3. IGAR-SWILIDIKID, DEGI, IGAR-SWILIDIKSULID
11
(11:1–15:33)
Ibdurgan-swilidikmalad, degi, ibdurgan-swilidiksurmalad
(Deuteronomio 14:3-21)
1 Bab-Jehová, Moisésʼga, degi, Aarónʼga sogded:
2 “Israel-dulemarga be sogmar: ‘Bela we-napneggi ibdurgan-bukwamalad-abargi, wemar be gunmaloed:
3 Ibdurgan-e-goonasi-darbo-mamararmalad,
gagan-masar, gannar-mabaliga sabanyagi mas saboged,
Wegiid-ibdurganmar be nabir gunnoed.
4 ” ’Degi-inigwele, ibdurgan-gagan-masar, gannar-mabaliga sabanyagi mas saboged, amar-abargi goonasi-darbo-mararsurmalad gudidimogad. Amardi be gunnosulid. A-ibdurganmala, wemalad:
Moli-yargan-mureged, we-moli gagan-masar, gannar-mabaliga sabanyagi mas saboged, ar e-gonasidi, mararsulid.
We-ibdurgan bemarga ibmar-swilidiksulidga guoed.
5 Deginbali, nubi, gannar-mabaliga sabanyagi mas saboged, ar e-gonasidi, mararsulid.
We-ibdurgan bemarga ibmar-swilidiksulidga guoed.
6 Amba deyobi, ugdun, gannar-mabaliga sabanyagi mas saboged, ar e-gonasidi, mararsulid.
We-ibdurgan bemarga ibmar-swilidiksulidga guoed.
7 Deginbali, sina, goonasi-darbo-marar-nika-inigwele, gannar-mabaliga sabanyagi mas sabosulid.
We-ibdurgan bemarga ibmar-swilidiksulidga guoed.
8 ” ’We-sanmar be gunnosurmalad, deginbali, a-ibmar-burgwarmalad be ebugosurmarbalid. Bemar we-ibmarmar swilidiksuli dakoed.
9 Ibdurgan-dii-yagi-gudidimalad-see-nikamalad, degi, uka-nikamalad, demargineddibe, diwargineddibe,
be sunna gunmaloed.
10 Ar ibmar-dummagan, degi, ibmar-senigan-see-nikasurmalad, degi, uka-nikasurmalad, demargineddibe, diwargineddibe,
bemar we-ibdurgan swilidiksuli dakoed.
11 ” ’E-san bemar gunnosulid, deginbali, we-ibmar-burgwarmalad bemar ima-dakbaloed, ar ade, bemarga ibmar-swilidiksulidga guoed.
12 Bela ibmarmar-diigi-gudidimalad-see-nikasurmalad, degi, uka-nikasurmalad, bemarga ibmar-swilidiksulidga guoed.
13 ” ’Bemar we-nuumar ima-dakoed, be gunnosurmalad, ar ade, we-nuumar bemarga swilidiksuli gued:
Sulubagi,
sulubagi-garmar-bisge-bisge-imaked,
uabu,
14 mula,
degi, bela sulubagi-senigan akar-akar-daklemalad,
15 bela abgokor akar-akar-daklemalad,
16 nuu-dummad-dukar-suid avestruzʼye-nugad,
irmon-senigan,
bela dilli-dilli akar-akar-daklemalad,
17 irmon, diidod,
badu-cisneʼye-nugad,
18 noo-mutikid,
gorgi, mula-dummad,
19 dabgala,
bela dabgala-dummagan-akar-akar-daklemalad,
sikwi-nugar-suid-abubillaʼye-nugad,
degine, uksir.
20 ” ’Bela ibsenigan-gukumalad mali-walabakegwadgi-nanamalad, bemarga ibmar-swilidiksulidga guoed.
21 Degi-inigwele, ibsenigan-gukumalad mali-walabakegwadgi-nanamalad, ukinbali, ichomakega e-nag-sorbalid-bur-suigan nikamalad, be sunna gunmaloed.
22 Bemar we-ibmarmar sunna gunmaloed:
Bela ses-dummagan-akar-akar-daklemalad,
sesmar, degi, ses-senigan.
23 Ar bela ibsenigan-gukumalad-bamalad mali-walabakegwadgi-nanamalad, bemarga ibmar-swilidiksulidga guoed.’ ”
Ibmar-swilidiksurmalad-ebusad-igar
24 Bab-Jehová, Moisésʼga, degi Aarónʼga sogdebalid: “We-ibmarmar-ulale, bemar swilidiksuli gunonikoed.
Ar doa-dule we-ibdurgan-burgwarmalad ebusdibe,
neg-mutikidse swilidiksuli gudii guoed.
25 Ar doa-dule we-ibdurgan-burgwaled ebusale,
na e-mor enukoed.
We-dule mutikidse swilidiksuli gudii guoed.
26 Bela ibdurgan goonasi-mamararsulid, degi, mas gannar-mabaliga sabanyagi mas-sabosulidi,
bemar swilidiksuli dako.
Bemar we-ibdurgan-ebusale,
swilidiksuli be guoed.
27 Bela ibdurgan-mali-walabake-nikamalad e-goo-nasigi-nanasurmalad,
bemarga ibmar-swilidiksulidga guoed.
Doa-dule we-ibmar-burgwaled ebusale,
neg-mutikidse swilidiksuli gudii guoed.
