23
Kubaguligwa mwa wanhu wa Mulungu
1 “Mulume yoyose yoyalumile zimbwegele hebu yoyakanhigwe ulume wake, sekeyengile muna umting'hano wa wanhu wa Mndewa Mulungu.
2 “Na mwana wa mmbago yoyose, hebu mwana yondayamweleke, mbaka welesi wa longo, halondeka kwingila muna umting'hano wa wanhu wa Mndewa Mulungu.
3 “Muamoni hebu Mmoabu yoyose, welekwa wawo wose, mbaka welesi wa longo, hawalondeka kwingila muna umting'hano wa wanhu wa Mndewa Mulungu siku zose.
4 Kwaviya walema kumwing'hani ndiya na mazi vimukalile mzila kulawa Misili, na kwaviya wamwing'ha usang'hano Balaamu mwana wa Beoli kulawa Pesoli kuja Mesopotamiya, muladi yawaduwileni.
5 Mbali Mndewa Mulungu, Mulungu wenu hatogole kumtegeleza Balaamu, Mulungu wenu kahindula duwilo ijo na kuwa kutemeligwa mate, kwaviya Mndewa Mulungu, Mulungu wenu kamulondani.
6 Siku zose sekemuwataze wakale kwa tindiwalo hebu kupata vinhu vingi.
7 “Sekemuwehile Waedomu, kwaviya wawo ni wakaya wayenu Waisilaili. Iviya sekemuwehile Wamisili, kwaviya mukala kuna iisi yawo fana nyambenyambe.
8 Welesi wawo, kwandusila welesi wetatu wezatogoleligwa kwingila muna umting'hano wa wanhu wa Mndewa Mulungu.
Kwambula mwiko muna dilago
9 “Vondamuwe muna yamalago chipindi cha ng'hondo, muyepule na chila chinhu cha kumtendani mwambule mwiko.
10 One kumwenu kuhawa na munhu yoyose yambule mwiko kwa ichimu cha kulawigwa na shahawa ichilo, iyo kezalawa kunze ya lago na kezakala baho.
11 Mbali ihafika ichigulogulo kezakoga, zuwa vondadihonge kodaha kubwela muna dilago.
12 “Molondeka muwe na hanhu kunze ya lago hondamuhite mwanza mkulu.
13 Muna ivinhu venu molondeka muwe na gembe, vondamuhite uko, mwizadisang'hanila kuhimbila kombo na kusiliza mavi yenu.
14 Lago jenu dolondeka jele, kwaviya Mndewa Mulungu, Mulungu wenu, kogenda muna dilago jenu muladi yamkomboleni na kumtendani muwahume wehi wenu. Ivo sekemuleke yawone chinhu chochose chihile, buleivo kezamulekani.
Malagilizo mbasakanyo
15 “One mtumwa yahakimbilila kumwenu, sekemumbweleze kwa mwenevale wake.
16 Kezakala na mweye hanhu hohose hondayasagule muna yamabululu yenu, hanhu homnogela. Sekemumbamanye.
17 “Muisilaili yoyose, mulume hebu muke halondeka kuwa malaya wa kaye ya mulungu imwenga.
18 Hela yoyose yoipatike kwa ichimu cha umalaya uwo, sekeigaligwe kuna ikaye ya Mndewa Mulungu, Mulungu wenu, kuliha chilaho, kwaviya mulume hebu muke yeli malaya wa kaye ya milungu imwenga, Mndewa Mulungu komwihila munhu yotenda mbuli iyo.
19 “Uhamwazima hela mkaya miyago hebu ndiya hebu chinhu chimwenga chochose, sekeulonde yakulihe nyingi kufosa chiya chiumwing'hile.
20 One uhamwazima nyambenyambe kodaha kumulonda yakulihe nyingi kufosa chiumwing'hile, mbali mkaya miyago sekeumulonde yakulihe nyingi kufosa chiumwing'hile. Kwa kutenda ivo, Mndewa Mulungu, Mulungu wako, kezakutemela mate muna zisang'hano zako zose zondausang'hane muna iisi yondauhite kuihazi.
21 “Vondawike chilaho kwa Mndewa Mulungu, Mulungu wako, sekeukalame kuchifikiza, kwaviya Mndewa Mulungu, Mulungu wako kezachidai kumwako, na kwizakuwa kuhasanya.
22 Mbali kuleka kwika chilaho siyo uhasanyi.
23 Uiteganye kufikiza chilaho chouilahile kwa mulomo wako, kwaviya kumwikila chilaho Mndewa Mulungu, Mulungu wako bila kuwangilizigwa.
24 “Uhafosela muna umgunda wa zabibu wa mkaya miyago, kodaha kuja zabibu viulonda, mbali sekewike muna ichisege chako.
25 Uhafosela muna umgunda wa mkaya miyago uli na mhule, kodaha kukwanyula masuke yake kwa mkono na kuja, mbali sekeukanhe na sengo.