨᐦᒋᒑᓯᐤᐦ ᑭᔮᐦ ᐐᔨ ᒋᐦᒋᐆᒋᒫᐤ ᑳ ᐅᒋᒫᐦᑭᑑᐙᑦ ᒥᓯᐙ ᒋᐦᒋᐅᒋᒫᐤ ᐋ ᑎᔑᔨᒡ᙮ ᐊᓂᔮᔨᐤ ᒫᒃ ᑳ ᓅᔔᔥᑳᑯᑦ ᐋᐅᒄ ᐋᓐ ᐐᔨ ᐙᒌᐦᒡ ᑳ ᑖᑆᑖᑦ ᑭᔮᐦ ᑳ ᐅᐙᔮᐱᒫᑦ ᒑ ᒌ ᐅᑏᔨᔨᒥᑦ ᑭᔮᐦ ᐋᔪᐎᑯᓐᐦ ᐊᓂᔮᔨᐤ ᑳ ᑖᑆᐅᒑᔨᐦᑖᑰᓰᔨᒡ ᐋ ᓅᔔᔥᑳᑯᑦ᙮”
15 ᐋᒄ ᑳ ᐄᔑᑦ ᐊᓐ ᐋᓐᒋᓐ, “ᐊᓂᐦᐄ ᓰᐲ ᑳ ᐙᐱᐦᑎᒥᓐ ᐊᓂᑎᐦ ᑳ ᐊᐱᑦ ᐊᓐ ᐃᔅᒀᐤ ᑳ ᑎᐱᐦᐙᑭᓅᑦ, ᐄᔨᔨᐅᒡ ᐙᔥ ᐊᓂᒌ, ᐋ ᒥᐦᒑᑎᒡ ᐄᔨᔨᐅᒡ, ᓂᓈᐦᑭᐤ ᐋ ᐄᑎᔅᑳᓈᓯᒡ, ᑭᔮᐦ ᓂᓈᐦᑭᐤ ᐋ ᐄᔑ ᐊᔨᒥᒡ᙮
16 ᐊᓂᒌ ᒫᒃ ᒥᑖᐦᑐ ᐋᔅᑭᓂᒡ ᑳ ᐙᐱᒥᑣᐤ ᑭᔮᐦ ᐊᓐ ᒥᒋᐊᐅᐦᑳᓐ ᒋᑭ ᐋᑎ ᐅᐦᑳᑖᐅᒡ ᐊᓂᔮᔨᐤ ᐃᔅᒀᐤ ᑳ ᑎᐱᐦᐅᒫᑭᓂᐎᔨᒡ᙮ ᒥᓯᐙ ᒋᑭ ᐅᑎᓂᒸᐅᒡ ᑖᓐ ᐋ ᐄᔑ ᐃᔮᔨᒡ᙮ ᒑ ᐋᑎ ᒧᔖᔥᑭᑖᓈᒡ ᑭᔮᐦ ᒋᑭ ᐋᑎ ᒨᐙᐅᒡ ᐊᓂᑎᐦ ᐋᐆᔮᔔᐐᒡ ᑭᔮᐦ ᒥᑐᓐ ᒋᑭ ᓂᔑᐎᓈᒋᐦᐋᐅᒡ ᐋ ᐃᔥᒀᔂᒡ᙮
17 ᐙᔥ ᐅᔮᔨᐤ ᒌ ᐄᔅᐲᐦᐄᑰ ᐊᓐ ᐃᔅᒀᐤ, ᒋᔖᒥᓂᑑ ᒌ ᑐᑖᑰᐎᒡ ᐅᑖᐦᐄᐙᐦᒡ ᒑ ᒌ ᐅᐦᒋ ᐄᑖᔨᐦᑎᐦᒡ ᒑ ᒌᐦ ᑐᑎᒡ ᑖᓐ ᐋ ᐄᔑ ᓂᑎᐙᔨᐦᑎᒥᔨᒡ ᒑ ᒌ ᑐᑖᑭᓂᐎᔨᒡ᙮ ᐋᒄ ᒫᒃ ᐹᔨᑯᓂᐦᒡ ᑳ ᐄᑖᔨᐦᑎᒥᐦᐄᑯᒡ ᒑ ᒥᔮᒡ ᐊᓂᔮᔨᐤ ᒥᒋᐊᐅᐦᑳᓐ ᑖᓐ ᐋ ᐄᔑ ᐃᔮᒡ ᒑ ᒌ ᐅᒋᒫᐅᒡ᙮ ᒋᑭ ᐱᒋᔥᑖᔨᒧᔅᑎᐙᐅᒡ ᒫᒃ ᐹᑎᔥ ᒥᓯᐙ ᒌ ᑎᐱᐱᔨᒑ ᑖᓐ ᑳ ᐄᔑ ᓃᑳᓐ ᐐᐦᑎᒥᔨᒡ ᒋᔖᒥᓂᑑ ᒑ ᐄᔅᐱᔨᔨᒡ᙮
18 ᐊᓐ ᒫᒃ ᐃᔅᒀᐤ ᑳ ᐙᐱᒥᑦ, ᐋᐅᒄ ᐙᔥ ᐊᓐ ᑳ ᒋᔅᑖᔨᐦᑖᑯᐦᒡ ᐃᐦᑖᐎᓐ ᐊᓂᑖᐦ ᐙᐦᒋ ᐅᒋᒫᐦᑭᐦᑎᐙᑭᓂᐎᒡ ᒥᓯᐙ ᒋᐦᒋᐅᒋᒫᐅᒡ ᐅᑎᐦ ᐊᔅᒌᐦᒡ᙮”