40
Bab-Dummad isguedgi an-ollor-imakedid
(Salmo 70:1-5)
David we-namaked narmaksad. Namakmalad-e-iduedga soglenaid.
1 Ulubgi-abitoakwaa, Bab-Jehová-abdakdii an gusad.
Ansik aibilisad, an ese-goledi, magar an-itosad.
2 San-burba-bergued-galu-yagi an-onosad,
nega-matagangi an-onosad.
Akwasaila-birgi an-ogwisgusad,
nega-nuedgi an-ogwisgusad.
3 Bab-Jehová an-gwabindukugi namaked-gwapid nasiksad,
e-nug-ogannoedgi-namakega an-imaksad.
Deyob an-dakarmargua, bukidar dobe itodmalad,
Bab-Jehováʼgi bensuli gudmalad.
4 Dule, Bab-Jehováʼgi-bensuliguedi, Bab-Jehová egi nued binsadiid.
Dule, san-dummarba-samalad-barwisodisulidi,
bab-dummad-baidse-gormalad-barwisodisulidi,
Bab-Jehová egi nued binsadiid.
5 An-Bab-Dummad-Jehováʼye, ibibayobi ibmar-dakledisurmaladi be imaksa.
Ibibayobi be anmargi nued binsasa.
¡Dule beyobid sulid! Aisaar an bega bela be-ibmar-imaksad sogbienad.
Igi an bega sogergebele, ar gege bela bega sogleged.
6 Bega-ibdula-uklemalad gwen be abessulid,
bega-ibmar-gwag-gullemalad-ukleged gwen be abessurbalid.
Unnila beba-ibsaega be an-imaksad.
Bega-ibdula-ogumakar-uklegedi,
isgued-eliega ibdula-uklegedi,
gwen be egichissulid.
7 A-ulale, an sogdesunnad:
“Bab-Dummad, be-gardagi angi-narmakar-maiyob an danisun.
8 Bab-Dummad, an be-sogedba ibmar-imakedi ibiyobi an yeer-itodae.
Be-Igar-Mesisadi an-gwage-ulubgi an sediid.”
9 Dule-bukidarmalad-abargi an be-igar-napiragwadgi sunmakdiid.
Bab-Jehová, bedi nue an-wisid
be-igarba-sunmakedi an gwen boggudisulid.
10 Be-igar-napiragwadi dulemarga an gwen odukudisulid.
Be-innikidaedgi, be-abonoleged-igargi, an obinmakdiid.
Bipisaale, dule-bukidarmalad-abargi be-sabguedi,
be-igar-napiragwadi, an gwen odukudisulid.
11 Bab-Jehováʼye, melle be-sabguedi be angi obano.
Be nue-an-sabedgi, be-igar-napiragwadba, be an-sedii guo.
12 Isguedi bukidar an-ebiris naid,
isgued bukidarsoggu, gege na bega bela bied.
Isgued angi dar nue obined,
an akusunna-itogusad.
Isgued an-sailagiaganba bur bule mergued,
bar-gannarbaa an itosurgusad.
13 Bab-Jehováʼye, we-isguedgi wis be an-onodage.
Bab-Dummadye, gwae be an-bendakdage.
14 Dule-an-obelobimaladi be obingegsae,
akusunna ibmar-itogega be imake.
Dule-an-oichobigudimaladi, binged-abargi duurmakemai be sae.
15 Dule-an-wagar-daksuli an-dikarba-sunmakdimaladi, bingedar-itogwichi be imake.
16 Dule-be-amidimaladi, begi wergumarsun,
begi yeer-itomarsun.
Dule-abonoleged-igarbina-nue-sogdimaladi, weyob sogdii gumarsun:
“¡Ibiyobi Bab-Jehováʼdi dule-gandikid guye!”
17 Bab-Jehováʼye, melle be an-iego,
andi dule-wilesa gudiid,
ibmar-abesa garmakdiid.
Bab-Dummad, bee be an-bendakedid, igar-bulegangi bee be an-onogedid.
Bab-Dummadye, melle be undar-yogguo.