8
ᒫᓂᔥᒑᓂᔥ ᑳ ᒥᓂᐦᒃ ᐊᓂᔮᔨᐤ ᒫᐦᒑᔨ ᐋᐃᔨᒡ ᐱᓯᑯᐦᐄᑭᓂᔨᐤ
1 ᐋᒄ ᐊᓐ ᒫᓂᔥᒑᓂᔥ ᒦᓐ ᑳ ᒥᓂᐦᒃ ᐊᓂᔮᔨᐤ ᓃᔂᓯᒡ ᐋᐃᔨᒡ ᐱᓯᑯᐦᐄᑭᓂᔨᐤ ᐊᓂᑎᐦ ᒥᓯᓂᐦᐄᑭᓂᐦᒡ ᐅᐦᒋ᙮ ᐄᔥᐱᐦ ᒫᒃ ᑳ ᒥᓂᐦᒃ ᐊᐱᐦᑑ ᐋ ᒌᓂᒀᓂᐦᑖᑦ ᐲᓯᒧᐦᑳᓐ ᓂᒧᐃ ᒥᑐᓐ ᒑᒀᓐ ᐅᐦᒋ ᐹᐦᑖᑯᓐ ᐊᓂᑖᐦ ᒋᐦᒋᒌᔑᑯᐦᒡ᙮
2 ᐋᒄ ᑳ ᐙᐱᒥᒀᐤ ᐊᓂᒌ ᓃᔣᔥᒡ ᐋᓐᒋᓂᒡ ᒨᔥ ᐅᐦᑎᔅᑰ ᒋᔖᒥᓂᑑ ᐋᐦ ᑖᔨᒡ ᑳ ᓃᐴᐎᒡ᙮ ᓃᔣᔥᒡ ᐴᑖᒋᑭᓐ ᒌ ᒥᔮᑭᓂᐎᒡ᙮
3 ᒌ ᑎᑯᔑᓐ ᒦᓐ ᑯᑎᒃ ᐋᓐᒋᓐ ᐊᓂᑎᐦ ᑳ ᓃᐴᐎᑦ ᐊᓂᑎᐦ ᐱᒋᔅᑎᓂᒑᐤ ᒦᒋᓲᓈᐦᑎᑯᔨᐤ ᐊᐦᑎᑯᓃᔨᒡ, ᐋ ᑎᐦᑯᓂᐦᒃ ᐋ ᐅᔖᐅᔓᐎᔮᓈᐱᔅᑰᐎᔨᒡ ᐎᔮᑭᓂᔨᐤ ᑳ ᒥᔪᒫᑯᓃᔨᒡ ᒑᒀᔨᐤ ᑳ ᒌ ᐃᔥᒀᓯᑭᓂᐐᒡ ᐋ ᐊᐦᑎᑯᓃᔨᒡ ᐊᓂᑎᐦ᙮ ᒥᔥᑏᐦ ᒫᒃ ᒌ ᒥᔮᑭᓂᐤ ᐊᓂᔮᔨᐤ ᑳ ᐐᒋᒫᑯᓰᔨᒡ ᒑᒀᔨᐤ ᒑ ᒌ ᒌᑭᐎᓂᐦᒃ ᐅᑎᔨᒥᐦᐋᐎᓂᔨᐤ ᒥᓯᐙ ᒋᔖᒥᓂᑑ ᐅᑏᔨᔨᒥᔨᐤ ᑭᔮᐦ ᒑ ᒌ ᐱᒋᔅᑎᓂᒧᐙᑦ ᒋᔖᒥᓂᑑ ᐊᓂᑎᐦ ᑳ ᐅᔖᐅᔓᐎᔮᓈᐱᔅᑰᐎᔨᒡ ᐱᒋᔅᑎᓂᒑᐤ ᒦᒋᓲᓈᐦᑎᑯᔨᐤ ᐊᓂᑎᐦ ᐅᐦᑎᔅᑰ ᒋᐦᒋᐅᒋᒫᐤ ᑎᐦᑎᐱᐎᓂᐦᒡ᙮
