13
Atanna ‑bha ö ‑kɔ ‑yɛ Baanabasö waa‑ Sɔdhö ‑nu ‑bha kö ‑wa ‑bha yë kë ‑kɔ
1 Atanna ‑wʋdhiʋ̈loomɛ ‑nu waa‑ 'dhang ‑bho Yesu "dhiʋ̈ ‑mɛ ‑nu draan‑ ‑mɛ ‑nu ‑wo ‑gun ‑bha 'kɔdhigümɛ ‑nu 'wo Angtiɔsö ‑pö 'gü bha‑ ‑nu kpö 'gü. 'Mɛ 'wo "dhʋ̈ bha ‑wa mɛ do ‑dhɛ Baanabasö, 'yö 'wo‑ mɛ do 'bha ‑dhɛ Simeɔn 'yö 'wo‑ 'tɔ kpɔ 'wo‑ ‑dhɛ Mɛtii, 'yö 'wo‑ mɛ do ‑dhɛ Dhusiusö ('yö go 'pö Sidhɛnö ‑sɛ 'gü), 'yö Manaɛ 'ö "klʋ bho ‑gblüdë Edhodö ꞊keng‑, waa‑ Sɔdhö.
2 Yi do 'ka kö ‑wo kwa Dëmɛ ‑dhɔkë sië, kö ‑wo 'sunng‑ ma sië, 'yö 'Nii‑ "slʋ̈ʋ̈slʋ̈ ‑ya pö‑ ‑nu ‑dhɛ: «‑Ka Baanabasö waa‑ Sɔdhö ‑a ‑nu ‑ya ‑dɩ ‑ta kö yë 'a‑ ‑nu ‑dhɛ 'ka bha ‑wa kë!»
3 'Yö 'wo 'sunng‑ ma 'wo ꞊bhɛa Atanna ‑dhɛ ‑a ‑nu ‑wɔn 'gü, 'yö 'wo wo ‑kɔ kpa‑ ‑nu ‑ta, 'yö 'wo 'dhuë‑ ‑kë ‑nu ‑bha, 'yö 'wo wo kwaa‑ ‑nu ‑zü 'wo dho.
Baanabasö waa‑ Sɔdhö ‑nu ‑bha ‑dho Siplë ‑sɛ 'gü ‑kɔ
4 'Yö Baanabasö waa‑ Sɔdhö 'ö 'Nii‑ "slʋ̈ʋ̈slʋ̈ ‑ya ‑nu bɔ bha, 'wo dho 'wo ꞊loo Sedhösi ‑pö 'gü, 'yö 'wo ‑ya "yitagɔ 'gü mü 'wo dho "sɛgɔ 'dhɛ ‑ya ‑sü 'ka "yi ꞊zinng 'gü 'wo‑ ‑dhɛ Siplë bha‑ 'gü.
5 ꞊Dhɛ 'ö ꞊wa 'dho ꞊wa ꞊loo Sadhaminö ‑pö 'gü, 'yö 'wo zun Atanna ‑wʋ pö ‑sü ‑bha Zuifö ‑nu ‑bha ‑yakwëëkëgükɔ 'gü. Zan Makö ‑yö ‑gun ‑nu ꞊keng‑ 'yö‑ ‑nu ‑ta kun.
6 'Yö 'wo ‑ziö "sɛgɔ bha‑ 'gü 'wo dho "dhʋ̈ 'wo ꞊loo Pafɔsö ‑pö 'gü. ꞊Dhɛ 'ö ꞊wa ꞊loo Pafɔsö, 'yö 'wo ‑kpan "zʋʋdhɛ këmɛ do 'ö Zuifö 'ka 'wo‑ ‑dhɛ Baa Yesu bha‑ ‑bha mü. 'Mɛ 'ö bha ‑ya ‑pö ö ‑dɩ ‑dhɛ Atanna ‑wʋdhiʋ̈loomɛ ‑mü ö 'ka,
7 "kɛɛ ‑yö ‑kë 'pö ‑gblüdë 'wo‑ ‑dhɛ Sɛɛziusö Podhusö bha‑ ꞊kengmɛ do 'ka. ‑Gblüdë bha ‑yö ‑gun ꞊kpaɔmɛ 'ka, 'yö Baanabasö waa‑ Sɔdhö ‑nu ‑dhɛ kö ‑wo Atanna ‑wʋ pö ö ‑dhɛ.
