25
1 “One wanhu waidi wahagomba, wahahita kuhumizigwa kuna ichitala, imwe kowoneka kuwa kabule ubananzi na imwenga kotagusigwa.
2 One ija yatagusigwe keng'higwa nhaguso ya kulanhigwa mibalati, msemi kezalagiliza munhu iyo yatambalale hasi yalanhigwe mibalati kwa viya viyabanange.
3 Mwene ubananzi kodaha kulanhigwe mibalati malongo mane, mbali sekeifose baho. One muhaiyoha baho mokuwa mumguma chinyala mkaya miyenu.
4 “Ng'ombe vondayahwage uhemba, sekeumzibe umulomo yahalonda kuja.
Sang'hano ya sekulu kwa ndugu yake yadanganike
5 “One ndugu waidi wa chilume wahakala hanhu hamwe na imwe viweli yahadanganika bila kuleka mwana wa chilume, muke wa mwenekwaga sekeyasoligwe na mulume imwenga wa lukolo lumwenga. Ndugu wa mwenekwaga kolondeka yamwingilile muke iyo.
6 Mwana wa chilume wa mwanduso yondawamweleke kezapetigwa kuwa wa mwenekwaga, muladi zina jake sekejage muna iisi ya Isilaili.
7 Mbali one ndugu wa mwenekwaga halonda kumwingilila, mgane iyo kezahita kwa walangulizi wa bululu na kuwalongela, ‘Sekulu wa mulume wangu mwenekwaga kolema kugendelesa zina da mwenekwaga muna iisi ya Isilaili, hatenda chiyolondeka kutenda.’
8 Maabaho walala wa bululu wezamtanga na kulonga nayo. One yahawa yang'hali kolema kumwingilila,
9 mwanamke iyo imgane kezamuhitila haulongozi ha walala wa bululu, kezamvula chilatu chake chimwe na kumbwajulila mate muna ichihanga na kumulongela, ‘Vino niivo viyolondeka kutendigwa munhu yolema kuigendesa kaye ya sekulu wake.’
10 Zina da kaye yake muna iisi ya Isilaili dizakuwa, ‘Kaye ya munhu yoyavuligwe chilatu.’
Malagilizo yamwenga
11 “Walume waidi wahaitowa, one muke wa imwe wawo yahamtaza mulume wake kwa kumwamha zimbwegele ija yoitowa na mulume wake,
12 mwizamkanha umkono mwanamke iyo, sekemumuwonele ubazi.
13 “Sekemuwe na ningo mbili, ihuhile na izamile. Sekemusang'hanile ningo za uvwizi.
14 Wala sekemuwe na ningo mbili, ng'hulu na ndodo.
15 Sang'hanileni vinogile ningo zenu muladi mukale siku nyingi muna iisi iyomwing'hani Mndewa Mulungu, Mulungu wenu.
16 Kwaviya wanhu wose wotenda ivo, wanhu wose wovwiza, womtenda Mndewa Mulungu, Mulungu wenu yehilwe.
Lagilizo da kuwakoma Waamaleki
17 “Kumbukeni viwamtendileni Waamaleki vimukalile muna inzila kulawa Misili,
18 vimukalile wanyondenyonde na viwawatowile waja wose wakalile wokwiza kuchisogo yenu kuno walegela. Waamaleki hawamdumbile Mulungu.
19 Ivo Mndewa Mulungu, Mulungu wenu, vondayamuhumuzeni kulawa muna ukuitowa na wehi wenu wowomzungulukani muna iisi iyamwing'hileni iwe yenu na mukale umo, molondeka muwanange Waamaleki wose muladi sekewakumbukigwe kaidi. Sekemuzimize kutenda ivo.