15
‑Yakwëë 'kpii‑ 'ö Yesu ‑bha mɛ ‑nu ‑wa ‑kë Zedhizadhɛmö ‑a ‑dhiang
1 ꞊Dhɛ 'ö ꞊ya kë "dhʋ̈, 'yö mɛ 'bha ‑nu ‑wo go Zude ‑sɛ 'gü 'wo nu Angtiɔsö ‑pö 'gü, 'yö 'wo zun 'dhang ‑bho Yesu "dhiʋ̈ ‑mɛ ‑nu 'wo mü ‑a ‑nu draan‑ ‑sü ‑bha 'wo‑ pö: «꞊Ya kë ꞊dhɛ 'kii 'dho 'gbannë ‑zë 'gü ꞊dhɛ ‑kɔ 'ö ‑bɛn zë ‑sü 'ka Moizö ‑bha 'tɔng‑ 'gü ‑a 'dhö, 'kii 'dho dha.»
2 'Yö 'wo ‑ya dhiang ‑nu zë ‑sü waa‑ zaɔdhe ‑da Pɔdhö waa‑ Banabasö ‑nu 'ka ‑sü ‑bha, ‑a ‑gɛn ‑mü ꞊dhɛ Pɔdhö waa‑ Banabasö 'wii "wɩ‑ ‑nu ‑wʋ ‑bha gbonggbongdhö. 'Yö ‑kë Yesu ‑bha mɛ ‑nu 'wo Angtiɔsö ‑a ‑nu 'gü ‑së kö 'wo mɛ dɔ Pɔdhö waa‑ Baanabasö ‑nu ꞊keng‑ kö ‑wo 'dho Zedhizadhɛmö kö Yesu ‑bha yëkëmɛ ‑nu waa‑ Atanna ‑bha mɛ ‑nu "dhiʋ̈ziöwomɛ ‑nu 'wo mü bha ‑wo 'wɔn bha‑ ‑bho 'koo kë wo ‑dhɛ.
3 'Yö 'wo‑ ‑nu dɔ zian‑ 'yö 'wo dho. 'Yö 'wo bɔ Fenisi ‑sɛ waa‑ Samadhi ‑sɛ ‑nu 'gü, 'yö ‑kɔ 'ö 'mɛ 'waa Zuifö 'ka 'wo wo zuë" ꞊slëë‑ 'ka Atanna "piʋ̈ bha, 'wo‑ ‑gɛn ‑nu dɔ 'dhang ‑bho Yesu "dhiʋ̈ ‑mɛ ‑nu 'wo ‑dhɛ ‑nu bha‑ 'gü ‑a ‑nu ‑dhɛ, 'yö‑ ‑nu zuë" ꞊nii ‑da 'pö ꞊dedewo.
4 ꞊Dhɛ 'ö ꞊wa ꞊loo Zedhizadhɛmö 'plöö, 'yö 'dhang ‑bho Yesu "dhiʋ̈ ‑mɛ ‑nu 'dhö, Yesu ‑bha yëkëmɛ ‑nu waa‑ Atanna ‑bha ‑mɛ ‑nu "dhiʋ̈ziöwomɛ ‑nu 'wo ‑dhɛ bha‑ 'gü 'wo ‑kɔ ‑ya ‑a ‑nu ‑dhɛng ‑gɔ, 'yö woo ‑dɩ 'pö waa‑ Atanna ‑nu 'wo 'wɔn ‑nu 'wo‑ ‑kë wo 'kwëë‑ ‑a ‑nu ‑bha "ta 'kpɔ ‑sü 'gü bha 'wo‑ ‑gɛn dɔ 'pö‑ ‑nu ‑dhɛ.
5 'Yö Fadhiziɛn ‑nu 'bha ‑nu 'wo 'dhang bho Yesu ‑wɔn "dhiʋ̈ bha 'wo ꞊wlü 'wo‑ pö: «‑Ka ‑kwaa pö 'dhang ‑bho Yesu "dhiʋ̈ ‑mɛ ‑nu 'ö 'waa Zuifö 'ka bha‑ ‑nu ‑dhɛ ‑wo 'dho 'gbannë 'gü, ꞊ya 'go mü kö 'tɔng‑ 'ö Moizö ‑ya nu kwa ‑dhɛ bha ‑wa ꞊bhlëë ‑ya.