8 "Kɛɛ "zʋʋdhɛ këmɛ 'wo‑ 'tɔ kpɔ glɛkö ‑wʋ 'gü 'wo‑ ‑dhɛ Edhimasö bha, Sɔdhö waa‑ Baanabasö 'wii Atanna ‑wʋ ‑pö ‑gblüdë bha‑ ‑dhɛ ‑dhɛ 'yö‑ ‑gɔ, kö ‑ya "slë mɔɔ‑ sië kö ‑gblüdë bha 'ya 'dho 'dhang bho Yesu ‑wɔn "dhiʋ̈.
9 ꞊Dhɛ 'ö ꞊ya kë "dhʋ̈, 'yö Sɔdhö 'wo‑ 'tɔ kpɔ 'pö Pɔdhö bha 'Nii‑ "slʋ̈ʋ̈slʋ̈ ‑ya pa, 'yö ö wë ꞊slëë ‑dɛ mi bha‑ ‑ta 'yö‑ ‑ga zuudhö
10 'yö‑ pö‑ ‑dhɛ: «Bhi 'ö 'i Sɔtraan gbö 'ka 'ö 'wɔn ‑së ‑dhɔ 'yaa i kë, 'ö 'i pa ‑sü 'ka "kpënng‑ waa‑ "slë yaa suu ꞊gban "pɛpɛ ꞊në‑ 'ka ya, ‑yö i "piʋ̈ 'zü ꞊dhɛ 'i tɛanwɔn 'ö ‑gban yi Dëmɛ ‑bha bha‑ bhɔ mɛ ‑nu 'gü ꞊sua ‑bha ‑ee?
11 ‑Bhö ‑dhɛ ‑ga, yi Dëmɛ ‑dho i ‑wëëdhɛ bho, ‑yö ‑dho i "yënng trö 'ö 'bhaa ‑dhɛ yö 'ö dho 'ö zun‑ 'ka "tʋ̈ng kpö ‑bha!» Edhimasö ‑to ‑dhɛ do bha‑ 'gü 'ö‑ "yënng ‑yö ꞊tröö 'sënsëndhö, 'yö zun ö ‑kɔ dan ‑sü ‑bha ö ‑züzü kö 'mɛ 'ö dho zian bho ö 'ka 'ö‑ ꞊slɔɔ.
12 ꞊Dhɛ 'ö ‑gblüdë bha ꞊ya 'wɔn 'ö ‑kë Edhimasö 'ka bha‑ ‑dhɛ yö, 'yö 'dhang bho Atanna ‑wʋ "dhiʋ̈, 'yö mɛ draan‑ ‑kɔ ‑nu 'wo go kwa Dëmɛ Yesu "piʋ̈ bha 'wo‑ ‑zʋ kun.
Pɔdhö waa‑ Baanabasö ‑a ‑nu ‑bha ‑kë Angtiɔsö ‑pö 'ö Pisidi ‑sɛ 'gü bha‑ 'gü ‑kɔ
13 'Yö Pɔdhö waa‑ ö "tayɔɔ ‑nu ‑wo ‑da "yitagɔ 'gü Pafɔsö ‑pö 'gü 'zü ‑deewo, 'yö 'wo dho Pɛɛzö ‑pö 'ö Panfidhi ‑sɛ 'gü bha‑ 'gü. ꞊Dhɛ 'ö ꞊wa ꞊loo mü, 'yö Zan Makö ‑yö ‑kan ‑a ‑nu ‑bha 'yö dho Zedhizadhɛmö.
