19
Job ni Bildad a pathung
1 Job ni a pathung teh,
2 Atueng nâsittouh maw ka hringnae he runae na poe awh teh,
lawk hoi kai na raphoe awh han.
3 Vai hra totouh na pathoe awh e ka tak dawkvah
na payon awh nakunghai na kayak awh hoeh.
4 Ka payon katang pawiteh,
ka payonnae teh kai dawk pou ao han.
5 Kai na taranlahoi na kâoup awh teh,
kai kayanae heh kai na tarannae lah na hno awh pawiteh,
6 kai dawkvah Cathut a payon tie hoi,
a tamlawk hoi na ramuk tie hah panuek awh.
7 Payonnae kong dawkvah ka hram pawiteh, na thai pouh mahoeh.
Puenghoi ka hram nakunghai lannae hah awm hoeh.
8 Ka tapuet thai hoeh nahanlah ama ni ka lamthung hah a pâbing.
Ka lamthung dawk hmonae hah a ta.
9 Ka bawilennae hah na rading pouh teh,
ka lû dawk e bawilukhung hah na la pouh.
10 Avoivang hoi vekvek na phi te ka kahma toe.
Ka ngaihawinae teh, thingkung patetlah na phawk pouh.
11 Kai na taranlahoi a lungkhueknae hah a kâan sak teh,
a taran buet touh e patetlah na touksin.
12 A ransahu hah a kamkhueng awh teh,
kai na taran lahoi lamthung a rasoun awh,
ka lukkareirim tengpam petkâkalup lah na ven awh.
13 Ka hmaunawnghanaw hah ahla nah koelah na puen pouh teh,
ka panue e naw hah tamitavan lah koung ao awh.
14 Ka imthungnaw hai ka hmawt thai hoeh toe.
Ka huikahawinaw ni koung na pahnim awh toe.
15 Ka im dawk kho kasaknaw,
ka sannunaw ni imyin lah na pouk awh. Ahnimae mithmu vah imyin lah ka o.
16 Ka sannaw hah ka kaw eiteh, na pato awh hoeh toe.
Lawkkanem hoi pasawt a ngai toe.
17 Ka hringnae teh ka yu hanelah a hnueai e lah ao teh,
rei ka tâcawt e hmaunawnghanaw hanelah ngai ka tho e la awm hoeh toe.
18 Camoca ni patenghai na dudam awh.
Ka thaw navah kai taranlahoi lawk a dei awh.
19 Ka huiko kamyawng pueng ni na panuet awh.
Ka lungpataw e naw ni hai kai tarankung lah koung ao awh.
20 Ka vuen hoi ka tak hai ka hru dawk rapkâbet.
Kahâhli duengdoeh kaawm toe.
21 Oe, nangmouh ka huinaw, na pahren awh haw, na pahren awh haw,
bangkongtetpawiteh Cathut e kut hoi na hem e la ka o toe.
22 Bang kecu dawk maw Cathut na rektap e patetlah kai hah na rektap awh.
Ka takthai dawk ka khangnae he na khout sak awh hoeh rah maw.
23 Oe, ka lawknaw he ca lah ka thun pawiteh,
cauknaw dawk pakhum boipawiteh,
24 thutnae sum hoi, talung dawk thut e
a yungyoe hanelah awm pawiteh,
25 kai na karatangkung teh a hring tie hah ka panue.
A hnuktengpoung nah talai van bout a kangdue han.
26 Ka vuen heh raphoe hnukkhu hoi,
ka takthai hoi Cathut hah ka hmu han tie hah ka panue.
27 Kai kama roeroe ni ka hmu vaiteh, ayâ alouk ni a hmu dueng laipalah,
kai ni kamae mit hoi roeroe ka hmu han.
Banghloimaw ka thung e ka lungthin ni a rabui.
28 Hno coungnae a kung teh, kai dawkvah hmu awh eiteh,
bangtelamaw, ahni teh rektap han, na tet awh boipawiteh,
29 Namamouh ni tahloi teh taket awh.
Bangkongtetpawiteh, lungkhueknae ni tahloi hoi reknae hah tâco sak.
Lawkcengnae ao tie hah panuethai nahan telah ati.