3
ᒫᐦᒑᔨ ᐋ ᒌᔑᑳᒡ
1 ᒑ ᐐᐦ ᒋᔅᒑᔨᐦᑎᒥᓐ ᑭᔮᐦ ᐆ, ᐄᔥᐱᐦ ᐋᑎ ᒫᐦᒋᐱᔨᒀᐙ ᐋ ᒌᔑᑳᐦᒡ ᓈᔥᑖᑆᐦ ᑭᑎ ᑎᑯᓐ ᑖᓐ ᒑ ᐄᔑ ᐋᔨᒥᐱᔨᐦᒡ ᒑᒀᓐ᙮
2 ᐊᐅᔅᑖ ᐐᔨ ᑭᑎ ᐄᑖᔨᒦᓱ ᐊᐙᓐ, ᑭᔮᐦ ᓈᔥᑖᑆᐦ ᑭᑎ ᓵᒋᐦᐋᐤ ᔓᐎᔮᓐ᙮ ᓈᔥᒡ ᑭᑎ ᒥᒥᔻᒋᒥᓯᐎᒡ, ᑭᑎ ᒋᔅᑖᔨᒧᐎᒡ, ᑭᔮᐦ ᓈᔥᒡ ᑭᑎ ᒫᒫᔮᔨᐦᒑᐅᒡ᙮ ᑭᔮᐦ ᓂᒧᐃ ᑭᑎ ᐅᐦᒋ ᓂᓂᐦᐄᐦᑐᐙᐅᒡ ᐅᓃᒋᐦᐄᑯᐙᐤ᙮ ᓂᒧᐃ ᒥᑐᓐ ᑭᑎ ᐅᐦᒋ ᓂᓈᔅᑯᒨᐎᒡ ᒑᒀᔨᐤ ᑭᔮᐦ ᓂᒧᐃ ᒥᑐᓐ ᑭᑎ ᐅᐦᒋ ᐃᔮᐱᑖᔨᒫᐅᒡ ᒋᔖᒥᓂᑑ᙮
3 ᓂᒧᐃ ᑭᑎ ᐅᐦᒋ ᑭᒋᔅᑎᒫᒑᔨᒫᐅᒡ ᐊᐙᔨᐤᐦ ᑭᔮᐦ ᓂᒧᐃ ᒥᑐᓐ ᑭᑎ ᐅᐦᒋ ᐐᐦ ᐙᐹᔨᐦᑎᒫᒑᐅᒡ᙮ ᑭᑎ ᐐᐦ ᓈᓂᑐ ᐃᔮᐦᑯᐦᐋᐅᒡ ᐊᐙᔨᐤᐦ ᑖᓐ ᐋᐦ ᐄᑖᒡ, ᑭᔮᐦ ᓈᔥᒡ ᑭᑎ ᐋᐦᑯᔨᐙᓯᐎᒡ, ᑭᔮᐦ ᓈᔥᒡ ᑭᑎ ᐅᐦᑳᑎᒧᒡ ᐋ ᒥᔪᑐᑖᑭᓄᐐᒡ᙮
4 ᓈᔥᒡ ᑭᑎ ᒥᔻᔨᐦᑎᒧᐦᒡ ᐋ ᐎᓂᐱᔨᐦᐋᒡ ᐅᐐᒑᐙᑭᓂᐙᐤ, ᓂᒧᐃ ᒥᑐᓐ ᑭᑎ ᐅᐦᒋ ᓂᓈᑭᑎᐙᔨᐦᑎᒧᒡ ᑖᓐ ᐋᐃᐦᔨᑎᒡ, ᑭᔮᐦ ᓈᔥᑖᑆᐦ ᑭᑎ ᒥᒥᐦᒋᐦᐄᓱᐎᒡ᙮ ᐊᑎᑎᐤ ᑭᑎ ᓵᒋᐦᑖᐅᒡ ᐊᓂᔮᔨᐤ ᐐᔨᐙᐤ ᐋ ᐄᔑ ᒨᒋᒑᔨᐦᑎᒥᐦᐄᑯᒡ ᒑᒀᔨᐤ ᐃᔥᐱᔥ ᐐ ᐋ ᓵᒋᐦᐋᒡ ᒋᔖᒥᓂᑑ᙮
