15
Machered-abgangi boni-nikad-igar
1 Bab-Jehová Moisésʼga, degi, Aarónʼga sogded:
2 “Israel-dulemarga be sunmakmar, ega be sogmar: ‘Machered-gwensak, e-abgangi boni-nikale, we-dule swilidiksuli gunonikoed.
3 Ar ega duled-bupunmaksadibe, bupunmaksasurdibe, we-dule swilidiksuli guoed.
Weyob ibmar swilidiksuli gunonikoed:
4 We-dule-boni-nikad bia megoe, a-ibmar swilidiksuli gunonikoed.
Amba deyobbalid, we-dule ibugi sigoe, bela a-ibmar swilidiksuli gunonibaloed.
5 Ar doa-dule, dule-boni-nikad-e-meged-ebusale,
e-mor enukoed, degi, obbaloed.
Dule-ibmar-ebusad neg-mutikguedse swilidiksuli gudii guoed.
6 Ar doa-dule, bia dule-boni-nikad-sigisadgi sigisale,
e-mor enukoed, degi, obbaloed.
Dule-sigisad neg-mutikguedse swilidiksuli gudii guoed.
7 Amba deyobbalid, ar doa-dule, dule-boni-nikad-ebusale,
e-mor enukoed, degi, obbaloed.
We-dule neg-mutikguedse swilidiksuli gudii guoed.
8 Ar dule-boni-nikad dule-baidgi wii-agsale,
dulegi-wii-aglesad e-mor enukoed, degi, obbaloed.
Dulegi-wii-aglesad neg-mutikguedse swilidiksuli gudii guoed.
9 Dule-boni-nikad moli-e-gangi-sigisale,
we-moli-e-gan swilidiksuli gunonikoed.
10 Ar doa-dule, dule-boni-nikad-urba-ibmar-sigisad-ebusale,
dule-ibmar-ebusad neg-mutikguedse swilidiksuli gudii guoed.
Ar dule-we-ibmar-sedoed e-mor enukoed, degi, obbaloed.
Geb we-dule neg-mutikguedse swilidiksuli gudii guoed.
11 Ar dule-boni-nikad e-argan-enuksasuli dule-ebusale,
we-dule-ebulesad e-mor enukoed, degi, obbaloed.
Dule-ebulesad neg-mutikguedse swilidiksuli gudii guoed.
12 Ar dule-boni-nikad ibmar-napsagi-sobaled-ebusale,
we-ibmar-napsagi-sobaled marilegoed.
Ar ibmar-urgogi-sobaled-ebusale,
we-ibmar diigi nue enuklegoed.
13 Dule-bonigwaled nugusdibe, san-uruked-igar-imakegala, ibagugle (7) edarboed.
E-mor enukoed, diigi nue-oboed,
geb deyobi, swilidik gunonikoed.
14 ” ’We-dule-nugusadi, ibabaabakgine (8), wagnuu-gwabo, sapur-nuu-gwabodibe, Bab-Jehováʼga Bab-Dummad-dulemar nugusdibe boo-ambikued-neg-yawagakse sedoed. Agi dule-irwa-Bab-Dummadse-goledga nuumar ukoed.
15 Dule-irwa-Bab-Dummadse-goled nuu-gwagwen dule-isgued-ular ukoed, nuu-baiddi ogumakar Bab-Jehováʼga ukoed. Deyobi, dule-irwa-Bab-Dummadse-goled Bab-Jehová-asabin swilidik-imakega dule-bonigwaled-saoed.
16 ” ’Machered-gwensak e-san-burba misale, oboed. Geb neg-mutikguedse swilidiksuli gudii guoed.
17 Ar ibi-morgindibe, ibi-ibmar-ukagindibe, dule-burba milesale, we-ibmar diigi nue enuklegoed. Geb neg-mutikguedse swilidiksuli guoed.
