15
Mosi la
1 Hat navah, Mosi hoi Isarelnaw ni BAWIPA koe la a sak awh e teh, BAWIPA ni a lentoenae hoi a tâ dawkvah ama pholennae la sak awh sei. Marang hoi marangransanaw tuipui thung koung a tâkhawng toe.
2 BAWIPA teh ka thaonae hoi ka la lah ao.
Ama teh na ka rungngangnae lah ao.
Hote Cathut teh kai ni ka bawk e Cathut lah ao dawkvah,
ka pholen han. Ka mintoenaw e Cathut lah ao dawkvah ka oup han.
3 BAWIPA teh ransa lah ao.
A min teh Jehovah doeh.
4 Faro siangpahrang e rangleng hoi a ransanaw teh
tuipui dawk koung a tâkhawng.
A rawi e bawinaw hai tuipui paling dawk koung a bo awh.
5 Kadung poung e hmuen dawk muen a ramuk.
Talung patetlah thung a bo awh.
6 Oe BAWIPA, Aranglae na kut teh
hnosakthainae hoi a lentoe teh,
Oe BAWIPA, aranglae na kut ni tarannaw koung a raphoe.
7 Nang na ka tarannaw hah na lentoenae naw hoi
koung na tâkhawng. A lungkhueknae a patoun teh
songnawng patetlah ahnimouh teh a kak.
8 Na hnong dawk e kâha lahoi tui teh na kâcu sak teh,
Kalawng e tui barukbaruk a phuen sak teh,
tuipui thung kadung poung e tui hah a kamkak.
9 Taran ni kai na pâlei han. ahnimouh ka pha han.
Lawp e hno hah ka kârei vaiteh ahnimouh koe ka ngainae akuep han.
Tahloi tabu dawk e ka rasa vaiteh,
ka kut hoi ahnimouh teh koung ka thei han telah a dei.
10 BAWIPA ni kahlî a hmu teh,
tuipui ni ahnimouh muen a ramuk teh
katha kaawm poung e tui dawk talung patetlah a bo awh.
11 Oe BAWIPA, cathutnaw thung dawk
nang patetlae Cathut apine kaawm.
Thoungnae lahoi ka lentoe e, pholen nah,
taki kaawm e, kângairu hno ka sak e,
Nang hoi bang patet e cathut maw ka kâvan.
12 Aranglae kut na dâw nah ahnimouh teh
talai ni koung a payawp.
13 Na taran e taminaw hah lungmanae lahoi na hrawi.
Kathounge na onae hmuen koe tha onae lahoi na hrawi.
14 Miphunnaw ni kamthang a thai awh vaiteh a taki awh han.
Filistin khocanaw teh a lungpuen awh han.
15 Edom kahrawikungnaw kângairunae,
Moab ram e ransanaw teh pâyawnae,
Kanaan khocanaw pueng teh
lungpoutnae koe a pha awh han.
16 Oe BAWIPA, na taminaw ni a tapoung toteh,
Na ran e taminaw ni a tapoung toteh,
Hote miphunnaw pueng ni takinae lungthin,
lungpuennae a tawn awh vaiteh,
Na kut hno sakthainae dawk ahnimouh teh
talung patetlah duem ao awh han.
17 Oe BAWIPA, râw coe hane mon,
Na o nahanelah na sak e hmuen koe
na taminaw na kâenkhai han.
Oe BAWIPA, na kut hoi sak e kathoung e
hmuen koe hmuen na ta han.
18 BAWIPA ni a yungyoe uk na lawiseh telah la a sak awh.
19 Bangkongtetpawiteh, Faro siangpahrang e marangnaw, ranglengnaw, marangransanaw teh tuipui dawk a kâen teh BAWIPA ni ahnimae lathueng tuipui hoi muenli sak. Isarel miphunnaw teh tuipui lungui vah talai dawk a cei awh.
Miriam la
20 Aron e a tawn canu, profet napui Miriam ni cecak a sin teh, napuinaw pueng ni hai cecak khawng hoi a hnuk a kâbang awh.
21 Miriam ni hai BAWIPA teh a lentoe teh tânae a hmu dawkvah,
Ama teh pholen awh sei.
Marang hoi marangransanaw hah tuipui thungvah
koung a pabo toe telah ahnimouh hoi cungtalah la a sak awh.
Tui kakhat e radipsaknae
22 Hahoi, Mosi ni Isarelnaw hah tuipui paling koe lahoi a hrawi teh, ahnimouh teh Sur kahrawngum vah a pha awh. Hote kahrawng dawk hnin thum touh kahlawng a cei awh teh tui hmawt awh hoeh.
23 Marah tie hmuen koe a pha awh navah, Marah tui teh akha dawkvah net thai awh hoeh. Hatdawkvah, Hote hmuen hah Marah telah a kaw awh.
24 Taminaw ni Mosi yonpen awh teh bangtelamaw nei han ti hoi a phuenang awh.
25 Mosi ni BAWIPA a kaw teh BAWIPA ni thingkung buet touh a patue. Hote akung tui dawk a tâkhawng nah tui teh a radip. Hote hmuen koe ahnimouh a tanouk teh phunglam a sak pouh e teh,
26 Nangmouh ni BAWIPA Cathut e lawk hah kahawicalah na ngai teh a ngai e hno na sak teh a kâpoelawknaw hah na ngai teh aphunglawknaw pueng na tarawi pawiteh, Izipnaw koe ka pha sak e Lacik hah nangmouh koe ka phat sak mahoeh. Bangkongtetpawiteh, nangmae patawnae kadamsakkung, BAWIPA lah ka o telah ati.
27 Hat hnukkhu, tuido hlaikahni touh, samtue 70 touh a onae Elim kho a pha awh teh, Hote hmuen dawk tui onae koe tengpam vah rim a tuk awh.