5 ᒧᔮᒻ ᓈᔥᒡ ᐋ ᐊᔨᒥᐦᐋᐙᑎᓰᔨᒡ ᑭᑎ ᐐᐦ ᐃᓯᓈᑯᐦᐄᓯᐎᒡ ᒥᒄ ᒫᒃ ᓂᒧᐃ ᑭᑎ ᐅᐦᒋ ᐃᔮᐱᑖᔨᐦᑎᒥᐦᐄᑯᒡ ᐊᓂᔮᔨᐤ ᓲᐦᑳᑎᓰᐎᓂᔨᐤ ᒑ ᐎᒋᐦᐄᑯᐙᑯᐱᓈ ᒑ ᒌ ᓂᓂᐦᐄᐙᐦᐋᒡ ᒋᔖᒥᓂᑑ᙮ ᐊᑳᐐ ᐃᔮᐱᑖᔨᒥᒡ ᐅᔮᔨᐤ ᑳ ᐄᑖᔨᐦᑖᑯᓯᒡ ᐄᔨᔨᐅᒡ᙮
6 ᐱᔅᒡ ᐹᐲᐦᒑᐅᒡ ᐙᔅᑳᐦᐄᑭᓐ, ᐋᒄ ᐊᓂᔮᔨᐤ ᐃᔅᒀᐤ ᑳ ᔑᐦᑯᒋᐦᐄᑯᔨᒡ ᒥᒋᐦᑐᑎᒧᐎᓂᔨᐤ ᑭᔮᐦ ᐱᔑᒄ ᓂᑎᐐ ᒥᒄ ᑳ ᐐᐦ ᐄᑖᑎᓰᔨᒡ ᐋᔪᐎᒄ ᐋᓐ ᐊᓂᔮᔨᐤ ᓈᔥᒡ ᐙᐦ ᑎᐹᔨᒫᒡ᙮
7 ᐅᔮᔨᐤ ᐃᔅᒀᐤ ᒨᔥ ᑯᒋᐦᑖᔨᐤ ᒑ ᒌ ᒋᔅᒑᔨᐦᑎᒥᔨᒡ ᓂᓈᐦᑭᐤ ᒋᔅᑯᑎᒫᒑᐎᓐ ᒥᒄ ᒫᒃ ᓂᒧᐃ ᒌ ᒥᔅᑭᒥᔨᐤ ᑖᑆᐎᓂᔨᐤ᙮
8 ᓂᔥᑰᔥᑎᒧᒡ ᑖᑆᐎᓂᔨᐤ ᐅᒌ ᓈᐹᐅᒡ ᒧᔮᒻ ᑖᓐ ᑳᐦ ᑎᔨᒡ ᐊᓂᔮᐦᑳ ᒑᓀᔅ ᑭᔮᐦ ᒫᒃ ᒑᒻᑉᕇᔅ ᐋ ᒌ ᓂᔥᑰᔥᑐᐙᔨᒡ ᒧᓱᔅ᙮ ᓈᔥᑖᑆᐦ ᓂᒧᐃ ᑯᐃᔅᑯᑯᑖᔨᐤ ᐅᒥᑐᓈᔨᐦᒋᑭᓂᐙᐤ, ᑭᔮᐦ ᐅᑖᑆᔮᔨᐦᑎᒧᐎᓂᐙᐤ ᓂᒧᐃ ᑯᐃᔅᒄ ᐃᓯᓈᑯᓂᔨᐤ᙮
9 ᓂᒧᐃ ᒫᒃ ᐊᐅᔅᑖ ᒋᑭ ᒌᐦ ᑐᑎᒧᒡ ᐅᔮᔨᐤ ᑖᓐ ᐋᐃᐦᔨᑎᒡ, ᐙᔥ ᑭᑎ ᐙᐱᐦᑎᒥᔨᐤ ᒥᓯᐙ ᐊᐙᔨᐤᐦ ᑖᓐ ᐋ ᐃᔥᐱᔥ ᓂᑎᐐ ᒥᒄ ᐃᔨᐦᑎᒡ, ᒧᔮᒻ ᑖᓐ ᑳ ᐄᔑ ᒋᔅᒑᔨᐦᑖᑯᓰᔨᒡ ᐊᓂᔮᔨᐤ ᓃᔓ ᓈᐹᐤ ᒑᓀᔅ ᑭᔮᐦ ᒫᒃ ᒑᒻᑉᕇᔅ᙮