14 'Yö wo ‑zë 'wo dho wo "dhiʋ̈ 'wo dho 'wo ꞊loo Angtiɔsö ‑pö 'ö Pisidi bha‑ 'gü, 'yö 'wo dho Zuifö ‑nu kpö 'gü ‑a ‑nu ‑bha ‑yakwëëkëgükɔ ‑nu 'gü ‑a ‑nu ꞊glooyi 'ka 'wo ‑ya mü.
15 ꞊Dhɛ 'ö 'kɔ bha‑ ‑gɔmɛ ‑nu ꞊wa wo bo Atanna ‑bha 'tɔng‑ ‑nu waa‑ Atanna ‑wʋdhiʋ̈loomɛ ‑nu ‑wʋ 'bha ‑nu ‑wʋ pö ‑sü 'ka‑ ‑bha 'sëëdhɛ 'gü, 'yö Zuifö ‑nu ‑bha ‑yakwëëkëgükɔ ‑gɔmɛ ‑nu ‑wa pö Pɔdhö waa‑ Baanabasö ‑a ‑nu ‑dhɛ: «Yi dheebhang ‑nu, ꞊ya kë ꞊dhɛ 'wɔn 'bha 'dhö ka ‑gɔ kö 'ka‑ pö mɛ faan dɔ ‑wʋ 'ka 'mɛ 'wo ya‑ ‑nu ‑dhɛ kö "dhɛɛ ‑yö ka ‑gɔ.»
16 'Yö Pɔdhö ‑yö ꞊wlü 'yö ö ‑kɔ "paa 'gü zë‑ ‑nu ‑dhɛ 'ö‑ pö: «Izraɛdhö ‑mɛ ‑nu waa‑ 'mɛ 'kaa Zuifö 'ka, "kɛɛ 'ö 'ka Atanna ‑wʋ ꞊bhlëë ‑zë ‑ya, ‑ka ka "tʋ 'to n ‑bha!
17 Izraɛdhö ‑mɛ ‑nu, kwa ‑bha Atanna bha ‑yö kwa "bhɛma ‑nu sü ö ‑bha 'ka 'ö‑ ‑nu suu ‑da "dhiʋ̈ kö ‑wo ‑tun ꞊dhuëngdhɛ 'gü Ezitö ‑sɛ 'gü, 'yö‑ ‑nu bho mü ö ‑bha 'gügbɩɩdhɛ 'ka,
18 'yö "klʋ bho‑ ‑nu ‑bha ‑kwɛ 'ö ꞊mɔɔ ‑kwɛ ‑kaɔng ‑yiisiö ‑bha ‑a 'ka "tʋng ‑ta.
19 'Yö Kanaa "sɛgɔ "saɔplɛ bha‑ ‑nu 'gü ꞊see ‑gblü 'ka, 'yö‑ nu kwa "bhɛma ‑nu ‑dhɛ kö ‑wo ‑ya mü.
20 'Yö zagɔbhomɛ ‑nu ‑ya ‑nu ‑gɔ "dhiʋ̈ ‑kwɛ 'ö ꞊mɔɔ ‑kwɛ këng ‑yiisiö waa‑ ‑kwɛ ‑kaɔng "sɔɔdhu ‑nu ‑bha ‑a 'ka 'ö dho "dhʋ̈ 'ö zun Atanna ‑wʋdhiʋ̈loomɛ Samiɛdhö ‑bha "tʋ̈ng ‑bha.
21 'Yö 'wo ‑gblüdë do ‑gbadhɛ Samiɛdhö ‑gɔ, 'yö Atanna ‑yö Saidhö 'ö ‑kë Kisö gbö 'ka, 'ö go Bɛnngzamɛ ‑gɔ "kwɛandhö bha‑ nu‑ ‑nu ‑dhɛ, 'yö ‑ya Izraɛdhö ‑sɛ ‑gɔ "dhiʋ̈ ‑kwɛ ‑kaɔng ‑yiisiö 'ka.
22 ꞊Dhɛ 'ö Atanna ‑yö ö ‑kɔ ‑kan Saidhö "dhiʋ̈, 'yö Davi ‑kë ‑nu ‑bha ‑gblüdë 'ka, 'yö "sɛɛdhɛ kë Davi ‑bha 'ö‑ pö:
‹Izai gbö Davi bha n dhɔɔbhaamɛ ‑mü,
yö ꞊në dho n dhɔɔbhaawɔn ꞊gban kë›.