18 Dule-gwensak omebo-gabisadgi, e-san-burba misale, ebobela nue obmaloed. Geb neg-mutikguedse swilidiksuli gudii gumaloed.’ ”
Ome-igar-daked-igar
19 Bab-Jehová, Moisésʼga, degi, Aarónʼga sogdebalid: “Israel-dulemarga be sunmakmar, ega be sogmar:
‘Ome-gwensak na e-igar-dakdiile, ibagugle (7) swilidiksuli gudii guoed.
Ar doa-dule we-ome ebusale, we-dule mutikguedse swilidiksuli gudii guoed.
20 Ar we-ome ibugi megoe, bela we-ibmar swilidiksuli gunonikoed.
Ar we-ome na igar-dakdiid-ibagangi ibugi sigbalodibe, amba deyobi, a-ibmar swilidiksuli gunonibaloed.
21 Ar doa-dule we-ome-gabed-ebusale,
we-dule e-mor enukoed, degi, nue obbaloed.
Geb neg-mutikguedse swilidiksuli gudii guoed.
22 Ar doa-dule we-ome-ibmar-birgi-sigisad ebusale,
e-mor enukoed, degi, nue obbaloed.
Geb neg-mutikguedse swilidiksuli gudii guoed.
23 Ar doa-dule we-ome-gabisad-birgi-ibmar-bukwad-ebusdibe,
we-ome-gangi-sigisad-birgi-ibmar-bukwad-ebusdibe,
we-dule neg-mutikguedse swilidiksuli gudii guoed.
24 Ar machered-gwensak we-omebo-gabisale, ibagugle (7) swilidiksuli gunonikoed.
Deginbali, we-machered bia gaboe, bela a-ibmar swilidiksuli gunonimogoed.
25 Ome-gwensak na e-igar-daked-e-ibagan-sogedba e-igar-dakdiid ega bergusulile, igidibe, e-igar-dakdiid-e-ibagan ega suitii nadele, we-ome weyob-gudiid-berguedse swilidiksuli gudii guoed.
26 We-ome na e-igar-dakdiid-ibagangi ibigi gaboe, we-ibmar ome-igar-dakdiid-berguedse swilidiksuli gunonikoed.
Deginbali, we-ome ibugi sigoe, bela we-ibmar ome-igar-dakdiid-berguedse swilidiksuli gunonibaloed.
27 Ar doa-dule we-ibmarmar-ebusale, swilidiksuli gunonikoed. E-mor enukoed, degi, nue obbaloed. Geb neg-mutikguedse swilidiksuli gudii guoed.
28 ” ’Ome na-e-igar-dakdiid-bergunonikile, san-uruked-igar-imakegala, ibagugle (7) edarboed. Geb a-sorbali, swilidik gunonikoed.
29 We-ome ibabaabakgine (8), wagnuu-gwabo, sapur-nuu-gwabodibe, Bab-Jehováʼga Bab-Dummad-dulemarbo-ambikued-neg-yawagakse sedoed. Agi dule-irwa-Bab-Dummadse-goledga nuumar ukoed.
30 Dule-irwa-Bab-Dummadse-goled we-nuu-gwagwen dule-isgued-ular ukoed, nuu-baiddi Bab-Jehováʼga ogumakar ukoed. Deyobi, dule-irwa-Bab-Dummadse-goled, Bab-Jehová-asabin ome-igar-dakdiid swilidik-imakega saoed.’ ”
31 Bab-Jehová, Moisésʼga, degi, Aarónʼga, sogdebalid: “Deyobi, bemar, Israel-dule-swilidiksurmalad e-dulemargi bachikii imakmaloed. Adi, anse-goled-neg bemar-abargi-siid-oichosmalad-ulale, mer wemar burgwemalagar.”
32 Deyobi, machered-e-abgangi-boni-nikadga, degi, machergan-san-burba-mimaladga igar mai guoed. Ar ade, weyob-gued-ulale, swilidiksuli gunonidamalad.
33 Deyobi, ome-igar-dakdiidga, machered-e-burba-misadga, degi, machered-ome-igar-dakdiidse-gochadga, igar mai guoed.