6 'Yö Yesu ‑bha yëkëmɛ ‑nu waa‑ Atanna ‑bha mɛ ‑nu "dhiʋ̈ziöwomɛ ‑nu 'wo ‑ya ‑dhɛ do 'gü kö 'wo ‑dhɛ ‑ga 'wɔn bha‑ 'gü.
7 ꞊Dhɛ 'ö‑ ‑nu ‑dɩ ‑slɔɔ ꞊wa zaɔdhe ‑da wo "kwëë pinpindhö 'wɔn bha‑ 'gü, 'yö Piɛdhö ‑yö ꞊wlü 'ö‑ pö: «N dheebhang ‑nu, kaa ꞊dede ka‑ 'wɔn ‑dɔ 'kpakpadhö ‑a yi ꞊ya ꞊gwëë ‑dhɛ Atanna ꞊në n ‑ya ka kpö 'gü kë "dhʋ̈ kö 'a kë ö ‑bha mɛ dha ‑sü ‑naɔ 'ö ‑gban Yesu ‑bha bha‑ pömɛ 'ka 'mɛ 'waa Zuifö 'ka ‑a ‑nu ‑dhɛ kö ‑wa ma kö ‑wo 'dhang bho‑ "dhiʋ̈ 'pö.
8 'Yö Atanna 'ö mɛ "bhɩɩ‑ ‑nu zuë" dɔ bha 'ö ö ‑bha 'Nii‑ "slʋ̈ʋ̈slʋ̈ ꞊lɔɔ‑ ‑nu ‑ta ꞊dhɛ kwa 'dhö kö ‑ya ‑zɔn ꞊dhɛ ‑a ‑nu "dhia ‑yö ö 'gü 'pö.
9 'Yii 'mɛ 'wo Zuifö 'ka waa‑ 'mɛ 'waa Zuifö 'ka ‑a ‑nu ‑bho 'koo kë kwa ꞊zinng 'gü. 'Yö‑ ‑nu këwɔn yaa ‑nu ‑mawɔn to‑ ‑nu ‑bha 'dhang ‑bho Yesu "dhiʋ̈ ‑sü ‑wɔn 'gü, 'yö‑ ‑nu sü 'mɛ 'ö pö 'aa‑ ‑nu ‑bha 'ka ö wëëdhö.
10 ꞊Dhɛ 'ö "dhʋ̈, 'pë 'ö Atanna ‑ya pö 'kwa 'dho‑ kë ka‑ ‑kë ‑më ‑wɔn 'gü? "Ɛɛn Atanna 'gü 'pö 'ka‑ dan sië ‑ee? ‑A ‑bha 'tɔng‑ 'ö kwaa kwa "bhɛma ‑nu kwa ‑kɔ 'yii ꞊mɔɔ‑ ‑bha kö 'kwa‑ 'kun ‑a ‑bha ‑kë "gbɩɩ‑ ‑sü ‑wɔn 'gü bha 'yö 'ka‑ "piʋ̈ 'zü ꞊dhɛ 'dhang ‑bho Yesu "dhiʋ̈ ‑mɛ ‑nu 'ö 'waa Zuifö 'ka ‑wa yö ꞊në‑ 'kun ‑ee?
11 Kwa 'dhang ‑bho "dhiʋ̈ ꞊dhɛ kwa Dëmɛ Yesu ‑bha ‑gasitɛ ꞊në‑ ‑wɔn 'gü 'yö 'kwa dhasü ꞊slɔɔ. ‑Kɔ do bha ꞊në woo‑ ‑dɩ 'pö 'wo‑ ꞊slɔɔ‑ 'ka.»
