39
Lungangnae hoi ngaithoumnae
Kathutkung: Devit
1 Lawk hoi boehai ka payon hoeh nahanelah,
kai teh ka kâhruetcuet han.
Tamikathoutnaw ka hmalah ao awh lahun nah,
ka pahni ka moum han telah ka ti.
2 Lawk dei laipalah duem ka o.
Hawinae boehai dei laipalah duem ka o teh,
ka lung hoehoe a mathoe.
3 Ka lungthin teh ka thung vah a kâan.
Luepluep ka pouk lahun nah, hmai a kak.
Hat toteh, ka kâko hoi lawk ka dei.
4 BAWIPA ka thayounnae ka panue thai nahan,
ka poutnae na panuek sak haw.
Ka hringnae hnin hai na panuek sak haw.
5 Bokheiyah, ka hringyung heh khap touh dueng na sak teh,
ka kumnaw hai na hmalah, banghai bang hoeh lah doeh ao.
6 Tami pueng teh tâhlip patetlah doeh koung a loum awh.
Banghai bang hoeh e doeh a pâlei awh.
Hnopai thouk a pâkhueng awh teh,
apie lah maw ao han vai tie panuek awh hoeh.
7 Bawipa, atu ka panue e heh bang na maw.
Nang teh ka ngaihawi e lah na o.
8 Kâtapoenae pueng thung hoi na rasat haw,
tamipathunaw ni panuikhai hanelah na awm sak hanh.
9 Nang teh, kasakkung lah na o dawkvah,
ka kâko ka ang laipalah duem ka o.
10 Na reknae heh na takhoe pouh leih,
na kut hoi hemnae ni koung na raphoe toe.
11 Taminaw e payonnae hah na yue teh,
na rek pawiteh ahriai ni a ca e patetlah,
taminaw e taluenae teh, na kahma sak.
Atangcalah, tamipueng ahrawnghrang doeh.
12 Oe, BAWIPA, ka ratoumnae na thai pouh haw.
Ka hramnae lawk koelah, na hnâpakeng haw.
Ka mintoenaw patetlah imyin hoi kahlawng ka cet rumram e lah ka o.
13 Kaawm toung laipalah, ka khup hoehnahlan vah,
ka ko bout a nawm nahanelah, na pasai haw.