23 Davi bha‑ suu 'gü ‑në do ꞊në Atanna ‑ya ‑ya Izraɛdhö ‑sɛ 'gü ‑mɛ ‑nu Dhamɛ 'ka ꞊dhɛ ‑kɔ 'ö‑ "plüün bho‑ 'ka ‑a 'dhö. Mɛdhamɛ 'ö "dhʋ̈ bha ꞊në 'wo‑ ‑dhɛ Yesu.
24 'Ö gun kö Yesu 'yii Atanna ‑bha yë zü bho ꞊kö mɛ kpö 'gü, Zan ‑yö Atanna ‑wʋ ‑pö 'ö‑ pö Izraɛdhö ‑sɛgümɛ ‑nu ‑dhɛ ꞊dhɛ ‑wo wo kwaa‑ wo ‑kë ‑sɔng yaa ‑nu ‑zü kö ‑wo wo wë bɔ Atanna "piʋ̈ kö ‑wa ‑nu ‑bɔ ‑a 'ka ‑zu bho.
25 ꞊Dhɛ 'ö Zan 'dhö ‑wo sië ö ‑bha ‑tosɛa "dhiʋ̈todhɛ 'gü 'yö‑ pö: «Ka ka ‑zʋ ‑gɔn ꞊dhɛ de suu 'pö n 'ka? 'Mɛ 'ka ‑ya sië‑ ‑gɔ bha 'yaa ‑mü n 'ka, yö ‑zë ‑yö nu sië n zian‑ ‑ta. Mɛ 'ö bha yö ‑zë ꞊bhlëë ‑yö 'kpii‑ 'ö ‑ziö n ‑ta, ‑a ‑gɛn 'gü ‑sabha ‑zian fië‑ ‑dhö n 'ka.»
26 'Yö Pɔdhö ‑ya pö: «N dheebhang ‑nu, ka 'ö 'ka ‑kë Ablaamö suugümɛ ‑nu 'ka, waa‑ 'mɛ 'ö 'kaa Zuifö 'ka "kɛɛ 'ö 'ka Atanna ꞊bhlëë ‑zë ‑ya, kwa ꞊në naɔ ‑së 'ö ‑kë dha ‑sü ‑naɔ 'ka bha 'ö nu kwa ‑dhɛ.
27 'Mɛ 'wo Zedhizadhɛmö waa‑ wo ‑gɔdhiʋ̈mɛ ‑nu 'wii "wɩ‑ ‑bha kö ‑wo Yesu 'sü wo Dhamɛ 'ka, 'wii Atanna ‑wʋdhiʋ̈loomɛ ‑nu ‑wʋ 'wo‑ pö ꞊glooyi ꞊gban "pɛpɛ 'ka bha‑ 'gü ma, "kɛɛ ‑wo kë‑ 'gü ‑wɔn ‑zë ‑kë Yesu zë ‑sü 'ka.
28 ‑A zë ‑gɛn 'bha 'yii kë, "kɛɛ ‑wo kë‑ ‑pö Pidhatö ‑dhɛ ‑ya zë.
29 ꞊Dhɛ 'ö ꞊wa 'wɔn ‑nu 'ö ‑bɛn zë ‑sü 'ka Atanna ‑bha 'sëëdhɛ 'gü 'ö ‑gban Yesu ‑wëëdhɛ bho ‑sü waa‑ ga ‑sü ‑nu ‑bha bha‑ ꞊gban "pɛpɛ 'gü ‑wɔn kë, 'yö 'wo‑ bho "dhü ‑bha, 'yö 'wo‑ ‑da ‑gwë ‑yɛ 'gü, (‑a ‑gɛn ‑mü ꞊dhɛ ‑a ‑nu ‑bha mɛ ‑wɛɛ bho ‑kɔ bha).