12 ꞊Dhɛ 'ö Piɛdhö ꞊ya bo dhiang bha‑ zë ‑sü 'ka, 'yö ‑dhɛa ‑yö ga 'mɛ 'wo gun 'mü bha‑ ‑nu ‑ta. 'Yö 'wo wo "tʋ to Banabasö waa‑ Pɔdhö ‑nu ‑wʋ ‑bha, 'yö 'wo zun ‑kɔ 'ö Atanna ‑yö bɔ‑ 'ka wo ‑ta 'ö "dhabhliwɔn ‑nu ‑kë 'ka ‑a ‑nu ‑bha ꞊nië ‑sü 'ö 'mɛ 'waa Zuifö 'ka‑ ‑nu kpö 'gü bha 'wo zun‑ ‑gɛn bho ‑sü ‑bha ‑a ‑nu ‑dhɛ.
13 ꞊Dhɛ 'ö ꞊wa bo 'wɔn ‑nu bha‑ ‑nu ‑gɛn bho ‑sü 'ka 'yö Zakö ‑ya pö: «N dheebhang ‑nu, ‑ka ka "tʋ 'to n ‑ta!
14 ‑Kɔ 'ö Atanna ‑yö ö ‑zʋ ‑kë 'ka ‑kɔ ‑blɛɛsü wo 'mɛ 'waa Zuifö 'ka‑ ‑nu "piʋ̈ kö ‑yö mɛ 'sü‑ ‑nu ꞊zinng 'gü kö ‑wo kë ö ‑bha "sɛgɔ 'gümɛ ‑nu 'ka bha, Simɔ ꞊yaa‑ ‑dhiang zë.
15 'Sa waa‑ Atanna ‑wʋdhiʋ̈loomɛ ‑nu 'wo gun yi 'bha 'ka ‑a ‑nu ‑wʋ ‑ya 'gü do, ‑a ‑gɛn ‑mü ꞊dhɛ 'pë 'ö ‑bɛn zë ‑sü 'ka Atanna ‑bha 'sëëdhɛ 'gü Davi suu 'gü ‑në ‑nu ‑bu 'gü ‑ya ‑pö:
16 ‹Kwa Dëmɛ ‑ya pö: 'Wɔn ‑nu ya ꞊wa ziö,
a ‑dho n yee kë 'a nu
'a Davi ‑bha 'kɔ 'ö wü bha‑ dɔ 'zü ‑deewo,
'yö 'a‑ 'wü ‑dhɛ ‑nu bha‑ ‑nu ‑pë ‑kë kö ‑yö ‑gban 'zü ‑deewo.
17 Kë "dhʋ̈ kö mɛ ‑kpɛa 'wo to ‑wo kwa Dëmɛ "gblʋʋ mɔɔ‑,
kö 'a 'mɛ 'waa Zuifö 'ka‑ ‑nu ‑dhɛ 'pö kö ‑wo kë n ‑bha 'ka›.»
18 'Wɔn ‑nu 'ö kwa Dëmɛ ‑ya pö 'ö‑ yi ꞊ya ꞊gwëë bha ꞊në 'wo bha.»
19 'Yö Zakö ‑yö ö ‑bha ‑da ‑ta 'ö‑ pö: «Pë ‑nu 'wo bha ꞊në‑ ‑nu ‑wɔn 'gü 'yö ‑kë n 'gü ‑së kö 'kwa 'dho sëëbhodhe nu 'mɛ 'waa Zuifö 'ka 'ö 'wo wo zuë" ꞊slëë Atanna "piʋ̈ bha‑ ‑nu ‑dhɛ!