ᒫᐦᒑᔨ ᑳ ᐄᔑ ᐎᔨᔓᒫᑭᓅᑦ ᑎᒧᕢ
10 ᒌᔨ ᒫᒃ ᑎᒧᕢ ᓂᒑᔥᑎᓈᐦᐅᓐ ᒑ ᓅᔔᔥᑭᒥᓐ ᓂᒋᔅᑯᑎᒫᒑᐎᓐ, ᑭᔮᐦ ᑳ ᐄᔑ ᐱᒫᑎᓰᔮᓐ, ᑭᔮᐦ ᓂᑎᐄᑖᔨᐦᑎᒧᐎᓐ᙮ ᒋᒌ ᐙᐱᐦᑖᓐ ᑖᓐ ᑳ ᐄᔑ ᑖᑆᐦᑎᒫᓐ, ᑖᓐ ᑳ ᐄᔑ ᓰᐱᔨᐙᓯᔮᓐ, ᑭᔮᐦ ᓂᓵᒋᐦᐄᐙᐎᓐ, ᑭᔮᐦ ᒋᒌ ᐙᐱᐦᑖᓐ ᑖᓐ ᑳ ᐄᔑ ᓲᐦᒑᐋᐦᔨᑖᑯᓯᔮᓐ ᑖᓐ ᑳ ᐄᔑ ᓂᓈᐦᑭᐤ ᓂᒋᔥᑭᒫᓐ᙮
11 ᑭᔮᐦ ᒫᒃ ᒋᒌ ᐙᐱᐦᑖᓐ ᑖᓐ ᑳ ᐄᔑ ᓂᓈᐦᑳᒋᐦᐄᑭᐎᔮᓐ ᑭᔮᐦ ᑖᓐ ᑳ ᐄᔑ ᐙᐐᓯᒑᔨᐦᑎᒫᓐ᙮ ᐙᔥ ᒥᓯᐙ ᒌ ᒋᔅᒑᔨᐦᑖᓐ ᑖᓐ ᑳᐦ ᑐᑖᑭᐎᔮᓐ ᐊᓂᑖᐦ ᐋᓐᑎᔻᑭᐦᒡ, ᐋᐃᒀᓃᔨᒥᐦᒡ ᑭᔮᐦ ᒫᒃ ᐊᓂᑖᐦ ᓕᔅᑦᕋᐦᒡ᙮ ᑖᑆᐦ ᓄᐎᒡ ᒌ ᐋᐦᒀᑖᔨᐦᑖᑯᓐ ᑖᓐ ᑳ ᐄᔑ ᓂᒋᔥᑭᒫᓐ᙮ ᒥᒄ ᒫᒃ ᑎᐹᔨᐦᒋᒑᓯᐤ ᐐᔨ ᓂᒌ ᐱᑯᐦᐄᒄ ᒑ ᒌ ᔖᐳᔥᑭᒫᓐ ᒥᓯᐙ ᑖᓐ ᑳᐦ ᑐᑖᑭᐎᔮᓐ᙮
12 ᐋᐦᐋ, ᑖᑆᐦ, ᒥᓯᐙ ᐊᐙᓐ ᑯᐃᔅᒄ ᑳ ᐐᐦ ᐄᔑ ᐱᒫᑎᓰᑦ ᑭᔮᐦ ᒥᑐᓐ ᑳ ᐱᒋᔅᑎᓂᓱᑦ ᐋ ᐐᐦ ᐐᒑᐙᑦ ᙭ ᒌᓴᔅᐦ, ᑭᑎ ᑎᑯᓂᔨᐤ ᑖᓐ ᒑ ᐄᔑ ᓂᓈᐦᑳᒋᐦᐋᑭᓅᑦ,