4 ᐊᓂᔮᔨᐤ ᑳ ᒥᔪᒫᑯᓰᔨᒡ ᑳ ᐃᔥᒀᑖᔨᒡ ᑳ ᑎᐦᑯᓂᐦᒃ ᐊᓐ ᐋᓐᒋᓐ ᐅᐦᑎᔅᑰ ᒋᔖᒥᓂᑑ ᐋᐦ ᑖᔨᒡ ᑳ ᓃᐴᐎᑦ, ᐊᓂᑖᐦ ᒋᔖᒥᓂᑑ ᐋᐦ ᑖᔨᒡ ᒌ ᐄᑖᐱᐦᑖᐱᔨᐤ, ᐋᔨᐤᐦ ᐊᓂᔮᔨᐤ ᒋᔖᒥᓂᑑ ᐅᑏᔨᔨᒥᔨᐤ ᐅᑎᔨᒥᐦᐋᐎᓂᔨᐤ ᐋ ᐊᔅᒋᐱᔨᔨᒡ᙮
5 ᐋᒄ ᐊᓐ ᐋᓐᒋᓐ ᑳ ᓵᑭᔅᒋᓂᑖᑦ ᐊᓂᔮᔨᐤ ᐎᔮᑭᓂᔨᐤ ᐃᔥᑯᑖᔨᐤ ᐋ ᐊᔥᑖᑦ ᐊᓂᑎᐦ ᐱᒋᔅᑎᓂᒑᐤ ᒦᒋᓲᓈᐦᑎᑯᐦᒡ ᐋ ᐅᐦᑎᓂᐦᒃ᙮ ᐋᒄ ᐊᓂᑖᐦ ᐊᔅᒌᐦᒡ ᑳ ᐄᔑ ᐙᐱᓂᐦᒃ ᐊᓂᔮᔨᐤ ᐃᔥᑯᑖᔨᐤ, ᑏᐙᐦᒡ ᒫᒃ ᒌ ᐹᐦᑖᑯᓐᐦ ᐹᐦᑖᑯᓯᐎᓐ ᑭᔮᐦ ᓂᒥᔅᒋᐅᒡ ᒌ ᐹᐦᑖᑯᓯᒡ ᑭᔮᐦ ᒥᔥᑎᐦ ᒌ ᐙᐙᔥᑖᐱᔨᐤ ᑭᔮᐦ ᒌ ᑯᐃᐦᑯᓐ᙮
ᐊᓂᔮᔨᐤ ᓃᔣᔥᒡ ᐴᑖᒋᑭᓐ
6 ᐋᒄ ᐊᓂᒌ ᓃᔣᔥᒡ ᐋᓐᒋᓂᒡ ᓃᔣᔥᒡ ᐴᑖᒋᑭᓐ ᑳ ᑎᐦᑯᓂᐦᒡ ᑳ ᐃᔮᔅᑭᐎᔨᒡ ᒑ ᒌ ᐴᑖᑎᐦᒡ ᐊᓂᔮᔨᐤ ᐴᑖᒋᑭᓐ᙮
7 ᐋᒄ ᐊᓐ ᓃᔥᑎᒻ ᑳᐦ ᑖᑦ ᐋᓐᒋᓐ ᑳ ᐴᑖᑎᐦᒃ ᐅᐴᑖᒋᑭᓐ᙮ ᒌ ᒀᐦᑭᐦᑯᐙᑖᓐ ᑭᔮᐦ ᐃᔥᑯᑖᐤ ᒌ ᐱᐦᒋᔥᑎᓐ ᐋ ᒋᔨᑰᐱᔨᐦᒡ ᒥᐦᒄ ᐊᓂᑖᐦ ᐊᔅᒌᐦᒡ ᐋ ᐄᔑ ᐙᐱᓂᑭᓂᐎᒡ᙮ ᐹᔨᒄ ᐋᔑᑯᒻ ᓂᔥᑐ ᐋᔅᐱᑎᔅᑭᒥᑳᐦᒡ ᐊᔅᒌ ᒌ ᐃᔥᒀᑖᐤ᙮ ᐹᔨᒄ ᐋᔑᑯᒻ ᓂᔥᑐ ᒌ ᐃᔥᐱᔥ ᐃᔥᒀᓲᐎᒡ ᒥᔅᑎᑯᒡ᙮ ᒥᓯᐙ ᑭᔮᐦ ᒥᔥᑯᔑᐤᐦ ᒌ ᐃᔥᒀᑖᐤ᙮
8 ᐋᒄ ᐊᓐ ᓃᔔ ᑳᐦ ᑖᑦ ᐋᓐᒋᓐ ᑳ ᐴᑖᑎᐦᒃ ᐅᐴᑖᒋᑭᓐ᙮ ᒧᔮᒻ ᓈᔥᒡ ᐋ ᒥᓵᒡ ᐎᒌ ᐋ ᐃᔥᑯᑖᐅᒡ ᒌ ᐃᓯᓈᑯᓐ ᒑᒀᓐ ᒋᐦᒋᑭᒦᐦᒡ ᐋ ᐄᔑ ᐙᐱᓂᑭᓂᐎᒡ᙮ ᐹᔨᒄ ᐋᔑᑯᒻ ᓂᔥᑐ ᐋᔥᐱᓵᒡ ᐊᓐ ᒋᐦᒋᑭᒦ ᒌ ᐋᑦ ᒥᐦᑰ᙮
9 ᒥᓯᐙ ᑖᓐ ᑳ ᐄᔑ ᐱᒫᑎᓰᒥᑭᐦᒡ ᓂᐲᐦᒡ ᐹᔨᒄ ᐋᔑᑯᒻ ᓂᔥᑐ ᒌ ᓂᐲᒥᑭᓐ᙮ ᑭᔮᐦ ᐹᔨᒄ ᐋᔑᑯᒻ ᓂᔥᑐ ᒌᒫᓐ ᐊᓂᑎᐦ ᑳᐦ ᑎᑯᐦᒡ ᒌ ᐃᔮᔪᐎᓐ᙮
10 ᐋᒄ ᐊᓐ ᓂᔥᑐ ᑳᐦ ᑖᑦ ᐋᓐᒋᓐ ᑳ ᐴᑖᑎᐦᒃ ᐅᐴᑖᒋᑭᓐ᙮ ᐋ ᒥᓯᒋᔅᑎᒃ ᐊᒋᐦᑯᔥ ᒌ ᐱᐦᒋᔑᓐ ᒌᔑᑯᐦᒡ ᐅᐦᒋ ᐊᓂᑖᐦ ᐄᔑ ᐊᔅᒌᐦᒡ᙮ ᒧᔮᒻ ᐊᓂᑖᐦ ᐋ ᐐᔨᓱᑦ ᒥᔥᑎᒄ ᐋ ᐹᓱᑦ ᐋᒄ ᑳ ᐃᓯᓈᑯᓯᑦ ᐊᓐ ᐊᒋᐦᑯᐦᔥ᙮ ᐹᔨᒄ ᐋᔑᑯᒻ ᓂᔥᑐ ᓰᐲ ᑭᔮᐦ ᑖᓂᑖᐦ ᒨᔔᒎᐎᒡ ᓂᐲ ᐋᑯᑖᐦ ᑳ ᐄᔑ ᐱᐦᒋᔑᐦᒃ ᐊᓐ ᐊᒋᐦᑯᐦᔥ᙮
