20
1 Misurtui teh ayâ ni panuikhainae doeh,
yamu teh kâyuenae doeh,
hot patet e hno ni tami lungang sak boihoeh.
2 Siangpahrang lungkhuek e teh sendek ka huk e patetlah ao,
a lung ka khuek sak e tami teh a hringnae hanlah runae doeh.
3 Kâyuenae karoumsakkung teh bari a kamcu,
tamipathu ni kâhemnae pou a kamtawng.
4 Tami ka pangak ni a pâding dawk laikawk kanawk ngaihoeh,
canga toteh a ca hane banghai tawn mahoeh.
5 Tami lungthin hoi pouknae teh ka dungpoung e tui hoi a kâvan,
hatei thaipanueknae ka tawn e ni teh haw hoi a tâco sak han.
6 Tami kapap ni amamouh hawinae dueng doeh ouk a dei awh,
hatei apinimaw yuemkamcu e a hmu thai han.
7 Tamikalan teh yuemkamcu lah ouk a hring,
a canaw ni hai ahnie yawhawi ouk a hmawng awh.
8 Lawkcengnae tungkhung dawk ka tahung e siangpahrang ni,
a mithmu e hnokathout pueng koung a takhoe.
9 Ka lungthin ka thoung sak toe,
yon hoi ka hlout toe telah apinimaw a dei thai.
10 Yawcu kânginghoehe hoi khinglung ka kuep hoeh e teh
BAWIPA hmalah panuet a tho.
11 Camo hai a tawk e lahoi panue thai,
a tawk e hno a thoung hoi a lan e lahoi bangnue thai.
12 Thaithainae hnâ hoi hmuthainae mit heh
BAWIPA ni a sak e doeh.
13 I e hah lungpataw hanh na mathoe han,
na mit pakkaw lah khenhaw! cakhuem rawca na tawn han.
14 Hno karankung ni hawihoeh ati,
hatei a cei hnukkhu a ran e hah a kâoupkhai.
15 Sui hoi talung phukaawm moikapap ao,
hatei panuenae pahni teh talung phukaawm e lah ao.
16 Tamitavan hanelah amahkhankung teh angki amahkhan
nahanelah la pouh lah ao vaiteh napui koe poe naseh.
17 Dumnae vaiyei teh a tui eiteh,
a ca hnukkhu a kâko dawk sadi hoi a kawi han.
18 Noenae heh kâpankhai hnukkhu caksak lah ouk ao,
kahawicalah kâpan hnukkhu na taran hah tuk.
19 Yapliyaplap kaawm e tami ni arulawk hah ouk a pâpho,
hatdawkvah a lawk ka pâhnan e tami hoi kamyawng hanh.
20 Apipatethai, a manu hoehpawiteh a na pa thoe ka bo e teh,
khohmo um a hmaiim a due pouh han.
21 Râw hah hmaloe pang thai eiteh,
apoutnae koe yawhawinae lah awm hoeh.
22 Moi ka pathung han telah tet hanh,
BAWIPA hah ring haw, ama ni na rungngang han.
23 Khinglung kâvan hoeh e heh BAWIPA mithmu vah panuet a tho teh,
kânging hoeh e yawcu hai hawihoeh.
24 Tami ceinae lamthungnaw heh BAWIPA ni a sak e doeh,
hatdawkvah tami ni ama ceinae lamnaw hah
bangtelamaw a panue thai han.
25 Hetheh poehno kathoung doeh telah
lungrang laihoi dei e teh tami hanelah karap doeh,
lawkkam hnukkhu pankângainae ouk ao.
26 A lungkaang e siangpahrang ni tamikathoutnaw hah
a kâyatsak teh lengkhok hoi a coungroe.
27 Tami e muitha teh BAWIPA e hmaiim doeh,
a lungthin thung e pueng pheng a tue.
28 Lungmanae hoi lawkkatang ni siangpahrang teh a kountouk,
a bawitungkhung teh lungpatawnae lahoi kangdue sak lah ao.
29 Thoundounnaw e bawilennae teh a thaonae doeh,
matawngnaw e kamcunae teh a sampo doeh.
30 Puenghoi hemnae ni hno kathout a thoung sak,
hemnae ni thung lah von dawk e pueng hai a thoung sak.