20 "Kɛɛ ‑ka ‑kwa 'sëëdhɛ bɔ‑ ‑nu ‑dhɛ kö 'kwa‑ pö 'wa 'dho ‑tuʋ̈pë ‑nu 'wo "saa‑ bho sië‑ 'ka ‑dhɔkëpë ‑nu "dhiʋ̈ bha ꞊në‑ ‑bhö! ꞊Dhɛ ‑wo wo ‑dɩ 'kun ‑zua zë ‑sü ‑gɔ, ꞊ya 'go mü 'zü wü 'ö‑ ꞊yɔɔn 'yii ꞊wɛnng 'wa 'dho‑ ‑bhö. ꞊Ya 'go mü 'zü 'wa 'dho pë ꞊yɔɔn ‑bhö,
21 ‑a ‑gɛn ‑mü ꞊dhɛ 'ö go‑ 'ka kwa "bhɛma ‑nu ‑bha "tʋ̈ng ‑bha 'ö nu 'ö zun‑ 'ka ꞊dɛɛ ‑bha, ‑wo Moizö ‑bha 'tɔng‑ ‑wɔn dhiang ‑zë mɛ ‑dhɛ 'pö‑ ꞊gban "pɛpɛ 'gü ‑kpɛawo; ‑a ‑gɛn ‑mü 'zü ꞊dhɛ Zuifö ‑nu ‑wo 'tɔng‑ bha‑ ‑wʋ ‑pö wo ‑bha ‑yakwëëkëgükɔ ‑nu 'gü ‑a ‑nu ꞊glooyi ꞊gban "pɛpɛ 'ka.
'Sëëdhɛ 'wo‑ bɔ 'dhang ‑bho Yesu "dhiʋ̈ ‑mɛ ‑nu 'ö 'waa Zuifö 'ka ‑a ‑nu ‑dhɛ
22 ꞊Dhɛ 'ö ꞊ya kë "dhʋ̈ 'yö Yesu ‑bha yëkëmɛ ‑nu 'wo Zedhizadhɛmö ‑pö 'gü bha waa‑ mɛ zizi ‑nu waa‑ 'dhang ‑bho Yesu "dhiʋ̈ ‑mɛ ‑nu 'wo to ‑a ‑nu ꞊gban "pɛpɛ 'wo wo ‑wʋ ‑kë do 'yö 'wo ‑kɔ ‑yɛ mɛ 'bha ‑nu ‑bha wo kpö 'gü, 'yö 'wo‑ ‑nu ‑da Pɔdhö waa‑ Banabasö ‑nu "piʋ̈, 'yö 'wo‑ ‑nu bɔ Angtiɔsö. 'Mɛ 'wo ‑kɔ ‑yɛ ‑nu ‑bha "dhʋ̈ bha ‑wa mɛ do ‑dhɛ Zudë, 'yö 'wo‑ 'tɔ kpɔ Bazabasö, 'yö 'wo‑ mɛ do 'bha ‑dhɛ Sidhasö. Mɛ ꞊plɛ bha ‑wʋgbiindhɛ ‑gun ‑nu ‑gɔ ‑a ‑nu kpö 'gü.
23 'Sëëdhɛ 'wo‑ dɔ‑ ‑nu ‑gɔ kö ‑wo 'dho‑ 'ka Angtiɔsö ‑mɛ ‑nu ‑dhɛ bha ‑wa ‑bɛn ‑zë 'pö 'wo‑ pö: «Yesu ‑bha yëkëmɛ ‑nu waa‑ mɛ zizi ‑nu 'yi ka dheebhang 'ka 'yi Zedhizadhɛmö 'plöö ya, 'ya 'mɛ 'ka 'dhang bho Yesu ‑wɔn "dhiʋ̈ "kɛɛ 'ö 'kaa Zuifö 'ka, 'ö 'ka Angtiɔsö ‑pö 'gü "ɛɛn 'ö 'ka Siidhi ‑sɛ waa‑ Sidhisi ‑sɛ ‑nu 'gü bha ka ꞊tua bho 'gbɛ.
24 'Ya‑ ma ꞊dhɛ mɛ 'bha ‑nu ꞊wa 'go yi "piʋ̈ yö ꞊wa zuëkaankwëëdhe waa‑ ‑zʋgɔndhe 'gbɛ ‑da ka 'gü ‑a ‑nu zë ‑dhiang ‑nu 'ka, "kɛɛ 'yii ‑wʋ 'kpɔ‑ ‑nu ‑bha kö ‑wa kë "dhʋ̈ (‑wa ‑bho wo ‑dɩ 'gü).
