3
Gwenatigwar-guega ibmar-ukleged
1 Bab-Jehová Moisésʼga sogdebalid: “Israel-dulemarga be soge: ‘Dule-gwensak gwenatigwar-guega anga moli-bebe-nikad ukele, we-moli machereddibe, omedibe, swilidik, gwen boni-nikasulid anga ukoed.
2 We-dule, moli-bebe-nikad-ogumakar-uklegoed-e-nonogi na e-argan mesoed. Bab-Dummad-dulemarbo-ambikued-neg-yawagak-dogedgi we-moli-e-dukar egwannoed. Geb sorbali, Aarón-masmala-dule-irwa-Bab-Dummadse-gormalad, moli-e-abe ibmar-ogumakar-ukleged-aila-dikarmargi bomi-bomi imakoed.
3 ” ’Geb dule-gwenatigwar-guega Bab-Jehováʼga we-moli-ibmarmar soogi-ogumakar ukoed:
Samurgi-gwallumar-nanaid,
bela samur-bukwad-e-dikarmargi-gwallumar-nanaid,
4 e-mirwa-gwabogwad,
mirwa-birgi-gwallumar-nanaid,
e-dikarmargi-gwallumar-nanaid,
bina-dutugwadgi-gwallumar-nanaid.
We-bina-dutugwad mirwa-gwabogwadba-mesa onolegoed.
5 Geb degine, Aarón-masmala bela we-ibmarmala ibmar-ogumakar-ukleged-ailagi ogumakoed.
We-ibmarmar, soo-gasiid-birgi ibmar-ogumakar-ukleged-bukwadmala ogumaklegoed.
We, Bab-Jehováʼga soogi-ibmar-ukleged, Bab-Jehová yeer-yapanne itogedid.
6 ” ’Ar dule-gwenatigwar-guega Bab-Jehováʼga sibad-wawaad-ukele, we-sibad-wawaad machereddibe, omedibe, swilidik, gwen boni-nikasulid ukoed.
7 Ar sibad-wawaad-sapingwagwad ukele, Bab-Jehováʼga uknaidgi
8 dule-ibmar-uknaidi, sibad-wawaad-sapingwagwad-e-nonogi na e-argan mesoed.
Geb Bab-Dummad-dulemarbo-ambikued-neg-yawagak-asabin we-sibad-wawaad-e-dukar egwannoed.
Geb sorbali, Aarón-masmala ibmar-ogumakar-ukleged-aila-e-dikarmargi sibad-wawaad-e-abe bomi-bomi imakoed.
9 ” ’Dule-gwenatigwar-guega Bab-Jehováʼga we-sibad-wawaad-ibmarmar ogumakar ukoed:
E-gwallu,
e-bunnusaila-nagase-sikaled,
samur-birgi-gwallumar-nanaid,
degi, bela samur-bukwad-e-dikarmargi-gwallumar-nanaid,
10 e-mirwa-gwabogwad,
degi, mirwa-birgi-gwallumar-nanaid,
e-dikarmargi-gwallumar-nanaid,
deginbali, bina-dutugwadgi-gwallumar-nanaid.
We-bina-dutugwad mirwa-gwabogwadba-mesa onolegoed.
11 Geb degine, dule-irwa-Bab-Dummadse-goled bela we-ibmarmar ibmar-ogumakar-ukleged-ailagi ogumakoed.
We-ibmar-ogumaklegedi, Bab-Jehováʼga masga gued.
12 ” ’Ar dule Bab-Jehováʼga sibad ukele, Bab-Jehováʼga we-sibad uknaidgine,
13 na e-argan sibad-e-nonogi mesoed.
Geb Bab-Dummad-dulemarbo-ambikued-neg-asabin sibad-e-dukar egwannoed.
Sorbali, Aarón-masmala ibmar-ogumakar-ukleged-aila-e-dikarmargi sibad-e-abe bomi-bomi imakoed.
14 ” ’Dule-gwenatigwar-guega Bab-Jehováʼga we-sibad-ibmarmar soogi ogumakar ukoed:
Samur-birgi-gwallumar-nanaid,
bela samur-bukwad-e-dikarmargi-gwallumar-nanaid,
15 e-mirwa-gwabogwad,
mirwa-birgi-gwallumar-nanaid,
e-dikarmargi-gwallumar-nanaid,
bina-dutugwadgi-gwallumar-nanaid.
We-bina-dutugwad mirwa-gwabogwadba-mesa onolegoed.
16 ” ’Geb degine, dule-irwa-Bab-Dummadse-goled bela we-ibmarmar ibmar-ogumakar-ukleged-ailagi ogumakoed. We-ibmar-ogumaklegedi, Bab-Jehováʼga masga gued, yeer-yapannedid. Bela we-gwallumala Bab-Jehováʼgadid.
17 ” ’Ar bia bemar ambikuoe, bemarga, degi, be-waganga, degisadegu weyob igar megoed: Bemar bipisaale, ibmar-e-gwallu, degi, ibmar-abe gunnosurmalad.’ ”