17
Judá-dulemar-e-isgued, degi, e-sabsur-odurdaklegoed
1 Bab-Jehová soged:
“Judá-dulemar-e-isguedi, e-gwagegi, esgoro-swiswidikidgi narmakar naiyobid,
akwa-diamante-e-dukugi narmakar naiyobid.
Judá-dulemar-e-isguedi, Bab-Dummadga-ibmar-ogumakar-ukleged-aila-e-bebegi sobles naid.
2 Ar be-mimmiganse-bakale, bab-dummad-bundor-Asera-e-wilubgan-sobsadi, ega e-ailamar sapi-dummagan-nagaba-sobsadi, nue ebinsamalad.
3 Degi, yar-mullugangi sapurba-neg-ollornaidgi aila-sobar-bukwamarbalidi, nue ebinsamarbalid.
”Bemar-isgued-ulale, bela be-yargine, be-manimala, be-ibmar-nuegana be-isdarmaladga an ukoed,
degine, be-bab-dummaganse-goled-negmar an ega ukbaloed.
4 Na be dukin an-bemarga-yala-uksadi be surgumaloed.
Be yar-dakdisulidgi, be-isdarmalad-e-maiga an be-imakoed.
Ar be, nue an-oulussoggu, an-urwed, soo-geg-ginnedyobi, bemargi degisadegu gusunnoed.”
5 Bab-Jehová weyob soged:
“¡Dule dule-baidgi-bensuli-gued, duledar wilesun!
¡Dule, dulegi-bendakleged-amidiid, duledar wilesun!
¡Dule angi-banguedi, duledar wilesun!
6 A-dule, sapi-matugana nega-dulesulidganba-nikadyob gumaloed:
Neg-nuegan-nonikir, gwen werguosulid,
unnila nega-dulesulidganba garmakdii guoed,
napa-balubiidgi gudii guoed,
agine, gwen dulemar gudidasurmalad.
Debayobi, dule Bab-Dummadgi-banguder guoed.
7 ”Ar dule angine-bensuligueddi, anginbi-bendakleged-edarbediiddi, egi nued binsalesad.
8 A-dule, sapi-diwar-naba-gwichidaedyobi gued,
igi sapi-malimar diwarse-bategwichile, neg-ued-nonikile, gwen akar-gusuli,
e-gagan aramakwisgudae, debayobi, a-dule gued.
Deginbali, igi a-sapi yolagi gwen akar-gusuli birga-irba gusgu sanmakgwisdae,
deyobi, we-dule gued.
9 ”Dule-binsaedi, ibmar-baiganba bur bule isganad, dule-yardakedgi binsadaed.
¿Ar wede doa dule-binsaed magar-dakosunna?
10 ”Unnila ani an Bab-Jehová-guedi, dulemar-ulubgi-binsaed magar-daked,
dulemar-binsaed balamied.
Degidbali, an e-ibmar-isgana-imakedba sabsur-odurdaked.
11 ”Dule igar-maisulidba mani-ibedga-guedi, nuu-butu, igi nuu-baid-akwa-akwedae, deyobi gued.
Dule-deyob-mani-ibedga-gusadi, sikwas-gudiidgi, gannar mani-sate gunonikoed,
gannar dule-wilegedga gudoed.”
12 Ani Jeremías, an weyob sogded:
“Bab-Dummad, anmar-bese-goled-nega, ologana-gandikidba-yeerdakleged-negad,
sailanagi bato agi be-nug odummoledanikid.
13 ¡Bab-Jehová, be Israel-dulemar-bendakega gued!
Dulemar begi-aibatemaladi, bingegudmaloed.
Dulemar begi-banguddamaladi, ukubgi-ibmar-narmaklegeyob yoggudmaloed.
Ar Bab-Jehová-dii-nuedyob-gued iedmalad.
14 ”Bab-Jehová be an-nudake,
adi, an nuguoed.
Be an-abonoge,
adi, an abonolegoed,
unnila an be-nugbi odummoged.
15 Ar dulemar anga sokardaed:
‘¿Ar bia Bab-Jehová-anmarga-ibmar-sogsadde?
