84
Cathut im khosak yawhawinae
Kathutkung: Korah capanaw
1 Oe ransahu BAWIPA, na onae teh
banghloimaw ngai ao.
2 Ka hringnae ni a rabui, Bokheiyah,
BAWIPA thongma rabui laihoi ka tâwn.
Ka lungthin hoi ka takthai ni
kahring Cathut teh atangcalah a kaw.
3 Oe ransahu BAWIPA, ka Siangpahrang hoi ka Cathut,
na thuengnae khoungroe dawk pusu ni tabu a tuk teh,
pingpit ni hai a canaw ta nahanelah tabu a tuk.
4 Na im dawk kaawmnaw teh,
a yaw kahawi e doeh.
Pou na pholen awh han. Selah.
5 Nang thaonae lah ka hnonaw hoi
hmuen ka thoung koe cei ngainae
lungthin ka tawn naw teh tami a yaw kahawi e doeh.
6 Baca yawn dawk a cei awh navah,
tuiphuek tâconae lah a coung sak teh,
khotui hai a kamuem sak.
7 Thaonae koehoi thathoenae koe lah cei awh teh,
buet touh hnukkhu buet touh
Zion Cathut hmalah a kamnue awh.
8 Oe ransahu Cathut BAWIPA,
ka ratoumnae heh na thai pouh haw.
Oe, Jakop Cathut, na hnâpakeng haw.
9 Oe Cathut, ka bahling khen nateh,
Satui na awi e mei hah khenhaw!
10 Bangkongtetpawiteh,
na thongma dawk hnin touh o e teh,
alouklah hnin 1,000 touh o e hlak ahawihnawn.
Thoenae rim dawk o e hlak teh
Cathut im longkha ring e ka ngaihnawn.
11 Bangkongtetpawiteh, BAWIPA Cathut teh
kanî hoi bahling doeh.
BAWIPA ni lungmanae hoi bawilennae a poe han.
12 Oe ransahu BAWIPA,
nang kâuep e teh a yaw kahawi e doeh.