25 'Wɔn 'ö‑ ‑wɔn 'gü 'yö ꞊dhɛ 'ö 'ya ‑ya ‑dhɛ do 'gü 'ö 'ya ‑dhɛ ‑ga 'wɔn bha‑ 'gü, 'ö yi ‑wʋ ꞊ya kë‑ 'gü do 'yö 'yi mɛ ‑da Baanabasö waa‑ Pɔdhö ‑a ‑nu ꞊keng‑ 'yi‑ ‑nu bɔ sië ka ‑dhɛ bha 'yö bha, ‑a ‑gɛn ‑mü ꞊dhɛ mɛ ꞊plɛ bha‑ ‑nu ‑wɔn ‑yö yi ‑gɔ "gbɩɩ‑.
26 ‑A pö 'yi‑ wo "dhʋ̈ bha‑ 'klɔɔ‑ ‑mü ꞊dhɛ mɛ ꞊plɛ bha ꞊në 'wo woo‑ ‑tosɛa "dhiʋ̈ dɔ kwa Dëmɛ Yesu Klisi 'tɔ ‑wɔn 'gü.
27 ꞊Dhɛ 'ö "dhʋ̈ yi Zudë waa‑ Sidhasö ‑a ‑nu ‑bɔ ka ‑dhɛ kö 'wɔn ‑nu 'yi‑ ‑nu ‑bɛn zë sië 'sëëdhɛ 'gü ya ꞊në ‑wa 'gü pö ka ‑dhɛ 'kpakpadhö ‑së 'ka wo ‑dɩ "dhi.
28 ‑A ‑gɛn ‑mü ꞊dhɛ ‑yö ‑kë yaa‑ Atanna ‑bha 'Nii‑ "slʋ̈ʋ̈slʋ̈ ‑nu yi 'gü ‑së kö 'ya 'dho ꞊kwɛɛ‑ 'gbiin‑ "wɛɛ 'bha ‑ya ka ‑ta 'zü kö 'yii kë 'wɔn ‑nu 'ö 'tɔng‑ ‑ya pö 'ka ka kwaa‑ ‑zü ‑a 'ka.
29 Yö ‑mü ꞊dhɛ kö ‑tuʋ̈pë ‑nu 'wo "saa‑ bho‑ 'ka ‑dhɔkëpë ‑nu "dhiʋ̈ bha 'ka 'dho‑ ‑bhö. ꞊Ya 'go mü 'zü 'ka 'dho pë ꞊yɔɔn ‑bhö. 'Ka 'dho wü 'ö 'wii‑ ꞊yɔɔn ꞊wɛnng ‑a ‑bhö 'pö, ‑a ‑gɛn ‑mü ꞊dhɛ kö‑ "tɩng ꞊ya 'to‑ 'gü, ꞊ya 'go mü 'zü kö 'ka ka ‑dɩ 'kun ‑zua zë ‑sü ‑gɔ. 'Ya ka ꞊tua bho 'gbɛ»
30 ꞊Dhɛ 'ö ꞊ya kë "dhʋ̈, 'yö 'wo wo ꞊kwaa 'mɛ 'wo bha‑ ‑nu ‑zü 'yö 'wo dho Angtiɔsö. ꞊Dhɛ 'ö ꞊wa 'dho ꞊wa ꞊loo mü 'yö 'wo 'dhang ‑bho Yesu "dhiʋ̈ ‑mɛ ‑nu "pɛpɛ ꞊gban ‑dhɛ ‑dhɛ do 'gü, 'yö 'wo 'sëëdhɛ bha‑ nu‑ ‑nu ‑dhɛ.
31 ꞊Dhɛ 'ö ꞊wa bo‑ ‑wʋ pö ‑sü 'ka, 'yö‑ ‑nu zuë" ꞊nii 'dhö ‑da ꞊dedewo ‑a ‑nu faan dɔ ‑wʋ 'wo‑ bɔ‑ ‑nu ‑dhɛ bha‑ ‑wɔn 'gü.
32 Zudë waa‑ Sidhasö 'wo ‑kë Atanna ‑wʋdhiʋ̈loomɛ 'ka 'pö bha ‑wo dhiang ‑zë pinngdhö wo dheebhang ‑nu 'wo mü bha‑ ‑nu ‑dhɛ, 'ö 'wo‑ ‑nu faan dɔ ‑a ‑nu ‑bha ‑zʋ ‑yö Yesu ‑dhɛ ‑sü bha‑ ‑bha.