30 "Kɛɛ 'yö Atanna ‑ya bho ga 'gü,
31 'yö ö ‑dɩ ‑zɔn 'mɛ 'wo gun‑ ꞊keng‑ 'wo go‑ 'ka Gadhidhe ‑sɛ 'gü 'wo dho‑ 'ka Zedhizadhɛmö bha‑ ‑nu ‑dhɛ ‑dhɛkpaɔyi 'gbɛ ꞊dede 'ka, 'mɛ 'wo "dhʋ̈ bha ꞊në 'wo‑ "sɛɛ‑ 'ka ꞊taamasü ya‑ 'gü, 'yö 'wo Yesu ‑dhiang zë sië Izraɛdhö ‑sɛgümɛ ‑nu ‑dhɛ.
32 Yii ‑dɩ 'pö yi ‑nu 'wɔn ‑taɔng ‑së bha ꞊në‑ 'ka ka ‑dhɛ. 'Wɔn ‑taɔng ‑së bha yö ‑mü ꞊dhɛ 'wɔn 'ö Atanna ‑ya pö kwa "bhɛma ‑nu ‑dhɛ yi 'bha 'ka bha,
33 ‑ya kë ‑sü 'ka kwa 'ö 'kwa‑ ‑nu bhang ‑nu 'ka bha ꞊në kwa ‑dhɛ ꞊dɛɛ Yesu ‑bho ga 'gü ‑sü 'ka ‑dhɛ ‑kɔ 'ö ‑bɛn zë ‑sü 'ka‑ 'ka "Tan 'sëëdhɛ ('wo‑ Somö ‑kë bha‑) ꞊plɛ ‑naa 'gü bha‑ 'dhö ꞊dhɛ:
‹Atanna ‑ya ‑pö ꞊dhɛ: Bhi ꞊në 'i n Gbö 'ka,
꞊ya 'go ꞊dɛɛ 'gü 'ma‑ ‑zɔn mɛ ꞊gban ‑dhɛ ꞊dhɛ ma ꞊në 'a i Dë 'ka›.
34 'Yö Atanna ‑ya pö ꞊dhɛ ‑yö ‑dho ‑a bho ga 'gü kö 'ya 'dho ga 'zü. 'Yö‑ pö 'zü ꞊dhɛ:
‹'Dhuë‑ 'ö "slʋ̈ʋ̈slʋ̈ 'ö‑ "plüün bho Davi ‑dhɛ bha
ö ‑dho ‑a kë ka ‑bha tɛan‑ 'ka›.
35 'Wɔn bha ‑yö ‑bɛn zë ‑sü 'ka Atanna ‑bha 'sëëdhɛ 'gü ‑dhɛ 'bha 'gü 'zü, ‑a ‑gɛn ‑mü ꞊dhɛ 'mɛ 'ö "Tan 'sëëdhɛ ('wo‑ Somö ‑kë bha‑) ‑bɛn zë bha ‑ya ‑pö Atanna ‑dhɛ:
‹'Bhii 'dho "wɩ‑ ‑bha kö i ‑sëmɛ "slʋ̈ʋ̈slʋ̈ bha‑ kwi ‑yö "bu›.
36 Yë 'ö Atanna ‑ya ‑ya Davi ‑bha 'ka ‑yö kë‑ ‑kë, "kɛɛ ꞊dhɛ 'ö ꞊yaa‑ kë 'yö ga, 'yö 'wo‑ ‑wɛɛ bho ‑a "bhɛma ‑nu ‑wɛɛ bho ‑dhɛ 'gü, 'yö‑ kwi ‑yö ‑bu. (꞊Ya kë "dhʋ̈ kö ‑wʋ 'ö Atanna ‑ya pö "dhʋ̈ bha 'yii‑ pö Davi ‑zë ‑dhɛ.)