28 Dule we-ibmarmar-burgwaled ebusale, e-mor enukoed.
We-dule mutikidse swilidiksuli gudii guoed.
We-ibmarmar ibmar-swilidiksuli be dakoed.
29 Napagi ibmar-durgan-garmakdii-abargi, bemar we-ibdurgan swilidiksuli dakoed:
Diachugiid-comadrejaʼye-nugad,
nusa, ammanoomar-akar-akar-daklemalad,
30 akwa-nuku, daim,
isgin, asbanmar,
degi, gwanurgiid-camaleónʼye-nugad.
31 Napagi ibdurgan-garmakdii-abargi, we-ibdurgan bemar swilidiksuli dakoed.
Ar doa-dule we-ibmar-burgwaled-ebusale,
neg-mutikidse swilidiksuli gudii guoed.”
Ibdurgan-swilidiksurmalad-ebusad-igar-bamalad
32 Bab-Jehová, Moisésʼga, degi, Aarónʼga sogdebalid: “We-ibdurganmar-burgwaled we-ibmarmargi argwachale:
Ibmar-urgogi-sobaledgi,
ibmar-ibdurgan-ukagi-sobaledgi,
morgi, sagugi,
degi, ibmar-arbaedgi-ebulegedgi, argwachale,
we-ibmarmar mutikidse swilidiksuli guoed.
Ar gannar we-ibmarmar swilidik-guega, diigi enuklegergebed.
Geb deyobi gannar swilidik gunonikoed.
33 ”Napsa-bormo-yagi we-ibmarmar-burgwaled argwachale, we-napsa-bormo-yagi bela ibmar-bukwadi ibmar-swilidiksulidga gunonikoed. Degisoggu, we-napsa-bormo mamarilegoed.
34 We-napsa-bormogi-dii-siid ibmar-gullegedgi dedemaksale, we-ibmar-gulleged swilidikidsulidga gunonikoed. Deyobbalid, we-napsa-bormogi-dii-siid gobedgi dedemaksale, we-gobed swilidiksuli gunonikoed.
35 ”We-ibmar-burgwaled ibmar-bamaladgi argwachale, we-ibmarmar bela ibmar-swilidiksulidga gunonikoed. Madu-yoedgi argwachadibe, soogi argwachadibe, we-ibmarmar swilidiksulidga gunonikoed. Degisoggu, we-madu-yoed mamarilegoed, degi, we-soo obelolegoed. We-ibmarmar swilidiksuli gunonikid. Degisoggu, bemar deyobi, we-ibmar dakoed.
36 ”Degi-inigwele, unnila dian, degi, dii-sailagi bia dii-sulege, amarbi amba ibmar-swilidikidga guoed, gwen isguosulid. Ar dule we-ibmar-burgwaled-ebusaddi, swilidiksuli gunonikoed.
37 ”Ar we-ibmar-burgwaled ibmar-gwag-diglesokalidgi argwachale, we-ibmar-gwag amba swilidik guoed.
38 Ar ibmar-gwaggi dii eolesardi, geb agi, we-ibmar-burgwaled egi argwachale, adi, we-ibmar-gwag swilidiksuli gunonikoed.
39 ”Ibdurgan-nabir-gulleged burgwisale, ar doa-dule we-ibmar-burgwaled-ebusale, neg-mutikidse swilidiksuli gudii guoed.
40 Dule we-ibmar-burgwisad-e-san guchale, na e-mor enukoed. We-dule mutikidse swilidiksuli gudii guoed. Doa-dule we-ibmar-burgwisad magaba-onosale, na e-mor enukoed. We-dule mutikidse swilidiksuli gudii guoed.”
Napagi-ibdurgan-garmakdimalad ise-gullemalad
41 Bab-Jehová, Moisésʼga, degi Aarónʼga sogdebalid: “Bemar napagi-ibdurgan-garmakmalad gunnosulid, ar ade, ibmar-swilidiksurmaladid.
42 ”Ibdurgan-unimakar-nanamalad, e-mali-walabakegwadgi-nanamalad, degi, e-malimar-ichesulidgi-nanamalad, bemar gunnosurmalad, ar ade, swilidiksurmaladid.
43 Ibdurgan-unimakar-nanamalad-gunnedba mer be swilidiksuli gumalo, mer be isgumalo, ar we-ibdurganmar swilidiksuli gumalad.
44 ”Ani, an-bemar-Bab-Dummad-Jehová gued. Ar an dule-isligwaledsoggu, bemar gwage-swilidik imakmalo, deyobi, bemar gwage-swilidik gudimalo. Ibdurgan-unimakar-nanamalad-gunnedba, degi, ebugedba, mer be swilidiksuli gumalo.
45 Ani an Bab-Jehová gued. Ani an Egipto-yargi bemar-onosad, adi, an be-Bab-Dummadga guegar. Degisoggu, bemar gwage-swilidik imakmala, ar an dule-islidikidid.
46 ”Ibdurgansik, nuumarsik, bela ibdurgan-dii-yagi-gudidimaladsik, degi, bela ibdurgan-napagi-garmakdidimaladsik, weyob igarmar megisad.
47 Adi, bemar magar-dakega, igid ibmar-isgana-gue, igid ibmar-nuegan-gue. Deginbali, igid-ibdurgan nabir gullege, igid-ibdurgan ise gullebali.”