11 ᐊᓐ ᒫᒃ ᐊᒋᐦᑯᐦᔥ ᐐᓯᑭᓐ ᒌ ᐃᔑᓂᐦᑳᓲ᙮ ᐹᔨᒄ ᐋᔑᑯᒻ ᓂᔥᑐ ᑖᓂᑖᐦ ᐋᐦ ᐋᑎ ᐄᐦᑎᑯᐦᒡ ᓂᐲ ᒌ ᐋᑎ ᐐᓯᑳᑭᒨᐤ᙮ ᒥᐦᒑᑐ ᐄᔨᔨᐅᒡ ᒌ ᓂᐱᐦᐄᑯᒡ ᐊᓂᔮᔨᐤ ᓂᐲᔨᐤ ᐋ ᒥᓂᐦᒀᒡ ᐋᐦᐋᑳ ᐅᐦᒋ ᒥᔻᑭᒥᔨᒡ᙮
12 ᐋᒄ ᐊᓐ ᓈᐤ ᑳᐦ ᑖᑦ ᐋᓐᒋᓐ ᑳ ᐴᑖᑎᐦᒃ ᐅᐴᑖᒋᑭᓐ᙮ ᐹᔨᒄ ᐋᔑᑯᒻ ᓂᔥᑐ ᐋᔥᑎᑎᒃ ᐊᓐ ᐲᓯᒻ, ᑭᔮᐦ ᐹᔨᒄ ᐋᔑᑯᒻ ᓂᔥᑐ ᐋᔥᑎᑎᒃ ᐊᓐ ᑎᐱᔅᒋᐲᓯᒻ ᑭᔮᐦ ᐹᔨᒄ ᐋᔑᑯᒻ ᓂᔥᑐ ᐊᒋᑯᐦᔑᒡ ᒌᐦ ᑎᑯᓂᔨᐤ ᑳ ᐄᔑ ᐅᑖᒥᐦᐙᑭᓂᐎᒡ ᐋᒄ ᐋᔑᑯᒻ ᓂᔥᑐ ᓂᒧᐃ ᐅᐦᒋ ᐃᔥᐱᔥ ᒋᐦᑳᔮᔥᑎᐙᐅᒡ᙮ ᐹᔨᒄ ᐋᔑᑯᒻ ᓂᔥᑐ ᐊᓐ ᐋ ᒌᔒᑳᒡ ᐃᔥᐱᔥ ᓂᒧᐃ ᐅᐦᒋ ᒋᐦᑳᔮᔥᑖᐤ ᑭᔮᐦ ᐹᔨᒄ ᐋᔑᑯᒻ ᓂᔥᑐ ᐊᓐ ᐋ ᑎᐱᔅᑳᒡ ᐃᔥᐱᔥ ᓂᒧᐃ ᐅᐦᒋ ᒋᐦᑳᔮᔥᑖᐤ᙮
13 ᒫᒀᒡ ᒫᒃ ᐋᐦ ᐄᑖᐱᔮᓐ, ᓂᒌᐙᐱᒫᐤ ᒥᒋᓲ ᐋ ᐱᐹᒥᐦᐄᔮᑦ ᐊᓂᑖᐦ ᒌᔑᑯᐦᒡ ᐋ ᒋᔣᐙᑦ ᐋᐦ ᐃᔨᑦ, “ᑯᔥᑖᑎᑯᓐ, ᑯᔥᑖᑎᑯᓐ, ᑭᑎ ᑯᔥᑖᑎᑯᓂᔨᐤ ᒑ ᐄᔅᐱᔨᑦ ᒥᓯᐙ ᐊᐙᓐ ᐅᑎᐦ ᐊᔅᒌᐦᒡ ᑳᐦ ᑖᑦ ᐄᔥᐱᐦ ᐴᑖᑎᐦᒀᐙ ᐅᐴᑖᒋᑭᓂᐙᐤ ᐊᓂᒌ ᓂᔥᑐ ᐋᓐᒋᓂᒡ ᐋᔥᒄ ᐋᑳ ᐙᐦᒋ ᐴᑖᑎᐦᒡ ᐅᐴᑖᒋᑭᓂᐙᐤ᙮”