Anmarga-ibmar-sogsadi anmarga imakbi an abedo.’
16 Bab-Jehová, an bega-ibmar-sogsadi be nue-wisid,
ar an be-asabinni an bega ibmar sogsad.
Degi-inigwele, an begi alamaknai gussulid,
be we-dulemar sabsur-odurdakye,
be we-dulemargi boni-dummagan-barmidaye
an bega sogsasurbalid.
17 Bab-Dummad, melle be an-ogwayega gue,
ar boni-dummagangine, bee be an-bendakedid.
18 ¡Baba, melle bingeguega be an-imake!
¡We-dulemar be obingegsae!
¡Melle dobe-itogega be an-imake!
¡We-dulemar be odobgue!
¡Ibagan-bulegan ega be barmidage!
¡We-dulemar be obeloge!
¡Ilabogwadse be wioge!”
Obunnoged-iba
19 Bab-Jehová weyob anga sogsad: “Be nae, neggwebur-yawagakse be gwisguna, bia Judá-reymar ubodae, degi, bia noardae, ase be gwisgunao. Geb, a-sorbali, bela Jerusalén-neggwebur-yawagak-bukmaladse be gwisgunabalo. Weyob be ega sogo:
20 ‘Judá-dulemar-e-reymar, Bab-Jehová-gayaburba be itomar. Degi, bela Judá-dulemar, bela Jerusalén-dulemar we-yawagakgi-dogdimalad, Bab-Dummad-gayaburba be itomar.’ ”
21 Bab-Jehová weyob soged: “Nue salakarmalo. Obunnoged-ibagi melle be ibmar-semalo, melle Jerusalén-yawagakgi ibmar-odomarbalo.
22 Deginbali, melle obunnoged-ibagi, be-negyagi ibmar-onomarbalo, degi, bipisaale, a-ibagi melle be arbamarbalo. We-obunnoged-iba iba-islidik be dakmalo. Igi an be-dadganga sogsagusa, deyob be dakmalo.
23 Degi-inigwele, be-dadgan an-itossurmalad, gwen an-sogedba ibmar imaksasurmalad, bur gwage-dutusuli gudmalad, gwen an-itossurmalad, degine, e-odurdaked abessurmarbalid.”
24 Bab-Jehová soged: “Ar bemar an-sogedba ibmar-imakmalale, gi we-neggwebur-yawagakba be ibmar-odosurmalale, unnila we-iba, iba-islidikidga be imakmalale, a-ibagi be ibmar-imaksurmalale,
25 we-neggwebur-yawagaknaba reymar, degi, reymar-masmala Rey-David-ologanagi sigmaloed. Reymar, reymar-masmala Judá-dulemar-abargi, degi, Jerusalén-dulemar-abargi ur-napaginedgi-sii dogmaloed, degi, moli-birgi-sii ubomaloed. We-neggweburgi dulemar bukwagu gumaloed.
26 ”Judá-dulemar danikoed, dulemar-Jerusalén-neggwebur-dikarba-bukmalad danimaloed, degi, Benjamín-yalagi-bukwamalad danimarmogoed, degine, Sefela-yalagi-bukwamalad danimaloed. Degine, yalaganba-bukwamalad, degi, Neguev-yalaganba-bukwamalad danimarmogoed. Bab-Jehováʼse-goled-negse Bab-Jehováʼga-ibmar-ukega, ibmar-uklemalad sedanimaloed, degi, ibmar-ogumakar-uklemalad, orosgi-dakleged, degine, ina-wawagan, sedanimaloed. Deginbali, Bab-Dummadga dog-nuedye-sogega-ibmar-ukleged sedanimarbaloed.
27 Ar bemar anba-ibsasulile, an-igar-maidba obunnoged-iba iba-islidikidga be imaksurmalale, degi, Jerusalén-yawagak-dummagangi be ibmar-odomalale, an a-yawagakmar ogumakoed, dule gwen-oginnosulid, bela Jerusalén-reynegmar an ogumakoed.”