143
Hramki laihoi kabawp heinae
Kathutkung: Devit
1 Oe BAWIPA, kaie ratoum lawk heh na thai pouh haw.
Kai ni ka kâhei e hah na thai pouh haw.
2 Nange yuemkamcunae lahoi thoseh,
nange lannae lahoi thoseh, kai hah na pato haw.
Nange na san hoi lawkcengnae koe na kâenkhai hanh.
Bangkongtetpawiteh, kahring e tami buet touh boehai
na hmalah a lan tie awm hoeh.
3 Atangcalah taran ni ka hringnae heh a rektap teh,
ka hringnae hai talai dawk rekrek a suk teh,
ngailawi kasawlah kadout tangcoung e patetlah
hmonae um hai kai hah na o sak.
4 Kai teh, ka lung apout teh
ka thung vah ka lung a rek.
5 Kaloum tangcoung e a hninnaw hah ka pouk teh,
Bawipa ni a sak e hnonaw hoi kut hoi a sak e
hnonaw hah luepluep ka pouk.
6 Bawipa nang koe ka kut ka daw.
Talai ka ke e patetlah ka hringnae ni nang teh na doun. Selah.
7 Oe BAWIPA karanglah na pato haw.
Ka muitha teh a tha abaw toe.
Kai teh duenae tangkawm dawk ka kum hane tami patetlah
alouklah na kangvawi takhai hanh loe.
8 Amom vah nange pahrenlungmanae hah na thai sak haw.
Bangkongtetpawiteh, kai ni nang teh na kâuep toe.
Ka dawn hane lamthung hah na panuek sak.
Bangkongtetpawiteh, ka hringnae ni nang doeh na kângue toe.
9 Oe BAWIPA, ka tarannaw e kut dawk hoi
kai hah na hlout sak haw.
Kai teh nang doeh na kângue.
10 Nange ngainae ka tawk thai nahan,
na cangkhai haw.
Bangkongtetpawiteh, nang teh kaie Cathut lah na o.
Nange Muitha teh ahawi, kai hah lamkalan dawk na thak lawiseh.
11 Oe BAWIPA na min kecu dawk kai hah na hring sak haw.
Na lannae kecu dawk ka hringnae hah
runae thung hoi rasat haw.
12 Kai teh nange san lah ka o dawkvah,
namae pahrenlungmanae lahoi ka tarannaw hah,
na takhoe pouh haw.