148
Sak e pueng ni BAWIPA teh pholen awh
Kathutkung: Panuekhoeh
1 BAWIPA teh pholen awh.
BAWIPA hah kalvan hoi pholen awh.
A rasang poungnae koe pholen awh.
2 A kalvantaminaw pueng ama teh pholen awh.
Rasahu pueng ama teh pholen awh.
3 Kanî hoi thapa naw ama teh pholen awh.
Ka ang e âsinaw pueng ama teh pholen awh.
4 Karasangpoung e kalvannaw hoi,
kalvannaw lathueng kaawm e tuinaw ama teh pholen awh.
5 Hotnaw pueng teh BAWIPA e kâ lahoi sak e lah ao awh dawkvah,
a min teh pholen awh.
6 Ama ni hotnaw pueng teh pou acak sak teh
kahmat thai hoeh e phung hah a poe.
7 Adungpoungnae koe
kaawm e naw hoi khoruinaw
8 hmai hoi roun, tadamtui hoi a kahû,
a lawk patetlah kâroe e kahlî,
9 monnaw hoi monrui pueng,
thingthai rompo hoi sidarkung pueng,
10 moithang ka matheng hoi saring ka mawng pueng,
vonpui hoi kâva e hoi kamleng e tava pueng,
11 talai van e siangpahrangnaw hoi tami pueng,
kacuenaw hoi ukkung khobawi pueng,
12 thoundounnaw hoi tanglanaw pueng,
matawngnaw hoi camonaw pueng,
BAWIPA teh talai van hoi pholen awh.
13 A min dueng doeh ka taluepoung,
a bawilennae teh talai hoi kalvan lathueng ao dawkvah,
BAWIPA min teh pholen awh.
14 A taminaw e ki teh a tawm pouh dawkvah,
ateng kaawm e taminaw,
a tami Isarelnaw e pholen lah kaawm e
tamikathoungnaw ni pholen e lah na o.
Hallelujah.