22
Bab-Dummad Abraham-wilubdaksad
1 Undar birgamar nasadgine, Bab-Dummad Abraham-wilub-dakesokalid, bule egi nue bensurdibeye. Bab-Dummad nugba Abrahamʼse gornonikid:
—¡Abraham!
Abraham Bab-Dummad-abin sogded:
—Na, degite, an be-itomai.
2 Bab-Dummad Abrahamʼga sogded:
—Isaac, be-machi-wargwennagwad be nue-sabedi, Moriah-yalaganse be sede. A-yalagan-mosale, an bega yar-oyogoedgi be-machi be anga ogumakoed.
3 Oibosgu, wakudaryalaba Abraham gwisgusad, e-moli-uayasuid guakwaa nasiksad. Sapan amisbalid, machigwa-ogumakar-uklegoedgi ogaegar. Abraham bia Bab-Dummad ega-naoye-sogsadse nadegusad. E-machi-Isaac, degi, e-maimar-warbo eba nadmarmogad.
4 Abraham ibapaagus-nanaedgi yar egi dikasur-noe dakalid.
5 Geb degine, Abraham e-maimarga sogded:
—Wegi bemar moli-uayasuidmala an-edarbemalo. Machigwa-anbogwa Bab-Dummad-e-nug-odummogega andi naoed. Geb degine, gannar anmar bese nonikoed.
6 Abraham ibmar-ogumaklegoed-ogaegala sapan susad, geb Isaac-e-gukingi mesisad. Abrahamʼdi es, degi, acha-gwallu-ogaar sesad. Geb degidgine, Abraham e-machi-ebo nade gusad.
7 Sikwas nanaedgine, Isaac Abrahamʼga sogded:
—¡Baba!
Abraham abin-sogded.
—Degite machi, soge.
Isaac sogded:
—Anmar sapan, degi, acha-gwallu-ogaar sedanikid, degite, ¿bia sibad-wawaad-senigwad anmar Bab-Dummadga-ogumakar-ukoedde?
Abraham Isaac-abin sogded:
8 —Machi, Bab-Dummad anmarga sibad-wawaad-senigwad udagoed, anmar ega ogumakar ukegar.
Deyob, ebogwa imakenadap gusmalad.
9 Abraham, degi, e-machi-Isaac-ebo Bab-Dummad-ega-yar-sogsadse modapmargu, Abraham Bab-Dummadga-ibmar-ogumakar-ukleged-aila sobsad. Geb a-aila-birgi sapan urbisad. Geb degine, e-machi-Isaac-edichagu, we-aila-birgi sapan-birgi Isaac-mesisad.
10 Abraham e-machi-oburgwegala es susgua,
11 Bab-Jehová-e-baliwitur niba ese gollalid:
—¡Abraham! ¡Abraham!
Abraham Bab-Jehová-e-baliwitur-abin sogded:
—Degite. Wegi an gunai.
12 Bab-Jehová-e-baliwitur Abrahamʼga sogded:
—Melle machigwa be oakaloge. Melle be naibi-imake. Ar bato an wisid, be Bab-Dummad-dobee nanadiid. Ar be gwen sogsasulid, an-machi-wargwensakad melle be anga ukodeeye.
13 Abraham dakded, sibad-wawaad-machered sapi-imbaba e-bebegi galesnai. Abraham agi sunaded. Sibad-wawaad-machered-susgua, ogumakar e-machi-anar Bab-Dummadga uksad.
14 Geb a-sorbali, Abraham weyob we-neg onugsasad: Bab-Jehová ibmar-unnitiba-ukedye. A-ulale, amba we-garda narmaklenaidse sogleged: Bab-Jehová-yargine ibmar-unnitiba-uklegoedye.
15 Bab-Jehová-e-baliwitur gannar irbogi niba Abrahamʼse gornonibalid,
16 ega sogded:
—Bab-Jehová soged: ‘Ani, an bega ise-sogar soged: Ar be-machi-wargwensakad mer be anga ukodeeye be sogsasursoggu,
17 an bela-bela ise-nued begi binsaoed. Be-wagan bela-bela-mergu an imakoed, niisgwamar-niba-nanaidyob, degi, ukub-demar-gakagi-nikadyob an imakoed. Deginbali, be-wagan e-isdarmaladgi nakwedii guoed, degi, e-neggweburgan ei sudii guoed.
18 Deginbali, ar an bega-ibmar-sogsadyob be imaksasoggu, bela dula-we-napneggi-bukwamalad be-waganba an egi ise-nued binsamogoed.’
19 Abraham bia-e-maimar-obesa, ase gannar nonikid. Degine, bela Beerseba-neggweburse nade gusmalad. Agine, Abraham megidapid.
Nacor-e-wagan
20 Degi-undaradgine, Abrahamʼga soglenonikid, e-urba-Nacor machimala-nikamoye, Milca ega baksaye.
21 Gebe-machigwa ega gwalulesad, Uzʼye nugad.
A-sorba, e-urba-Buz gwalulesad.
Degi, Kemuel gwalulesad.
Kemuelʼde, Aram-e-babad.
22 Deginbali, Nacor-e-masmala-baigan, Milcaʼbo-baksabalid, wemalad:
Quesed, Hazo, Pildas,
Jidlaf, degi, Betuel.
23 We-Betuelʼde Rebeca-e-babad.
Wemar-walabaabakadi (8) Nacor-machimalad, Milca-ebo baksadid.
Nacorʼde Abraham-e-urbad.
24 Deginbali, Nacor, Reúma-ebo baid-machimala nikusbalid. Reúmaʼde e-ome-dikarbalidid. We-ebogwa machimala-baksadi, wemalad:
Teba, Gaham,
Tahas, degi, Maaca.