109
Taran hanelah heinae
Kathutkung: Devit
1 Oe ka pholen e ka Cathut, duem awm hanh.
2 Bangkongtetpawiteh, tamikathoutnaw hoi
tami kadumyennaw ni, a pahni na ang sin awh teh,
lai na thoe sin awh.
3 Hmuhmanae lawk hoi na kalup awh teh,
a khuekhaw awm laipalah na tuk awh.
4 Ka lungpataw e naw teh na katarankung lah a coung awh.
Hatei, ratoum laihoi ka o.
5 Ahnimouh ni hawinae hah hawihoehnae hoi na patho awh teh,
ka pahrennae hah hmuhmanae hoi na patho awh.
6 Ahnimae lathueng vah tamikathoutnaw tat nateh,
aranglah vah tarannaw awm naseh.
7 Lawkceng navah sung naseh,
a ratoumnae teh yonnae lah coung pouh naseh.
8 A hringnae hnin duem naseh,
a thaw teh ayâ alouk ni patawm naseh.
9 A canaw teh nara lah awm awh naseh,
a yu teh lahmai naseh.
10 A canaw teh kâva awh naseh,
ka rawk tangcoung e amamae hmuen koehoi
rawca tawng awh naseh.
11 Tangka kacawisaknaw ni a canaw teh
laiba dawk lat pouh naseh,
a tawk teh a tawn tangcoung e hai
apimouh ti panue hoeh e ni koung lat pouh naseh.
12 A lathueng vah apinihai lungmanae kamnuek sak hanh naseh.
A ca naranaw hai apinihai pahren hanh naseh.
13 A ca catounnaw hai dout naseh.
A catoun awm laipalah a min kahmat naseh.
14 A na mintoenaw e yonnae teh,
BAWIPA hmalah pou pâkuem naseh.
A manu yonnae raphoe pouh hanh naseh.
15 Hotnaw teh BAWIPA hmalah pou kamnuek naseh.
Het talai van vah, ahnimouh pahnimhoehnae
awm hanh naseh.
16 Bangkongtetpawiteh, lungmanae kamnue sak hanelah, panuek awh hoeh.
A lung ka tangpawk e patenghai a thei thai awh nahanelah,
a reikathai hoi mathoenaw hah a pacekpahlek awh.
17 Thoe a bo awh e hah amamouh lathueng bawt naseh.
Banglahai a noutna awh hoeh e yawhawi ni
ahla poungnae koe cettakhai naseh.
18 Thoebonae hah angki lah a kho e patetlah,
a von dawk tui patetlah kâen naseh.
A hru thung satui patetlah kâen naseh.
19 A kâkhu e hah a khohna patetlah coung naseh,
taisawm patetlah a keng dawk pou kâyeng naseh.
20 Hothateh, ka tarannaw koe
BAWIPA ni moipathungnae lah awm naseh.
Na pathoe awh dawkvah,
a pang awh e lah awm naseh.
21 Hateiteh Oe Bawipa Jehovah,
kai hateh na min kecu dawk hawinae hoi
na awmkhai haw.
Na lungmanae dawkvah, na rungngang haw.
22 Tami ka roedeng hoi tami ka vout e lah doeh ka o.
Ka thung vah ka lungthin teh hmâ a ca.
23 Kanîka patetlah ka kahma teh,
awsi patetlah ka kâhuet.
24 Ka khokpakhu teh rawcahai kecu dawk cak hoeh,
ka takthai teh a kamsoe.
25 Ahnimouh ni na pathoe hanelah ka o teh,
na hmu awh toteh lû na saling sin awh.
26 Oe BAWIPA ka Cathut, na kabawm haw.
Na lungmanae patetlah na rungngang haw.
27 BAWIPA, hethateh na kut hoi sak e doeh
tie a panue thai awh nahanlah.
28 Ahnimouh ni thoe na bo eiteh,
nang ni yawhawi na poe haw.
Ahnimouh a thaw awh navah kayak awh naseh.
Hatei, na san teh konawm naseh.
29 Na katukkungnaw teh kayanae ni ramuk awh naseh.
Min mathoenae hni ni koung ramuk naseh.
30 Ka pahni hoi BAWIPA teh puenghoi ka pholen han.
Bokheiyah, maya hmalah ama teh ka pholen han.
31 Bangkongtetpawiteh, yon kapennaw kut dawk hoi rungngang hanelah,
ka roedengnaw e aranglah a kangdue han.