25
Solomon ni dei e lungangnae lawk alouknaw
1 Hethaiyah, Solomon e cingthuilawk,
Judah siangpahrang Hezekiah e taminaw ni
patuen a thut awh e doeh.
2 Hro e hno teh Cathut bawilennae doeh,
hatei hno pakhingpalang e teh siangpahrang bawilennae doeh.
3 Kalvan a rasang teh talai a dung e patetlah
siangpahrang lungthin hai koung panuek thai hoeh.
4 Ngun ei hah takhoe haw,
kahlunkung ni manang kahawi a sak thai han.
5 Siangpahrang hmalah hoi tamikathout hah takhoe pawiteh,
a bawitungkhung teh lannae lahoi a cak han.
6 Siangpahrang hmalah mahoima kârasang sak hanh,
siangpahrang hmuen koe hai kangdout hanh.
7 Na mit ni a hmu e bawitungkhung hmalah
pahoung hanelah puen e lah na o hlak teh,
hi tho, telah kaw e ahawihnawn.
8 Lawkcengnae hmuen koe karanglah cet hanh,
bangkongtetpawiteh, na imrinaw ni
yeirai na po sak vaiteh bangtelamaw na ti han.
9 Na imri hoi na lawk teh kâpankhai awh nateh,
arulawk hah ayânaw koe dei awh hanh.
10 Hoehpawiteh ka thai e ni hoe pâpho vaiteh,
yeirai na ponae hah hoe kamnuek langvaih.
11 Kamculah dei e lawk teh ngun manang dawk e
suipaw hoi a kâvan.
12 Kahawicalah yuenae ka tarawi e tami teh,
suihnapacap hoi sôlêi e sui hoi kamthoup e patetlah ao.
13 Kapatounkung hanelah yuemkamcu lah
kaawm e patoune teh canganae tadamtui patetlah ao,
bangkongtetpawiteh a bawi lung a roum sak.
14 Ka poe han tihoi a kâoup hnukkhu
poe laipalah kaawm e tami teh,
khotui laipalah e tâmai hoi kahlî hoi a kâvan.
15 Lungsawnae ni lawkcengkung a tâ thai,
lawkkanem ni hru a khoe thai.
16 Khoitui na hmu boimaw, na boum totouh duengma cat.
Na kâso pawiteh na palo han.
17 Na imri koe ekvoi cet hanh, na hmawt vaiteh
na hmuhma payon vaih.
18 A imri taranlahoi panuekkhaikung kaphawk lah kaawm e tami teh,
bongpai, tahloi, kahran e pala hoi a kâvan.
19 Runae kâhmo lahun nah yuemkamcu hoeh e kâuep e teh,
hâ kâkhoenae, hru kamhoutnae patetlah doeh ao.
20 A lungkamathout koe la ka sak e teh
pâding nah angki ka rading e hoi hmâ dawk
longtui awi e hawi a kâvan.
21 Na taran a vonhlam pawiteh,
a ca hane rawca poe nateh tui kahran pawiteh
nei hane tui poeh.
22 Bangkongtetpawiteh, hottelah na sak pawiteh
a lû dawk hmaisaan na pâpawp pouh e lah ao teh,
BAWIPA ni tawkphu na poe han.
23 Atunglah e kahlî ni kho a thokhai teh,
tamcuek lawk deinae lai ni lungkhueknae minhmai a thokhai.
24 Ka hrawk'ang e yu hoi im kalen dawk o hlak teh,
lemphu imtakin koe o e ahawihnawn.
25 Ahlanae koe e kamthang kahawi thai e heh,
tuikahran e tami koe tuipading hoi a kâvan.
26 Tamikathout hmalah tamikalan lawk dei payon e teh tui pânut e,
kapawk e tuikhu hoi a kâvan.
27 Khoitui ek kapap ca e hawi hoeh,
hot patetlah mahoima bawilennae tawng e teh bawilennae nahoeh.
28 Ma e muitha ka uk thai hoeh e teh
rapan tawn laipalah karawk e khopui hoi a kâvan