140
Rungngang hanelah ratoumnae
Kathutkung: Devit, Devit ni tumkhawngkung hanelah a sak e la
1 Oe BAWIPA, tamikathoutnaw e kut dawk hoi
kai hah na hlout sak haw.
Ka mathoutmakainaw e kut dawk hoi na rungngang haw.
2 Ahnimouh teh a lungthung vah hawihoehnae hah a pouk awh teh,
kâtuknae ao nahanelah, hnintangkuem cungtalah a pouk awh.
3 Ahnimouh teh amamae lai hah tahrun e lai patetlah,
a hran sak awh.
Ahnimae pahni thung vah hrunthoe sue ao. Selah.
4 Oe BAWIPA, tamikathoutnaw e kut dawk hoi
kai hah na ring haw.
Ka mathoutmakainaw e kut dawk hoi na rungngang haw.
Ahnimouh ni ka tâlaw nahanelah kho a khang awh.
5 Ka kâoupnaw ni kai hanelah arulahoi tangkam a patûng awh.
Lamthung dawk tamlawk a yangda awh teh,
kai hanelah karap a patûng awh. Selah.
6 Nang teh kaie Cathut lah na o tie hah Jehovah koe ka dei.
Oe BAWIPA, kai ni ka kâhei e hah na thai pouh haw.
7 Oe Bawipa Jehovah, nang teh kaie rungngangnae tha lah na o.
Tarankâtuk hnin vah, nang ni kaie ka lû teh na ramuk pouh.
8 Oe BAWIPA, tamikathoutnaw e ngainae teh kuep pouh hoeh.
Hawihoehnae sak hanelah noenae teh kuep sak pouh hoeh.
Hoehpawiteh, kârasang awh langvaih.
9 Hot patet e taminaw teh, kaie ka tengpam vah,
amamae lû loungouk awh laipalah,
amamouh ni a dei awh e hawihoehnae ni
amamanaw teh ramuk naseh.
10 Hmaisaannaw teh amamae van bawt naseh.
Ahnimouh teh hmai dawk thoseh, tangkawm thung thoseh,
tâkhawng e lah awm awh naseh, bout thaw awh hanh lawiseh.
11 Thoenae ka dei e naw teh, talai van cak awh hanh naseh,
ka mathoutmakai e taminaw koe runae ni pâlei awh naseh.
12 BAWIPA ni runae kâhmonaw hah a khetyawt teh,
kavoutthoupnaw koelah kalan lah lawk a ceng han tie ka panue.
13 Atangcalah, tami kalannaw ni na min a pholen awh han.
A lungthin kalannaw ni hai na hmalah ao awh han.