33 ꞊Dhɛ 'ö ꞊wa "tʋ̈ng 'bha kë 'mü, 'yö 'mɛ 'wo nu "dhʋ̈ bha‑ mɛ 'bha ‑nu 'wo wo ‑wʋ ‑da wo dheebhang ‑nu 'wo mü bha‑ ‑nu ‑dhɛ kö 'wo wo yee kë 'wo 'dho wo ꞊taama. 'Yö 'wo wo ‑wʋ kpɔ‑ ‑nu ‑bha 'yö 'wo dho.
34 "Kɛɛ 'yö Sidhasö ‑zë 'yii "wɩ 'dho ‑wɔn ‑bha, 'yö to mü.
35 'Yö Pɔdhö waa‑ Baanabasö ‑nu 'wo to mü waa‑ mɛ "wɛɛ 'gbɛ 'dhö, 'yö 'wo mɛ ꞊draan‑ Atanna ‑wʋ ‑bha, kö ‑wo 'wɔn ‑taɔng ‑së 'ö ‑kë kwa Dëmɛ ‑wʋ 'ka bha‑ pö sië mɛ ‑nu ‑dhɛ.
Pɔdhö waa‑ Banabasö ‑a ‑nu ‑kan "kwëë ‑kɔ
36 ꞊Dhɛ 'ö "tʋ̈ng 'bha ꞊ya ziö, 'yö Pɔdhö ‑ya pö Banabasö ‑dhɛ: «‑Kwa kwa yee kë 'kwa bɔ 'pö‑ ‑nu 'gü, kwa dheebhang ‑nu 'kwa kwa Dëmɛ ‑wʋ pö‑ ‑nu ‑dhɛ bha‑ ‑nu "piʋ̈ kö 'wo 'dho sië "dhiʋ̈ ‑a ‑nu ‑bha ‑zʋ ‑yö Yesu ‑dhɛ ‑sü 'gü kö 'kwa‑ 'wɔn dɔ!»
37 ‑Yö ‑gun Banabasö "piʋ̈ ꞊dhɛ Zan 'wo‑ 'tɔ kpɔ Makö bha ‑yö 'dho wo ꞊keng‑,
38 "kɛɛ 'yö Pɔdhö ‑zë 'yii "wɩ‑ ‑bha; ‑a ‑gɛn ‑mü ꞊dhɛ 'ö gun "dhʋ̈ kö ꞊ya "kan‑ ‑nu ‑bha 'nu Panfidhi ‑sɛ 'gü.
39 'Yö ‑kë zaɔdhe 'kpii‑ 'ka Pɔdhö waa‑ Banabasö ‑a ‑nu ꞊zinng 'gü 'yö 'wo ‑kan 'kwëë‑. 'Yö Banabasö ‑yö Makö sü ö ꞊keng‑ 'yö 'wo ‑da "yitagɔ 'gü 'wo dho "sɛgɔ 'ö ‑ya ‑sü 'ka "yi ꞊zinng 'gü 'wo‑ Siplë ‑dhɛ ‑kë bha‑ 'gü.
40 'Yö Pɔdhö ‑yö Sidhasö sü ö ꞊keng‑ 'pö. 'Yö 'dhang ‑bho Yesu ‑wɔn "dhiʋ̈ ‑mɛ ‑nu 'wo Angtiɔsö ‑pö 'gü 'wo Pɔdhö waa‑ Sidhasö ‑nu ‑wɔn ꞊loo kwa Dëmɛ ꞊kwɛɛ‑ kö ‑yö ö ‑zʋ kë‑ ‑nu "piʋ̈ 'yö 'wo dho.
41 'Yö 'wo bɔ Siidhi ‑dhɛ waa‑ Sidhisi ‑dhɛ ‑nu 'gü 'dhang ‑bho Yesu "dhiʋ̈ ‑mɛ ‑nu 'wo mü ‑a ‑nu faan dɔ ‑sü 'ka ‑zʋ ‑yö Yesu ‑dhɛ ‑sü ‑bha.