26
Hema jelile
(Kulawa 36:8-38)
1 “Maabaho zenga hema da Mulungu kwa mapanzia longo ya mawalo yanogile yabotigwe kwa nyuzi za langi ya buluu na za zambalau na ndung'hu. Mapanzia yayo kwizayahamba kwa vilumbe walingile fana wasenga wa kuulanga wasongoligwe na fundi.
2 Chila panzia dizakuwa na utali wa mita longo na mbili na ugalamu mita mbili.
3 Kwizalumbiliza mapanzia matano yawe chihande chimwe, mapanzia yamwenga matano yawe chihande chekaidi.
4 Iviya kwizasonela vitanzi va buluu muimhindo ya dipanzia da uhelelo da chihande cha mwanduso, iviya kwizashona vitanzi kuuhelelo wa mhindo ya kunze ya chihande chimwenga cha panzia.
5 Kwizagela vitanzi malongo matano muna dipanzia dimwe, vitanzi vimwenga malongo matano va panzia dekaidi, vitanzi vose viilole.
6 Maabaho kwizatengeneza vihindo malongo matano va zahabu muladi kulumbiliza viya vihande vidi va mapanzia, ivo hema da Mulungu dizakuwa chinhu chimwe.
7 “Iviya kwizatengeneza ngubiko imwenga ya hema da Mulungu kwa mapanzia longo na dimwe ya mazoya ya luti.
8 Chila panzia dizakuwa na utali wa mita longo na nhatu na ugalamu wake mita mbili, mapanzia yose longo na imwe yezakuwa na ningo ziya ziya.
9 Kwizalumbiliza mapanzia matano hamwe na mapanzia sita hamwe, panzia desita kwizadibanda haulongozi wa hema ijo.
10 Maabaho kwizatenda vitanzi malongo matano muimhindo ya panzia da uhelelo da chihande cha mwanduso, kwizatenda vitanzi malongo matano muimhindo ya panzia ya uhelelo wa chihande chekaidi.
11 Kwizatengeneza vihindo malongo matano va shaba na kuzigela muna ivitanzi viya malongo matano muladi kulumbiliza vihande vidi va mapanzia kutenda panzia dimwe da hema.
12 Nusu ya panzia disigale, kwizaitumbika ubanzi wa kuchisogo wa dihema,
13 Utali wa panzia disigale kwizaibanda nusu mita ubanzi umwe na nusu mita ubanzi umwenga, muladi itinge ubanzi wa dihema muladi iwe na ngubiko.
14 “Kwizatengeneza ngubiko imwenga ya hema kwa mbende ndung'hu ihondigwe ya mabebelu ya ng'hondolo na mchanyha yake ngubiko imwenga ya mbende ya mnyama wa mwiibahali.
15 “Kwizatengeneza mibiki ya mkenge ya kwimizila dihema.
16 Mibiki izakuwa na utali wa mita nne na ugalamu wa sentimita malongo sita na sita,
17 mibiki izakuwa na ndimi mbili za kulumbilizila. Mibiki yose kwizaitenda iwe na ndimi mbili.
18 Kwizatengeneza mibiki ya hema vino, mibiki malongo maidi ubanzi wa kusi
19 na vikalilo malongo mane va hela hasi ya mibiki iyo malongo maidi, vikalilo vidi hasi kwa chila mbiki muladi vamhilile ndimi zake mbili na vikalilo vidi viwe hasi ya mbiki umwenga muladi wamhilile ziya ndimi zake mbili.
20 Ubanzi wa kasikazi wa hema kwizatengeneza mibiki malongo maidi
21 Na vikalilo vake malongo mane va hela, vikalilo vidi hasi ya chila mbiki.
22 Kwa ubanzi wa kuchisogo wili uswelo wa zuwa wa hema kwizatengeneza mibiki sita.
23 Na kwizatenda mibiki midi kwa ichimu cha vingobweda va dihema ubanzi wake wa kuchisogo.
24 Mibiki iyo ya hasi iileke mbali ilumbilizigwe kwa kuchanyha kuna imhete imwe. Mibiki yose ya vingobweda izatendigwa ivo ivo muladi itende mbili.
25 Ivo kwizakuwa na mibiki minane hamwe na vikalilo vake longo na sita va hela.
26 “Kwizatengeneza mapalo ya mkenge, mapalo matano kwa ichimu cha mibiki ya ubanzi umwe wa hema,
27 mapalo matano kwa ichimu cha ubanzi umwenga wa hema, mapalo matano kwa ichimu cha mibiki ya kuchisogo cha hema na ubanzi wa uswelo wa zuwa.
28 Palo da hagati dodifikile nusu ya zengo da hema dizaibebenyeka hagati kulawa kuuhelelo umwe mbaka uhelelo umwenga wa hema.
29 Mibiki yose kwizaihaka zahabu na kuzitendela mhete za zahabu zondazamhilile mapalo yayo, izo iviya kwizazihaka zahabu.
30 Ivo kwizaditenda hema ijo kuilinga na viya vinikulaguse kumulima.
31 “Kwizatenda panzia da nyuzi za langi ya buluu na za zambalau na ndung'hu na walo dibotigwe. Panzia ijo kwizadihamba vinogile kwa vilumbe vilingile fana wasenga wa kuulanga wasongoligwe na mafundi.
32 Kwizatumbika dipanzia muna izimhanda nne za mkenge zozihakigwe zahabu, zili na ngwamo za zahabu na vikalilo vine va hela.
33 Kwizatumbika panzia ijo muna ivihindo, maabaho udigale disanduku diya da ukalangama dili na vibao vidi va mabwe kuchisogo ya panzia ijo. Panzia ijo dizagola hanhu helile na hanhu helile ng'hani.
34 Ika ngubiko uchanyha ya disanduku da lagano mgati ya hanhu helile ng'hani.
35 Meza ija kwizaika ubanzi wa kunze wa panzia ijo, chinala chiya cha chitasa kwizachika ubanzi wa kusi wa dihema, viilole na imeza. Meza iyo izakuwa ubanzi wa kasikazi.
36 “Kwa ichimu cha hanhu ha kwingilila muna dihema kwizatengeneza panzia da langi ya buluu na zambalau na ndung'hu na walo dinogile dibotigwe na kuhambigwa vinogile.
37 Kwa ichimu cha panzia kwizatengeneza mhanda tano za mkenge na kuzihaka zahabu. Mhanda izo zizakuwa na ngwamo za zahabu, chila imwe izakuwa na kalilo da shaba.”