60
Cathut ngaikhainae dawk ratoumnae
Kathutkung: Devit Mesopotamia hoi Siria Zabathnaw a tuk teh, Joab a ban teh, Palawi yawn dawk tami 12, 000 touh a thei navah a sak e la
1 Oe Cathut, na lungkhuek dawkvah,
kaimouh na pahnawt teh,
kho tangkuem na kathek toe.
Bout na roung sak haw.
2 Talai heh na pâyaw sak teh na kâbawng sak.
Kâbawng e naw hah bout pâbing haw, pou a kâhuet hei.
3 Na taminaw heh ka ru e hno na hmu sak teh,
runae misur hah na pânei.
4 Nang kataketnaw hah lawkkatang pâwlawk dawk ung vaiteh,
yap hanelah lukkarei na poe.
5 Na pahren e naw hah rungngang lah ao awh nahanlah,
nange aranglae kut hoi rungngang haw.
6 Cathut ni a thoungnae lahoi a dei toe.
Ka konawm vaiteh, Shekhem kho kapek vaiteh,
Sakut yawn hah ka bangnue han.
7 Gilead teh kaie doeh, Manasseh teh kaie doeh.
Ephraim hai kaie bawilakhung doeh.
Judah teh kaie kâlawk kapoekung doeh.
8 Moab teh ka kamhluknae kawlung doeh.
Edom ram teh, ka khok coungroenae lah ao han.
Kai kecu dawk Filistin lathueng tânae hram lawk a tâco han.
9 Kacake khopui dawk, apimaw na hrawi han.
Edom vah, apimaw na hrawi han.
10 Oe Cathut, na kapahnawtkung teh, nang nahoehmaw.
Ransanaw koe ka cet hoeh e hah teh, nang nahoehmaw.
11 Runae um vah, na kabawm haw.
Bangkongtetpawiteh, tami kabawpnae teh cungkeihoeh.
12 Cathut pawlawk dawk taranhawi laihoi namnei awh han.
Bangkongtetpawiteh, ama ni maimae tarannaw hah rep a coungroe han.