115
Meikaphawk banglah a ohoehnae hoi Cathut yuem a kamcunae
Kathutkung: Panuekhoeh
1 Oe BAWIPA, na lungmanae hoi na lawkkatang kecu dawkvah,
na bawilennae teh kaimouh koe laipalah,
na min dawkvah awm lawiseh.
2 Bangkong mouh Jentelnaw niyah,
ahnimae Cathut teh nâmouh ao ati awh va.
3 Maimae Cathut teh kalvan vah ao teh,
a ngai e pueng hah ouk a sak.
4 Ahnimae meikaphawknaw teh sui hoi ngun lah ao awh teh,
kut hoi sak e lah ao awh.
5 Pahni a tawn awh ei, lawk dei thai hoeh.
Mit a tawn awh ei, hmawt thai hoeh.
6 Hnâ a tawn awh ei, thai awh hoeh.
Hnawng a tawn awh ei, hmui thai awh hoeh.
7 Kut a tawn awh ei, banghai tek thai awh hoeh.
Khok a tawn awh ei, cet thai awh hoeh.
Hotnaw e lawkron dawk hoi lawk tâcawt hoeh.
8 Hotnaw kasakkung teh a sak awh e hoi doeh a kâvan awh.
Hotnaw kâuep e hai sue touh lah a kâvan awh.
9 Oe Isarel, BAWIPA hah kâuep haw.
Ahni teh nangmouh na kabawmkung hoi kângue e bahling doeh.
10 Oe Aron imthungnaw, BAWIPA hah kâuep awh.
Ahni teh nangmouh kabawmkung hoi kânguenae bahling doeh.
11 Nangmouh BAWIPA ka taket e naw,
BAWIPA hah kâuep awh haw.
Ahni teh nangmouh kabawmkung hoi
kânguenae bahling doeh.
12 BAWIPA ni pou na panue teh,
yawhawi na poe han.
Isarel imthung hai yawhawi a poe vaiteh,
Aron imthung hai yawhawi a poe han.
13 BAWIPA ka taket e teh,
tami kalen kathoung yawhawi a poe han.
14 Namamouh hoi na canaw khuehoi
BAWIPA ni hoehoe na pung sak naseh.
15 Talai hoi kalvan kasakkung
BAWIPA ni yawhawi na poe awh naseh.
16 Kalvan teh kalvannaw totouh BAWIPA e doeh.
Hatei, talai teh talai taminaw hah a poe toe.
17 Tami kadout ni BAWIPA pholen hoeh.
Duem kâhatnae koe kacettangcoungnaw nihai
BAWIPA pholen boihoeh.
18 Hatei, maimouh niteh,
BAWIPA hah atuhoi a yungyoe totouh pholen awh han.
BAWIPA teh pholen awh.