31
Tarannaw koehoi BAWIPA kânguenae
Kathutkung: Devit
1 Oe BAWIPA, nang doeh na kâuep.
Kaya hoi na awm sak hanh. Na lannae hoi na rungngang haw.
2 Kai koelah na hnâpakeng nateh, karanglah na rungngang haw.
Ka kâhronae lungsong hoi rungngang nahanlah
ngangnae rapan lah awm haw.
3 Bangkongtetpawiteh, nang teh ka lungsong hoi ka kâhronae lah na o.
Hatdawkvah, na min kecu dawk na hrawi nateh, na patue haw.
4 Kai hanlah, arulahoi a phai awh e tamlawk dawk hoi na rasat haw.
Bangkongtetpawiteh, nang teh ka thaonae doeh.
5 Oe BAWIPA, lawkkatang Cathut,
na kut dawk ka muitha ka hruek.
6 Cungkeihoehe meikaphawk alawkpui lah kahruengnaw hah ka hmuhma.
Hatei, kai teh BAWIPA ka kâuep.
7 Na pahrennae lahoi, ka konawm vaiteh, ka lung pou ahawi han.
Bangkongtetpawiteh, ka runae hah ouk na hmu pouh.
Runae thung ka hringnae hah na panue.
8 Taran kut dawk na poe laipalah,
A hmuen kawnae koe ka khok hah ouk na hruek.
9 Oe BAWIPA, na pahren haw.
Bangkongtetpawiteh, runae thungvah ka o.
Ka lungmathoe lawi ka mit koung a ro toe.
Bokheiyah, ka muitha hoi ka takthai totouh a ro toe.
10 Bangkongtetpawiteh, ka hringnae heh
lungmathoenae hoi koung ka hno toe.
Kum moikasawlah ka cingou.
Ka payonnae ni ka thaonae a baw sak.
Ka hru hai koung a hmawn toe.
11 Ka tarannaw ni pathoe hanelah doeh ka o.
A lawkpui lah, ka imrinaw hanelah hoe ka o.
Ka hui kahawi ni na panuet teh,
lam dawk na ka hmawt e ni na yawng takhai.
12 Tami kadout patetlah pahnim lah ka o teh,
ampaikei patetlah ka o.
13 Bangkongtetpawiteh, tami moikapap ni a dei awh e ka thai.
A hmuen tangkuem takinae ao.
Ka hringnae la hanelah kâcai laihoi a kamkhueng awh teh,
kho a khan awh.
14 Hatei, Oe BAWIPA, kai ni teh nang doeh na kâuep.
Ka Cathut doeh ka ti.
15 Kaie tuengnaw teh na kut dawk ao.
Ka tarannaw kut dawk hoi, na kapahuipalamnaw kut dawk hoi,
na rungngang haw.
16 Na san koe na mei ang naseh.
Na pahrennae lahoi na rungngang lawiseh.
17 Oe BAWIPA, kaya hoi na awm sak hanh.
Bangkongtetpawiteh, nang teh na kaw toe.
Tamikathoutnaw teh, kaya laihoi phuen vah
duem awm awh naseh.
18 Tamikalannaw taran lahoi, kâoupnae,
hoi matheng laihoi laithoe deinae pahni teh,
lawkkamuem lah o sak lah awm seh.
19 Oe nang kataketnaw hanelah,
na pâkhueng e hoi tami capanaw mithmu vah,
nang kâuepnaw hanelah,
na noe e na hawinae hah banghloimaw a bawilen.
20 Taminaw e arulahoi khokhangnae thung hoi,
hlout sak nahanelah, ahnimanaw teh,
na onae koe na hmalah na hro han.
Tamthoe kadeinaw e lai dawk hoi na rungngang vaiteh,
na rim dawk na hro han.
21 BAWIPA teh pholen lah awm seh.
Bangkongtetpawiteh, kângairu a pahrennae teh,
kacakpounge khopui dawk na hmu sak.
22 Bangkongtetpawiteh, kai teh na mithmu vah,
tâkhawng lah yo ka o toe telah tang ka dei.
Hatei, ka hram teh pahrennae ka hei e lawk hah na thai.
23 Oe tamikathoungnaw pueng,
BAWIPA teh lungpataw awh.
Bangkongtetpawiteh, BAWIPA ni yuemkamcu e hah a khetyawt teh,
kâoupnaw hah moi a pathung.
24 BAWIPA kâuepnaw pueng, tarankahawi lah awm awh,
na lungthin a thao sak han.