37 Mɛ 'ö Atanna ‑ya bho ga 'gü bha yö ‑zë kwi 'yii "bu.
38 ‑A ‑kë "dhʋ̈ ‑sü bha‑ 'gü n dheebhang ‑nu, ‑kaa dɔ ꞊dhɛ pë 'ö Yesu ‑ya ‑kë bha ꞊në‑ ‑wɔn 'gü 'yö Atanna dho ꞊mɔɔ‑ ‑bha 'ö mɛ ‑nu ‑bha 'wɔn yaa ‑nu ‑mawɔn to ꞊dhɛ ‑kɔ 'yi‑ pö sië‑ 'ka ka ‑dhɛ ꞊dɛɛ ya‑ 'dhö.
39 Moizö ‑bha 'tɔng‑ ‑zë 'yii 'dho ka kë ‑sɔng bho ka ‑bha Atanna wëëdhö, "kɛɛ 'dhang ‑bho Yesu ‑wɔn "dhiʋ̈ ‑sü bha ꞊në dho ka kë "slʋ̈ʋ̈slʋ̈ Atanna wëëdhö.
40 Kö ‑kaa kë ‑së kö 'pë 'ö Atanna ‑wʋdhiʋ̈loomɛ ‑nu ‑wa pö bha 'ya 'dho kë ka 'ka;
41 ‑a ‑gɛn ‑mü ꞊dhɛ ‑a ‑wʋdhiʋ̈loomɛ ‑nu ‑wa ‑pö:
‹Atanna ‑ya pö: 'Mɛ 'ka Atanna ‑wʋ ‑san ‑kë,
'wɔn ‑yö ka 'kɔn kö 'ka 'ma "sɛ 'ka,
‑a 'klɔɔ‑ ‑mü ꞊dhɛ yë 'ö ꞊waa‑ ‑wɔn ‑gɛn dɔ ka ‑dhɛ,
'ö 'kii 'dho 'dhang bho‑ "dhiʋ̈, a ‑dho ‑a kë ka ‑bha "tʋ̈ng 'gü›.»
42 ꞊Dhɛ 'ö ꞊wa bo dhiang ‑nu bha‑ ‑nu zë ‑sü 'ka, 'ö Pɔdhö waa‑ Baanabasö 'wo zun sië "kpɛnng, 'yö 'wo‑ pö‑ ‑nu ‑dhɛ ‑wo nu 'zü ꞊glooyi 'dhɛ 'ö dho dɔ‑ "piʋ̈ bha‑ 'ka kö ‑wo ‑wʋ ‑nu bha‑ 'gü 'bha pö wo ‑dhɛ.
43 ꞊Dhɛ 'ö ꞊wa ziö 'wo 'dho sië, 'yö Zuifö ‑nu 'gbɛ waa‑ 'mɛ 'wo ‑da Zuifö ‑nu ‑bha ‑bhɛa Atanna ‑dhɛ ‑kɔ 'gü ‑nu wo bha 'wo ‑ziö ‑a ‑nu ꞊keng‑. 'Yö Pɔdhö waa‑ Baanabasö 'wo dhiang ‑nu zë‑ ‑nu ‑dhɛ ‑a ‑nu faan dɔ ‑sü 'ka kö ‑wo 'to Atanna ‑bha "gblüsë 'ö‑ ‑kë bha‑ 'gü woo‑ ‑tosɛadhe ꞊gban 'ka kö ‑wo 'dho‑ 'ka "dhiʋ̈.
44 ‑A ꞊glooyi 'dhɛ 'ö dɔ‑ 'dhɛ bha‑ "piʋ̈ bha‑ 'ka, 'mɛ 'wo 'pö‑ bha‑ 'gü, ‑a ‑nu 'kpii‑ ‑dhɛ ꞊gban ‑wo kë ‑loo 'ko ‑ta ‑dhɛ do bha‑ 'gü kö 'wo Atanna ‑wʋ ma.
45 "Kɛɛ ꞊dhɛ 'ö Zuifö ‑nu ꞊wa mɛ kpö bha‑ ‑nu yö, 'yö ꞊drɔ ‑yö ‑da ‑nu 'gü 'yö 'wo ‑ya ꞊sua ‑yɛ Pɔdhö "yan ‑bha ‑sü ‑bha. 'Yö 'wo ‑ya ‑dhiang yaa ‑zë ‑a ‑bha ‑sü ‑bha mɛ ‑nu ‑dhɛ.