13 ᐋᒄ ᐊᓂᒌ ᑳ ᒥᒑᑎᓯᒡ ᑭᔮᐦ ᐊᓂᒌ ᓂᑎᐐ ᒥᒄ ᑳ ᐄᔑ ᒋᔅᑯᑎᒫᒑᒡ ᓈᓈᓂᒌᒻ ᐊᑎᑎᐤ ᑭᑎ ᐄᑖᔨᐦᑖᑯᓯᐎᒡ, ᐋ ᑳᒌᔑᒫᒡ ᐊᐙᔨᐤᐦ ᑭᔮᐦ ᐐᔨᐙᐤ ᐋ ᑳᒌᔑᒫᑭᓂᐎᒡ᙮
14 ᒋᐐᐦ ᐄᑎᑎᓐ ᒫᒃ ᒌᔨ, ᑖᑆᐦᑎᐦ ᑭᔮᐦ ᓲᐦᒃ ᓂᓈᑭᑎᐙᔨᐦᑎ ᐊᓐ ᑖᑆᐎᓐ ᑳ ᒋᔅᑯᑎᒫᑭᐎᔨᓐ ᐋ ᒋᔅᒑᔨᒥᑣᐤ ᐊᓂᒌ ᐄᔨᔨᐅᒡ ᑳ ᒋᔅᑯᑎᒫᔅᒡ᙮
15 ᐙᔥ ᒋᔥᒋᓈᒑ ᒫᒀᒡ ᐋᐙᔒᐎᔨᓐ ᔖᔥ ᒋᒌ ᒋᔅᑯᑎᒫᑭᐎᔨᓐ ᑖᓐ ᑳ ᐄᔑ ᒥᓯᓂᐦᐄᑭᓂᐎᔨᒡ ᒋᐦᒋᒥᓯᓈᐦᐄᑭᓂᐦᒡ᙮ ᐋᑯᑖᐦ ᒑ ᐅᐦᒋ ᐃᔮᔨᓐ ᑭᒑᐦᑖᐙᔨᐦᑎᒧᐎᓐ ᒑ ᒌ ᒋᔅᒑᔨᐦᑎᒥᓐ ᐋ ᑖᑆᔮᔨᒫᑦ ᐊᐙᓐ ᙭ ᒌᓴᔅᐦ ᐋᑎ ᒑ ᒌ ᐅᐦᒋ ᐱᒫᒋᐦᐅᑦ᙮
16 ᒥᓯᐙ ᐊᓐ ᐋᑎᔥᑖᒡ ᒋᐦᒋᒥᓯᓈᐦᐄᑭᓂᐦᒡ ᐐᔨ ᐊᓂᔮᔨᐤ ᑎᐱᔨᐙ ᐅᑎᔨᒧᐎᓐᐦ ᒋᔖᒥᓂᑑ, ᐅᔮᐦᔮᐦᐎᓐ᙮ ᒥᔻᐱᑎᓐ ᑭᒑᔅᒋᒧᐙᐎᓂᐦᒡ, ᒋᔅᑎᐦᐋᒫᒑᐎᓂᐦᒡ, ᑯᐃᔅᑯᓂᐙᐎᓂᐦᒡ, ᑭᔮᐦ ᑯᐃᔅᑯᑖᑎᓯᐎᓂᐦᒡ ᐄᔑ ᒋᔅᑯᑎᒫᒑᐎᓐ᙮
17 ᐅᔮᔨᐤ ᑭᔮᐦ ᐅᑎᔨᒧᐎᓐᐦ ᐎᒋᐦᐄᑯᔨᐤ ᒥᑐᓐ ᒑ ᒌ ᐃᔮᔅᑭᐎᔨᒡ ᒋᔖᒥᓂᑑ ᐅᑖᐱᒋᐦᐋᑭᓐᐦ ᒑ ᒌᐦ ᑐᑎᒥᔨᒡ ᒥᓯᐙ ᓂᓈᐦᑭᐤ ᒥᔪᑐᑎᒫᒑᐅᓂᔨᐤ᙮