24
Bab-Dummadse-goled-neggi gwallu ogalegoed
(Éxodo 27:20-21)
1 Bab-Jehová, Moisésʼga sogdebalid:
2 “Israel-dulemarga be soge: ‘Olivo-gwallu-bur-swilidikid ibmarba-oburarsulid, be sedamalo. Adi, Bab-Dummadse-goled-neggi gwallu ogaegar. Deyobi, a-gwallumar degisadegu gasii guoed.
3 Aarón Bab-Dummad-dulemarbo-ambikued-neggi gwallumar ogaoed, bia Bab-Dummad-Israel-dulemarbo-Igar-Mesisad-Ulu-siid-iduar, mor-dummad-naid magaba ogaoed. Adi, we-gwallumar Bab-Jehová-asabin gasii oibodagegar. We-igar, be-waganga degisadegu maigu guoed.
4 Gwallu-sied-olobiid-birgi gwallumar-bukwad degisadegu Bab-Jehová-asabin gasii guoed.’ ”
Madu-Bab-Dummadga-ukleged
5 Bab-Jehová, Moisésʼga sogdebalid: “Israel-dulemarga be sogo: ‘Madubur-nuedgi madu-ologana gwaambe-gakabo (12) be soboed. Madu-gwagwengi madubur nibirbo be ebugoed.
6 Bab-Jehová-asabin mese-olobiid-birgi, ilebo be madu-ologana urboed. Ilegwengi gwanergwa (6) be urboed, baid ilegwengi deyob mergu be urbebaloed.
7 Deginbali, ina-wawadikid-ibmar-baidba-oburarsulid madu-ilegwen-ilegwen-bukwad-dikarba be urbebaloed. We-ina-wawadikid madu-anar ebinsalegega-ibmar-uklegedyob gued. We-ina-wawadikid Bab-Jehováʼga ogumakar uklegoed.
8 Obunnoged-iba-iliba, Israel-dulemar-nukine, we-madu Bab-Jehová-asabin be urbedii guoed. Israel-dulemar weyob degisadegu we-igar imakdioed.
9 We-madu Aarónʼgadga, degi, e-masmalagadga degisadegu guoed, neg-islidikidgi gunmaloed. Ar ade, we-ibmar bur bule Bab-Jehováʼga ibmar-ogumakar-ukleged-baiganba, islidikid gued. Weyob we-igar degisadegu maigu guoed.’ ”
Bab-Dummadgi-isdar-sunmaked sabsur-odurdaklegoed
10 A-ibagangine, Israel-dulemar-abargi dule-gwensak maigusad. E-nande Israel-duled, e-babdi Egipto-duled. Ibagwengine, we-dulede Israel-dule-wargwen-ebo danar-danar-bukwadgi uluar gusad.
11 Agine, ome-Israelʼgined-e-machi galagwensuli sunmakdegu Bab-Dummad-nug obarisad. Degisoggu, we-dule, Moisésʼse sesagusmalad.
12 Geb Bab-Jehová Israel-dulemarga we-dule-imaklegoed-sogedse, esgaryagi we-dule-metemargweled. We-dule-e-nande Selomitʼye nugad, Dibri-sisgwad. Dibriʼdi Dan-wagwad.
13 Geb degine, Bab-Jehová Moisésʼga sogded:
14 “We-dule-galagwensuli-sunmaksad bemar-danar-danar-bukwad-magaba be onomalo. Bela dule-itosmalad we-dule-nono-birgi e-argan mesoed. Geb bela Israel-dulemar akwagi we-dule-makoed.
15 Israel-dulemarga weyob be sogoed: ‘Ar doa-dule e-Bab-Dummadgi galagwensuli-sunmaksale, e-isgusad egi aibinoed.
16 Ar doa-dule e-gwenad-ukabsanaidgi Bab-Jehová-nug bisale, we-dule oburgwilegoed. Bela Israel-dulemar akwagi we-dule-makoed. Ar Israel-duledibe, Israel-dulesurdibe, Bab-Jehováʼgi-galagwensuli-sunmaksale, we-dule oburgwilegoed.’ ”
Buged-mai-imakleged-igar
17 Bab-Jehová, Moisésʼga sogdebalid:
“Ar doa-dule, dule-baid-oburgwisale,
we-dule oburgwilemogoed.
18 Ar doa-dule, dule-baid-ibe ibdurgan-oburgwisale,
we-dule ibdurgan-oburgwisad-anar ibdurgan-baid ega ukoed.
19 Ar doa-dule, dule-baid-naibi-imaksale,
we-dule, deyob naibi-imaklemogoed.
20 Ar doa-dule, dule-baid-ibe gar-bichisale,
we-dule-ibe gar bisgelemogoed.
Ar doa-dule, dule-baid-ibe ibya-naibisasale,
we-dule-ibe ibya naibisalemogoed.
Ar doa-dule, dule-ibe nugar-bichisale,
we-dule-ibe nugar bisgelemogoed.
Ar doa-dule, igi-dule-baid-naibisaoe,
we-dule deyob naibisalemogoed.
21 Ar doa-dule, dule-baid-ibe ibdurgan-oburgwisale,
we-dule-ibe ibdurgan-oburgwisad-anar ibdurgan-baid ega ukoed.
Ar doa-dule, dule-baid-oburgwisardi,
we-dule deyob oburgwilemogoed.
22 Israel-dulega, degi, Israel-dulesulidga unnila igar-soggwenna maigu guoed.
Ani an bemar-Bab-Dummad-Jehová gued.”
23 Moisés Israel-dulemarga bela we-ibmar sogsa gusad. Geb Israel-dulemar, dule-galagwensuli-Bab-Jehováʼgi-sunmaksad danar-danar-bukwamalad-magaba onosmalad. Geb agi, akwagi-makar oburgwismalad. Ar igi Bab-Jehová, Moisésʼga sogsa gusa, deyobi, Israel-dulemar ibmar imaksamalad.