46 "Kɛɛ Pɔdhö waa‑ Baanabasö ‑wo wo ‑zʋ ‑gban 'wo dhiang zë‑ ‑nu ‑dhɛ 'wo‑ pö: «Atanna ‑wʋ ya‑ ‑dhɛa ‑bha ꞊dhɛ ‑yö pö ka ꞊në ka ‑dhɛ nu ‑blɛɛsü, "kɛɛ ꞊dhɛ 'ö ‑kë ꞊dhɛ 'kaa "wɩ‑ ‑bha kö 'ka 'dhang bho‑ ‑wɔn "dhiʋ̈, 'ö 'kaa ka ‑dɩ 'sü ꞊dhɛ ꞊sii 'ö 'yaa yën ‑a ꞊slɔɔ ‑mɛ 'dhö bha yi ‑dho yi wë slëë‑ 'mɛ 'waa Zuifö 'ka‑ ‑nu "piʋ̈.
47 ‑a ‑gɛn ‑mü ꞊dhɛ yi Dëmɛ ‑ya ‑pö yi ‑dhɛ: «A i ‑ya "sɛgɔ "wɛɛ ‑nu ꞊në‑ ‑nu ‑bha ‑dhɛpuudhɛ 'ka kö 'i 'dho dha ‑sü bha‑ ‑naɔ 'ka "sɛgɔ ‑nu 'wo ‑dhɛ ꞊gblɛɛn 'gü ‑a ‑nu 'gü.
48 ꞊Dhɛ 'ö 'mɛ 'waa Zuifö 'ka 'wo‑ ‑nu ‑wʋ bha‑ ma, 'yö‑ ‑nu ꞊nii ‑da ꞊dedewo 'yö 'wo‑ pö: «Kwa Dëmɛ ‑wʋ bha ‑yö ‑së!» 'Yö mɛ "pɛpɛ 'ö Atanna ‑ya ‑nu ‑da ‑tosɛa 'ö 'yaa yën ‑a këmɛ 'ka bha 'wo 'dhang bho Yesu ‑wɔn "dhiʋ̈.
49 'Yö kwa Dëmɛ ‑wʋ ‑yö ‑pɛn "sɛgɔ bha‑ 'gü ‑dhɛ ꞊gban "pɛpɛ 'gü.
50 "Kɛɛ 'yö Zuifö ‑nu 'wo dhebhɔ ꞊bhlëësü ‑nu 'wo 'pö‑ bha‑ 'gü, 'wo ‑da Zuifö ‑nu ‑bha bhɛa" ‑kɔ 'gü bha waa‑ 'pödë ‑nu zü ꞊yɔɔn Pɔdhö waa‑ Baanabasö ‑nu ‑bha kö ‑wa ‑nu ‑wëëdhɛ bho. ꞊Dhɛ 'ö ꞊ya kë "dhʋ̈ 'yö 'wo‑ ‑nu ‑kë, 'yö 'wo go‑ ‑nu ‑bha "sɛgɔ bha‑ 'gü.
51 'Yö Pɔdhö waa‑ Baanabasö 'wo wo ‑gɛn ‑bha ‑ma kö "sɛ 'ö dɔ‑ ‑nu ‑gɛn ‑bha 'pö‑ bha‑ 'gü bha ‑yö 'go‑ ‑nu ‑gɛn ‑bha kö ‑wa ‑zɔn ‑nu ‑dhɛ ꞊dhɛ ('mɛ 'wo bha Atanna ꞊ya 'wɔn bho‑ ‑nu 'gü kö‑) ‑dhɛ 'bha 'yii 'to wo ‑zë wo ‑bha, 'yö 'wo dho Ikɔnö ‑pö 'gü.
52 'Dhang ‑bho Yesu "dhiʋ̈ ‑mɛ ‑nu 'wo Angtiɔsö ‑wo ‑gun pa ‑sü 'ka zuëniidadhe waa‑ 'Nii‑ "slʋ̈ʋ̈slʋ̈ 'ka.