118
A lungmanae teh a yungyoe akangning
Kathutkung: Panuekhoeh
1 Oe BAWIPA koe lunghawilawk dei awh.
Bangkongtetpawiteh, ama teh ahawi,
a lungmanae teh a yungyoe a kangning.
2 A lungmanae teh a yungyoe a kangning telah
Isarelnaw ni atu dei awh naseh.
3 A lungmanae teh a yungyoe a kangning telah
Aron imthung ni atu dei awh naseh.
4 A lungmanae teh a yungyoe a kangning telah
BAWIPA ka taket e naw ni atu dei awh naseh.
5 Ka lungpout nah BAWIPA ka kaw teh,
BAWIPA ni hai na pato teh, hmuen akawnae koe na o sak.
6 BAWIPA ni na kampangkhai dawkvah ka taket mahoeh,
Tami ni kai lathueng bangmouh a sak thai han.
7 BAWIPA teh na kabawm e lah ao.
Hatdawkvah, na ka hmuhma e naw koe ka lungngai akuep han.
8 Tami kâuep hlak
BAWIPA kâuep ahawihnawn.
9 Bawinaw kâuep hlak BAWIPA kâuep ahawihnawn.
10 Miphun pueng ni na kalup awh.
Hatei, ahnimanaw teh BAWIPA min lahoi koung ka raphoe han.
11 Ahnimouh ni na kalup awh, na tuembue awh.
Hatei, BAWIPA min lahoi koung ka raphoe han.
12 Khoi ni a kayo e patetlah na kalup nakunghai,
buruk hmai kang e patetlah a roum awh.
Bangkongtetpawiteh, BAWIPA min lahoi koung ka raphoe han.
13 Ka rawp nahanlah puenghoi na ka tanawt nakunghai,
BAWIPA ni na kabawp.
14 BAWIPA teh ka tha hoi ka la doeh.
Ahni teh kaie rungngangnae doeh.
15 Tami kalannaw e rim dawkvah,
konawmnae pawlawk hoi rungngangnae pawlawk teh ao.
BAWIPA e aranglae kut ni taranhawinae lahoi a tawk.
16 BAWIPA e aranglae kut teh, tawm lah ao teh,
BAWIPA e aranglae kut ni taranhawi lahoi ouk a tawk.
17 Dout laipalah, ka hring vaiteh,
BAWIPA hnosak e hah ka pâpho han.
18 BAWIPA ni puenghoi na yue, hatei due hane teh
pasoung hoeh rah.
19 Lannae takhang teh na paawng pouh haw.
Hawvah ka kâen vaiteh, BAWIPA ka pholen han.
20 Hethateh, BAWIPA e longkha,
tami kalannaw a kâen nahane doeh.
21 Nang teh, na pholen han.
Bangkongtetpawiteh, nang ni na pato teh,
kaie rungngangnae lah na o.
22 Im kasakkungnaw ni a pahnawt awh e talung hah
alawkpui poung e a takinlung lah ao.
23 Hothateh, BAWIPA ni a sak e doeh.
Maimae mithmu haiyah kângairu hanlah ao.
24 Hethateh, BAWIPA ni a sak e hnin a tho.
Hote hnin dawkvah, lunghawi awh han. Konawm awh han.
25 Oe BAWIPA, atu na rungngang haw telah ka ratoum.
Oe BAWIPA kuepcingnae hah na poe haw telah ka ratoum.
26 BAWIPA min lahoi ka tho e teh tami yawkahawi e doeh.
BAWIPA imthung hoi yawhawi teh na poe awh.
27 Cathut teh BAWIPA lah ao teh angnae hah na poe awh toe.
Thueng nahane hateh thuengnae khoungroe ki dawk
rui hoi pâkhit nateh pen awh.
28 Nang teh, kaie Cathut lah na o, na pholen han.
Nang teh, ka Cathut lah na o. Na tawm han.
29 Oe, BAWIPA koe lunghawilawk dei awh.
Bangkongtetpawiteh, ama teh ahawi.
A lungmanae teh a yungyoe a kangning.